សង្គម​ស៊ីវិល​បន្ត​រំលឹក​ខួប​៨​ឆ្នាំ​នៃ​ឃាតកម្ម​សម្លាប់​លោក​ កែម ឡី ​តាម​រូបភាព​ផ្សេង​ៗ​គ្នា

កម្ពុជា
09/07/2024 – 12:23
ដោយ៖ ញឹម សុផល
RFI

ក្រុម​អង្គការ​សង្គមស៊ីវិល​នានា​បាន​នាំគ្នា​រៀបចំ​កម្មវិធី​ផ្សេង​ៗ​ដើម្បី​រំលឹក​ខួប​០៨​ឆ្នាំ​នៃ​ឃាតកម្ម​សម្លាប់បណ្ឌិត​ កែម ឡី ​អ្នក​វិភាគ​នយោបាយ ​និង​សង្គម​ដ៏​ល្បីល្បាញ​មួយរូប​នៅក្នុង​ប្រទេស​កម្ពុជា​ដែល​ត្រូវបាន​ខ្មាន់​កាំភ្លើង​បាញ់​សម្លាប់​កាលពី​ថ្ងៃទី​១០ ខែ​កក្កដា ​ឆ្នាំ​២០១៦​។​ មជ្ឈមណ្ឌល​សិទ្ធិមនុស្ស​កម្ពុជា​បានប្រារព្ធ​ពិធីនេះ​ចាប់តាំង​ពីថ្ងៃ​ទី​០១ ខែ​កក្កដា ឆ្នាំ​២០២៤ ​មកម៉្លេះ​។

សង្គម​ស៊ីវិល​បន្ត​រំលឹក​ខួប​៨​ឆ្នាំ​នៃ​ឃាតកម្ម​សម្លាប់​លោក​ កែម ឡី ​តាម​រូបភាព​ផ្សេង​ៗ​គ្នា


ចាប់តាំងពី​ថ្ងៃទី០១ ខែកក្កដា ឆ្នាំ​២០២៤ មក ក្រុមអង្គការសង្គម​ស៊ីវិលដែលដឹកនាំដោយ​មជ្ឈមណ្ឌលសិទ្ធិមនុស្ស​កម្ពុជាបានបង្កើតកម្មវិធីមួយ ​ដែលមានចំនួន ៧ចំណុច​ទាក់ទងទៅនឹង​សកម្មភាពនៃការ​ប្រារព្ធខួប០៨ឆ្នាំ​ នៃឃាតកម្មលើ​លោក កែម ឡី អ្នកវិភាគ​នយោបាយ និងសង្គមដ៏ល្បីល្បាញ​មួយរូប​។ កម្មវិធីរបស់​មជ្ឈមណ្ឌលសិទ្ធិមនុស្សកម្ពុជា​ទាំងនោះរួមមាន ​ការប្តូរគម្របទំព័រ​ហ្វេសប៊ុករបស់ខ្លួន​ដោយដាក់តាំងជំនួសវិញនូវ​រូបថតរបស់លោក​ កែម ឡី ជាទំរង់ស-ខ្មៅ ​ចាប់ពីថ្ងៃទី០១ ដល់ថ្ងៃទី​៣១ ខែកក្កដា​ ឆ្នាំ២០២៤​។

មួយវិញទៀត ​និងដូចជាឆ្នាំកន្លងទៅដែរ ​មជ្ឈមណ្ឌលសិទ្ធិមនុស្សកម្ពុជា​បានបើកឲ្យសារធារណជន​សរសេរសារបង្ហាញនូវក្តី​នឹករលឹក បង្ហោះសម្រង់​សម្តីសំខាន់ៗរបស់លោក​បណ្ឌិត កែម ឡី ទាំងសំណេរ និង​សម្លេងនៅលើហ្វេសប៊ុក​ រួមទាំងបង្ហោះវីដេអូ​នៃការចងចាំរយៈពេល ​០៨ឆ្នាំផងដែរ។ ទន្ទឹមគ្នា​នេះ​ អង្គការសិទ្ធិមនុស្សលីកាដូ​ អង្គការអាដហុក​ និងសង្គមស៊ីវិលផ្សេងទៀត​ក៏មានវិធីរំលឹកខួប​លោកបណ្ឌិត ​កែម ឡី រៀងៗខ្លួន​ផងដែរ ក្នុងនោះ​អង្គការលីកាដូបាន​បង្ហាញជារូបថត ​និង​សារសំខាន់ៗរបស់​លោក​បណ្ឌិត កែម ឡី ​នៅមុខទីស្នាក់ការ​របស់ខ្លួន​។

ចំណែកអង្គការ​សិទ្ធិមនុស្សអាដហុក​បានប្រកាសរំសាយចោល​ការប្រកួតបាល់ទាត់​ស្តីពី «​បាល់ទាត់បង្ហាញពីការរួបរួម ​និង​ស្មារតី កែម ឡី»​ ដោយសារតែម្ចាស់​តារាងបាល់ទាត់​មិនហ៊ានជួលតារាងឲ្យ​។ល។ សូមរំលឹកថា​ លោក កែម ឡី ត្រូវបានខ្មាន់កាំភ្លើង​បាញ់សម្លាប់ឲ្យដេកស្លាប់ក្នុង​ថ្លុកឈាមភ្លាមៗកាលពី​ថ្ងៃទី១០ ខែកក្កដា​ ឆ្នាំ២០១៦ នៅក្នុងហាង​លក់ទំនិញនៃស្ថានីយ៍​ប្រេងឥន្ធនៈបូកគោ​។

សាររបស់សង្គមស៊ីវិលដែលបង្ហោះលើហ្វេសប៊ុក
សាររបស់សង្គមស៊ីវិលដែលបង្ហោះលើហ្វេសប៊ុក © FB

ក្រោយហេតុការណ៍នោះ ​អាជ្ញាធរបាន​ប្រកាសពីការចាប់​បានឃាតករម្នាក់​ឈ្មោះ អឿត អាង ហៅ ​ជួប សម្លាប់។ ​ឃាតកររូបនេះ​ត្រូវបានតុលាការផន្ទាទោស​ឲ្យជាប់គុកអស់ ​១ជីវិតកាលពីឆ្នាំ​២០១៩។ ក៏ប៉ុន្តែ​ ក្រុមអង្គការ​សង្គមស៊ីវិលហាក់ពិបាក​នឹងទទួលយក ​និង​នៅតែមាន​សំណួរជាច្រើន​ជុំវិញបញ្ហាយុត្តិធម៌​សម្រាប់លោកបណ្ឌិត​ កែម ឡី​៕

What Next?

Recent Articles

Leave a Reply

Submit Comment