អាជ្ញាធរ​ខេត្ត​កំពង់ចាម បញ្ជា​សមាគម​ការពារ​សិទ្ធិ​មនុស្ស​អាដហុក ឱ្យ​រុះរើ​ស្លាក​ទាមទារ​ឲ្យ​ដោះ​លែង​លោក កើត សារ៉ាយ

ដោយ ទីន ហ្សាការីយ៉ា
2024.07.08
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

អាជ្ញាធរ​ខេត្ត​កំពង់ចាម បញ្ជា​សមាគម​ការពារ​សិទ្ធិ​មនុស្ស​អាដហុក ឱ្យ​រុះរើ​ស្លាក​ទាមទារ​ឲ្យ​ដោះ​លែង​លោក កើត សារ៉ាយ

លោក ចាន់ រស្មី (រូប​ទី៣ ខាង​ឆ្វេង) ស្នងការរង ខេត្តកំពង់ចាម បានមកស្នាក់ការអាដហុកខេត្ត​នេះ ស្នើសុំអាដហុក​ឱ្យ​ដោះស្លាកកើតសារ៉ាយចេញ នៅ​ថ្ងៃ​ទី៨ ខែកក្កដា ឆ្នាំ២០២៤។ Provided photo


អាជ្ញាធរ​ខេត្តកំពង់ចាម បញ្ជា​មន្ត្រី នៃ​សមាគម​ការពារ​សិទ្ធិ​មនុស្ស​អាហុក (ADHOC) ឱ្យ​រុះរើ​ស្លាក​ទាមទារ​ឲ្យ​ដោះ​លែង​លោក កើត សារ៉ាយ នៅ​ខាង​មុខ​ទីស្នាក់ការ​សមាគម​ប្រចាំ​ខេត្តកំពង់ចាម។

ស្នងការ​រង នៃ​ស្នងការដ្ឋាន​នគរបាល​ខេត្តកំពង់ចាម លោក ចាន់ រស្មី នៅ​ថ្ងៃ​ទី៨ ខែកក្កដា បាន​ដឹកនាំ​កម្លាំង​នគរបាល​ជាច្រើន​នាក់ បញ្ជា​មន្ត្រី នៃ​សមាគម​ការពារ​សិទ្ធិ​មនុស្ស​អាហុក ប្រចាំ​នៅ​ទីស្នាក់ការ​ខេត្ត​កំពង់ចាម ឱ្យ​ដោះ​បដា ដែល​ទាមទារ​ឲ្យ​ដោះលែង​ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ គឺ​លោក កើត សារ៉ាយ ចេញ​ពី​មុខ​ទីស្នាក់ការ​ប្រចាំ​ខេត្ត​នេះ។ អាជ្ញាធរ​ថែម​ទាំង​បង្គាប់​បុគ្គលិក នៃ​សមាគម​ការពារ​សិទ្ធិ​មនុស្ស​ទាំង​អស់ ឱ្យ​សរសេរ​ប្រវត្តិរូប​ផ្ទាល់​ខ្លួន ភ្ជាប់​ជាមួយ​រូបថត និង​ផ្ញើ​ទៅ​កាន់​ស្នងការដ្ឋាន​នគរបាល​ខេត្ត​កំពង់ចាម នៅ​រសៀល​ថ្ងៃ​ដដែល​នេះ។

អាជ្ញាធរ​ខេត្តកំពង់ចាម ប្រាប់​មន្ត្រី នៃ​សមាគម​អាដហុក​ថា ការ​បង្គាប់​ឲ្យ​រុះរើ​បដា​នេះ គឺ​ធ្វើ​តាម​បញ្ជា​របស់​ស្នងការ​នគរបាល​ខេត្ត​កំពង់ចាម លោក ហេង វុទ្ធី ប៉ុន្តែ​អាជ្ញាធរ​មិន​បាន​បញ្ជាក់​ថា ការ​ដាក់​បដា​នេះ ខុស​ច្បាប់​ត្រង់​មាត្រា​ណា​ឡើយ។

ជុំវិញ​រឿង​នេះ អនុ​ប្រធាន​ផ្នែក​សិទ្ធិមនុស្ស ដីធ្លី និង​ធនធានធម្មជាតិ នៃ​សមាគម​អាដហុក លោក យិន ម៉េងលី នៅ​ថ្ងៃ​ទី៨ ខែកក្កដា​ដដែល ចាត់​ទុក​ទង្វើ​របស់​អាជ្ញាធរ​ខេត្ត​កំពង់ចាម​ថា ជា​រឿង​មួយ​ដ៏​អាម៉ាស់ និង​កំពុង​តែ​រឹតត្បិត​សិទ្ធិ​សេរីភាព​បញ្ចេញ​មតិ ។

លោក យិន ម៉េងលី៖ «កាល​ណា​យើង​មក​ប្រាប់​គេ​មិន​ឲ្យ​ធ្វើ​អ្វី​មួយ អ៊ីចឹង យើង​ត្រូវ​សំអាង​ទៅ​លើ​ច្បាប់​ថា តើ​ទង្វើ​នៃ​ការ​ធ្វើ​ហ្នឹង វា​ខុស​ច្បាប់​អីតើ​ការ​បិត​បដា ការ​ដាក់​រូបភាព​ហ្នឹង វា​ជា​បទ​ល្មើស​អ្វី​ដែរហើយ​កាល​ណា​សមត្ថកិច្ច​គាត់​យក​បទ​បញ្ជា​យក​មក​និយាយ​ជា​គោល គាត់​លែង​យក​ច្បាប់​មក​និយាយ។ ពេល​ហ្នឹង អ្វីៗ ចប់​ហើយ ព្រោះ​សមត្ថកិច្ច​ជា​អ្នក​អនុវត្ត​ច្បាប់ តែ​ដល់​ខ្លួន​ឯង​មក​ធ្វើ មក​ហាម​ឃាត់ មក​ថា គេ​ខុស​ច្បាប់ ដោយ​ខ្លួន​ឯង​មិន​បង្ហាញ​ពី​ច្បាប់ ដល់​ពេល​គេ​សួរ​ថា ខុស​ច្បាប់​អី យើង​បែរជា​មក​បង្ហាញ​អំពី​បញ្ជា​របស់​លោក​ស្នងការ​ទៅ​វិញ។ នេះ​ជា​ភាព​អាម៉ាស់​មួយ​របស់​មន្ត្រី​អនុវត្ត​ច្បាប់»

វិទ្យុ​អាស៊ីសេរី នៅ​មិន​ទាន់​អាច​ទាក់ទង​ស្នងការ នៃ​ស្នងការដ្ឋាន​នគរបាល​ខេត្ត​កំពង់ចាម លោក ហេង វុទ្ធី ដើម្បី​សុំ​ការ​បកស្រាយ​ជុំវិញ​បញ្ហា​នេះ បាន​នៅ​ឡើយ​ទេ នៅ​ថ្ងៃ​ទី៨ ខែ​កក្កដា។

ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ លោក កើត សារ៉ាយ ត្រូវ​បាន​សមត្ថកិច្ច​ចាប់​ខ្លួន កាល​ពី​ថ្ងៃ​ទី៥ ខែមេសា នៅ​ទីស្នាក់ការ​សមាគម​សម្ព័ន្ធ​និស្សិត​បញ្ញវន្ត​ខ្មែរ ស្ថិត​នៅ​ក្នុង​សង្កាត់​ក្រាំងធ្នង់ រាជធានី​ភ្នំពេញ ក្រោយ​ពី​លោក​បាន​ចុះ​ទៅ​ស្វែងយល់​ពី​ទុក្ខ​លំបាក​របស់​ប្រជាពលរដ្ឋ នៅ​ឃុំ​ស្រយង់ ដែល​កំពុង​លាក់​ខ្លួន គេច​ពី​ការ​តាម​ចាប់​របស់​សមត្ថកិច្ច​ខេត្ត​ព្រះវិហារ កាល​ពី​ថ្ងៃ​ទី២១ ខែមីនា និង​ផ្ដល់​បទ​សម្ភាសន៍​ទៅ​ឱ្យ​ប្រព័ន្ធ​ផ្សព្វផ្សាយ។

កន្លង​ទៅ​អង្គការ​សង្គម​ស៊ីវិល សមាគម និង​សហជីព​ជិត ១០ស្ថាប័ន បាន​ធ្វើ​យុទ្ធនាការ​លើ​បណ្ដាញ​សង្គម ដោយ​អ្នក​ចូលរួម​យុទ្ធនាការ​នេះ បាន​ឈរ​ដោះ​ស្បែក​ជើង និង​កាន់​រូបថត​របស់​​​លោក កើត សារ៉ាយ ដើម្បី​ទាមទារ​អាជ្ញាធរ​ឱ្យ​ដោះលែង​ប្រធាន​សមាគម​រូប​នេះ ឱ្យ​មាន​សេរីភាព​ដោយ​ឥត​លក្ខខណ្ឌ។

អនុ​ប្រធាន​ផ្នែក​សិទ្ធិមនុស្ស នៃ​សមាគម​ការពារ​សិទ្ធិ​មនុស្ស​អាហុក លោក យិន ម៉េងលី អំពាវនាវ​ដល់​អាជ្ញាធរ ឲ្យ​អនុវត្ត​តួនាទី​ជា​អ្នក​អនុវត្ត​ច្បាប់​ឲ្យ​បាន​ត្រឹមត្រូវ ជៀសវាង​ការ​រិះគន់​នានា ពី​សាធារណៈ​ជន​ថា ខកខាន​ក្នុង​ការ​អនុវត្ត​តួនាទី​របស់​ខ្លួន​ស្រប​ទៅ​តាម​ច្បាប់ និង​ធ្វើ​ឲ្យ​ប្រទេស​ជាតិ គ្មាន​នីតិរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment