ដោយ ហ៊ុំ ចំរើន
2024.07.30
RFA
ស្ដាប់ ឬទាញយកសំឡេង
(ពីឆ្វេងទៅស្ដាំ) លោកស្រី ទឹម អ៊ុក លោកស្រី ស៊ា ដាវី និងលោកស្រី គង់ តឿ ជាពលរដ្ឋមានវិវាទដីធ្លីនៅតំបន់បឹងតាមោក ក្នុងចំណោមពលរដ្ឋចំនួន ១០នាក់ ដែលតុលាការចេញដីកាកោះហៅឱ្យទៅឆ្លើយបំភ្លឺជាបន្តបន្ទាប់។ លោកស្រី គង់ តឿ (ស្ដាំ) បានចូលឆ្លើយបំភ្លឺ កាលពីថ្ងៃទី២៤ ខែកក្កដា ឆ្នាំ២០២៤។ រូប៖ ពីពលរដ្ឋ
សាលាដំបូងរាជធានីភ្នំពេញ បន្តសាកសួរពលរដ្ឋមានវិវាទដីធ្លីនៅតំបន់បឹងតាមោកម្នាក់ទៀត ក្នុងចំណោមពលរដ្ឋចំនួន ១០នាក់ ដែលតុលាការបានចេញដីកាកោះហៅ កាលពីថ្ងៃទី៩ ខែកក្កដា តាមពាក្យបណ្ដឹងរបស់ដើមបណ្ដឹងឈ្មោះ រុន តាក់។
តំណាងពលរដ្ឋនៅតំបន់បឹងតាមោក លោកស្រី ស៊ា ដាវី ប្រាប់វិទ្យុអាស៊ីសេរីថា នៅព្រឹកថ្ងៃទី២៩ ខែកក្កដា លោក អ៊ុត អាត បានចូលខ្លួនបំភ្លឺតាមការកោះហៅរបស់តុលាការ។
ចំណែកឯនៅមុខសាលាដំបូងរាជធានីភ្នំពេញ មានតំណាងពលរដ្ឋនៅតំបន់បឹងតាមោកចំនួន ២នាក់ គឺលោកស្រី និងលោកស្រី គង់ តឿ បានទៅលើកទឹកចិត្តលោក អ៊ុត អាត។
នេះជាការសាកសួរលើកទី៣ ហើយ ក្នុងសំណុំរឿងដដែលនេះ បន្ទាប់ពីចៅក្រមស៊ើបសួរសាលាដំបូងរាជធានីភ្នំពេញ លោក ឆែ វិវឌ្ឍនៈ បានសាកសួរពលរដ្ឋរស់នៅតំបន់បឹងតាមោកចំនួន ២នាក់ គឺលោកស្រី គង់ តឿ និងលោស្រី អំ ភឿន កាលពីថ្ងៃទី២៤ និង២៥ ខែកក្កដាកន្លងទៅ។ ចំណែកឯពលរដ្ឋបឹងតាមោកដទៃទៀត ដែលរងបទចោទដូចគ្នានេះ នឹងបន្តចូលខ្លួនទៅបំភ្លឺក្នុងសវនាការតាមដីកាបង្គាប់ឲ្យចូលខ្លួនរបស់តុលាការ។
វិទ្យុអាស៊ីសេរីនៅមិនទាន់អាចទាក់ទងពលរដ្ឋរស់នៅតំបន់បឹងតាមោក លោក អ៊ុត អាត ដើម្បីសួរពីបញ្ហានេះបាននៅឡើយទេ នៅថ្ងៃទី២៩ ខែកក្កដា។ ចំណែកឯអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ក៏វិទ្យុអាស៊ីសេរី មិនអាចទាក់ទងបានដែរ នៅថ្ងៃដដែលនេះ។
ទាក់ទងនឹងការសាកសួរនេះ លោកស្រី ស៊ា ដាវី ឲ្យដឹងថា លោក អ៊ុត អាត គ្មានមេធាវីចូលអមឡើយ ហើយពលរដ្ឋរូបនេះ ក៏ បានដោះដូរដីជាមួយអាជ្ញាធររួចហើយដែរ។
កាលពីថ្ងៃទី២៧ ខែកុម្ភៈ អាជ្ញាធរខណ្ឌព្រែកព្នៅ បានប្រើគ្រឿងចក្រ ចំនួន ២គ្រឿង ចុះកាយដីខាងក្រោយផ្ទះពលរដ្ឋនៅតំបន់បឹងតាមោក ក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ដោយអាជ្ញាធរអះអាងថា ដើម្បីសាងសង់ប្រឡាយ ដែលមានទទឹង ៤០ម៉ែត្រ ដើម្បីរំដោះទឹកជំនន់។ ប៉ុន្តែ ការដាក់គ្រឿងចក្រកាយប្រឡាយនោះ អាជ្ញាធរពុំបានជូនដំណឹងដល់ពលរដ្ឋ ដែលកំពុងអាស្រ័យផលលើផ្ទៃបឹងឡើយ ថែមទាំងបានប្រើប្រាស់អំពើហិង្សាលើស្ត្រី និងកុមារ បណ្ដាលឲ្យមានស្ត្រីម្នាក់ដួលសន្លប់ នៅពេលគាត់ព្យាយាមរារាំងមិនឲ្យអាជ្ញាធរកាយដី ដែលពលរដ្ឋកំពុងចិញ្ចឹមត្រី និងដាំបន្លែផ្សេងៗ។ ប៉ុន្តែ អាជ្ញាធរបែរជាតាំងខ្លួនជាជនរងគ្រោះ ហើយប្ដឹងពលរដ្ឋទៅវិញ។ មកទល់ពេលនេះ តំណាងពលរដ្ឋចំនួន ១០នាក់ បានជាប់បណ្ដឹងក្នុងតុលាការជាច្រើនករណី ដោយសារការតស៊ូទាមទារដំណោះស្រាយដីធ្លី ហើយតំណាងសហគមន៍ម្នាក់ គឺអ្នកស្រី ប្រាក់ សុភា បានភៀសខ្លួនទៅប្រទេសថៃ ដើម្បីគេចពីការចាប់ខ្លួន។ ក្រៅពីនេះ ពលរដ្ឋទាំងនោះ ក៏រងការបង្ក្រាបដោយហិង្សាមិនឲ្យតវ៉ា ការគំរាមកំហែង ការបំផ្លិចបំផ្លាញមុខរបរ និងការបូមខ្សាច់ពន្លិចផ្ទះពួកគាត់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។