ដោយ ច័ន្ទ ដារ៉ូ
2024.07.31
RFA
ស្ដាប់ ឬទាញយកសំឡេង
(ឆ្វេង) លោក វឿង សំណាង ជាអតីតចៅសង្កាត់រងទី២ នៅរាជធានីភ្នំពេញ និងលោក ខាន់ ប៊ុនផេង ជាអតីតចៅសង្កាត់ព្រែកព្រះស្ដេច ក្រុងបាត់ដំបង ខាងគណបក្សសង្គ្រោះជាតិ ដែលកំពុងជាប់ពន្ធនាគារ។ រូប៖ ហ្វេសប៊ុក
សាលាឧទ្ធរណ៍ភ្នំពេញសម្រេចតម្កល់សាលក្រមរបស់សាលាដំបូងរាជធានីភ្នំពេញ ដោយផ្ដន្ទាទោសសកម្មជនបក្សសង្គ្រោះជាតិ លោក វឿង សំណាង និងលោក ខាន់ ប៊ុនផេង ឱ្យជាប់ពន្ធនាគារ ៥ឆ្នាំទុកជាបានការ នៅថ្ងៃទី៣០ ខែកក្កដា។ ជុំវិញរឿងនេះគ្រួសារ និងមន្រ្តីសិទ្ធិមនុស្សយល់ថា ការសម្រេចនេះជារឿងអយុត្តិធម៌ ហើយទាមទារឱ្យដោះលែងសកម្មជនទាំងនេះឱ្យមានសេរីភាពឡើងវិញ។
ក្រុមប្រឹក្សាជំនុំជម្រះនៃសាលាឧទ្ធរណ៍ភ្នំពេញ នៅថ្ងៃអង្គារ ទី៣០ ខែកក្កដា បានបើកសវនាការជំនុំជម្រះលើបណ្ដឹងសារទុក្ខរបស់សកម្មជនគណបក្សសង្គ្រោះជាតិពីរ គឺលោក វឿង សំណាង និងលោក ខាន់ ប៊ុនផេង ពីបទ «រួមគំនិតក្បត់» ពាក់ព័ន្ធជាមួយផែនការវិលចូលស្រុករបស់អតីតអនុប្រធានគណបក្សសង្គ្រោះជាតិ អ្នកស្រី មូរ សុខហួរ បច្ចុប្បន្នជាប្រធានចលនាខ្មែរ ដើម្បីប្រជាធិបតេយ្យ កាលពីដើមខែមករា ឆ្នាំ២០២១ កន្លងទៅ។ សំណុំរឿងសកម្មជនបក្សជំទាស់នេះបានអូសបន្លាយជិត ២ឆ្នាំ (១ឆ្នាំ ៧ខែ) ទើបសាលាឧទ្ធរណ៍លើកយកមកបើកសវនាជំនុំជម្រះ និងប្រកាសសាលដីកាជាសាធារណៈ។
សវនាការរយៈពេលមួយព្រឹក ដោយប្រព្រឹត្តទៅចំពោះមុខជនជាប់ឃុំ គឺភាគច្រើនតុលាការសួរដេញដោលទៅលើអង្គហេតុពាក់ព័ន្ធការបង្ហោះសារ នៅលើបណ្ដាញសង្គមហ្វេសប៊ុក។ លោក វឿង សំណាង អះអាងនៅមុខអង្គជំនុំជម្រះថា គណនីហ្វេសប៊ុកឈ្មោះថា វឿង សំណាង សង្គ្រោះជាតិ ដែលតុលាការយកមកចោទប្រកាន់នោះ មិនមែនជាគណនីហ្វេសប៊ុកផ្ទាល់ខ្លួនរបស់លោកនោះទេ។ ចំណែកលោក ខាន់ ប៊ុនផេង ក្នុងឯកសណ្ឋានអ្នកជាប់ឃុំ រាងកាយស្គមស្គាំងវិញ បានប្រាប់តុលាការថា លោកមិនជាប់ព័ន្ធការនិយាយឆ្លើយឆ្លងអ្វីជាមួយបុរសឈ្មោះ សុខ ឡេង នោះទេ ខណៈបុរស ដែលនិយាយតែម្នាក់ឯង ប្រៀបដូចជាមនុស្សវិកលចរិតនោះ ត្រូវបានតុលាការដោះលែងឱ្យនៅក្រៅឃុំរួចហើយ។
ទោះបីជាមេធាវី និងជនជាប់ចោទព្យាយាមលើកអំពីផ្លូវច្បាប់ និងបញ្ជាក់ពីភាពស្អាតស្អំយ៉ាងណាក្តី ក៏ប្រធានក្រុមប្រឹក្សាជំនុំជម្រះសាលាឧទ្ធរណ៍ភ្នំពេញលោក ងួន រតនា ប្រកាសតម្កល់សាលក្រមផ្ដន្ទាទោសឱ្យលោក វឿង សំណាង និងលោក ខាន់ ប៊ុនផេង ជាប់ពន្ធនាគារម្នាក់ៗ៥ឆ្នាំដដែល។
មេធាវីការពារក្តីឱ្យសកម្មជនបក្សសង្គ្រោះជាតិ លោក អែម ចន្ថា ប្រាប់វិទ្យុអាស៊ីសេរី ក្រោយចេញពីបន្ទប់សវនាការថាលោកសោកស្ដាយជាខ្លាំងចំពោះការតម្កល់សាលក្រមផ្ដន្ទាទោស ដោយតុលាការមិនបានពិចារណាលើហេតុផល របស់មេធាវី និងផ្លូវច្បាប់។
លោក អែម ចន្ថា៖ «ខ្ញុំមានការសោកស្ដាយ និងខកចិត្ត ដែលតុលាការពុំបានពិចារណាជុំវិញទឡ្ហីករណ៍ពីការលើកឡើងរបស់មេធាវី ហើយការអះអាង ប្រកាន់ភ្ជាប់របស់កូនក្តី យើងលើកពីអង្គច្បាប់មួយចំនួនទៅបង្ហាញតាមមាត្រាច្បាប់ទាំងនេះ គឺផលប្រយោជន៍បានទៅជនជាប់ចោទបាទ សុទ្ធតែមានវិមតិសង្ស័យ មិនបទល្មើសកើតឡើង មិនមានព្យសនកម្មកើតឡើងទេ»។
កូនប្រុសលោក ខាន់ ប៊ុនផេង គឺលោក ខាន់ សុវណ្ណារ៉ា ប្រាប់វិទ្យុអាស៊ីសេរីថា ឪពុករបស់លោកជាប់ពន្ធនាគារជាង៣ឆ្នាំដោយមិនបានប្រព្រឹត្តកំហុស តែតុលាការកាត់ក្តីឱ្យឪពុករបស់លោកបន្តជាប់គុកទាំងអយុត្តិធម៌ ក្រោមឥទ្ធិពលនយោបាយ និងធ្វើឱ្យឈឺចាប់សម្រាប់ឪពុកលោកដែលជាសកម្មជនបក្សប្រឆាំងស្មោះត្រង់នឹងជាតិ។ លោកនៅតែទទូចដល់តុលាការដោះលែងឪពុកឱ្យមកទាន់ដង្ហើមម្ដាយបង្កើតជាលើកចុងក្រោយ។
លោក ខាន់ សុវណ្ណារ៉ា៖ «ខ្ញុំស្នើសុំតុលាការ និងរដ្ឋាភិបាលគួរតែគិតឡើងវិញ ចំពោះការកាត់ទោសគាត់អ៊ីចឹង។ ខ្ញុំស្នើសុំឱ្យមានការកាត់ទោសឱ្យបានត្រឹមត្រូវ និងយុត្តិធម៌ឱ្យស្របតាមច្បាប់ទៅ កុំឱ្យចេះតែកាត់ទោស ចាប់ដាក់ដាក់ ចាប់ដាក់គុក អាងអីចាប់ចង អាងអីចាប់ចង គេមិនមានកំហុស។អ៊ីចឹងទេ ខ្ញុំស្នើសុំដោះលែងឪពុកខ្ញុំបាននៅក្រៅឃុំ ដើម្បីជួបម្ដាយរបស់គាត់ជាលើកចុងក្រោយ បើតាមសភាពម្ដាយគាត់នៅមិនបានយូរទេ »។
លោក ខាន់ ប៊ុនផេង ជាអតីតចៅសង្កាត់ព្រែកព្រះស្ដេច ក្រុងបាត់ដំបង ត្រូវបានអាជ្ញាធរចាប់ខ្លួន កាលពីថ្ងៃទី៣១ ខែធ្នូ ឆ្នាំ២០២០។ រីឯលោក វឿង សំណាង ជាអតីតចៅសង្កាត់រងទី២ នៅរាជធានីភ្នំពេញ ត្រូវបានសមត្ថកិច្ចកម្ពុជាចាប់បញ្ជូនពីប្រទេសថៃកាលពីថ្ងៃទី៩ តុលា ឆ្នាំ២០២១។ តុលាការក្រុងភ្នំពេញបានផ្ដន្ទាទោសពួកគាត់ពីបទ«រួមគំនិតក្បត់» កាលពីខែធ្នូ ឆ្នាំ២០២២ ពាក់ព័ន្ធនឹងគម្រោងវិលចូលស្រុករបស់អនុប្រធានគណបក្សសង្គ្រោះអ្នកស្រី មូរ សុខហួរ។ ប៉ុន្តែ អតីតមន្ត្រីបក្សសង្គ្រោះជាតិខេត្តស្វាយរៀង គឺលោក គង់ ម៉ាស់ ដែលស្ថិតនៅក្នុងសំណុំរឿង និងបទចោទដូចគ្នានេះ ត្រូវបានតុលាការដោះលែងកាលពីខែឧសភា ឆ្នាំ២០២៣ ក្រោយធ្វើវីដេអូសុំទោសលោក ហ៊ុន សែន និងប្រកាសចុះចូលជាមួយបក្សកាន់អំណាច។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង ដើម្បីសាកសួរជុំវិញរឿងនេះបានទេនៅថ្ងៃទី៣០ ខែកក្កដា។
មកទល់ពេលនេះ ការចាប់ខ្លួនសកម្មជនបរិស្ថាន និងមន្ត្រីគណបក្សប្រឆាំងបានកើនឡើងដល់ចំនួនជាង ៥០នាក់ ដោយចំនួននេះមិនទាន់រាប់អ្នកដែលតុលាការដោះលែងរាប់សិបនាក់ទៀត ក្រោយប្រកាសចុះចូលជាមួយគណបក្សប្រជាជនកម្ពុជា ជាថ្នូរនឹងការដោះលែងឱ្យមានសេរីភាពទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។