ដោយ វិទ្យុអាស៊ីសេរី
2024.08.12
RFA
ក្នុងរយៈពេលមិនដល់ជាង២ឆ្នាំមកនេះ ក្នុងតំបន់អាស៊ី យ៉ាងហោចណាស់មានមេដឹកនាំ២នាក់ហើយ ដែលគ្រប់គ្រងប្រទេសតាមបែបផ្តាច់ការ កណ្ដាប់ដៃដែក គ្រួសារបក្ខពួកនិយមតពូជ និងពុករលួយ ត្រូវបានប្រជាជនខ្លួនឯងទម្លាក់ចេញពីអំណាចជាបន្តបន្ទាប់។ ពួកគេ ត្រូវបង្ខំចិត្តវេចបង្វេចរត់ចោលស្រុកស្ទើរមិនទាន់។ នោះគឺអតីតប្រធានាធិបតីនៃប្រទេសស្រីលង្កា (Sri Lanka) លោក ហ្គោតាបាយ៉ា រ៉ាចាប៉ាក់សា (Gotabaya Rajapaksa) នៅខែកក្កដា ឆ្នាំ២០២២ និងអតីតនាយករដ្ឋមន្ត្រីនៃប្រទេសបង់ក្លាដេស្ហ (Bangladesh) គឺអ្នកស្រី សេក្ខ ហាស៊ីណា (Sheikh Hasina) នៅខែសីហា ឆ្នាំ២០២៤។ការវិវត្តន៍នៃព្រឹត្តិការណ៍ចុងក្រោយនៅប្រទេសបង់ក្លាដេស្ហនេះ បានធ្វើឱ្យលោកនាយករដ្ឋមន្ត្រី ហ៊ុន ម៉ាណែត ព្រមានប្រើវិធីផ្ដាច់ការបង្ក្រាបពលរដ្ឋខ្មែរទាំងឡាយណា ដែលហ៊ានធ្វើបាតុកម្មទម្លាក់រដ្ឋាភិបាលរបស់លោកដោយយកគំរូតាមប្រទេសបង់ក្លាដេស្ហ។ លោក ហ៊ុន ម៉ាណែត ប្រមាថការតស៊ូរបស់ប្រជាពលរដ្ឋបង់ក្លាដេស្ហ ថាជាការដុតប្រទេសឱ្យធ្លាក់ចូលក្នុងវិបត្តិ ខណៈលោកមិនបានលើកឡើងពីវិបត្តិពុករលួយ បក្ខពួកនិយមចាក់ស្រេះបង្កឡើងដោយក្រុមមេដឹកនាំនៃប្រទេសនេះឡើយ ដែលបានបណ្ដាលឱ្យពលរដ្ឋរងទុក្ខវេទនា និងរស់នៅក្នុងភាពក្រីក្រតោកយ៉ាក។ ទន្ទឹមគ្នានេះ ឪពុករបស់លោក គឺលោក ហ៊ុន សែន ក៏បានរំលោភអំណាចនាយករដ្ឋមន្ត្រីជាកូន ចេញមុខព្រមានបង្ក្រាប និងកម្ចាត់ក្រុមអ្នកហ៊ានងើបតវ៉ានៅកម្ពុជា ដែលលោកចោទថាជាក្រុមប្រឆាំងជ្រុលនិយម «ទោះក្នុងតម្លៃណាក៏ដោយ»។ ទោះយ៉ាងណា លោក ហ៊ុន ម៉ាណែត អះអាងថា គ្រួសាររបស់លោក «គ្មានផែនការវេចបង្វេចនាំកូននាំចៅទៅក្រៅប្រទេសទេ»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។