ដោយ ប្រាជ្ញ ចេវ
2024.08.13
RFA
ស្ដាប់ ឬទាញយកសំឡេង
ទូកចម្លងដឹកសិស្ស អនុវិទ្យាល័យចំនួន១៥នាក់ បានលិចអំឡុងពេលឆ្លងស្ទឹងសែន ស្ថិតនៅភូមិគ្រួសស ឃុំឈូក ស្រុកប្រាសាទសំបូរ ខេត្តកំពង់ធំ នៅថ្ងៃទី០៨ ខែមិថុនា ឆ្នាំ២០២៤។ រូប៖ ហ្វេសប៊ុក
អ្នកឃ្លាំមើលថា អាជ្ញាធរថ្នាក់មូលដ្ឋានគួរតែទទួលខុសត្រូវចំពោះករណីលិចទូកបណ្ដាលឲ្យកុមារីម្នាក់ស្លាប់នៅខេត្តកំពង់ធំ កាលពីខែមិថុនាកន្លងទៅ។ ការលើកឡើងនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត និងភរិយា ផ្ដល់សាឡាងមួយគ្រឿង សម្រាប់ដឹកពលរដ្ឋ និងសិស្សសាលានៅតំបន់លិចទូកចម្លងខាងលើ តែមិនឃើញមានចំណាត់ការលើអាជ្ញាធរ ដែលមិនយកចិត្តទុកដាក់ពីសុវត្ថិភាពរបស់ពលរដ្ឋ។
អ្នកឃ្លាំមើលសិទ្ធិមនុស្ស និងសង្គម លោក ស៊ឹង សែនករុណា ប្រាប់វិទ្យុអាស៊ីសេរី នៅថ្ងៃទី១២ ខែសីហាថា ក្រសួងមហាផ្ទៃ គួរតែចុះពិនិត្យការអនុវត្តភារកិច្ចរបស់អាជ្ញាធរថ្នាក់មូលដ្ឋាន ចំពោះករណីលិចទូកចម្លងបណ្ដាលឲ្យយុវតីម្នាក់ស្លាប់កាលពីខែមិថុនាកន្លងទៅ ។ លោកបន្ថែមថា ប្រសិនបើអាជ្ញាធរមូលដ្ឋានធ្វេសប្រហែសក្នុងការអនុវត្តតួនាទីរបស់ខ្លួន គួរតែទទួលខុសត្រូវតាមច្បាប់។
លោក ស៊ឹង សែនករុណា៖ «មន្ត្រីដែលទទួលខុសត្រូវតួនាទីទាំងអស់ហ្នឹងពុំគួរទទួលទានតែប្រាក់ខែ ហើយខ្វះការយកចិត្តទុកដាក់អនុវត្តតួនាទីបែបហ្នឹងទេ ហាក់ដួចជា មើលស្រាលអាយុជីវិតរបស់ប្រជាពលរដ្ឋ។ អីចឹងគួរតែធ្វើការពិនិត្យជាមុនពីបញ្ហាប្រព័ន្ធសុវត្ថិភាព សណ្ដាប់ធ្នាប់អ្វីផ្សេងៗហ្នឹង ដើម្បីធ្វើឲ្យប្រជាពលរដ្ឋមានការជឿជាក់ មានការពេញចិត្តក្នុងការដឹកនាំ ការពារ បង្ការសុវត្ថិភាពនៅមូលដ្ឋាន»។
ការលើកឡើងនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន ម៉ាណែត និងភរិយា បានផ្ដល់សាឡាងមួយគ្រឿង ដល់ប្រជាពលរដ្ឋរស់នៅតំបន់ ដែលមានទូកចម្លងលិចបណ្ដាលឲ្យមានមនុស្សស្លាប់នៅក្នុងភូមិសាស្ត្រស្រុកប្រាសាទសំបូរ ខេត្តកំពង់ធំ កាលពីថ្ងៃទី១០ ខែសីហា។ក្នុងភូមិសាស្ត្រស្រុកប្រាសាទសំបូរ ខេត្តកំពង់ធំ មានប្រជាពលរដ្ឋជាង១ម៉ឺន ២ពាន់នាក់ (១២. ៣៧៩) មកពីភូមិចំនួន១៦ ត្រូវធ្វើដំណើរឆ្លងកាត់ដងស្ទឹងសែន ក្នុងនោះមានពលរដ្ឋចន្លោះពី១៥០ ទៅ២០០នាក់ ឆ្លងកាត់ស្ទឹងនេះជារៀងរាល់ថ្ងៃ ។ នេះបើតាមអភិបាលស្រុកប្រាសាទសំបូរ លោក ឃឺម សុខឃាង ថ្លែងក្នុងពិធីប្រគល់សាឡាងជូនពលរដ្ឋ កាលពីថ្ងៃទី ១០ ខែសីហា។
ទូកចម្លងមួយគ្រឿង បានដឹកសិស្សានុសិស្សចំនួន១៥នាក់ ឆ្លងដងស្ទឹងសែន ពីត្រើយម្ខាងទៅត្រើយម្ខាងទៀត ហើយបានលិចចូលទៅក្នុងទឹក នៅឃុំស្រើង ស្រុកប្រាសាទសំបូរ ខេត្តកំពង់ធំ បណ្ដាលឲ្យកុមារីម្នាក់បានបាត់បង់ជីវិត កាលពីថ្ងៃទី៨ មិថុនា។
អាជ្ញាធរមូលដ្ឋាន និងគ្រូបង្រៀននៅអនុវិទ្យាល័យឈូកឲ្យដឹងថា ហេតុការណ៍លិចទូកដឹកសិស្សសាលានេះ គឺបណ្ដាលមកពីអ្នកបើកបរទូកក្នុងល្បឿនលឿន និងបានដឹកសិស្សានុសិស្សចំនួនច្រើន ខណៈសិស្សានុសិស្សទាំងនោះពុំមានអាវពោងសង្គ្រោះជីវិតឡើយ។ ក្រោយពីហេតុការណ៍នេះ កើតឡើងអាជ្ញាធរបានឃាត់ខ្លួនម្ចាស់ទូកចម្លងម្នាក់ ប៉ុន្តែគ្មានអាជ្ញាធរណាចេញមុខទទួលខុសត្រូវចំពោះការធ្វេសប្រហែសរបស់ខ្លួននោះទេ ហើយចំណែកពីខាងរដ្ឋាភិបាលក៏គ្មានចំណាត់ការទៅលើអាជ្ញាធរនៅក្នុងខេត្តនេះដែរ។
វិទ្យុអាស៊ីសេរី នៅមិនទាន់អាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា និងអ្នកនាំពាក្យរងក្រសួងមហាផ្ទៃ លោក ទូច សុខៈ ដើម្បីឆ្លើយតបជុំវិញបញ្ហានេះ បាននៅឡើយទេ នៅថ្ងៃទី១២ ខែសីហា។
ករណីលិចទូកបណ្តាលឲ្យមានមនុស្សបាត់បង់ជីវិតបែបនេះ បានកើតឡើងជាច្រើនលើកច្រើនសាមកហើយ ប៉ុន្តែរដ្ឋាភិបាល ហាក់មិនបានចាត់វិធានការទប់ស្កាត់រឿងនេះ ឲ្យមានប្រសិទ្ធភាពនៅឡើយទេ ដោយបណ្តោយឲ្យទូកចម្លង ដែលគ្មានប្រព័ន្ធសុវត្ថិភាពនៅបន្តដំណើរការដដែល។
ជាក់ស្ដែងដូចករណី ទូកដខ្នាតតូចសម្រាប់ចម្លងប្រជាពលរដ្ឋពីភូមិកំពង់ពោធិ និងភូមិអំពិលទឹក ទៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល បានលិច និងបណ្តាលឱ្យសិស្ស១១នាក់បានស្លាប់ កាលពីយប់ថ្ងៃទី១៣ តុលា ឆ្នាំ២០២២។
អ្នកឃ្លាំមើលលើកឡើងថា ក្រសួងមហាផ្ទៃ គួរតែចុះត្រួតពិនិត្យការអនុវត្តភារកិច្ចរបស់អាជ្ញាធរមូលដ្ឋាន ហើយប្រសិនបើរកឃើញថា ពួកគេធ្វេសប្រហែសក្នុងភារកិច្ចបណ្ដាលឲ្យមានមនុស្សស្លាប់ គួរតែមានវិធានការណ៍តាមបទវិន័យនគរបាលជាតិ ដើម្បីទប់ស្កាត់មិនឲ្យមានហេតុការណ៍នេះ កើតឡើងបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។