ដោយ សុជីវី
2024.08.21
RFA
ស្ដាប់ ឬទាញយកសំឡេង
យុវជននៃសមាគមសម្ព័ន្ធនិស្សិតបញ្ញវន្តខ្មែរ និងអង្គការកម្មវិធីអភិវឌ្ឍន៍ធនធានយុវជន ហៅកាត់ថា YRDP ទាំង ៦នាក់ ដែលអាជ្ញាធររដ្ឋាភិបាលលោក ហ៊ុន ម៉ាណែត ចាប់ឃុំឃាំង នៅថ្ងៃទី១៨ ខែសីហា ឆ្នាំ២០២៤ ដោយចោទប្រកាន់អំពីបទរួមគំនិតក្បត់។ រូប៖ ហ្វេសប៊ុក
មន្ត្រីសង្គមស៊ីវិលឱ្យដឹងថា យុវជននៃសមាគមសម្ព័ន្ធនិស្សិតបញ្ញវន្តខ្មែរចំនួន ៥នាក់ ត្រូវបានតុលាការចោទប្រកាន់ពីបទរួមគំនិតក្បត់ និងញុះញង់ ហើយបញ្ជូនទៅឃុំខ្លួននៅពន្ធនាគារ ខណៈយុវជនម្នាក់ទៀត ជាបុគ្គលិកនៃអង្គការកម្មវិធីអភិវឌ្ឍន៍ធនធានយុវជនហៅកាត់ថា YRDP អ្នកស្រី សាក់ កន្និការ នៅតែបន្តបាត់ដំណឹង។ អ្នកឃ្លាំមើលសិទ្ធិមនុស្សចាត់ទុកការចាប់ខ្លួនយុវជន ៦នាក់នេះ គឺជារឿងអយុត្តិធម៌ និងរំលោភសិទ្ធិមនុស្សធ្ងន់ធ្ងរ។
អគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ឱ្យដឹងថា សមត្ថកិច្ចបានបញ្ជូនយុវជនសមាគមនិស្សិតបញ្ញវន្តខ្មែរ២នាក់ទៅឃុំនៅពន្ធនាគារព្រៃស ដោយកញ្ញា រៀម ស្រីពេជ្ររតនា ឃុំនៅពន្ធនាគារ ម២ និងលោក ធី ថន ឃុំនៅពន្ធនាគារ ម១។ ចំណែកឯយុវជនចំនួន ៤នាក់ទៀត លោក នុត សវនា អះអាង ថាលោកមិនទាន់ដឹងអាជ្ញាធរបញ្ជូនពួកគាត់យកឃុំនៅពន្ធនាគារណានៅឡើយទេ។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ ដើម្បីសាកសួរបន្ថែមជុំវិញបញ្ហានេះបានទេ នៅថ្ងៃទី២១ ខែសីហា។
មន្ត្រីអង្គការសង្គមស៊ីវិលមួយចំនួនបញ្ជាក់ថា យុវជនសមាគមសម្ពន្ធនិស្សិតបញ្ញវន្តខ្មែរ ៤នាក់រួមមាន កញ្ញា រៀម ស្រី ពេជ្ររតនា លោក ធី ថន កញ្ញា កាត់ ស៊ីណាត និងកញ្ញា នឿន ស្រីណែត តុលាការចោទប្រកាន់ពីបទ «រួមគំនិតក្បត់»។ រីឯសមាគមសម្ពន្ធនិស្សិតបញ្ញវន្តខ្មែរម្នាក់ទៀតគឺ កញ្ញា សើន ស្រីម៉ៃ ជាប់ពីបទ «ញុះញង់»។ អ្នកទាំង៥ ត្រូវបានបញ្ជូនទៅឃុំនៅពន្ធនាគារផ្សេងៗគ្នា។
រីឯបុគ្គលិកនៃអង្គការកម្មវិធីអភិវឌ្ឍន៍ធនធានយុវជនអ្នកស្រី សាក់ កន្និការ ត្រូវបានសមត្ថកិច្ចចាប់ខ្លួនកាលពីយប់ថ្ងៃទី១៨ ខែសីហា ដែលប្រភពមួយចំនួនបញ្ជាក់ថា រហូតមកទល់ពេលនេះក្រុមគ្រួសារ មិត្តភ័ក្ដិនៅមិនទាន់ទទួលដំណឹងពីអ្នកស្រីនៅឡើយ។ ពួកគាត់នាំគ្នាបង្ហោះសារនៅបណ្ដាញសង្គមព្រាតព្រោងថា រយៈពេល ៤ថ្ងៃមកហើយដែលក្រុមគ្រួសារសាច់ញាតិបាត់ដំណឹងអ្នកស្រី សាក់ កន្និការ មិនដឹងថា អ្នកស្រី មានបាយហូប ឬមានសំលៀកបំពាក់ផ្លាស់ឬនៅទេ។
ការចាប់ខ្លួនក្រុមយុវជនទាំងនេះ គឺក្រោយពេលពួកគាត់ បង្ហោះសារនៅលើបណ្ដាញសង្គមអំពីរឿងអយុត្តិធម៌សង្គម និងបង្ហាញពីការឈឺចាប់ដែលយុវជនសង្គមផ្សេងទៀតដែលជាមិត្តភ័ក្ដិរបស់ពួកគាត់ត្រូវបានចាប់ខ្លួនទាំងអយុត្តិធម៌។ ពួកគាត់ មិនបង្ហាញអំពីគម្រោងចូលរួមធ្វើបាតុកម្មដើម្បីផ្ដួលរំលំរដ្ឋាភិបាលពាក់ព័ន្ធនឹងរឿង CLV នោះឡើយ។
គូដណ្ដឹងរបស់កញ្ញា រៀម ស្រីពេជ្ររតនា គឺលោក ហ៊ន លីហ្សា ថ្លែងថា លោកសោកស្ដាយ និងតក់ស្លុតនៅពេលទទួលដំណឹងថា គូដណ្ដឹងរបស់លោកត្រូវបានសមត្ថកិច្ចយកទៅនៅពន្ធនាគារព្រៃសទាំងគ្មានកំហុស។
លោក ហ៊ន លីហ្សា៖ «គាត់មិនបានទៅធ្វើអ្វីខុសផង គឺបែរជាគេចោទគាត់ពីបទរួមគំនិតក្បត់។ ចង់ឱ្យទាក់ទងនឹងតុលាការឱ្យគិតឡើងវិញ ព្រោះការដាក់ទោសគាត់ច្រើនណាស់រហូតដល់ទៅ១០ឆ្នាំ វាមិនសាកសមទេ។ អាចជួយដោះលែងគាត់មកវិញមក ព្រោះអីមើលទៅវាមិនជាមានទោសអីធ្ងន់ធ្ងរនោះទេ»។
ជុំវិញបញ្ហានេះ អនុប្រធានផ្នែកសិទ្ធិមនុស្សដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី ដែលតាមដំណើររឿងនេះឱ្យដឹងថា យុវជនសមាគមសម្ពន្ធនិស្សិតបញ្ញវន្តខ្មែរចំនួន ៥នាក់ ត្រូវតុលាការចោទប្រកាន់ពីបទរួមគំនិតក្បត់ និងញុះញង់។ លោកបន្តថា ការចោទប្រកាន់យុវជនពីបទល្មើសធ្ងន់ៗ បែបនេះគឺបង្ហាញថា សិទ្ធិសេរីភាពរបស់ក្រុមយុវជនរងការរឹតត្បិតធ្ងន់ធ្ងរ។
លោក យិន ម៉េងលី៖«ដោយសារតែយើងមើលឃើញបទល្មើសហ្នឹង វាពាក់ព័ន្ធនឹងសេរីភាពបញ្ចេញមតិ ហើយសេរីភាពហ្នឹងក៏វាមានសារសំខាន់ដែរ អ៊ីចឹង រដ្ឋាភិបាលគប្បីតែពិចារណាពីបញ្ហាលម្ហសេរីភាពហ្នឹង។ ប៉ុន្តែ បញ្ហាទាំងអស់នេះ យើងឃើញថា វាមានទំនាក់ទំនងទៅនឹងបញ្ហានយោបាយ។ កាលណាបញ្ហានយោបាយមិនមានស្ថិរភាព បញ្ហានយោបាយមិនមានភាពប្រសើរទេ ទាំងអស់ហ្នឹងយើងឃើញថាលំបាកណាស់ក្នុងការធ្វើឱ្យប្រសើរដល់សេរីភាពទាំងអស់ហ្នឹង។ អ៊ីចឹង សំខាន់ដំបូងគឺថា ធ្វើយ៉ាងម៉េចក្នុងការផ្សះផ្សាផ្នែកនយោបាយឱ្យមានភាពប្រសើរឡើង»។
ក្រុមគ្រួសារសាច់ញាតិ និងយុវជន ព្រមទាំងមន្ត្រីសង្គមស៊ីវិល នៅតែទាមទារឱ្យអាជ្ញាធររដ្ឋាភិបាល ដោះលែងក្រុមយុវជនសង្គមទាំងអស់ឱ្យមានសេរីភាពឡើងវិញ ពីព្រោះសកម្មភាពរបស់ក្រុមយុវជនទាំងនោះពុំបានប្រព្រឹត្តកំហុសអ្វីដូចការចោទប្រកាន់នោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។