កម្ពុជា
03/09/2024 – 11:30
ដោយ៖ អ៊ឹង ប៊ុនថន
RFI

គណ​បក្ស​កម្លាំង​ជាតិ​បាន​ចេញ​សេចក្តី​ថ្លែង​ការណ៍​មួយ​នៅថ្ងៃទី​០៣ ខែ កញ្ញានេះ​ដោយចាត់​ទុក​ការ​ចាប់​ខ្លួនលោក ​ជិន ប៊ុនណ្ណារ័ត្ន អគ្គនាយក​រដ្ឋបាល​របស់​គណ​បក្ស​ជំទាស់​នេះ​ថា​ជា​ការ​គំរាម​កំហែង​ផ្នែក​នយោបាយ និងជា​ការ​បន្ត​ធ្វើ​ទុក្ខ​បុកម្នេញលើ​គណ​បក្ស​កម្លាំង​ជាតិ​។​ ទន្ទឹម​គ្នា​នេះ ​គណ​បក្ស​ប្រឆាំង​ដដែល​នេះ​បាន​ហៅការ​បន្តចាប់​ខ្លួន​សមាជិក​របស់​ខ្លួន​ថា​ធ្វើឲ្យ​ប៉ះពាល់​យ៉ាង​ធ្ងន់​ធ្ងរ​ដល់​ដំណើរ​ការ​ប្រជា​ធិបតេយ្យ​នៅ​កម្ពុជា​។​

គណបក្សកម្លាំងជាតិថា ការចាប់ខ្លួនលោក ជិន ប៊ុនណ្ណារ័ត្ន ជាការធ្វើទុក្ខបុកម្នេញផ្នែកនយោបាយ

សាច់ញាត្តិ​របស់​ លោក ​ជិន ប៊ុណ្ណារ័ត្ន ​បាន​ប្រាប់​ប្រព័ន្ធ​ផ្សព្វ​ផ្សាយ​មួយ​ចំនួន​ថា ​ជន​ស្លៀកពាក់​ស៊ីវិល​មួយ​ក្រុម​ជាអ្នក​ចាប់​ខ្លួន​សមាជិក​ជាន់​ខ្ពស់​របស់​គណ​បក្ស​កម្លាំង​ជាតិ​ដោយ​មិន​បាន​បង្ហាញ​ដី​កាពី​តុលា​ការ​ទេ។

 ចំណែក​គណបក្ស​កម្លាំង​ជាតិ​បាន​បញ្ជាក់ថា ការចាប់​ខ្លួន​ លោក ​ជិន ប៊ុណ្ណារ័ត្ន ​ដែល​ជា​ប្រធាន​ក្រុម​ការ​ងារ​គណបក្ស​កម្លាំង​ជាតិ​ខេត្ត​កំពត​ផង​នោះបាន​កើត​ឡើង​នៅ​ម៉ោង​ជិត​១២​ថ្ងៃ​ត្រង់​ក្នុង​ថ្ងៃ​ទី​២ ​ខែ​កញ្ញា ឆ្នាំ​២០២៤ នៅក្នុង​ខណ្ឌមានជ័យ រាជធានីភ្នំពេញ។ ក្នុងន័យនេះ គណបក្ស​កម្លាំង​ជាតិ​បាន​ទទូច​ឲ្យ​ដោះ​លែង​ ​លោក ​ជិន ប៊ុណ្ណារ័ត្ន ​ដោយ​ឥត​លក្ខខណ្ឌ​ដើម្បី​បើក​លំហសេរី​ភាព​នយោបាយ​របស់​គណ​បក្សកម្លាំង​ជាតិ​ក្នុង​ការ​ចូល​រួម​ចំណែក​ដំណើរ​ការ​ប្រជា​ធិប​តេយ្យ​នៅកម្ពុជា​។ ​

បើតាម​មន្ត្រី​បក្ស​ប្រឆាំង មាន​អ្នក​នយោបាយ​នៅ​ក្រៅ​រដ្ឋាភិបាល​យ៉ាង​ហោច​ណាស់​ជាង ៤០​នាក់​ត្រូវ​បាន​ចាប់​ខ្លួនជា​បន្ត​បន្ទាប់​តាំង​ពី​លោក​នាយករដ្ឋ​មន្ត្រីហ៊ុន ម៉ាណែត ​ឡើង​កាន់​អំណាច​។​ ដោយ​ឡែក​ ​សម្រាប់​តែ​គណ​បក្សកម្លាំង​ជាតិ​មួយ គឺ​មាន​ក្បាល​ម៉ាស៊ីន​ របស់​គណ​បក្ស​នេះជាច្រើន​នាក់​ត្រូវ​បាន​ចាប់​ខ្លួន​ រួម​មាន​ ​លោក​ ស៊ុន ចន្ធី ប្រធាន​គណ​បក្ស ​លោក អ៊ុំ​ វីរៈរដ្ឋ អគ្គ​ហិរញ្ញិក​គណ​បក្ស លោក ជិន ប៊ុនណ្ណារ័ត្ន អគ្គនាយករដ្ឋបាល​ជាដើម​។

ចំណែក ​លោក មឺ សេងហ៊ ហៅ គា វិសាល ​ដែល​ជា​អនុប្រធាន​គណបក្ស​កម្លាំង​ជាតិ​ខេត្ត ​កំពង់ចាម​ទើប​ត្រូវ​បាន​តុលាការ​កាត់​ទោស​ឱ្យជាប់​ពន្ធនាគារ​រយៈ​ពេល ២​ឆ្នាំ​ពី​បទ «ញុះញង់ឱ្យមានការរើសអើង» និង«ជេរប្រមាថជាសាធារណៈ»​៕​