ដោយ វិទ្យុអាស៊ីសេរី
2024.11.07
RFA
រូបត្លុកនយោបាយ៖ នយោបាយដើរ «ទាក់ម៉ូយ» អ្នកវិនិយោគបរទេស រូប៖ RFA
ភ្លាមៗក្រោយឡើងកាន់តំណែងតាមរយៈការផ្ទេរអំណាចតពូជពីឪ លោក ហ៊ុន ម៉ាណែត ថ្លែងអួតអាងប្រាប់ពលរដ្ឋខ្មែរទូទៅពីនយោបាយដើរ «ទាក់ម៉ូយ» អ្នកវិនិយោគបរទេសឱ្យមករកស៊ីបណ្ដាក់ទុននៅកម្ពុជា។ ទន្ទឹមនឹងនោះ ក្រុមអ្នកហែហមលោក ក៏មិនភ្លេចចាំកត់ត្រាវាស់ដី និងចំនួនគីឡូម៉ែត្រដែលលោកបានធ្វើដំណើរ ទុកប្រកាសនូវអ្វីមួយដែលពួកគេហៅថាជា«សមិទ្ធផល»ប្រចាំឆ្នាំរបស់លោក។ រដ្ឋាភិបាលរបស់លោក បានហៅនយោបាយនេះថាជានយោបាយ «ការទូតសេដ្ឋកិច្ចសកម្ម» ដែលជាសកម្មភាពដ៏សំខាន់មួយនៃនយោបាយការបរទេសរបស់កម្ពុជា។
ក៏ប៉ុន្តែ ជាងមួយឆ្នាំក្រោយមក «ម៉ូយ» ដែលរដ្ឋាភិបាលលោកទាក់បាននោះ គឺគ្មានអ្វីក្រៅតែពីធ្វើឱ្យកម្ពុជាជាប់ឈ្មោះជា «មជ្ឈមណ្ឌលប្រព្រឹត្តអំពើឆបោកតាមអនឡាញ» ដ៏ឈានមុខគេក្នុងតំបន់អាស៊ីអាគ្នេយ៍ និងជាប្រទេសដែលសំបូរទៅដោយអំពើឆបោកតាមបែបផន់ហ្ស៊ី (Ponzi Schemes)។ ពលរដ្ឋខ្មែរទាំងអ្នកក្រ និងអ្នកមានជាច្រើនរាប់សិបនាក់ កំពុងធ្លាក់ខ្លួនក្លាយជាជនរងគ្រោះនៃអំពើទាំងនេះ។ នោះគឺដោយសារតែរដ្ឋាភិបាលរបស់លោក ត្រូវហ៊ុំព័ទ្ធស្ទើររំសួតដោយអំពើបក្ខពួកនិយមចាក់ស្រេះ មន្ត្រី ឬនាយទុនទុច្ចរិតនៅកម្ពុជា និងអ្នកវិនិយោគក្លិនមិនស្រួលមកពីប្រទេសចិនកុម្មុយនិស្ត។ ពួកគេមួយចំនួន ត្រូវលោកប្រមែប្រមូលឱ្យមកធ្វើជាទីប្រឹក្សា ឬជំនួយការផ្ទាល់នៅជាប់ក្លៀកនឹងលោក និងឪពុកលោក ខណៈអ្នកខ្លះទៀតធ្លាប់មានរឿងរ៉ាវអាស្រូវជាឧក្រិដ្ឋជនរត់គេចពីសំណាញ់ច្បាប់នៅប្រទេសចិន ជាក្រុមសង្គមងងឹតម៉ាហ្វីយ៉ា ដែលជាប់សង្ស័យពីបទលាងលុយកខ្វក់ ជួញដូរមនុស្ស បើកបនល្បែនអនឡាញខុសច្បាប់ និងប្រតិបត្តិអាជីវកម្មឆបោកតាមអនឡាញ ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។