ដោយ សេក បណ្ឌិត
2025.01.19
RFA
ទិដ្ឋភាពកម្មកររោងចក្រ គ្លូរី នីតវែរ (Glory Knitwear) នៅខេត្តកណ្ដាល ធ្វើបាតុកម្មបិទផ្លូវជាតិលេខ៤ កាលពីថ្ងៃទី ១៨ ខែមករា ឆ្នាំ២០២៥។ រូប៖ បណ្ដាញសង្គម
កម្មកររោងចក្រ គ្លូរី នីតវែរ (Glory Knitwear) នៅខេត្តកណ្ដាល ចំនួនរាប់រយនាក់ នៅព្រឹកថ្ងៃទី ១៨ ខែមករា ធ្វើបាតុកម្មបិទផ្លូវជាតិលេខ៤ ដើម្បីទាមទារឲ្យថៅកែទូទាត់ប្រាក់បំណាច់ឆ្នាំសម្រាប់ឆ្នាំ២០២៤។
កម្មកររោងចក្រ គ្លូរី នីតវែរ (Glory Knitwear) ស្ថិតនៅភូមិកៅ ឃុំបែកចាន ស្រុកអង្គស្នួល ខេត្តកណ្ដាល ចំនួនរាប់រយនាក់បានជួបជុំគ្នាធ្វើបាតុកម្មបិទផ្លូវជាតិលេខ៤ នៅខាងមុខរោងចក្រមួយនេះ ដើម្បីឲ្យថៅកែទូទាត់ប្រាក់បំណាច់ឆ្នាំ។
កម្មករមួយចំនួន ថ្លែងប្រាប់អ្នកសារព័ត៌មាននៅពេលបិទផ្លូវថា គោលបំណងនៅពេលនេះ គឺដើម្បីទាមទារឲ្យថៅកែបើកប្រាក់បំណាច់ឆ្នាំសម្រាប់ឆ្នាំ២០២៤។
«ចង់ឲ្យក្រសួងការងារដឹងឮទាំងអស់គ្នា ព្រោះអីពួកខ្ញុំធ្វើការយប់ៗជ្រៅថែមដល់ម៉ោង៨ ឬម៉ោង១០ ពេលខ្លះ ពេលក្រសួងការងារចុះមកពិនិត្យអី គេឲ្យកូនចៅកុហកគេ ក៏មានដែរ ។ ពេលអីចឹងខ្ញុំស្នើសុំចូលដោះស្រាយរោងចក្រនេះ ឥឡូវនេះ រោងចក្រមានគម្រោងការចង់បិទ ហើយគាត់ថា អីចេះថា អ្នកធ្វើការយូរឆ្នាំ ក៏គេអត់បើកលុយធ្វើការយូរឆ្នាំឲ្យដែរ ខណៈរោងចក្រដទៃទៀតគេបើកលុយឲ្យ ឲ្យតែរោងចក្រនោះឈប់ ឬរោងចក្រគេបិទ តែរោងចក្រនេះ គេបិទហើយ ។ អ្នកខ្លះធ្វើការយូរឆ្នាំហើយ គាត់ថា រោងចក្រនេះ គេអត់បង់ឲ្យទេ ចង់ឲ្យគាត់ដោះស្រាយថា ពេលបិទរោងចក្រហ្នឹងលុយអ្នកធ្វើការយូរៗឆ្នាំ ឲ្យពួកគាត់អីចឹង»។
ការតវ៉ានេះ ធ្វើឡើងបន្ទាប់ពីរោងចក្រ គ្លូរី នីតវែរ ពុំបានគោរពតាមពាក្យសន្យាជាមួយកម្មករ ថានឹងបើកប្រាក់បំណាច់ឆ្នាំ សម្រាប់ឆ្នាំ២០២៤ នៅព្រឹកថ្ងៃទី១៨ មករា។
ភ្លាមៗបន្ទាប់ពីកម្មករបិទផ្លូវ អាជ្ញាធរមូលដ្ឋានបានចុះមកសម្របសម្រួល និងបើកផ្លូវធ្វើដំណើរឡើងវិញ។
ចំណែកប្រធានមន្ទីរការងារ និងបណ្ដុះបណ្ដាលវិជ្ជាជីវៈ លោក ធុល នាង បានដឹកនាំមន្ត្រីផ្សះផ្សាវិវាទការងាររួម ដោះស្រាយករណីកម្មកររោងចក្រគ្លូរី នីតវែរ ដែលបានបិទផ្លូវជាតិលេខ៤ និងបានបញ្ចប់វិវាទនេះ នៅរសៀលថ្ងៃដដែលនេះ ។ នេះ បើតាមការ បង្ហោះសារ នៅលើទំព័រហ្វេសប៊ុក (Facebook) របស់ប្រធានមន្ទីរការងារ និងបណ្ដុះបណ្ដាលវិជ្ជាជីវៈ លោក ធុល នាង នៅរសៀលថ្ងៃទី១៨ ខែមករា។
ទាក់ទងនឹងបញ្ហានេះ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (CCAWDU) លោក អាត់ ធន់ ប្រាប់វិទ្យុអាស៊ីសេរីថា តាមច្បាប់ស្ដីពីការងារ កម្មករមានសិទ្ធិឈប់សម្រាកចំនួន១៨ថ្ងៃ ហើយកម្មករ ដែលអតីតភាព ឬធ្វើការនៅកន្លែងណាមួយលើសពី៣ឆ្នាំ គឺអាចឈប់សម្រាកបន្ថែមចំនួន១ថ្ងៃទៀត។
លោក អាត់ ធន់៖ «និយោជកគាត់អាចនឹងចាត់ចែងខ្លះដែរយ៉ាងហោចណាស់ពាក់កណ្ដាល ប៉ុន្តែយ៉ាងហោចណាស់គេឲ្យយើងឈប់យ៉ាងតិចចំនួន១២ ក្នុងចំណោម១៨ថ្ងៃ ហើយសល់ប៉ុន្មានទៀត គឺគេឲ្យកម្មកររបស់យើងឈប់បន្តទៀត បើយើងឈប់មិនអស់ឆ្នាំហ្នឹង ។ ប៉ុន្តែនៅពេល ដែលកម្មករត្រូវបានដាច់កិច្ចសន្យា ឬបញ្ឈប់ ឬត្រូវជួបបញ្ហាផ្សេងៗ គាត់ត្រូវតែបានលុយវិញ ជំនួសឲ្យថ្ងៃ ដែលមិនបានឈប់ហ្នឹង។ ជាទូទៅនៅតាមរោងចក្រសហគ្រាសបច្ចុប្បន្ននេះ កាលណាគាត់ឈប់នៅសេសសល់ គឺគេគិតទូទាត់ជាលុយតែម្ដង ហើយកម្មករសុខចិត្តទទួលយក អីចឹងហើយបានជាយើងឃើញមាន ការស្នើឲ្យបង់អតីតភាពការងារ ឬបង់បំណាច់ឆ្នាំ ដែលយោងទៅលើកិច្ចសន្យាហ្នឹងឯង»។
កម្មករមួយចំនួនឲ្យដឹងថា បច្ចុប្បន្នរោងចក្រចាក់សំលៀកបំពាក់ គ្លូរី នីតវែរ មានកម្មករកំពុងបម្រើការងារប្រមាណ ៦រយនាក់។
ទាក់ទិននឹងកម្មករបិទផ្លូវមុខរោងចក្របិទផ្លូវទាមទារប្រាក់ និងអត្ថប្រយោជន៍នេះ កម្មកររោងចក្រចំនួន២នៅខេត្តកំពង់ស្ពឺ ប្រមាណ៤រយនាក់ កាលពីរសៀលថ្ងៃទី៦ មករាកន្លងទៅ បានប្រមូលផ្ដុំគ្នា បិទផ្លូវជាតិលេខ៣ នៅចន្លោះគីឡូម៉ែត្រលេខ៥២ និង៥៣ ត្រង់ចំណុចមុខរោងចក្រ លីវតាន ក្នុងខេត្តកំពង់ស្ពឺ ដើម្បីទាមទារតំឡើងប្រាក់ឈ្នួលបន្ថែមចំនួន២៦ដុល្លារ ។ បន្ទាប់ពីនេះ រោងចក្របានឯកភាពតាមសំណើរបស់កម្មករ ហើយកម្មករ ក៏បានបើកឲ្យចរាចរណ៍ដំណើរការឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។