ដោយ ខាន់ លក្ខិណា
2025.01.18
RFA
កូនប្រុសរបស់លោក សុខ ស៊ុនណារ៉េត សោកស្ដាយ ដែលសាលាឧទ្ធរណ៍រាជធានីភ្នំពេញបដិសេធការសុំនៅឃុំក្រៅរបស់ឪពុកលោក។ ការលើកឡើង នេះ បន្ទាប់ពីសភាស៊ើបសួរសាលាឧទ្ធរណ៍ កាលពីថ្ងៃទី១៦ ខែមករា បានច្រានចោលបណ្ដឹងសុំនៅក្រៅឃុំរបស់លោក សុខ ស៊ុនណារ៉េត។
កូនប្រុសរបស់លោក សុខ ស៊ុនណារ៉េត ប្រាប់វិទ្យុអាស៊ីសេរី នៅថ្ងៃទី១៨ ខែមករា ថា គ្រួសារនឹងប្ដឹងសាទុក្ខទៅតុលាការកំពូលទៀត។ លោកថា ឪពុករបស់លោក ឈឺជង្គង់ និងក្អកមិនបាត់រយៈពេល ១ខែមកហើយ។
កាលពីថ្ងៃទី១៦ ខែមករា សភាស៊ើបសួរសាលាឧទ្ធរណ៍រាជធានីភ្នំពេញ លោក យូ ប៊ុនណា បានបើកសវនាការអសាធារណៈលើសំណុំរឿងលោក សុខ ស៊ុនណារ៉េត ចំពោះការសម្រេចមិនឱ្យនៅក្រៅឃុំរបស់សាលាដំបូងខេត្តកំពង់ស្ពឺ លើបទចោទ «រក្សាទុកដោយខុសច្បាប់នូវសារធាតុញៀន» ដែលថា បានប្រព្រឹត្ត កាលពីថ្ងៃទី១៣ ខែវិច្ឆិកា ឆ្នាំ២០២៤។
ក្រោយពីសវនាការសួរដេញដោល ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក យូ ប៊ុនណា បានបដិសេធបណ្ដឹងសុំនៅក្រៅឃុំរបស់លោក សុខ ស៊ុនណា រ៉េត តាមសេចក្ដីសម្រេចរបស់សាលាដំបូងខេត្តកំពង់ស្ពឺ កាលពីខែធ្នូ ឆ្នាំ២០២៤ ដែរ។ ការសម្រេចនេះ ក្រោមហេតុផលថា បង្ការបទល្មើសកុំឱ្យកើតជាថ្មី រក្សាជនត្រូវចោទទុកជូនតុលាការតាមនីតិវិធី និងដើម្បីរារាំងកុំឱ្យមានការគាបសង្កត់លើសាក្សី ជាដើម។
វិទ្យុអាស៊ីសេរីមិនទាន់អាចទាក់ទងអ្នកនាំពាក្យសាលាឧទ្ធរណ៍រាជធានីភ្នំពេញ លោក ឃុន លាងម៉េង បានទេ នៅថ្ងៃទី១៨ ខែមករា។
អនុប្រធានផ្នែកសិទ្ធិមនុស្សដីធ្លី និងធនធានធម្មជាតិ នៃសមាគមការពារសិទ្ធិមនុស្សអាដហុក (Adhoc) លោក យិន ម៉េងលី មានប្រសាសន៍ថា សំណុំរឿងនេះ មានចរិតនយោបាយ ដោយលោកកត់សម្គាល់តាមប្រតិកម្មរបស់សហគមន៍អន្តរជាតិ ដែលបានរិះគន់ប្រព័ន្ធតុលាការកម្ពុជាជាបន្តបន្ទាប់។
លោកប្រាប់វិទ្យុអាស៊ីសេរី នៅថ្ងៃទី១៨ ខែមករាថា លោកសោកស្ដាយ ចំពោះការសម្រេចរបស់តុលាការ ដែលនៅតែបន្តឃុំខ្លួន លោក សុខ ស៊ុនណារ៉េត។
លោក យិន ម៉េងលី បន្តថា តុលាការគួរតែឱ្យលោក សុខ ស៊ុនណារ៉េត នៅក្រៅឃុំ ពីព្រោះយោងតាមគោលការណ៍មនុស្សធម៌ លោក សុខ ស៊ុនណារ៉េត មាន គុណ បំណាត់ ដើម្បីបុព្វហេតុជាតិ ហើយពេលនេះ គាត់ចាស់ជរា ជាជនពិការ និងមានជំងឺ ដែលត្រូវទទួលការព្យាបាលពីគ្រូពេទ្យជាប្រចាំទៅទៀត។ ម្យ៉ាងទៀត យោងតាមលក្ខខណ្ឌនៅក្រៅឃុំ ដែលមានចែងក្នុងច្បាប់វិញ លោក យិន ម៉េងលី ថា ស្ថានភាពរបស់លោក សុខ ស៊ុនណារ៉េត គាត់គ្មានលទ្ធភាពបំពានច្បាប់ឡើយ។
លោក យិន ម៉េងលី៖«គាត់មិនទៅប្រព្រឹត្តបទល្មើសអីផ្សេងទៀត គាត់មិនអាចទៅគំរាមកំហែងសាក្សី គាត់មិនអាចទៅបំផ្លាញភស្តុតាង គាត់មិនអាចរត់គេចទៅណាទេ។ គាត់មានក្រុមគ្រួសារ គាត់មានផ្ទះសម្បែងរស់នៅ គាត់មិនចាកចេញទៅណាទេ ហើយគាត់ជាជនមនុស្សចាស់ជរា ពិការ គាត់អាចទៅគំរាម ទៅបំផ្លាញអ្នកណាបាន? អត់ទេ។ អ៊ីចឹងហើយ ទាំងនេះ ដែលយើងនៅតែធ្វើការសោកស្ដាយបញ្ហានេះ»។
កាលពីថ្ងៃទី១៣ ខែវិច្ឆិកា កងរាជអាវុធហត្ថខេត្តកំពង់ស្ពឺ បានចាប់ខ្លួនលោក សុខ ស៊ុនណារ៉េត អំឡុងពេលមេបញ្ជាការភូមិភាគ៣ បានហៅឱ្យលោកទៅជួប។ តុលាការខេត្តកំពង់ស្ពឺ បានចោទប្រកាន់លោកថា បានរក្សាទុកដោយខុសច្បាប់នូវសារធាតុញៀន និងបញ្ជូនទៅឃុំបណ្ដោះអាសន្ននៅពន្ធនាគារខេត្តនេះ។ ប៉ុន្តែ លោក សុខ ស៊ុណារ៉េត បានបដិសេធការចោទប្រកាន់ ដោយអះអាងថា លោកមិនបានដឹងរឿងទេ តាំងពីដំបូងរហូតដល់ពេលចាប់ខ្លួន និងមិនពាក់ព័ន្ធអង្គហេតុ ចោទប្រកាន់នោះឡើយ។
អ្នកឃ្លាំមើល និងមន្ត្រីបក្សប្រឆាំង ចាត់ទុកការសម្រេចបដិសេធរបស់តុលាការថា ជារឿងអយុត្តិធម៌ និងបង្ហាញកាន់តែច្បាស់ថា សំណុំរឿងនេះ ពាក់ព័ន្ធរឿងនយោបាយ ដោយប្រើលេសចាប់លោក សុខ ស៊ុនណារ៉េត ធ្វើជាចំណាប់ខ្មាំង ក្នុងគោលដៅដាក់សម្ពាធលើលោក ស៊ន តារា ពីព្រោះកន្លងមកលោក ហ៊ុន សែន អូសទាញលោក ស៊ន តារា ឱ្យផ្ដាច់ខ្លួនចេញពីគណបក្សប្រឆាំងមិនបាន។
នៅក្នុងវេទិកាអ្នកស្ដាប់វិទ្យុអាស៊ីសេរីថ្មីៗ នេះ អ្នកអត្ថាធិប្បាយបញ្ហាសង្គម និង នយោបាយ លោក ស៊ន តារា បានប្រកាសរក្សាជំហរថា លោកនៅតែស្មោះស្ម័គ្រ ជាមួយអ្នកប្រជាធិបតេយ្យ គឺមិនលក់ខ្លួន ឬចុះចូលបក្សកាន់អំណាចឡើយ បើទោះជាអាជ្ញាធររដ្ឋាភិបាលត្រកូល ហ៊ុន ចាប់ឪពុករបស់លោកធ្វើជាចំណាប់ខ្មាំងនយោបាយក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។