ដោយ ខាន់ លក្ខិណា
2025.02.01
RFA

លោកស្រី ង៉ែត ឃុន ហៅយាយម៉ាំម៉ី សកម្មជនបឹងកក់ ព្យាយាមជួបមុខកូនស្រី នៅសាលាដំបូងរាជធានីភ្នំពេញ នៅថ្ងៃទី១ ខែកុម្ភៈ ឆ្នាំ២០២៥។ រូបពីពលរដ្ឋ
សកម្មជនដីធ្លីតំបន់បឹងកក់លោកស្រី ង៉ែត ឃុន ហៅយាយម៉ាំម៉ី ដែលមានវ័យ ៨៤ឆ្នាំ ប្ដេជ្ញាចេញតវ៉ា រហូតដល់អាជ្ញាធរដោះលែងកូនស្រីរបស់គាត់ ដោយចាត់ទុកការចាប់ខ្លួនកូនស្រី ថាជារឿងអយុត្តិធម៌។ ការប្ដេជ្ញានេះ ធ្វើឡើងក្នុងពេល អាជ្ញាធរក្រុងភ្នំពេញ បានបញ្ជូនកូនរបស់លោកស្រី គឺលោកស្រី អេង សុខា ទៅសាលាដំបូងរាជធានីភ្នំពេញនៅថ្ងៃទី០១ ខែកុម្ភៈនេះ។ សង្គមស៊ីវិលថា តុលាការគួរតែដោះលែងកូនលោកស្រី ង៉ែត ឃុន ឱ្យមានសេរីភាព ដើម្បីកុំឱ្យគ្រួសារពួកគាត់រងភាពអយុត្តិធម៌ផ្ទួនគ្នា។
សកម្មជនបឹងកក់លោកស្រី ង៉ែត ឃុន ហៅយាយម៉ាំម៉ី ចាត់ទុកការចាប់ខ្លួនកូនស្រី របស់លោកស្រីនៅពេលនេះ គឺ ជាការគំកួនរបស់អាជ្ញាធរមកលើកូនស្រីលោកស្រី ដែលតែងតែចេញមុខតវ៉ាទាមទារយុត្តិធម៌ឱ្យលោកស្រី និងសហគមន៍។
លោកស្រី ង៉ែត ឃុន អះអាងថា នៅរសៀលថ្ងៃទី០១ ខែកុម្ភៈ សមត្ថកិច្ចបញ្ជូន កូនស្រីរបស់គាត់ទៅសាកសួរនៅសាលាដំបូងរាជធានីភ្នំពេញ បន្ទាប់មកក៏បញ្ជូន ទៅឃុំនៅខណ្ឌជ្រោយចង្វាវិញ។ លោកស្រីប្ដេជ្ញាចិត្តចេញមុខទាមទារយុត្តិធម៌ ឱ្យដល់ទីបញ្ចប់ បើសមត្ថកិច្ចមិនព្រមដោះលែងកូនស្រីនោះទេ។
លោកស្រី ង៉ែត ឃុន៖«បើសិនដាក់កូនខ្ញុំនៅពន្ធនាគារ គឺខ្ញុំចេញមកតវ៉ាទៀត ឱ្យតុលាការចង់ចាប់ ចាប់ឱ្យអស់ចុះ កូនខ្ញុំមួយពូជ ចាប់ដាក់ពន្ធនាគារទាំងអស់គ្នា ដោយសារតែភាពអយុត្តិធម៌សម្រាប់ខ្ញុំ ដូចជាគេវាយខ្ញុំបែកក្បាលអ៊ីចឹង ហេតុអីប្រព័ន្ធតុលាការមិនចាប់ជនល្មើសជនល្មើសនៅរាល់ថ្ងៃ ហើយរូបភាព ភស្តុតាងមានទាំងអស់»។
ស្ត្រីអាយុ ៨៤ ឆ្នាំរូបនេះ លើកឡើងថា កូនស្រីរបស់លោកស្រី បានសារភាពថា គាត់ពិតជាបានវាយកញ្ចក់នៅខាងមុខតុលាការមែន។ ប៉ុន្តែ លោកស្រីរៀបរាប់ថា ការវាយកញ្ចក់នោះ គឺព្រោះតែសន្តិសុខក៏បានចូលរួមបង្កហេតុដែរ ដោយកម្លាំង សន្តិសុខ មិនត្រឹមតែរំខានការផ្សាយផ្ទាល់ ឬLive តាមបណ្ដាញសង្គមហ្វេសប៊ុក
របស់កូនស្រីលោកស្រីទេ ប៉ុន្តែថែមទាំងបានប្រើអំពើហិង្សាលើគាត់ផង ជាហេតុ ធ្វើឱ្យកូនរបស់លោកស្រីខឹង និង ឈានដល់ការវាយកញ្ចក់នោះ។
លោកស្រី ង៉ែត ឃុន៖ «បើគេមិនលែង បើមិនអ៊ីចឹង វាឱ្យចាប់ប៉ូលិសតុលាការ ៥ ទៅ ៥ នាក់មកផ្ដន្ទាទោសតាមច្បាប់ឱ្យវា ព្រោះពួកគាត់សុទ្ធតែប្រុសៗ ៤ ទៅ ៥ នាក់មកចាប់វាមកបោចសក់វា។ ម៉ែឯងមើលៗៗ មើលសក់វាបោចចេញមក ហើយដៃខ្ញុំឃើញហើមមែន ហើយកួយដៃដាច់ចេញឈាម ហើយនឹងក្បាល»។
លោកស្រី ង៉ែត ឃុន ថា ការចាប់ខ្លួនកូនរបស់លោកស្រីដាក់ឃុំក្នុងរឿងនេះ គឺជាអំពើអយុត្តិធម៌ នៅពេលសន្តិសុខដែលបានបង្ករឿង បែរជារួចខ្លួនទៅវិញ។ លោកស្រី ទទូចឱ្យសមត្ថកិច្ចដោះលែងកូនស្រី ហើយលោកស្រីសុខចិត្តជួសជុលកញ្ចក់សងតុលាការវិញ។ លោកស្រីថា អាជ្ញាធរឃុំខ្លួនកូនលោកស្រីនៅកន្លែងស្អុយឆ្អេះឆ្អាបស្ទើរតែ ដកដង្ហើមមិនរួច គឺជាការរំលោភសិទ្ធិពលរដ្ឋ។
លោកស្រី ង៉ែត ឃុន៖ «កូនខ្ញុំវាយកញ្ចក់ហ្នឹងបែកពិតប្រាកដមែន ខ្ញុំសូមធ្វើឱ្យស្អាតវិញ សូមដោះលែងកូនខ្ញុំទៅ បើសិនជាតុលាការ ចៅក្រមយុត្តិធម៌ ឯករាជ្យពិតប្រាកដស្រុកខ្មែរ កុំយកទោសពៃកូនខ្ញុំអី។ កូនខ្ញុំសតិអារម្មណ៍អត់មូលទេ វាចង់សរសៃប្រសាទផង អ៊ីចឹងមិនអាចប្រកាន់វាបានទេ»។
អាជ្ញាធរក្រុងភ្នំពេញបានឃាត់ខ្លួនកូនស្រីសកម្មជនបឹងកក់លោកស្រី ង៉ែត ឃុន គឺលោកស្រី អេង សុខា ដោយពុំមានដីកា កាលពីថ្ងៃទី៣១ ខែមករា គឺក្នុងអំឡុង ពេលដែលលោកស្រី អេង សុខា ទៅតវ៉ានិងផ្សាយផ្ទាល់ឬLiveលើបណ្ដាញសង្គមហ្វេសប៊ុករបស់ខ្លួន នៅមុខសាលាដំបូងរាជធានីភ្នំពេញ។ ក្នុងការផ្សាយផ្ទាល់នោះ លោកស្រីបានរិះគន់តុលាការ ដែលកាត់ក្ដីដោយអយុត្តិធម៌ លើសំណុំរឿងម្ដាយ របស់លោកស្រីគឺលោកស្រី ង៉ែត ឃុន ដែលត្រូវក្រុមសន្តិសុខក្រុងភ្នំពេញ បាន វាយដំឱ្យបែកក្បាលហូរឈាម ពេលចេញតវ៉ារកដំណោះស្រាយជម្លោះដីធ្លី កាលពី ជាង១០ឆ្នាំកន្លងមក។
វិទ្យុអាស៊ីសេរី មិនអាចសុំការអត្ថាធិប្បាយ ពីអភិបាលខណ្ឌជ្រោយចង្វារលោក លឹម សុភា និងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅ ថ្ងៃទី០១ ខែកុម្ភៈ។
ជុំវិញករណីនេះ មន្ត្រីសិទ្ធិមនុស្ស នៃសមាគមការពារសិទ្ធិ មនុស្សអាដហុក លោក យិន ម៉េងលី ថា តុលាការ គួរតែសម្រេចដោះលែងលោកស្រី អេង សុខា ឱ្យមាន សេរីភាព ទោះបីជាគាត់មានសកម្មភាព និងប្រើពាក្យសម្ដីលើសលស់បន្តិចក៏ ដោយ។ លោកថា ការផ្សាយផ្ទាល់របស់លោកស្រី អេង សុខា លើបណ្ដាញសង្គមនេះ កើតចេញពីការឈឺចាប់ និងការមិនសប្បាយចិត្ត ដែលគាត់មិនអាចទប់ ចិត្តបាន ពីការមិនមានជំនឿលើប្រព័ន្ធយុត្តិធម៌តែប៉ុណ្ណោះ។ លោកថា ករណីនេះ គួរណាស់តែតុលាការចាត់ទុកជាការសម្ដែងមតិ។
លោក យិន ម៉េងលី៖ «ប្រសិនបើតុលាការបន្តឃុំខ្លួនគាត់ ដោយតែគាត់មានការរំជើបរំជួលចិត្ត ដោយសារតែគាត់រងនូវភាពអយុត្តិធម៌។ អ៊ីចឹង គេនឹងមើលឃើញ គេនឹងធ្វើការរិះគន់បន្ថែមទៀត ទៅលើប្រព័ន្ធតុលាការរបស់យើងហ្នឹង។មួយទៀតនេះ ជាផ្នែកមួយនៃសេរីភាពក្នុងការបញ្ចេញមតិ ក៏ដូចជាការតស៊ូមតិដែរ របស់ពួកគាត់ ទោះបីជាមានការពាក្យពេចន៍ធ្ងន់ធ្ងរខ្លះក៏ដោយ។ អ៊ីចឹងយើងចង់តុលាការពិនិត្យ និងធ្វើការដោះលែងគាត់វិញ ដើម្បីកុំឱ្យមានការរងការរិះគន់ពីបញ្ហាប្រព័ន្ធតុលាការរបស់យើងហ្នឹង»។
លោកស្រី អេង សុខា កូនស្រីរបស់សកម្មជនបឹងកក់ គឺលោកស្រី ង៉ែត ឃុន ហៅយាយម៉ាំមី តែងតែចេញមុខតវ៉ា ទាមទារយុត្តិធម៌សង្គមជាមួយម្ដាយក្នុងរយៈពេលជាង ១០ ឆ្នាំមកនេះ ជាពិសេសក្នុងជម្លោះដីធ្លីនៅតំបន់បឹងកក់ និងករណីចាប់ខ្លួនសកម្មជនសង្គមនានា។
អ្នកឃ្លាំមើលថា ការឃាត់ខ្លួនលោកស្រី អេង សុខា ដែលគ្រាន់តែផ្សាយផ្ទាល់លើ បណ្ដាញសង្គម សម្ដែងមតិអំពីបញ្ហាសង្គម និងទាមទារយុត្តិធម៌ជូនម្ដាយគឺជា ការដាក់ទណ្ឌកម្មបន្ថែមលើភាពឈឺចាប់ ដែលគ្រួសារពួកគាត់កំពុងតែទទួលរង និងជាការរំលោភបំពានសិទ្ធិមនុស្ស៕