មន្ត្រី​បក្ស​ប្រឆាំង​ថា លោក ហ៊ុន សែន បញ្ចេញ​សារ​រឿង​បដិសេធ​យុវជន​ម្នាក់​នៅ​ជប៉ុន​ស្នើ​សុំ​ធ្វើជា​ទីប្រឹក្សា​ជា​នយោបាយ​ប្រជាភិថុតិ

ដោយ ជាតិ ចំណាន
2025.02.01
RFA

មន្ត្រី​បក្ស​ប្រឆាំង​ថា លោក ហ៊ុន សែន បញ្ចេញ​សារ​រឿង​បដិសេធ​យុវជន​ម្នាក់​នៅ​ជប៉ុន​ស្នើ​សុំ​ធ្វើជា​ទីប្រឹក្សា​ជា​នយោបាយ​ប្រជាភិថុតិ

(ឆ្វេង) លោក ហ៊ុន សែន ប្រធានព្រឹទ្ធសភា និង​គណបក្សប្រជាជន​កម្ពុជា និង​យុវជន​ឈ្មោះ សិទ្ធិ ឬ​ហៅ​ថា Mr. Seth នៅ​ប្រទេស​ជប៉ុន ដែលលោក ហ៊ុន សែន អះអាង​ថា រូប៖ ហ្វេសប៊ុកលោក ហ៊ុន សែន


មន្ត្រី​បក្ស​ប្រឆាំង​រិះគន់ លោក ហ៊ុន សែន រឿង​បញ្ចេញ​សារ​សំឡេង​ឆ្លើយឆ្លង​នៅ​លើ​បណ្ដាញ​សង្គម បដិសេធ​យុវជន​ម្នាក់​នៅ​ជប៉ុន​ស្នើ​សុំ​ធ្វើជា​ទីប្រឹក្សា​ថា ជា​រឿង​ឥត​ប្រយោជន៍ និង​ជា​នយោបាយ​ឆ្ពិន​ភ្នែក​ពលរដ្ឋ។ ការ​លើក​ឡើង​នេះ គឺ​ក្រោយ​ពេល​ប្រធាន​គណបក្ស​ប្រជាជន​កម្ពុជា លោក ហ៊ុន សែន បដិសេធ​មិន​តែងតាំង​យុវជន​ម្នាក់​ឈ្មោះ សិទ្ធិ (Mr. Seth) ជា​ទីប្រឹក្សា ដោយ​សំអាង​ថា យុវជន​រូប​នោះ​គ្មាន​សមត្ថភាព និង​ចំណេះ​ជំនាញ។ ប៉ុន្តែ​កន្លង​មក គេ​ដឹង​ថា លោក ហ៊ុន សែន ធ្លាប់​បាន​តែងតាំង​មនុស្ស​ជា​ច្រើន ដែល​បម្រើ​នយោបាយ​លោក​ឱ្យ​ធ្វើ​ជា​ទីប្រឹក្សា បើ​ទោះ​ជា​អ្នក​ខ្លះ​គ្មាន​សមត្ថភាព​ក៏​ដោយ។

មន្ត្រី​បក្ស​ប្រឆាំង និង​អ្នក​វិភាគ​ចាត់​ទុក​សារ​សំឡេង​របស់​លោក ហ៊ុន សែន រឿង​បដិសេធ​ការ​តែង​តាំង​យុវជន​ម្នាក់​ឈ្មោះ សិទ្ធិ (Mr. Seth) ជា​ទីប្រឹក្សា គ្រាន់តែ​ជា​ការ​សំដែង​ល្ខោន​នយោបាយ និង​បិទ​បាំង​ទង្វើ​អាក្រក់​របស់​ខ្លួន។

អតីត​អ្នក​តំណាង​រាស្ត្រ​គណបក្ស​សង្គ្រោះ​ជាតិ លោក អ៊ំ សំអាន ប្រាប់​វិទ្យុ​អាស៊ី​សេរី​នៅ​ថ្ងៃ​ទី១ ខែកុម្ភៈ​ថា ប្រសិនបើ​លោក ហ៊ុន សែន ជា​មនុស្ស​គិតគូរ​ពី​ផល​ប្រយោជន៍​ជាតិ​ជា​ធំ​នោះ លោក ហ៊ុន សែន មិន​បន្ត​តាម​កម្ទេច​ក្រុម​អ្នក​ប្រឆាំង​ឡើយ។ លោក​សង្កេត​ឃើញ​ថា អត្តចរិត​លោក ហ៊ុន សែន ជា​មនុស្ស​ហិង្សា និង​ចូលចិត្ត​ប្រើ​អំណាច​កម្ចាត់​អ្នក​ដែល​ហ៊ាន​រិះគន់​ក្រុម​គ្រួសារ​ត្រកូល «ហ៊ុន» ដូច្នេះ លោក ហ៊ុន សែន មិន​ខ្លាច​រអា​នឹង​កម្ចាត់​ចោល​អ្នក ដែល​អស់​ផល​ប្រយោជន៍ ចំពោះ​លោក​ឡើយ។

លោក អ៊ំ សំអាន៖ «ចេតនា​គាត់ គឺ​គ្រាន់តែ​ចង់​បំបែក​បំបាក់​ក្នុង​ក្រុម​យុវជន​អ្នក​ប្រជាធិបតេយ្យ​ហ្នឹង កុំ​ឱ្យ​ទុក​ចិត្ត​គ្នា ដើម្បី​ឱ្យ​យុវជន​មាន​ការ​សង្ស័យ​គ្នា​បាក់​សាមគ្គី​ទៅ ដើម្បី​ឱ្យ​គាត់​ងាយ​ស្រួល​គ្រប់គ្រង​ដល់​អ៊ីចឹង។ ធ្វើ​ឱ្យ​អ្នក​ប្រជាធិបតេយ្យ​មាន​ការ​បាក់​ទឹក​ចិត្ត​សូម្បី​តែ​ក្នុង​ក្រុម​យើង​ហ្នឹង ក៏​មាន​អ្នក​បង្គាប់ តាម​អា​ហ្នឹង​ជា​នយោបាយ​បំបែកបំបាក់​ដើម្បី​គ្រប់គ្រង​ទេ​មិនមែន​ក្នុង​បំណង​ល្អ​របស់​លោក ហ៊ុន សែន នោះ​ទេ»

ចំណែក​អ្នក​អត្ថាធិប្បាយ​នយោបាយ លោក ស៊ន តារា ថ្លែង​នៅ​ក្នុង​វេទិកា​អ្នក​ស្ដាប់​វិទ្យុ​អាស៊ី​សេរី​កាល​ពី​យប់​ថ្ងៃ​ទី៣១ ខែ​មករា​ថា លោក ហ៊ុន សែន គឺជា​មនុស្ស​ក្រឡេចក្រឡុច និង​ផ្លាស់ប្ដូរ​អត្តចរិត​បាន​គ្រប់​ពេល ដើម្បី​ផល​ប្រយោជន៍​ផ្ទាល់​ខ្លួន ដូច្នេះ ការ​បញ្ចេញ​សារ​សំឡេង​របស់​លោក ហ៊ុន សែន ជា​ចេតនា​បង្ហាញ​ឱ្យ​មហាជន​ដឹង​ថា លោក​អាច​ធ្វើ​អ្វី​បាន​គ្រប់​យ៉ាង ដើម្បី​រក្សា​អំណាច​ផ្ដាច់ការ។

លោក ស៊ន តារា៖ «ចំណុច​សំខាន់​ដែល​ខ្ញុំ​ចង់​និយាយ​នោះ គឺ​លោក ហ៊ុន សែន គ្មាន​អ្នក​ណា​គេ​មើល​គាត់​យល់​ទេ។ ពេល​ខ្លះ​ជួប​គាត់​ជា​មនុស្ស​ចេះ ពេល​ដែល​គាត់​នៅ​ក្នុង​វេទិកា​មួយ គាត់​ជា​មនុស្ស​ចុះ​គាត់​ចង់​ឱ្យ​ធ្វើ​មនុស្ស​ហ្នឹង មើល​គាត់​អត់​យល់។ ប៉ុន្តែ ស៊ន តារា មើល​លោក ហ៊ុន សែន យល់​ច្បាស់​អ្វី​ដែល​លោក ហ៊ុន សែន ឱ្យ​យើង​ឃើញ​គឺជា​របស់​ក្លែងក្លាយ»។

កាល​ពី​ថ្ងៃទី៣១ ខែ​មករា លោក ហ៊ុន សែន បាន​បញ្ចេញ​សារ​សំឡេង​រយៈ​ពេល​ជាង ៦នាទី​នៅ​លើ​គណនី​ហ្វេសប៊ុក​របស់​លោក​អំពី​ការ​សន្ទនា​រវាង​លោក និង​យុវជន​ម្នាក់​ឈ្មោះ សិទ្ធិ ឬ​ហៅ​ថា Mr. Seth នៅ​ប្រទេស​ជប៉ុន ដោយ​យុវជន​រូប​នេះ​ស្នើ​សុំ​ឱ្យ​លោក ហ៊ុន សែន តែងតាំង​ខ្លួនឯង​ជា​ទីប្រឹក្សា​ដើម្បី​ឱ្យ​រូប​គេ​មាន​ការងារ​ធ្វើ។ ប៉ុន្តែ​លោក ហ៊ុន សែន បាន​បដិសេធ​ដោយ​សំអាង​ថា យុវជន​រូប​នោះ​ពុំ​មាន​សមត្ថភាព និង​ចំណេះ​គ្រប់គ្រាន់​ដើម្បី​ធ្វើ​ជា​ទីប្រឹក្សា​ឡើយ ហើយ​ការ​ជ្រើសរើស​ទីប្រឹក្សា​នេះ​ក៏​ទាក់ទង​នឹង​ការ​ចំណាយ​ថវិកា​ជាតិ​ដែរ។ លើស​ពី​នេះ លោក ហ៊ុន សែន ក៏​បាន​សរេសរ​សំណេរ​ភ្ជាប់​ជាមួយ​នឹង​សារ​សំឡេង​នោះ​ផង​ដែរ ដោយ​លោក​អះអាង​ថា លោក​បាន​ឱ្យ​លុយ​ទៅ​យុវជន​ឈ្មោះ សិទ្ធិ និង​ឪពុកម្ដាយ​របស់​យុវជន​រូប​នោះ ដើម្បី​ធ្វើ​ជា​ដើម​ទុន​រកស៊ី ប៉ុន្តែ​ក្រោយ​មក​យុវជន​នោះ​ក៏​វាយប្រហារ​លើ​លោក ដោយសារ​តែ​លោក​បដិសេធ​មិន​ផ្ដល់​ដំណែង​ជា​ទីប្រឹក្សា។ លោក ហ៊ុន សែន ក៏​បញ្ជា​ឱ្យ​តុលាការ​សើរើ​រឿង​ក្ដី​យុវជន​ឈ្មោះ​សិទ្ធិ នោះ​ដែល​ជាប់​ពាក់ព័ន្ធ​នឹង​ថ្ងៃ​ទី១៨ សីហា ដែល​រដ្ឋាភិបាល​ត្រកូល «ហ៊ុន» អះអាង​ថា គឺជា​ថ្ងៃ ដែល​ក្រុម​ប្រឆាំង​រៀបចំ​ផែនការ​ចង់​ផ្ដួល​រំលំ​រដ្ឋាភិបាល។

លោក ហ៊ុន សែន៖ «កូន​សុំ​អង្វរ​សម្ដេច​ពុក​ជួយ​កូន​ម្ដង​ឱ្យ​កូន​បាន​ធ្វើ​ការងារ​នឹង​គេ សម្ដេច​ពុក​កូន​មិន​ចង់​ធ្វើ​ការ​នៅ​ប្រទេស​ជប៉ុន​នេះ​ទេ (យុវជនសិទ្ធិ)។ (លោក ហ៊ុន សែន) ប៉ុន្តែ កូន​ឯង​មិន​ទាន់​គ្រប់​លក្ខណៈ​សម្បត្តិ​នៅ​នេះ គេ​កំណត់​ជា​ផ្លូវការ​តែ​ម្ដង​រាល់​ក្របខ័ណ្ឌ​រដ្ឋ ត្រូវតែ​ឆ្លង​កាត់​នៅ​ការ​ប្រឡង​ប្រជែង បើ​យក​កូន​ឯង​មក​ដាក់ គឺ​វា​ខុស។ អា​ហ្នឹង​រឿង​តែ​ប៉ុណ្ណឹង​ទេ ឱ្យ​តែ​កូន​ឯង​មាន​លទ្ធភាព​ប្រឡង​ជាប់​វា​មិន​ពិបាក​ទេ»

ក្រោយពី​មាន​ការ​បង្ហោះ​សារ​សំឡេង​របស់​លោក ហ៊ុន សែន គិត​មក​ទល់​ពេល​នេះ គេ​មិន​ទាន់​ឃើញ​ថា យុវជន​ឈ្មោះ​សិទ្ធិ​ចេញ​មុខ​ប្រតិកម្ម​តបត ចំពោះ​លោក ហ៊ុន សែន វិញ​ឡើយ។

កាល​ពីខែ​សីហា ឆ្នាំ២០២៤​បុគ្គល​ឈ្មោះ​សិទ្ធិ ឬ​ហៅ Mr. Seth នេះ​បាន​គ្រុប​តេឡេក្រាម (Telegram) មួយ​ឈ្មោះ​ថា «រួបរួម​ដើម្បី​ជាតិ» ដើម្បី​រៀបចំ​គម្រោង​ធ្វើ​បាតុកម្ម​ប្រឆាំង​នឹង​កិច្ច​សហប្រតិបត្តិការ​តំបន់​ត្រីកោណ​អភិវឌ្ឍន៍ ហៅ​កាត់​ថា CLV-DTA នៅ​ថ្ងៃ​ទី១៨ សីហា ដោយ​គ្រុប​នោះ​បាន​ជជែក​គ្នា​អំពី​ការ​ធ្វើ​បាតុកម្ម​ទាមទារ​ឱ្យ​រដ្ឋាភិបាល​ដក​ខ្លួន​ចេញ​ពី​កិច្ច​សហប្រតិបត្តិការ​តំបន់​ត្រីកោណ​អភិវឌ្ឍន៍​នេះ។ ក្រោយមក​បុគ្គល​ឈ្មោះ សិទ្ធិ នោះ​បាន​ប្រកាស​ចុះ​ចូល​ជាមួយ​គណបក្ស​ប្រជាជន​កម្ពុជា​ដោយ​អះអាង​ថា ខ្លួន​យល់​ខុស​ដោយសារ​ជឿ​តាម​ការ​ញុះញង់​របស់​មន្ត្រី​បក្ស​ប្រឆាំង​នៅ​ក្រៅ​ប្រទេស។

ក្នុង​សំណុំ​រឿង​នៅ​ថ្ងៃ១៨ សីហា រដ្ឋាភិបាល​អះអាង​ថា ជា​ថ្ងៃ​ដែល​ក្រុម​ប្រឆាំង​រៀបចំ​គម្រោង​ធ្វើ​បាតុកម្ម​ផ្ដួល​រំលំ​នោះ រដ្ឋាភិបាល​លោក ហ៊ុន ម៉ាណែត បាន​យក​លេស​នេះ​ចាប់​យុវជន​សង្គម បុគ្គលិក​អង្គការ​សង្គម​ស៊ីវិល និង​មន្ត្រី​បក្ស​ប្រឆាំង​ប្រមាណ ៤២នាក់ ដាក់​ពន្ធនាការ​ជា​បន្ត​បន្ទាប់​ដោយ​ចោទ​ប្រកាន់​ទាំង​គ្មាន​ភស្តុតាង​ពី​បទ «រួម​គំនិត​ក្បត់ និង​ញុះញង់»។ ប៉ុន្តែ​ក្រោយ​មក​រដ្ឋាភិបាល​បាន​ដោះលែង​យុវជន​សង្គម​ចំនួន ៦នាក់ ឱ្យ​នៅ​ក្រៅ​ឃុំ​បណ្ដោះអាសន្ន បន្ទាប់​ពី​ពួក​គេ​សុំទោស​រដ្ឋាភិបាល និង​ចុះចូល​ជាមួយ​បក្ស​កាន់​អំណាច។

ជុំវិញ​រឿង​នេះ អ្នក​អត្ថាធិប្បាយ​នយោបាយ លោក គឹម សុខ មាន​ប្រសាសន៍​ថា ការ​បញ្ចេញ​សារ​នយោបាយ​របស់​លោក ហ៊ុន សែន នៅ​ពេល​នេះ គឺ​ជា​ការ​សំដែង​ល្ខោន​បិទ​បាំង​រឿង​អាស្រូវ និង​កុំ​ឱ្យ​ពលរដ្ឋ​រិះគន់​រឿង​រដ្ឋាភិបាល​កូនប្រុស​លោក គឺ​លោក ហ៊ុន ម៉ាណែត ចាយ​លុយ​ជាតិ​ខ្ជះខ្ជាយ​ដើម្បី​តែង​តាំង​ទីប្រឹក្សា។ លោក​បន្ត​ថា ក្នុង​រឿង​នេះ​លោក ហ៊ុន សែន ទំនង​ជា​ចង់​ផ្ញើ​សារ​គំរាម​ដល់​លលក​របស់​លោក​ថា ប្រសិនបើ​អ្នក​ណា​មិន​ធ្វើ​តាម​បញ្ជា​របស់​លោក លោក​នឹង​បញ្ចេញ​សារ​សន្ទនា​ជា​សាធារណៈ ហើយ​ព្រមាន​ចាត់​វិធានការ​តាម​ផ្លូវ​ច្បាប់។

លោក គឹម សុខ៖ «របៀប​ដែល​លោក ហ៊ុន សែន ធ្វើ​មិន​អាច​លាក់បាំង​ភ្នែក​ពលរដ្ឋ​បាន​ទេ​ល្ខោន​កំប៉ិកកំប៉ុក​ប៉ុណ្ណឹង។ ដោយសារ​ក្រុម​គ្រួសារ​ហ៊ុន​ខ្លួនឯង​ហ្នឹង​មាន​ដំណែង​ធំៗ នៅ​ក្នុង​ជួរ​រដ្ឋាភិបាល​មិន​សុទ្ធតែ​អ្នក​ដែល​មាន​ចំណេះ​ដឹង​ខ្ពស់​ទេ។ យើង​ឃើញ ហ៊ុន ម៉ានិត ហ៊ុន ម៉ានី ហ៊ុន ម៉ាណែត អី​រៀន​សូត្រ​បាន​ខ្ពស់​មែន​ក៏​ប៉ុន្តែ​ក្មួយ​លោក ហ៊ុន សែន ជា​ច្រើន​ទៀត​មិន ដែល​ចូល​សាលា​ផង​ហ្នឹង។ អ្នក​ខ្លះ​ជាប់​កេរ្តិ៍ឈ្មោះ​បាញ់​បោះ​គ្រឿងញៀន ប៉ុន្តែ​មាន​ឈ្មោះ​សុទ្ធតែ​ឧត្ដមសេនីយ៍»។

មន្ត្រី​បក្ស​ប្រឆាំង និង​អ្នក​អត្ថាធិប្បាយ​នយោបាយ​យល់​ឃើញ​ថា ប្រសិនបើ​លោក ហ៊ុន សែន ពិត​ជា​មាន​ទស្សនៈ​ដូច​ការ​លើក​ឡើង​នៅ​ក្នុង​សារ​សំឡេង​របស់​លោក​ពាក់ព័ន្ធ​នឹង​ការ​គោរពច្បាប់ និង​ឱ្យ​តម្លៃ​លើ​អ្នក​ចេះ​ដឹង​ពិត​ប្រាកដ​មែន នោះ​លោក​ចាំបាច់​ត្រូវ​តែ​ស្ដារ​ស្ថានការណ៍​នយោបាយ​កម្ពុជា​ឱ្យ​ល្អ​ឡើង​វិញ​តាម​រយៈ​ការ​បោះឆ្នោត​ដោយ​សេរី យុត្តិធម៌ និង​ត្រឹមត្រូវ ពីព្រោះ​កូន​របស់​លោក​គឺ លោក ហ៊ុន ម៉ាណែត ឡើង​កាន់​ដំណែង​ជា​នាយករដ្ឋមន្ត្រី​ក៏​ដោយសារតែ​មាន​លោក ហ៊ុន សែន ជា​ឪពុក​លើក​បន្តុប និង​ចាំ​កាង​ការពារ​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

Leave a Reply

Submit Comment