កម្ពុជា
09/04/2025 – 13:47
ដោយ៖ អ៊ឹង ប៊ុនថន
RFI
ក្រឹត្យដំឡើងពន្ធរបស់ប្រធានាធិបតីអាមេរិក លោក ដូណាល់ ត្រាំ ដែលដាក់ទៅលើប្រទេសជាដៃគូពាណិជ្ជកម្មរបស់អាមេរិកត្រូវចូលជាធរមាននៅថ្ងៃទី៩ ខែមេសា ឆ្នាំ២០២៥ ក្នុងនោះ ចិនរងទណ្ឌកម្មបន្ថែមពន្ធពីអាមេរិកធ្ងន់ជាងគេរហូតដល់ទៅ ១០៤%។ តែបើនិយាយពីក្នុងចំណោមប្រទេសអាស៊ានទាំង១០ ប្រទេសវិញ កម្ពុជាស្ថិតនៅលេខរៀងទី១ ដែលរងការដំឡើងពន្ធខ្ពស់ជាងគេពីរដ្ឋបាលអាមេរិករហូតដល់ ៤៩% លើទំនិញកម្ពុជានាំចូលទីផ្សារអាមេរិក។
ការដំឡើងពន្ធរបស់អាមេរិកលើកម្ពុជា និងប្រទេសនានាត្រូវចូលជាធរមានថ្ងៃទី៩ មេសា
សារព័ត៌មាន CNBC បានដកស្រង់សម្តីអ្នកជំនាញពាណិជ្ជកម្មថា កម្ពុជាត្រូវបានអាមេរិកដំឡើងអត្រាពន្ធខ្ពស់បំផុត ពោលដល់ទៅ ៤៩% នៅក្នុងសង្គ្រាមពាណិជ្ជកម្មពិភពលោកដែលបញ្ឆេះដោយប្រធានាធិបតីអាមេរិក លោក ដូណាល់ ត្រាំ ទោះបីជាអតិរេកពាណិជ្ជកម្មរបស់កម្ពុជាជាមួយសហរដ្ឋអាមេរិកមានកម្រិតទាប ធៀបនឹងប្រទេសដទៃទៀតក៏ដោយ។ នៅចំពោះមុខនេះ អ្នកជំនាញព្រមានថា កម្មករកម្ពុជាកំពុងស្ថិតក្នុងការប្រយុទ្ធដើម្បីការរស់រានមានជីវិតផ្នែកហិរញ្ញវត្ថុ ប៉ុន្តែទំនិញរបស់កម្ពុជានឹងពិបាកនាំចេញទៅទីផ្សារសហរដ្ឋអាមេរិក។
លោក Casey Barnett ប្រធានសភាពាណិជ្ជកម្មអាមេរិកប្រចាំកម្ពុជាត្រូវបានសារព័ត៌មាន CNBC ស្រង់សំដីមកចុះផ្សាយនៅថ្ងៃទី៨ ខែមេសា ពោលមួយថ្ងៃមុនក្រឹត្យរបស់លោក ដូណាល់ ត្រាំ ចូលជាធរមានថា ក្រុមហ៊ុនផលិតមួយចំនួននៅកម្ពុជាកំពុងសម្លឹងមើលប្រទេសផ្សេងទៀតដើម្បីបោះទីតាំងថ្មី ពិសេសប្រទេស អេហ្ស៊ីប អនុតំបន់សាហារ៉ាអាហ្វ្រិក ឥណ្ឌា និងឥណ្ឌូណេស៊ីដែលអាមេរិកយកពន្ធទាបជាងកម្ពុជា។ យោងតាមលោក Barnett រោងចក្រនៅក្នុងប្រទេសកម្ពុជានាពេលបច្ចុប្បន្ននេះកំពុងស្វែងរកមធ្យោបាយដើម្បីរស់រានសម្រាប់ប៉ុន្មានខែខាងមុខ។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ប្រាប់វិទ្យុបារាំងអន្តរជាតិ RFI ថា លោកនៅមិនទាន់បានទទួលព័ត៌មានអ្វីជុំវិញការចូលជាធរមាននៃការដំឡើងពន្ធរបស់អាមេរិកនេះនៅឡើយទេ។ សូមបញ្ជាក់ថា នៅក្នុងចំណោមប្រទេសអាស៊ានទាំង១០ កម្ពុជាត្រូវបានអាមេរិកដំឡើងពន្ធរហូតដល់ទៅ ៤៩% លើទំនិញនាំចូលទីផ្សារអាមេរិក និងតាមពីក្រោយដោយឡាវ ៤៨% វៀតណាម ៤៦% ភូមា ៤៤% ថៃ ៣៦% ឥណ្ឌូណេស៊ី ៣២% ប៊្រុយណេ និងម៉ាឡេស៊ីចំនួន ២៤% ហ្វីលីពីន ១៧% ខណៈសិង្ហបុរីត្រូវបានអាមេរិកដំឡើងពន្ធតែ ១០%ប៉ុណ្ណោះ៕