កម្ពុជា
17/05/2025 – 09:25
ដោយ៖ អ៊ឹង ប៊ុនថន
RFI
អង្គការអ្នកសារព័ត៌មានគ្មានព្រំដែន (RSF) បានបញ្ចេញប្រតិកម្មភ្លាមៗទៅនឹងការចាប់ខ្លួនអ្នកសារព័ត៌មានបរិស្ថានប្រចាំខេត្តស្ទឹងត្រែង គឺលោក អ៊ុក ម៉ៅ កាលពីថ្ងៃទី១៦ ខែឧសភា ឆ្នាំ២០២៥ ដោយទាមទារឲ្យដោះលែងជាបន្ទាន់។ នាយកការិយាល័យប្រចាំតំបន់អាស៊ីប៉ាស៊ីហ្វិក នៃអង្គការអ្នកសារព័ត៌គ្មានព្រំដែន បាននិយាយនៅក្នុងសេចក្តីថ្លែងការណ៍មួយថា «ការចាប់ខ្លួនដោយបំពានទៅលើ អ៊ុក ម៉ៅ ដែលធ្វើឡើងដោយគ្មានដីកា គឺជាការកើនឡើងនៃការយាយីផ្នែកតុលាការដ៏ធ្ងន់ធ្ងរដែលអ្នកកាសែតបានស៊ូទ្រាំជាយូរមកហើយ»។
អង្គការអ្នកសារព័ត៌មានគ្មានព្រំដែនថា ការចាប់ខ្លួន លោក អ៊ុក ម៉ៅ ធ្វើឡើងដោយបំពាន
មានអាយុ៥៧ឆ្នាំ លោក អ៊ុក ម៉ៅ គឺជាអ្នកសារព័ត៌មានរបស់អង្គភាព «ឥន្ទ្រីផ្លើស ញូស៍» ប្រចាំខេត្តស្ទឹងត្រែង។ នៅមុនចាប់ខ្លួន លោក អ៊ុក ម៉ៅ ដែលមានកូនក្នុងបន្ទុកចំនួន៧នាក់ បានប្រាប់វិទ្យុបារាំងអន្តរជាតិ RFI កាលពីថ្ងៃទី១៣ខែឧសភាថា លោកត្រូវបានគេប្តឹងចំនួន១៥ករណី បន្ទាប់ពីលោកបានរាយការណ៍ពីការកាប់ឈើនៅខេត្តស្ទឹងត្រែង។ ករណីថ្មីចុងក្រោយដែលលោកទទួលបានដីកា គឺតម្រូវឲ្យលោកចូលបំភ្លឺនៅតុលាការខេត្តស្ទឹងត្រែង នៅថ្ងៃទី២០ ឧសភា២០២៥ ពីបទកាប់គាស់ រុករានដីព្រៃយកធ្វើជាកម្មសិទ្ធិ និងពីបទញុះញង់ឲ្យប្រព្រឹត្តិបទឧក្រិដ្ឋអាទិ៍។
តែតាមការចុះផ្សាយរបស់សារព័ត៌មាន Mongabay និង Camboja បានឲ្យដឹងថា លោក អ៊ុក ម៉ៅ ត្រូវបានបុរស៣នាក់ដែលស្លៀកពាក់ស៊ីវិលចាប់ខ្លួនតាំងពីរំលងអាធ្រាត្រ ថ្ងៃទី១៦ ខែឧសភា ដោយដឹកតាមរថយន្តម៉ាក Luxus ចេញទៅដោយមិនមានដីកាបង្ហាញនោះទេ។
តែលោក ម៉ែន គង់អ្នកនាំពាក្យសាលាខេត្តស្ទឹងត្រែងប្រាប់វិទ្យុបារាំងអន្តរជាតិ RFI ថា លោកក្តាប់មិនទាន់បានពីករណីចាប់ខ្លួន លោក អ៊ុក ម៉ៅ នៅឡើយទេ។
សារព័ត៌មាន Mongabay បានផ្សាយនៅថ្ងៃទី១៦ ឧសភា ដោយដកស្រង់សំដី លោក Cédric Alviani នាយកការិយាល័យប្រចាំតំបន់អាស៊ីប៉ាស៊ីហ្វិក នៃអង្គការអ្នកសារព័ត៌គ្មានព្រំដែន បាននិយាយនៅក្នុងសេចក្តីថ្លែងការណ៍មួយថា «ការចាប់ខ្លួនដោយបំពានទៅលើ អ៊ុក ម៉ៅ ដែលធ្វើឡើងដោយគ្មានដីកា គឺជាការកើនឡើងនៃការយាយីផ្នែកតុលាការដ៏ធ្ងន់ធ្ងរដែលអ្នកកាសែតបានស៊ូទ្រាំជាយូរមកហើយ»។
តាម Mongabay លោក អ៊ុក ម៉ៅ ចាប់ផ្តើមមានបញ្ហាតាំងពីក្នុងខែមិថុនា ឆ្នាំ២០២៤ នៅពេលដែលគាត់ត្រូវបានសួរដោយកងរាជអាវុធហត្ថអំពីការស៊ើបអង្កេតរបស់គាត់អំពីការឈូសឆាយដីនៅក្នុងព្រៃសហគមន៍ក្នុងខេត្តស្ទឹងត្រែង។ នៅខែសីហា ឆ្នាំ ២០២៤ ដដែល អ្នកសារព័ត៌មានបរិស្ថានរូបនេះ បានជួយ Mongabay ដោយរកឃើញថា ក្រុមហ៊ុនរុករករ៉ែ ដែលមានទំនាក់ទំនងនឹងយោធារបស់កម្ពុជាកំពុងកាប់ឈើក្នុងខេត្តស្ទឹងត្រែង។ បន្ទាប់ពី Mongabay បានចុះផ្សាយរឿងនេះ លោក អ៊ុក ម៉ៅ ក៏ត្រូវបានចោទប្រកាន់ពីបទកាប់រានព្រៃរដ្ឋដោយខុសច្បាប់ បើទោះជាលោកមានប្រវត្តិជាអ្នកការពារព្រៃឈើនៅកម្ពុជាយ៉ាងត្រឹមត្រូវក៏ដោយ។
ក្នុងបទសម្ភាសជាមួយវិទ្យុបារាំងអន្តរជាតិ RFI នៅថ្ងៃទី១៣ ខែឧសភា អ្នកសារព័ត៌មានដែលគ្មានប្រាក់ខែរូបនេះ បានអះអាងថា លោកបានរងបណ្តឹងនៅតុលាការសរុប១៥ករណីដោយសារតែលោកបានរាយការណ៍ពីការឃុបឃិតគ្នារវាងមន្ត្រី និងក្រុមអ្នកកាប់ឈើនៅតំបន់នោះ។ ក្រៅពីជាប់បណ្តឹងលោក អ៊ុក ម៉ៅ អះអាងថាលោកធ្លាប់ត្រូវបានគេវាយដំ គេបោកទូរសព្ទចោល និងដុតផ្ទះចោល។ តែថា នៅពេលលោកដាក់ពាក្យបណ្តឹងដើម្បីរកយុត្តិធម៌ មន្ត្រីមួយចំនួនទាត់ចោលពាក្យបណ្តឹងរបស់លោក ហើយនៅពេលដែលភាគីម្ខាងទៀតប្តឹងលោកវិញ គឺបែរជាមន្ត្រីមានចំណាត់ការលឿនទៅវិញ៕