Written by ភ្នំពេញដេលីញូវ
Wednesday, 20 June 2012

កាលពីពេលថ្មីនេះ មានអ្នក សារភាព សុំស្នេហ៍អ្នក ចម្រៀងរាងសង្ហា ឆន សុវណ្ណរាជ ដោយមានអក្ខរា ភ្ជាប់ជាមួយនឹង បាច់ផ្កា កុលាបដ៏ ស្រស់ស្អាត ប៉ុន្តែស្ត្រីនោះ មិនបាន ចេញមុខ មកហុចបាច់ផ្កា ដោយផ្ទាល់នោះទេ ។ ក្រដាស តូចមួយ នៅក្នុង បាច់ផ្កានោះ បានសរ សេរដោយ សារភាព ត្រង់ៗថា “រាជ ខ្ញុំស្រឡាញ់អ្នក” ប៉ុន្តែ ឆន សុវណ្ណរាជ បែរជា និយាយថា បាច់ផ្កានោះគឺ ផ្តល់ឱ្យដោយ ប្រិយមិត្ត របស់លោក ដែលតែង ស្រឡាញ់គាំទ្រ និង លើកទឹកចិត្ត តែប៉ុណ្ណោះ មិនមានអ្វី ចម្លែកនោះទេ ។

កាលពីថ្ងៃទី ២ ខែមិថុនា ឆ្នាំ ២០១២ កន្លងមកនេះ នៅក្នុងកម្មវិធី “តន្ត្រី យុវវ័យ” របស់ស្ថានីយទូរទស្សន៍ បាយ័ន អ្នកចម្រៀងលោក ឆន សុវណ្ណរាជ បាន ទទួលបាច់ផ្កាកុលាបមួយបាច់ធំដ៏ស្រស់ ស្អាតពីស្ត្រីអនាមិកម្នាក់ ដោយមិនចេញមុខ ។ បាច់ផ្កា នោះ ត្រូវគេផ្តល់ឱ្យ អ្នកចម្រៀង ឆន សុវណ្ណរាជ ឱ្យតាមរយៈមនុស្សផ្សេងទៀត ។

នៅក្នុងបាច់ផ្កាមានក្រដាសតូចមួយ ដែលបានសរសេរអក្សរដោយមានអត្ថន័យយ៉ាងខ្លីថា “រាជ ខ្ញុំស្រឡាញ់អ្នក… ថ្ងៃនេះជាខួបកំណើតរបស់ខ្ញុំ… ខ្ញុំស្រឡាញ់អ្នក !” ។

តាមរយៈអត្ថន័យអក្ខរារបស់ម្ចាស់ បាច់ផ្កានេះនាំឱ្យកត់សម្គាល់ថា កំលោះ សង្ហា ឆន សុវណ្ណរាជ ចាប់ផ្តើម ធ្វើឱ្យ ស្ត្រីពេញចិត្ត និង ចោមរោមសុំស្នេហ៍ កាន់តែច្រើនហើយ ។ ប៉ុន្តែទាក់ទងទៅនឹង ចម្ងល់ថា តើម្ចាស់បាច់ផ្កាជានរណានោះ ? លោក ឆន សុវណ្ណរាជ បញ្ជាក់ ថា “បាច់ផ្កានោះជារបស់ហ្វ្រេនក្លឹប (Reach Family) របស់ខ្ញុំជាអ្នកផ្តល់ឱ្យ ដែលពួក គាត់តែងគាំទ្រ និង លើកទឹកចិត្តដល់ខ្ញុំតែ ប៉ុណ្ណោះ គ្មានស្ត្រីណាឱ្យខ្ញុំទេ ហើយក្រុមនេះ ដែលមានគ្នាជិត ១០០ នាក់” ។

ទាក់ទងទៅនឹងរឿងរ៉ាវស្នេហារបស់អ្នកចម្រៀង ឆន សុវណ្ណរាជ គឺកន្លងមកធ្លាប់មានព័ត៌មានថា លោកមាន ទំនាក់ទំនងស្នេហាជាមួយស្ត្រីនៅអូស្ត្រាលី ដែលស្ត្រីនោះថែម ទាំងជួយទំនុកបម្រុងក្នុងការបើកហាងកាត់ដេរ សម្លៀកបំពាក់ ព្រម ទាំងទិញរ ថយន្តទំនើប ឱ្យជិះ ថែមទៀតផង ប៉ុន្តែនៅពេលសួរនាំ អំពីស្នេហា ឆន សុវណ្ណរាជ បញ្ជាក់ថា “ខ្ញុំសុំ មិននិយាយពីរឿងនេះទេ” ។

បើនិយាយពីការងារសិល្បៈវិញ អ្នកចម្រៀងប្រចាំផលិតកម្មរស្មីហង្សមាសរូបនេះបានបង្ហាញនូវភាព ផ្អែមល្ហែមក្នុងការសម្តែងតាមបទចម្រៀងនៅលើឆាកតន្ត្រីជាមួយកញ្ញា ឈិត សុវណ្ណបញ្ញា ដែលជាអ្នកចម្រៀងរួម ផលិតកម្មនៅក្នុង កម្មវិធី “តន្ត្រីយុវ វ័យ” របស់ស្ថានីយ ទូរទស្សន៍បាយ័នកាលពីថ្ងៃទី ២ ខែមិថុនាកន្លងមក ។

ឈុតឆាកសម្តែងលើឆាកបែបនេះមិនធ្លាប់មានទេពីមុនមករវាង ឆន សុវណ្ណរាជ និង ឈិត សុវណ្ណបញ្ញា ដែលធ្វើឱ្យអ្នកទស្សនាលាន់មាត់ថា អ្នកទាំងពីរធ្វើដូចជាគូស្នេហ៍ពិតប្រាកដយ៉ាងដូច្នេះដែរ ។

នៅក្នុងការប្រគំតន្ត្រីនោះលោក ឆន សុវណ្ណរាជ និង កញ្ញា ឈិត សុវណ្ណបញ្ញា បានច្រៀងបទ “ចង់ឱបបង ជាលើកចុងក្រោយ”ដោយពួកគេបានឱបរឹតរួតគ្នាយ៉ាងណែននៅក្នុងទ្រូងប្រៀបបីដូចជាគូស្នេហ៍ដែលពោរពេញ ដោយសេចក្តីស្នេហា ដ៏ជ្រាល ជ្រៅ ។ កន្លងមកអ្នក ទាំងពីរមិនសូវធ្លាប់បានសម្តែងជាមួយគ្នាបែបនេះទេ ហើយ ភាគ ច្រើន ឆន សុវណ្ណរាជ សម្តែងផ្អែមល្ហែមតែជាមួយ អ្នកចម្រៀង ពេជ្រ សោភា និង ឱក សុគន្ធកញ្ញា តែប៉ុណ្ណោះ ។

លោក ឆន សុវណ្ណរាជ បានឱ្យដឹងថា ការសម្តែងឱបគ្នាជាមួយ ឈិត សុវណ្ណបញ្ញា បែប នេះ គឺធ្វើឱ្យត្រូវ នឹងបទចម្រៀងដែលពួកគេ បានច្រៀងជាមួយគ្នា មិនមែនជាគូស្នេហ៍អ្វី នោះទេ នេះគ្រាន់តែជាការសម្តែងប៉ុណ្ណោះ ។

មួយរយៈពេលចុងក្រោយនេះ លោក ឆន សុវណ្ណរាជ បានលេងស្ទីលប្លែកៗទាំង ម៉ូដសក់ ម៉ូដសម្លៀកបំពាក់ ស្របទៅតាមបទ ចម្រៀងបែបយុវវ័យដែលនាំឱ្យរូបរាងរបស់គេកាន់តែមានការទាក់ទាញ ។

លោកទើបនឹងចេញបទចម្រៀងថ្មីចំនួនពីរវ៉ុល ហើយមានបទចម្រៀងមួយចំនួន ទទួលបានការគាំទ្រដែរ ដែលក្នុងនោះមានដូចជាបទ “៣៦៦ ថ្ងៃ” និង បទ “ស្រឡាញ់ គ្នាកំដរថ្ងៃបែក”ជាដើម ។

ឆ្នាំនេះលោក ឆន សុវណ្ណរាជ ក៏នឹងមានគម្រោងចេញទៅសម្តែងនៅអាមេរិកក្នុង អំឡុងខែកញ្ញា ឆ្នាំ ២០១២ ខាងមុខនេះដែរ ហើយបើបានចេញទៅអាមេរិកគឺជា ប្រទេសទីពីរបន្ទាប់ពីប្រទេសអូស្ត្រាលី ដែលលោកធ្លាប់បានទៅសម្តែង នៅទីនោះ ចំនួន ២ លើក រួចមក ហើយ ។

បើនិយាយពីអតីតកាលវិញ អ្នកចម្រៀង ឆន សុវណ្ណរាជ ត្រូវបានគេស្គាល់តាម រយៈបទចម្រៀងដំបូង គឺបទ “ចាំទាំងត្រដរ” និង ក្រោយមកទៀតក៏បានចូលមកច្រៀង នៅក្នុងផលិតកម្មរស្មីហង្សមាស ហើយដែលគេនៅចាំបានថា បទចម្រៀងដំបូង នៅ ក្នុង ផលិតកម្មនេះ គឺបទ “ទីក្រុងគ្មានមេឃ” ៕