ថ្ងៃទី 9 កក្កដា 2012
ដោយ: សុខ ភក្តី
CEN
រដ្ឋមន្ត្រីការបរទេសអាស៊ាន ថតរូបរួមគ្នា ក្នុងពេលបើកកិច្ចប្រជុំ កាលពីព្រឹកថ្ងៃទី៩កក្កដា ឆ្នាំ២០១២ នៅវិមានសន្តិភាព ក្នុងរាជធានីភ្នំពេញ (រូបថត៖ ស៊ីវ ចាន់ណា)
ភ្នំពេញ: បន្ទាប់ពីបើកកិច្ចប្រជុំ នាព្រឹកថ្ងៃទី៩កក្កដា ឆ្នាំ២០១២ រដ្ឋមន្ត្រីការបរទេសអាស៊ាន បានជួបប្រជុំពេញអង្គ ដោយបិទទ្វារ នៅវិមានសន្តិភាព។ បន្ទាប់ពីកិច្ចប្រជុំវគ្គពេលព្រឹក លោក កៅ គឹមហួន រដ្ឋលេខាធិការក្រសួងការបរទេស បានថ្លែងក្នុងសន្និសីទកាសែតអំពីលទ្ធផលនៃកិច្ចប្រជុំរដ្ឋមន្ត្រីការបរទេសពេញអង្គ លើកទី៤៥។
ក្នុងសន្និសីទកាសែត លោក កៅ គឹមហួន បានលើកឡើងថា “រដ្ឋមន្ត្រីការបរទេសអាស៊ាន បានអនុម័តទៅលើឯកសារគោលនៅក្នុងការបង្កើត និងការដាក់ឲ្យប្រើប្រាស់នៃវិទ្យាស្ថានអាស៊ាន ដើម្បីសន្តិភាព និងសម្របសម្រួល។ រដ្ឋមន្ត្រីការបរទេសអាស៊ានក៏បានពិភាក្សាជាច្រើន ជាពិសេសជុំវិញទំនាក់ទំនងក្រៅតំបន់អាស៊ាន និងជុំវិញតួនាទីស្នួលរបស់អាស៊ាន បានន័យថា អាស៊ាន ត្រូវរក្សាតួនាទីស្នួល ទៅលើយន្តការតំបន់ ដែលអាស៊ានបានបង្កើត ជាពិសេសនៅក្នុងក្របខណ្ឌអាស៊ាន បូក១ អាស៊ាន បូក ៣ វេទិកាតំបន់អាស៊ាន និងកិច្ចប្រជុំកំពូលអាស៊ីបូព៌ា”។
លោក កៅ គឹមហួន បានបន្តថា “ក្នុងន័យនេះ រដ្ឋមន្ត្រីការបរទេសអាស៊ាន បានគូសបញ្ជាក់ថា អាស៊ានត្រូវតែសម្របសម្រួល ហើយនិងធ្វើយ៉ាងណាឲ្យមានគោលជំហររួម ពាក់ព័ន្ធបញ្ហាមួយចំនួន ដូចជា ការប្រឆាំងនឹងភេរវកម្ម បំរែបំរួលអាកាសធាតុ និងឧក្រិដ្ឋកម្មឆ្លងដែន។ល។ និង។ល។ អីចឹងអ្វីដែលសំខាន់ គឺរដ្ឋមន្ត្រីការបរទេសអាស៊ាន បានជជែកច្រើនលើបញ្ហានេះ ហើយជាពិសេសទៀត គឺការពង្រឹងភាពជាដៃគូ និងកិច្ចសហប្រតិបត្តិការ ៦ ប្រទេស ដែលជាដៃគូអាស៊ាន និងប្រទេសដែលបានគាំទ្រ ជាពិសេសប្រទេសដែលបានបណ្តាក់ឯកអគ្គរដ្ឋទូត ឯកអគ្គរាជទូត នៅអាស៊ាន ដែលបច្ចុប្បន្នមាន៦៣ ប្រទេស។ ដូច្នេះអាស៊ាន មានការរីកចម្រើន និងមានការទទួលស្គាល់ មិនត្រឹមតែតំបន់ តែជាសកល”។
នៅពេលរសៀលម៉ោង ១ និង ៣០ នាទី ថ្ងៃទី៩កក្កដា ឆ្នាំ២០១២ រដ្ឋមន្ត្រីការបរទេសអាស៊ាន បានបន្តកិច្ចប្រជុំ ដោយបិទទ្វារ។ រហូតដល់ល្ងាចម៉ោង ៤ និង ១៥ នាទី រដ្ឋមន្ត្រីការបរទេសអាស៊ាន នឹងចុះហត្ថលេខាលើសេចក្តីប្រកាស ស្តីពី ពិធីសារ លើសន្ធិសញ្ញា នៃតំបន់អាស៊ីអាគ្នេយ៍ គ្មានអាវុធនុយក្លេអ៊ែរ។
ក្រោយពីបិទបញ្ចប់កិច្ចប្រជុំរដ្ឋមន្ត្រីការបរទេសអាស៊ាន លើកទី៤៥ នាល្ងាចថ្ងៃទី៩កក្កដា ឆ្នាំ២០១២ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា និងជាប្រធានអាស៊ាន នឹងធ្វើសន្និសីទកាសែត នៅវិមានសន្តិភាព៕