ភ្នំពេញៈលោក ឡុង ដារ៉ា មេធាវីការពារក្ដីលោកឧកញ៉ា កុក អាន បានឲ្យដឹងថា តុលាការកំពូលនឹងធ្វើការជំនុំជម្រះលើបណ្ដឹងសារទុក្ខព្រហ្មទណ្ឌរបស់លោក ហេង ឈាង អតីតអគ្គនាយកក្រុមហ៊ុន Brothers Co, LTD និងភរិយារបស់លោកគឺអ្នកស្រី ទេព កូលាប សាកលវិទ្យាធិការសាកលវិទ្យាល័យភ្នំពេញអន្តរជាតិ(PPIU)នៅថ្ងៃទី២៨កញ្ញា២០១២ នេះ។
Thursday, 27 September 2012
ប៊ុត រស្មីគង្គា
ភ្នំពេញ ប៉ុស្តិ៍
លោកហេង ឈាងអតីតអគ្គនាយកក្រុមហ៊ុន Brothers Co, LTD។ រូបថតហេង ជីវ័ន
លោកមេធាវីបានបានបញ្ជាក់ថា សវនាការលើបណ្ដឹងសារទុក្ខព្រហ្មទណ្ឌរបស់លោក ហេង ឈាង និងអ្នកស្រី ទេព កូលាបនេះ នឹងត្រូវធ្វើដោយក្រុមប្រឹក្សាអង្គចៅក្រម ដែលដឹកនាំដោយឯកឧត្ដម ឃឹម ប៉ុណ្ណ ដែលជាអនុប្រធានតុលាការកំពូល និង តំណាងមហាអយ្យការ ឯកឧត្ដម ឈួន ចាន់ថា។
លោក ឡុង ដារ៉ាបានថ្លែងថា៖«ខ្ញុំមានភស្តុតាងនិងឯកសាររឹងមាំនៅក្នុងករណីនេះ។ ខ្ញុំសង្ឃឹមថា តុលាការកំពូលនឹងរកយុត្តិធម៌ដល់កូនក្ដីខ្ញុំ ហើយនឹងតម្កល់ការសមេ្រចចិត្តរបស់តុលាការជាន់ក្រោម»។
លោក ឡុង ដារ៉ាបានបន្ថែមថា កូនក្ដីលោក គឺលោកឧកញ៉ា កុកអាន សមាជិកព្រឹទ្ធសភា នឹងចូលរួមនៅក្នុងសវនាការចុងក្រោយរបស់តុលាការកំពូលនៅ ព្រឹកថ្ងៃសុក្រនេះ។
លោក អ៊ន ហ៊ីង មេធាវីការពារក្ដីលោក ហេង ឈាង និងអ្នកស្រី ទេព កូលាប បានប្រាប់ភ្នំពេញប៉ុស្តិ៍ថា កូនក្តីរបស់លោកទាំងពីរ ក៏នឹងមានវត្តមាននៅក្នុងសវនាការលើបណ្តឹងសារទុក្ខរបស់ពួកគាត់នៅព្រឹកថ្ងៃសុក្រនេះ ដែរ។
លោកមេធាវី អ៊ន ហ៊ីង បានមានប្រសាសន៍ថា៖«កូនក្ដីខ្ញុំគឺលោក ហេង ឈាង និងអ្នកស្រី ទេព កូលាប ត្រូវបានតុលាការជាន់ទាបកាត់ទោសឲ្យជាប់ពន្ធនាគារដោយសារតែមានរបាយការណ៍លម្អៀងដែលធ្វើឡើងដោយលោក កាក់ កី នាយកក្រុមហ៊ុន Morison & Accessories ។ ខ្ញុំសង្ឃឹមថា ក្នុងសវនាការចុងក្រោយពួកគាត់នៅថ្ងៃសុក្រនេះ តុលាការកំពូលនឹងរកការពិត និងយុត្តិធម៌ឲ្យពួកគាត់»។
លោកបន្ថែមថា៖ «យោងតាមភស្តុតាងជាក់ស្ដែង និងលិខិតបញ្ជាក់ថ្មីបំផុតរបស់ក្រុមប្រឹក្សាជាតិ គណនេយ្យ និង ឯកសារពាក់ព័ន្ធទាំងអស់ដែលកូនក្ដីខ្ញុំបានដាក់ជូនតុលាការ ប្រសិនបើតុលាការកំពូល បានអាន និង ពិនិត្យដោយម៉ត់ចត់ និង យកមក ពិចារណានោះ តុលាការកំពូលនឹងយល់ឃើញថា កូនក្ដីខ្ញុំមិនបានប្រព្រឹត្តអ្វីខុសដូចការចោទប្រកាន់របស់ពួកគាត់នោះឡើយ»។
លោក ហេង ឈាង បាននិយាយថា៖«តុលាការថ្នាក់ក្រោមទាំងពីរ សំអាងលើរបាយការណ៍មិនពេញលេញរបស់លោកកាក់ កី បានសម្រេចផ្តន្ទាទោស ខ្ញុំបាទ និង ភរិយាឲ្យជាប់ពន្ធនាគារ ម្នាក់ៗចំនួនបីឆ្នាំ និង បង្គាប់ឲ្យភាគីខ្ញុំបាទ សងប្រាក់ជាង ៥៨ លានដុល្លារទៅភាគីលោកឧកញ្ញ៉ា កុក អាន ដែលតាមការពិត ភាគីលោក ឧកញ្ញ៉ា កុក អាន មិនបានបាត់បង់ប្រាក់ សូម្បីតែមួយដុល្លារ ដូចមានបញ្ជាក់ក្នុងលិខិត លេខ UCB12/ចុះ ថ្ងៃទី ២២ ខែ កក្កដា ២០១២ របស់ធនាគារ UCB ស្រាប់»។
«បច្ចុប្បន្ននេះ ខ្ញុំបាទ និងភរិយាបានជាប់ក្នុងពន្ធនាគារយ៉ាងអយុត្តិធម៌ អស់រយៈពេលជាងមួយឆ្នាំ មកហើយ ហើយក្រុមគ្រួសារខ្ញុំបាទបានទទួលរងគ្រោះ យ៉ាងអនោចអាធម បាត់បង់កិត្តិយស ប្រាក់កាស ព្រាត់ប្រាស់ និរាសគ្រួសារ ជាពិសេសកូនតូចៗ ដែលមិនទាន់ដឹងក្តី»។
«ខ្ញុំសង្ឍឹមថា ក្រោយពីបានទទួលលិខិតរបស់ ក្រុមប្រឹក្សាជាតិគណនេយ្យនេះហើយ តុលាការកំពូលនឹងមាន មូលដ្ឋានច្បាស់លាស់ ក្នុងការសម្រេចសេចក្តី ហើយភាគី ខ្ញុំបាទនឹងទទួលបានភាពយុត្តិធម៌ ក្នុងនាម ជាអ្នក វិនិយោគ ជាពាណិជ្ជករ និង ជាប្រជាពលរដ្ឋដែលរស់នៅក្នុងប្រទេស ដែលប្រកាន់ នូវ នីតិរដ្ឋ និង កំពុងមានការរីកច្រើន ស្ទើរគ្រប់វិស័យ»។
គួរបញ្ជាក់ថា លោកហេង ឈាង និង អ្នកស្រី ទេព កូលាប ត្រូវបានចោទប្រកាន់ដោយសាលាដំបូងរាជធានីភ្នំពេញ ពីបទរំលោភសេចក្តីទុកចិត្ត ក្នុងថ្នាក់អភិបាល និង ត្រូវបានប្តឹងដោយ លោកឧកញ្ញ៉ា កុក អាន អគ្គនាយកក្រុមហ៊ុន Brothers Co, LTD និង ជាសមាជិកព្រឹទ្ធសភា។ ពួកគាត់ត្រូវបានចាប់ ឃុំខ្លួនដាក់ពន្ធនាគារ ព្រៃស នៅថ្ងៃទី ១៨ មិថុនា ឆ្នាំ ២០១១។
កាលពីថ្ងៃទី១២មីនា២០១២ សាលាឧទ្ធរណ៍បានកាត់ទោសលោក ហេង ឈាង និងអ្នកស្រី ទេព កូលាប ឲ្យជាប់ពន្ធនាគារម្នាក់ៗរយៈពេល៣ឆ្នាំ និងបង់ប្រាក់ជំងឺចិត្ត៥ម៉ឺនដុល្លារដល់លោកសមាជិកព្រឹទ្ធសភាឧកញ៉ា កុក អាន ដែលជាដើមបណ្ដឹង។
រឿងក្តីនេះមានលក្ខណៈចំលែកៗណាស់
ចោទប្រកាន់បទកេងបន្លំទឹកប្រាក់ ៥៨ លានដុល្លា ហើយកាត់ទោសអោយជាប់ទោស ៣ ឆ្នាំនិងសងជំងឺចិត្តតែ ៥ ម៉ឹនដុល្លា [តិចជាង ០.១ ភាគរយ] បើមានទោសពិតប្រាកដ ។ ដើមបណ្តឹងសុខចិត្តអោយតែឈ្នះក្តី ទោះជាបាត់បង់ធនធាន – តើគួរអោយជឿបានទេ?
រឿងក្តីនេះនឹងឆ្លុះបញ្ចាំងពីតថៈភាពក្នុងសង្គមបច្ចុប្បន្នរវាង ប្រព័ន្ធតុលាការ-ជញ្ជិងយុត្តិធ៏ម និង កូនក្តីដែលមានអំណាច និង ទឹកលុយ…
គួរតែសុំអោយក្រុមហ៊ុនថតកុនរឿង ប៉ាវចិន បញ្ចូលវគ្គមួយឈុតនេះក្នុងរឿងភាគផង……
តាមដំណើររឿន ហាក់ដូចជាការចោទប្រកាន់របស់ដើមបណ្តឹងដូចជាគ្មានមូលដ្ឋានច្បាស់លាស់សោះ ចុះហេតុអ្វីហ៊ានដាក់ពាក្យបណ្តឹង ? ឬអាងមានលុយ និងបុណ្យស័ក្តិ ធ្វើអ្វីក៏កើតនោះ ឬការប្តឹងផ្តល់ជាកំសាន្តរបស់ខ្លួន ? សូមទោស ខ្ញុំដូចជារាងឆ្ងល់បន្តិច ។