មន្រ្តីសាលារាជធានីភ្នំពេញ កាលពីព្រឹកថ្ងៃអង្គារនេះ បានស្នើឲ្យអាជ្ញាធរខណ្ឌទាំង៩ ត្រូវបង្កើនកិច្ចប្រតិបត្តិការចុះដកហូតសំភារៈផ្សាយពាណិជ្ជកម្មផលិតផលថ្នាំជក់ នៅតាមតំបន់គោលដៅរបស់ខ្លួនថែមទៀត ដើម្បីចូលរួមទប់ស្កាត់ការរំលោភបំពានលើអនុក្រឹត្យស្តីពី«ការហាមឃាត់ផ្សាយពាណិជ្ជកម្មថ្នាំជក់របស់រាជរដ្ឋាភិបាលកម្ពុជា»។
Tuesday, 09 October 2012
ឃួន លក្ខិណា
ភ្នំពេញ ប៉ុស្តិ៍
លោក ទូច សារ៉ុម អភិបាលរងរាជធានីភ្នំពេញបានមានប្រសាសន៍ ក្នុងអង្គសិក្ខាសាលា ដែលបានធ្វើឡើងនៅទីស្នាក់ការសាលារាជធានី កាលពីថ្ងៃទី៩ ខែតុលាថា ដោយមានការយកចិត្តទុកដាក់ពីក្រសួងពាក់ពន្ធ័នានា ទើបធ្វើឲ្យការផ្សាយពាណិជ្ជកម្មបារីនៅរាជធានីភ្នំពេញ ត្រូវបានថយចុះគួរឲ្យកត់សំគាល់ ក្រោយពេលរាជរដ្ឋាភិបាលដាក់ចេញនូវអនុក្រឹត្យ ស្តីពីការហាមឃាត់ការផ្សាយពាណិជ្ជកម្មបារី។
លោកបន្តថា សាលារាជធានីបានចូលរួមចំណែកអនុវត្តអនុក្រឹត្យនេះ ដោយបានចេញសេចក្តីជូនដំណឹង ទៅឲ្យក្រុមហ៊ុនថ្នាំជក់ និងអ្នកពាក់ពន្ធ័ ឲ្យបញ្ឈប់រាល់ការផ្សាយពាណិជ្ជកម្មឲ្យបានមុនខែសីហា ឆ្នាំ២០១១ បើពុំដូច្នេះទេ និងចាត់វិធានការត្រួតពិនិត្យដកហូតសំភារៈផ្សាយពាណិជ្ជកម្មផលិតផលថ្នាំជក់។
លោកបញ្ជាក់ថា៖« កន្លងមកសាលាខណ្ឌ មួយចំនួន បានអនុវត្តតាមការជូនដំណឹងរបស់សាលារាជធានី ដោយទទួលបានប្រសិទ្ធភាព ប៉ុន្តែនៅមានសាលាខណ្ឌខ្លះទៀត កំពុងត្រៀមប្រតិបត្តិការលើការងារនេះ ដូច្នេះខ្ញុំសង្ឈឹមថា តាមរយៈសិក្ខាសាលាថ្ងៃនេះ និងពន្យល់ឲ្យកាន់តែច្បាស់ពីអនុក្រិត្យនេះ ដើម្បីពង្រឹងការអនុវត្តឲ្យកាន់តែមានប្រសិទ្ធភាពខ្ពស់ថែមទៀត»។
សូមបញ្ជាក់ថារាជរដ្ឋាភិបាលកម្ពុជាបានដាក់ចេញនូវអនុក្រឹត្យស្តីពីវិធានការផ្សាយពាណិជ្ជកម្មផលិតផលថ្នាំជក់ កាលពីថ្ងៃទី២៤ ខែកុម្ភៈ ឆ្នាំ២០១១។