ភ្នំពេញៈ កាលពីម្សិលមិញនេះមានភាពភ្ញាក់ផ្អើលប្រកបដោយក្តីសង្វេគមួយត្រូវបានគេមើលឃើញនៅលើបណ្តាញសង្គមហ្វេសប៊ុក នៅខណៈពេលដែលរូបថតមួយសន្លឹកត្រូវបានគេបង្ហោះឡើងដែលសបញ្ជាក់ឲ្យឃើញថា បុរសពីរនាក់កំពុងដេកស្លាប់ហើយអ្វីដែលកាន់តែធ្វើឲ្យទស្សនិកជនភ្ញាក់ផ្អើលទៀតនោះគឺអ្នកដែលស្លាប់ក្នុងរូបថតនោះគឺតារាកំប្លែងនាយ ពាង និងនាយកណ្តុរ។
Thursday, 09 May 2013
សេត គឹមសឿន
ភ្នំពេញ ប៉ុស្តិ៍
តារាកំប្លែងជើងថ្មីនាយ កណ្តុរ និងនាយ ពាង ដែលមុនល្បីថាស្លាប់។ រូបថត សេត គឹមសឿន
អ្នកនិយមលេងបណ្តាញសង្គមហ្វេសប៊ុកបានទទួលនូវអារម្មណ៍ស្រឡាំងកាំងកាល ពីល្ងាចម្សិលមិញនៅពេលរូបថតមួយសន្លឹកត្រូវបានគេឃើញបង្ហោះបន្តកន្ទុយគ្នាសបញ្ជាក់ពីការស្លាប់របស់តារាកំប្លែងកំពុងមានមុខមាត់នាយពាង និងនាយ កណ្តុរ។ រូបថតនោះ គេបានមើលឃើញថា តារាកំប្លែងទាំងពីរដួងហាក់ដូចជាស្លាប់ដោយទទួលរងគ្រោះថ្នាក់ចរាចរណ៍ដោយនៅក្នុងរូបនោះគេបានឃើញប្រជាជនជាច្រើននាក់កំពុងចោមរោមមើលយ៉ាងកុះករផងដែរ។
អ្នកលេងហ្វេសប៊ុកដែលបានឃើញរូបថតនោះបានចោទសួរឡើងគួរឲ្យភ្ញាក់ផ្អើលថា តើតារាកំប្លែងទាំងពីរនាក់ស្លាប់មែនទែន? ហេតុអ្វីបានជាពួកគេស្លាប់? ពួកគេបានចោទសួរគ្នាទៅវិញទៅមកដោយអ្នកខ្លះនិយាយថា ពួកគេពិតជាស្លាប់មែនទែន ឯអ្នកខ្លះទៀតបានបញ្ជាក់ថា រូបថតដែលពួកគេថតនោះប្រហែលជាគេថតភាពយន្តតែប៉ុណ្ណោះ មិនមែនសុខៗគេស្លាប់បែបនេះទេ។
ទោះបីជាយ៉ាងណា មិនទាន់មានការបញ្ជាក់ពីក្រុមគ្រួសារ និងអ្នកសិល្បៈទាំងពីរឡើយនៅពេលភ្លាមនោះ តែតាមមិត្តភក្តិពួកគេបានបញ្ជាក់ឲ្យដឹងថា រូបថតនេះមិនមែនអ្នកទាំងពីរស្លាប់មែននោះទេ តែជាការសម្តែងរបស់ពួកគេឲ្យបានល្អឥតខ្ចោះដូចជាស្លាប់មែនទែនតែប៉ុណ្ណោះ ហើយរូបថតនោះក៏មិនដឹងអ្នកណាថតបង្ហោះនៅលើហ្វេសប៊ុកដែរ។ យ៉ាងនេះក្តីក៏អ្នកអះអាងម្នាក់នេះមិនបានបញ្ជាក់ថា ពួកគេសម្តែងនៅក្នុងភាពយន្តអ្វីដែរ។
ដើម្បីបញ្ជាក់ឲ្យបានកាន់តែច្បាស់ភ្នំពេញ ប៉ុស្តិ៍ បានព្យាយាមទាក់ទងទៅតារាកំប្លែងនាយ កណ្តុរ ជាច្រើនដង តែពេលនេះទូរស័ព្ទរបស់តារាកំប្លែងរូបនោះមិនអាចទាក់ទងបានដែលនេះកាន់តែធ្វើឲ្យមានចម្ងល់ថា តើនាយ កណ្តុរ ពិតជារងគ្រោះអ្វីមួយបណ្តាលឲ្យស្លាប់មែនទេដឹង? លុះដល់រសៀលម៉ោងប្រហែលពីរ ទើបទូរស័ព្ទរបស់តារារូបនេះអាចទាក់ទងបាន។
ពាក់ព័ន្ធនឹងភាពភ្ញាក់ផ្អើលនេះ តារាកំប្លែងដែលទើបលេចវត្តមាននៅក្នុងពិភពសិល្បៈនៅឆ្នាំ២០១១ នាយកណ្តុរ បានឲ្យដឹងថា រូបលោកក៏មានការភ្ញាក់ផ្អើល និងខ្លាចខ្លួនឯងដែរនៅពេលឃើញរូបរបស់ខ្លួនមានសភាពបែបនេះ។
នាយ កណ្តុរ បានឲ្យដឹងថា រូបនោះគឺជាផ្នែកមួយនៃឈុតក្នុងរឿងខ្នាតធំមួយរបស់ផលិតកម្ម ភូមិពេជ្រភាពយន្ត ក្រោមចំណងជើងថា «ព្រាយខ្លា»។ លោកបានឲ្យដឹងថា ដំបូងរូបនេះលោកបង្ហោះនៅក្នុងហ្វេសប៊ុកដោយមានសរសេរអក្សរបញ្ជាក់យ៉ាងត្រឹមត្រូវតែនៅពេលអ្នកឃើញចេះតែបង្ហោះបន្តពីមួយទៅមួយដោយមិនបានបញ្ជាក់ច្បាស់លាស់ ទើបបណ្តាលឲ្យមានភាពភ្ញាក់ផ្អើលនេះកើតឡើងតែម្តង។ លោកបានបញ្ជាក់ថា លោកមិនមានចេតនាបង្កភាពចលាចលបែបនេះឡើយ។ នាយកណ្តុរនិយាយថា៖«រូបនោះបងខ្ញុំមើលខ្លួនឯងក៏ខ្លាចដែរ តែដំបូងពេលបង្ហោះនោះ ខ្ញុំបានសរសេរប្រាប់ច្បាស់ណាស់ តែមិនដឹងយ៉ាងម៉េចបានជាក្រោយមកមានតែរូប ហើយគេម្នាក់ៗភ្ញាក់ផ្អើលគ្រប់ៗគ្នា»។ លោកបានឲ្យដឹងថា រូបនេះគឺស្ថិតឈុតមួយនៃរឿង «ព្រាយខ្លា» ដែលរឿងនេះនិយាយពីអ្នកឡើងកាប់ឈើលក់ តែក៏ត្រូវខ្លាខាំស្លាប់ ហើយក៏ក្លាយជាព្រាយតែម្តង។
ដោយមុននេះបានធ្វើឲ្យទស្សនិកជនយល់ច្រឡំ នាយ កណ្តុរ ក៏បានសម្តែងនូវក្ដីសង្ឃឹមវិញថា ក្រោយពេលទស្សនិកជនដឹងរឿងនេះ ពួកគាត់នឹងគាំទ្រចំពោះរឿងខ្នាតធំដែលលោកកំពុងតែថតនេះដោយលោកបញ្ជាក់ថា រឿងនេះប្រាកដជាល្អមើលជាងរឿងកន្លងមក៕
Nonsense. Hmmmmmm useless!!!
Srey khmer , does this time your vulga swelling and itchy?…
Let me know I can make you screaming forever …………………………………….