ដោយ៖ ស៊ុន ណារិន
ថ្ងៃចន្ទ ទី28 ខែតុលា ឆ្នាំ2013
http://vodhotnews.com
មន្ត្រីជាន់ខ្ពស់នៃក្រសួងការបរទេស កម្ពុជា និងថៃ ជួបគ្នានៅថ្ងៃចន្ទនេះ ដើម្បីពិភាក្សាពីការអភិវឌ្ឍតំបន់ព្រំដែនកម្ពុជា-ថៃ ឲ្យកាន់តែមានការរីកចម្រើនថែមទៀត តាមរយៈការបើកច្រកព្រំដែនថ្មីៗមួយចំនួន។
សេចក្តីជូនព័ត៌មានរបស់ក្រសួងការបរទេស កម្ពុជា ចេញផ្សាយនៅថ្ងៃទី២៤ ខែតុលា ឲ្យដឹងថាក្រុមការងារកម្ពុជា ដែលចូលរួមពិភាក្សា ត្រូវដឹកនាំដោយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង ។ ចំណែកក្រុមការងារថៃ នឹងត្រូវដឹកនាំដោយរដ្ឋមន្ត្រីក្រសួងការបរទេសថៃ លោក សូរ៉ាពង្ស តូវីចាក់ឆៃគល់។ កិច្ចប្រជុំនេះ ត្រូវធ្វើឡើងនៅក្រុងប៉ោយប៉ែត។
សេចក្តីប្រកាសព័ត៌មានបន្តថា ការពិភាក្សា ក៏នឹងនិយាយពីការបើកច្រកព្រំដែនថ្មីមួយចំនួនទៀត ដើម្បីបង្កលក្ខណៈងាយស្រួលក្នុងការចរាចរណ៍ និងប្រជាជននៅតាមព្រំដែន ក្នុងតំបន់ទាំងនោះ។ ក្នុងការពិភាក្សានោះ ភាគីទាំងពីរ ក៏នឹងនិយាយពីការរក្សានូវសន្តិសភាព សន្តិសុខ និងស្ថិរភាព នៅតាមព្រំដែននៃប្រទេសទាំងពីរ។កម្ពុជា និងប្រទេសថៃ មានច្រកព្រំដែន ប្រមាណជា៦រួមគ្នា។
ការជួបជុំគ្នានេះ ធ្វើឡើងមុនពេល តុលាការអន្តរជាតិទីក្រុងឡាអេ ICJ គ្រោងនឹងបកស្រាយសាលក្រមឆ្នាំ១៩៦២ ករណីប្រាសាទ ព្រះ វិហារតាមការស្នើសុំរបស់ភាគីកម្ពុជា នៅថ្ងៃទី១១ខែវិច្ឆិកា ខាងមុខនេះ បន្ទាប់ពីបានបើកសវនាការចាប់ពីថ្ងៃទី១៥ដល់ថ្ងៃទី១៩ខែមេសា។
កាសែតបាងកកប៉ុស្តិ៍រាយការណ៍កាលពីថ្ងៃអាទិត្យថា ការជួបពិភាក្សានេះ ក៏នឹងមានតំណាងពីកងកម្លាំងយោធា ចូលរួមផងដែរ ហើយការពិភាក្សាជាការពង្រឹងទំនាក់ទំនងនៃប្រទេសទាំងពីរ។ មន្ត្រីថៃប្រាប់កាសែតបាងកកប៉ុស្តិ៍ថៃថា ការពិភាក្សា នឹងធានាថា ទំនាក់ទំនងតាមព្រំដែនកម្ពុជា-ថៃ នឹងមិនត្រូវបានប៉ះពាល់ដោយសេចក្តីសម្រេចរបស់តុលាការ។
កន្លងទៅ នាយករដ្ឋមន្ត្រីថៃ លោកស្រី យីងឡាក់ ប្រកាសថានឹងធ្វើការជាមួយភាគីកម្ពុជា ដើម្បីរក្សាសន្តិភាពនៅតាមព្រំដែន បើទោះជាសេចក្តីសម្រេចតុលាការអន្តរជាតិទីក្រុងឡាអេ(ICJ) នៅថ្ងៃទី១១ខែវិច្ឆិកា យ៉ាងណាក៏ដោយ។
ក្រោយពីការបកស្រាយតទល់គ្នាជាមួយ ភាគីថៃ សារព័ត៌មាននៅកម្ពុជា ចុះផ្សាយថា តុលាការអន្តរជាតិទីក្រុងឡាអេ គ្រោងនឹងប្រកាសសេចក្តីសម្រេចរឿងដីទំហំ ៤.៦ គីឡូម៉ែត្រក្រឡា ក្បែរប្រាសាទព្រះវិហារ នៅចុងខែតុលា ឆ្នាំ២០១៣នេះ៕
សរសេរមកកាន់ លោក ស៊ុន ណារិន តាមរយៈsun_narin@vodhotnews.com