ដោយ៖​ ញឹម សុខន​​
ថ្ងៃចន្ទ ទី28 ខែតុលា ឆ្នាំ2013
http://vodhotnews.com

អ្នកភូមិ​បឹងកក់​មួយចំនួន​ដែល​ប្រឈម​ការបណ្តេញចេញ ខកចិត្ត​ចំពោះ​សាលា​រាជធានី​ភ្នំពេញ​ដែល​យឺតយ៉ាវ​ក្នុង​ការចុះវាស់វែង​ដី ​ធ្វើ​ប័ណ្ណកម្មសិទ្ធិ​ជូន​ពួកគាត់ តាម​អនុក្រឹត្យ​នាយករដ្ឋមន្ត្រី។​

​កាលពី​ឆ្នាំ​២០១១ ប្រមុខ​រដ្ឋាភិបាល លោក ហ៊ុន សែន ​បាន​ចេញ​អនុក្រឹត្យ​កាត់ ដី​នៅ​តំបន់បឹងកក់​ទំហំ​១២.៤៤​ហិកតា ​ឲ្យទៅ​ពលរដ្ឋ​ដែល​នៅ​សេសសល់​ជិត​១ ០០០​គ្រួសារ នៅ​តំបន់​នោះ ធ្វើជា​កម្មសិទ្ធិ​វិញ បន្ទាប់​ពី​អ្នកភូមិ​ចេញ​តវ៉ា​។​​

អ្នកភូមិ​ដែល​ពុំទាន់​ទទួលបាន​ប័ណ្ណ​កម្មសិទ្ធិ​ដី តាម​អនុក្រឹត្យ ប្រាប់​VOD​នៅ​ថ្ងៃ​ចន្ទ​នេះ​ថា សាលា​រាជធានី​ភ្នំពេញ បាន​សន្យា​ថា​ខ្លួន​ចុះ​វាស់វែង​ដី​ធ្វើ​ប័ណ្ណកម្មសិទ្ធិ​ជូន​ពួកគាត់ នៅ​ថ្ងៃ​ទី​២៥ ខែ​តុលា​នេះ ដើម្បី​បញ្ចប់​ជម្លោះ​។ ប៉ុន្តែ​អ្នក​ភូមិ​អះអាងថា មកដល់ពេលនេះ ពួកគាត់​មិន​ទាន់​ឃើញ​វត្តមាន ​មន្ត្រី​ណា​ម្នាក់​ចុះ​មក​តាម​ការសន្យា​ទេ​ ៖

VOD មិនអាច​សុំ​អត្ថាធិប្បាយ​ពី​អ្នកនាំពាក្យ​សាលា​រា​ធានី​ភ្នំពេញ លោក ឡុង ឌី​ម៉ង់​ បានទេ ដោយ​លោក​អះអាងថា លោក​កំពុង​ជាប់​ប្រជុំ​។ ប៉ុន្តែសកម្មជន​ដីធ្លី​មា្ន​ក់​នៅ​តំបន់​បឹង​កក់ ដែល​ទើប​ផ្តាច់ខ្លួន​ចេញពី​ក្រុម​តវ៉ា គឺ​ក្រុម​អ្នកស្រី ទេព វ​ន្នី  ហើយ​កំពុង​មាន​ទំនាក់ទំនង​ល្អ​ជាមួយ​អាជ្ញាធរ​មូលដ្ឋាន គឺ​អ្នកស្រី ហេង មុំ ថ្លែងថា នៅ​សប្តាហ៍​នេះ អភិបាល​រាជធានី​ភ្នំពេញ លោក ប៉ា សុជាតិ​វង្ស គ្រោង​ធ្វើ​ប័ណ្ណកម្មសិទ្ធិ​ដី​ជូន​ពលរដ្ឋ ​ដែល​នៅ​សេសសល់​៣២​គ្រួសារ​ទៀត ដើម្បី​កាត់បន្ថយ​ការចេញ​តវ៉ា  ៖

នាយក​លេខាធិការដ្ឋាន ​នៃ​ក្រុមការងារ​ពិសេស​សិទ្ធិ​លំនៅឋាន លោក សៀ ភារម្យ យល់ថា ជម្លោះ​ដីធ្លី​អូសបន្លាយ​នៅ​តំបន់​បឹងកក់ មកពី​អាជ្ញាធរ​គ្មាន​ឆន្ទៈ​ដោះស្រាយ​បញ្ហា​នេះ តាម​អនុក្រឹត្យ​របស់​នាយករដ្ឋមន្ត្រី ៖

​អ្នកភូមិ​អះអាងថា ពួក​គាត់​នៅ​ជាង​៤០​គ្រួសារ​ទៀត ​ប្រឈម​ការបណ្តេញចេញ ដោយសា​លា​រាជធានី​ភ្នំពេញ​ មិន​ព្រម​ធ្វើ​ប័ណ្ណ​កម្មសិទ្ធិឲ្យ​។  ពួកគាត់​ព្រមាន​ថា បាតុកម្ម​ទ្រង់ទ្រាយ​ធំ នឹង​កើតឡើង​ទៀត​នៅ​សប្តាហ៍​នេះ បើ​អាជ្ញាធរ​មិន​អនុវត្ត​ការសន្យា​របស់​ខ្លួន​៕

សូមសរសេរមកកាន់លោក ញឹម សុខន តាមរយៈ sokhorn@vodhotnews.com​