Fri, 2 January 2015
Chelsea Chapman and មួង វណ្ណឌី
ភ្នំពេញប៉ុស្តិ៍
កំពត: ស្ថិតនៅលើកំពូលភ្នំមួយ ចម្ងាយប្រមាណពីរបីគីឡូម៉ែត្រខាងជើងទីរួមខេត្ដកំពត ការរស់នៅបែបអាថ៌កំបាំងនៃដូនជីម្នាក់ពឹងអាស្រ័យលើអំណាចឫទ្ធិបារមី មានឆ្កែជាញាតិ និងអាហារផ្សែងកំដរមាត់។
មនុស្សមិនច្រើនទេដែលបានដឹងពីការរស់នៅខុសប្លែកពីធម្មតានេះ។ គួរបញ្ជាក់ថា ដូនចាស់រូបនេះបានសង់ផ្ទះលើភ្នំសកាលពីជាង១០ឆ្នាំមុន។
មនុស្សភាគច្រើនហៅគាត់ថា លោកយាយភ្នំស។ ប្រជាពលរដ្ឋក្នុងភូមិអណ្ដូងជីមឿន ស្ថិតនៅក្បែរភ្នំស រមែងធ្វើដំណើរឡើងភ្នំដើម្បីទៅជួបដូនចាស់នោះ។ ពួកគេនិយាយថា យាយភ្នំសអាចព្យាបាលជំងឺ ទស្សន៍ទាយ ស្រោចទឹកប្រោះព្រំ និងដោះអំពើនានា ព្រមទាំងអាចនិយាយសន្ទនាជាមួយសត្វទៀតផង។
អ្នកស្រុកនៅទីនោះម្នាក់ឈ្មោះ កែប ហ៊ីម វ័យ៤២ឆ្នាំ បានឲ្យដឹងថា៖ «ខ្ញុំបានឃើញមនុស្សជាច្រើនសម្រុកទៅជួបយាយភ្នំស បំណងដើម្បីព្យាបាលជំងឺ និងប្រោះព្រំលើកជោគជតារាសី និងមុខរបរកាក់កប»។
លោក ហ៊ីម បានបន្ដថា ពេលមួយ លោកវង្វេងផ្លូវក្នុងព្រៃ។ នៅពេលភរិយាទៅរកលោកយាយភ្នំស គាត់បានទស្សន៍ទាយថា លោកនឹងត្រឡប់មកផ្ទះវិញនៅ ២ថ្ងៃក្រោយ។
យាយបសរូបនេះមិនពិបាករកទេ។ ជារឿយៗ លោកយាយចុះមកជើងភ្នំចម្ងាយប្រមាណ៥០០ម៉ែត្រពីភូមិអណ្ដូងជីមឿន ដែលមានព្រះពុទ្ធរូប និងតង់តូចមួយ។ ទៅដល់ទីនោះ ភ្ញៀវត្រូវបានស្វាគមន៍ដោយសំឡេងព្រុស និងលូរបស់ម្ចាស់ទឹកដី និងជាមិត្ដភក្ដិរបស់លោកយាយ។ ដូនចាស់ស្លៀកពាក់ពណ៌ស ហើយសក់របស់គាត់នៅខ្មៅក្រឹប បើទោះបីជាលោកយាយឈានដល់វ័យ ៩១ ឆ្នាំយ៉ាងណាក៏ដោយ។ ស្នាមញញឹមរបស់លោកយាយបង្ហាញពីក្រអូមមានតែអញ្ចាញប្រកបដោយភាពរួសរាយ។
លោកយាយធ្លាប់រស់នៅក្នុងជីវិតផ្លូវលោកិយដោយរៀបការ ២ ដង និងមានកូន ៧នាក់ ព្រមទាំងបានបម្រើការក្នុងជួររដ្ឋាភិបាលនៅភ្នំពេញ។
លោកយាយដែលបានចាកចេញពីភ្នំពេញក្នុងឆ្នាំ១៩៦២ ព្រោះតែមិនចង់ឃើញអំពើពុករលួយក្នុងសង្គមនោះបានថ្លែងថា៖ «នៅពេលខ្ញុំចាប់ផ្ដើមអស់ទោសៈមោហៈ ទ្រព្យធន លុយកាក់ ផ្ទះសម្បែង ដី និងអ្វីៗគ្រប់យ៉ាង ខ្ញុំងាកមករកការសមាធិវិញ»។
ក្រោយពីស្វែងរកកន្លែងស្ងប់ស្ងាត់អស់រយៈពេលជាច្រើនឆ្នាំនៅលើភ្នំជាង ៧០០ កន្លែង ទីបំផុតលោកយាយបានជួបជម្រកដ៏ស័ក្ដិសមបំផុត គឺភ្នំសនេះឯង។ ដូនចាស់ល្បីខាងជំនឿរូបនេះ រស់នៅជាជីវិតពនេចរដោយមានអាហារចម្អែតក្រពះពឹងលើការបរិច្ចាគសម្ភារ និងលុយកាក់ពីកូនៗរស់នៅភ្នំពេញ និងប្រទេសបារាំង។
ខណៈបដិសេធក្នុងការព្យាបាលរបួសលើរាងកាយ លោកយាយបានអះអាងថា លោកយាយអាចព្យាបាលជំងឺផ្លូវចិត្ដ និងខ្មោចចូល ព្រមទាំងអាចនិយាយជាមួយសត្វផងដែរ។ ប៉ុន្ដែលោកយាយបានបកស្រាយថា ក្នុងនាមជាសាវ័កព្រះសម្មាសម្ពុទ្ធ លោកយាយមិនប្រព្រឹត្ដអាក្រក់ទេ ទាំងការដាក់ស្នេហ៍ និងអំពើផ្សេងៗ។
អ្វីដែលប្រាកដនោះគឺថា លោកយាយស្រឡាញ់សន្ដិភាព និងភាពស្ងៀមស្ងាត់ ឆ្កែ និងការជក់បារី។
លោកយាយបង្ហើបថា៖ «រហូតដល់បច្ចុប្បន្ននេះ ខ្ញុំចង់រស់នៅលើភ្នំនេះរយៈពេលយូរទៅទៀត ពីព្រោះខ្ញុំចង់នៅក្នុងកន្លែងស្ងប់ស្ងាត់ និងការពារភ្នំ។ ប៉ុន្ដែប្រហែលជាថ្ងៃណាមួយ ខ្ញុំនឹងពិចារណាទៅប្រទេសបារាំងរស់នៅជុំកូនចៅនៅទីនោះ»៕ HR
ពូកែណាស់ម៉េចមិនធ្វើយួនអោយឈឺពោះងាប់អស់ទៅ!
បើពូកែមែន បងចង់រៀបការជាមួយអូន!
ខ្មែររវល់តែបែបនឹងបានជាយួននិងសៀមយកដីអស់