កម្ពុជា-នយោបាយ
09/10/2022 – 09:02
ដោយ៖ ជួប នរក្សា
RFI

គណបក្សភ្លើងទៀនក្នុងអំឡុងពេលឃោសនាបោះឆ្នោតឃុំសង្កាត់ AP – Heng Sinith

គណបក្ស​ភ្លើងទៀន​ កាល​ពី​ថ្ងៃ​សៅរ៍​ម្សិល​មិញ​នេះ ​បាន​រៀប​ចំ​ប្រជុំ​ផែនការ​យុទ្ធសាស្រ្ត​សម្រាប់​ការ​បោះឆ្នោត​ជ្រើស​តាំង​តំណាងរាស្រ្ត​ អាណត្តិទី៧​ឆ្នាំ២០២៣​ខាង​មុខ​ ដោយ​មាន​មហិច្ឆតា ​ដណ្តើម​យក​ខ្សែក្រវ៉ាត់​ពីគណបក្ស​អំណាច។​ ក៏​ប៉ុន្តែ​គណបក្ស​ប្រជាជនកម្ពុជា ​ចាត់ទុក​ថា​នេះ​ជា​ការ​ស្រមៃ​ដែល​មិន​អាច​ទៅ​រួច​ ដ្បិត​ការ​បោះឆ្នោត​ស្ថិត​លើ​ឆន្ទៈ​ប្រជាពលរដ្ឋ។​

តាមរយៈកិច្ចប្រជុំដែលមានសមាជិកប្រមាណ១២០នាក់មកពីរាជធានី-ខេត្តចូលរួម បក្សភ្លើងទៀនបានពិភាក្សាអំពីបញ្ហាប្រឈមនៃការដាក់បញ្ជីចុះឈ្មោះបោះឆ្នោត ដ្បិតថ្ងៃទី២០តុលាខាងមុខ គឺ គ.ជ.ប នឹងចាប់ផ្តើមពិនិត្យបញ្ជីឈ្មោះ និងការចុះឈ្មោះបោះឆ្នោត សម្រាប់ការបោះឆ្នោតថ្នាក់ជាតិឆ្នាំ២០២៣។ នេះបើតាមការគូសបញ្ជាក់របស់ លោក ថាច់ សេដ្ឋា អនុប្រធានគណបក្សភ្លើងទៀន។ តាមលោក ថាច់ សេដ្ឋា​ កិច្ចប្រជុំកាលពីថ្ងៃទី៨តុលា គឺជាការណែនាំដើម្បីឲ្យសមាជិកបក្សនៅរាជធានី-ខេត្ត មានការយល់ដឹងពីបញ្ហានេះ។

យ៉ាងណាមិញ នេះគឺជាកិច្ចប្រជុំផែនការយុទ្ធសាស្រ្តរបស់គណបក្សភ្លើងទៀន ជាលើកទី២ ខណៈដែលកិច្ចប្រជុំបែបនេះ ធ្លាប់ធ្វើម្តងនៅខេត្តសៀមរាប កាលពីដើមខែកញ្ញាកន្លងទៅ។ ជាការកត់សម្គាល់ គឺផែនការរបស់គណបក្សប្រឆាំងមួយនេះ មានមហិច្ឆតាឈានទៅការដណ្តើមអំណាច តាមរយៈការបោះឆ្នោតថ្នាក់ជាតិ នៅឆ្នាំ២០២៣ខាងមុខ។

លោក ថាច់ សេដ្ឋា បានអះអាងថា បក្សភ្លើងទៀនមានក្តីសង្ឃឹមច្រើនសម្រាប់ការបោះឆ្នោតជ្រើសតាំងតំណាងរាស្រ្ត អាណត្តិទី៧ឆ្នាំ២០២៣ ប្រសិនបើការរៀបចំការបោះឆ្នោតមានភាពល្អប្រសើរ មិនមានបញ្ហាគួរឲ្យកត់សម្គាល់។

បើតាមលោក ថាច់ សេដ្ឋា គឺគណបក្សភ្លើងទៀនមានយុទ្ធសាស្រ្តក្នុងការទាញសំឡេងពីប្រជាពលរដ្ឋ តាមរយៈការមើលឃើញពីបញ្ហាមួយចំនួនដែលម្ចាស់ឆ្នោតកំពុងប្រឈម។ ក្នុងនោះរួមមានបញ្ហាអយុត្តិធម៌សង្គម បញ្ហាដីធ្លី ធនធានធម្មជាតិ សិទ្ធិសេរីភាពពលរដ្ឋ និងអំពើពុករលួយជាដើម។ អនុប្រធានគណបក្សភ្លើងទៀន អះអាងថា បញ្ហាប្រឈមទាំងនេះ សុទ្ធតែជាផែនការនៃការពង្រាងយុទ្ធសាស្រ្តគោលនយោបាយរបស់គណបក្សភ្លើងទៀន សម្រាប់ការបោះឆ្នោតនៅឆ្នាំក្រោយ។

លោក សុខ ឥសាន អ្នកនាំពាក្យគណបក្សប្រជាជនកម្ពុជា យល់ថា មហិច្ឆតារបស់គណបក្សប្រឆាំងក្នុងការដណ្តើមខ្សែក្រវ៉ាត់ គ្រាន់តែជារឿងធម្មតា ដែលហាចេញពីមាត់របស់អ្នកនយោបាយ ដែលមិនអាចសម្រេចទៅរួច។ លោកថា អ្វីដែលអាចកើតឡើងនៅឆ្នាំ២០២៣ ត្រូវសម្រេចទៅតាមឆន្ទៈរបស់ប្រជាពលរដ្ឋ តាមរយៈការបោះឆ្នោត ខណៈលោកអះអាងថាប្រជាពលរដ្ឋបានទុកចិត្តការដឹកនាំរបស់គណបក្សប្រជាជនកម្ពុជារួចទៅហើយ។

នៅចំពោះមុខនៃការដណ្តើមខ្សែក្រវ៉ាត់អំណាចពីគណបក្សប្រជាជនកម្ពុជា លោក សុខ ឥសាន យល់ថា គ្រាន់ជាក្តីស្រមៃ។ ត្រឹមក្តីសុបន្តិ ដ្បិតការបោះឆ្នោតឃុំ-សង្កាត់កន្លងទៅនេះ បានបង្ហាញលទ្ធផលថា គណបក្សភ្លើងទៀនទទួលបានអាសនៈតែជាង២ពាន់ប៉ុណ្ណោះ ខណៈដែលការបោះឆ្នោតឃុំ-សង្កាត់ កាលពីឆ្នាំ២០១៧ អតីតគណបក្សសង្រ្គោះជាតិទទួលបានជាង៥ពាន់អាសនៈ។ លោក សុខ ឥសាន ចំអកថា តួលេខ បានចាញ់រួចទៅហើយ។

ទោះយ៉ាងណា លោក ថាច់ សេដ្ឋា ទទួលស្គាល់ពីបញ្ហាប្រឈមមួយចំនួន ដែលគេគិតថា ត្រូវដោះស្រាយជាចម្បង ទើបអាចសម្រេចជ័យជំនះនៃការបោះឆ្នោតឆ្នាំក្រោយ។ លោក ថាច់ សេដ្ឋា ថា បញ្ហាសមាសភាពគ.ជ.ប និងការកែលម្អប្រព័ន្ធបោះឆ្នោត នៅតែជាបញ្ហាចោទ ដែលបក្សភ្លើងទៀន កំពុងតស៊ូមតិឲ្យមានការកែទម្រង់៕