Cambodia News | Khmer News - ពត៌មានខ្មែរ

លោក ង៉ូ អាញ់ហ្សុង ឯកអគ្គរដ្ឋទូតវៀតណាមប្រចាំនៅកម្ពុជា បញ្ជាក់ពីចំណងមិត្តភាពកម្ពុជា-វៀតណាមកាន់តែរឹងមាំ

somphy — Fri, 03 Sep 2010 07:03:53 +0000

ដោយ : សុភ័ក្ត្រ
ថ្ងៃទី 3 កញ្ញា 2010
CEN

ភ្នំពេញ: ស្ថានទូតប្រទេសវៀតណាម នៅល្ងាចថ្ងៃទី២ ខែកញ្ញា ឆ្នាំ២០១០ បានប្រារព្ធខួបទទួលបានឯករាជ្យពីអាណានិគមបារាំងទី ៦៥ ឆ្នាំ (២ កញ្ញា ១៩៤៥ – ២ កញ្ញា ២០១០) នៅឯសណ្ឋាគារអ៊ីនធឺកុងទីណង់តាល់នៃទីក្រុងភ្នំពេញ ដោយមានការអញ្ជើញចូលរួមសំណាកមន្ត្រីជាន់ខ្ពស់កម្ពុជា សម្តេច ហេង សំរិន ប្រធានរដ្ឋសភា និងអ្នកកាទូតបរទេសប្រចាំនៅកម្ពុជា ប្រមាណជាង ៣០០ នាក់ ។ ក្នុងពិធីបុណ្យឯករាជ្យនោះមានការសំដែងរបាំ និងច្រៀងចំរៀងតាមប្រពៃណីវៀតណាមផងដែរ ។

លោក ង៉ូ អាញ់ហ្សុង ឯកអគ្គរដ្ឋទូតវៀតណាមប្រចាំនៅកម្ពុជា មានប្រសាសន៍ក្នុងពិធីបុណ្យឯករាជ្យវៀតណាម ដណ្តើមបានពីអាណានិគមបារាំងលើកទី ៦៥ឆ្នាំ (២ កញ្ញា ១៩៤៥ – ២កញ្ញា ២០១០) យ៉ាងនេះថា នៅក្នុងឆ្នាំបុណ្យនៃឯករាជ្យឆ្នាំនេះ វៀតណាមបានរៀបចំបុណ្យជាប្រវត្តិសាស្ត្រជាច្រើន គឺនៅខែតុលា ឆ្នាំ២០១០ នៃការកើតអតីតទីក្រុងហាណូយ ហើយឆ្នាំនេះដែល ប្រទេសវៀតណាមទទួលរ៉ាប់រងនូវតួនាទីជាប្រធានសហគមន៍អាស៊ានផងដែរ ហើយជាផែនទីនៃការកសាងសហគមន៍អាស៊ាន ព្រមទាំងរដ្ឋធម្មនុញ្ញអាស៊ាន ។

លោក ង៉ូ អាញ់ហ្សុង មានប្រសាសន៍បន្តទៀតថា ក្នុងរយៈពេល ៦៥ឆ្នាំ នៃការទទួលបានឯករាជ្យ គឺប្រទេសវៀតណាមបានសំរេចនូវសមិទ្ធិផលធំៗជាច្រើន ក្នុងការឈានទៅរកសង្គមសំបូរបែប សង្គមមានសមភាព ។ វៀតណាម ព្យយាមអនុវត្តគោលនយោបាយកាទូត ដែលមានលក្ខណៈឯករាជ្យ និងត្រៀមខ្លួនជានិច្ចជាមិត្តភក្តិជាប្រទេសនានាលើសកលលោក ព្រមទាំងប្រទេសជិតខាងភូមិផងរបងជាមួយដោយស្មោះត្រង់ ។ បច្ចុប្បន្ននេះវៀតណាម បាននឹងកំពុងធ្វើសមាហរណកម្មយ៉ាងសកម្ម ចូលក្នុងតំបន់ និងលើឆាកអន្តរជាតិឲ្យបានស្មើនឹងប្រទេសនានាលើសកលលោក ដើម្បីឈានទៅមុខក្នុងសតវត្សទី២១ នេះ ។

លោក ង៉ូ អាញ់ហ្សុង មានប្រសាសន៍លើកឡើងថា ដោយសារទំនាក់ទំនងមិត្តភាព និងកិច្ចសហប្រតិបត្តិការប្រសើរជាប្រពៃរវាងវៀតណាម និងកម្ពុជា ត្រូវបានពង្រឹងដោយឥតឈប់ឈរ និងមានការរីកលូតលាស់យ៉ាងខ្លាំងក្លា លើគ្រប់វិស័យ ដើម្បីភាពសំបូររុងរឿងនៃប្រជាជនទាំង២ ដើម្បីសក្ខីភាព ការអភិវឌ្ឍន៍ប្រកបដោយចិរភាពក្នុងតំបន់ និងសកលលោក ។ ហើយក្នុងឱកាសនេះ វៀតណាមសូមសំដែងនូវការស្មោះស្ម័គ្រចំពោះប្រជាជនកម្ពុជា តែងតែគាំទ្រនូវបុព្វហេតុជាតិទាមទារឯករាជ្យមកវិញ របស់វៀតណាមពីមុនក៏ដូចជាបច្ចុប្បន្ននេះ ។

លោក ហោ ណាំហុង ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស នៃប្រទេសកម្ពុជាបានមានប្រសាសន៍ ក្នុងពិធីបុណ្យឯករាជ្យទី៦៥ នៃប្រទេសវៀតណាម (២កញ្ញា ២០១០) យ៉ាងនេះថា ប្រទេសកម្ពុជា-វៀតណាម មានមិត្តភាពដ៏យូរលង់ជាមួយគ្នា ។ លោកឧបនាយករដ្ឋមន្ត្រីមានប្រសាសន៍បន្តថា ពាណិជ្ជកម្មវៀតណាមមកកម្ពុជានៅឆ្នាំ២០០៩ កន្លងមកនេះមានទឹកប្រាក់ជាង ១៣០០ លានដុល្លារ ហើយនៅឆ្នាំ២០១០ នេះ ការផ្លាស់ប្តូរពាណិជ្ជកម្មជាមួយគ្នាទៅវិញទៅមក នឹងកើនឡើងជាង ២០០០ លានដុល្លារ ហើយគួរឲ្យកត់សំគាល់ប៉ុន្មានឆ្នាំកន្លងមកនេះ ការវិនិយោគរបស់វៀតណាម នៅកម្ពុជាមានភាពទូលំទូលាយច្រើន ។

ប្រទេសវៀតណាម បានតស៊ូដណ្តើមបានឯករាជ្យពីដៃអាណានិគមបារាំង នៅថ្ងៃទី២ ខែកញ្ញា ឆ្នាំ១៩៤៥ បន្ទាប់ពីស្ថិតនៅក្រោមអាណានិគមបារាំងអស់រយៈពេល ៨០ ឆ្នាំមកនោះ ។ ប្រទេសវៀតណាមបានជួយវាយបណ្តេញផ្តួលរំលំរបបកម្ពុជាប្រជាធិបតេយ្យ និងជារបបវាលពិឃាតសំលាប់ប្រជាជនកម្ពុជា អស់ជិត ២ លាននាក់ រយៈពេលជាង ៣ឆ្នាំ គឺការវាយរំលំរបបខ្មែរក្រហមកាលពីថ្ងៃទី៧ មករា ឆ្នាំ១៩៧៩ ហើយអស់រយៈពេលជាង ៣០ ឆ្នាំ កន្លងមកនេះពួកអតីមេដឹកនាំរបបខ្មែរក្រហមចំនួន ៥នាក់ ត្រូវបានចាប់ខ្លួនមកជំនុំជម្រះទោសក្រោមច្បាប់តុលាការប្រទេសកម្ពុជា និងមានការចូលរួមពីអង្គការសហប្រជាជាតិ ។ ពួកមេដឹកនាំរបបខ្មែរក្រហមត្រូវបានកាត់ទោស និងកំពុងប្រឈមកាត់ទោសរួមមាន កាំង ហ្គេចអ៊ាវ ហៅឌុច អតីតមេគុកទួលស្លែង ឬស២១ អៀង សារី អតីតឧបនាយករដ្ឋមន្ត្រី-រដ្ឋមន្ត្រីក្រសួងការបរទេស ខៀវ សំផន អតីតប្រមុខរដ្ឋរបបខ្មែរក្រហម , នួន ជា អតីតប្រធានរដភា និងអ្នកស្រីអៀង ធីរិទ្ធ អតីតរដ្ឋមន្ត្រីក្រសួងសុខាភិបាល និងសង្គមកិច្ច ពួកគេត្រូវប្រឈមការកាត់ទោសឧក្រិដ្ឋកម្ម ប្រឆាំងមនុស្សជាតិ និងប្រល័យពូជសាសន៍អម្លុងពេលពួកគេគ្រប់គ្រងអំណាច ៕

ថាក់ស៊ីន ប្រាប់ពីមូលហេតុនៃការលាឈប់ពីតំណែងជាទីប្រឹក្សា ហ៊ុន សែន

somphy — Fri, 03 Sep 2010 06:43:12 +0000

ដោយ យន់ សាមៀន
2010-09-03
វិទ្យុអាស៊ីសេរី

អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ នៅថ្ងៃ៣ កញ្ញានេះ បានឲ្យដឹងថា លោកបានលាឈប់ពីតំណែងជាទីប្រឹក្សារបស់លោក ហ៊ុន សែន និងជាទីប្រឹក្សាសេដ្ឋកិច្ចរដ្ឋាភិបាលកម្ពុជា ដើម្បីចៀសវាងការរំខាន និងដោយសារតែលោកគ្មានពេលវេលាគ្រប់គ្រាន់។

អតីត នាយក រដ្ឋមន្ត្រី ថៃ លោក ថាក់ស៊ីន ស៊ីណាវ៉ាត់ (Thaksin Shinawatra) (AFP Photo)

លោក ថាក់ស៊ីន ស៊ីណាវ៉ាត្រ (Thaksin Shinawatra) អតីតនាយករដ្ឋមន្ត្រីថៃ និងជាទណ្ឌិតកំពុងភៀសខ្លួនពីការតាមចាប់របស់អាជ្ញាធរថៃ បានប្រកាសឲ្យដឹងថា លោកបានឈប់ពីតួនាទីលោកជាទីប្រឹក្សាសេដ្ឋកិច្ចរដ្ឋាភិបាលកម្ពុជា ដោយសារមិនចង់ឲ្យមានការរំខានលោក ហើយលោកត្រូវការពេលវេលាទំនេរសម្រាប់ខ្លួនលោកផ្ទាល់។

ការប្រកាសរបស់លោក ថាក់ស៊ីន ស៊ីណាវ៉ាត្រ គឺក្រោយពេលជាងមួយសប្ដាហ៍ បន្ទាប់ពីលោកបានលាលែងពីតំណែងរបស់គាត់ ហើយការលាលែងរបស់លោក ថាក់ស៊ីន ស៊ីណាវ៉ាត្រ បានធ្វើឲ្យកម្ពុជា និងថៃ បានបន្តទំនាក់ទំនងការទូតឡើងវិញ ក្រោយពេល ៩ខែ ដែលប្រទេសទាំងពីរនេះបានកោះហៅឯកអគ្គរាជទូតរបស់ខ្លួនរៀងៗខ្លួន ទៅប្រទេសនីមួយៗវិញមក។

កាសែតថៃ ឌឹ ណេសិន (The Nation) នៅថ្ងៃទី៣ ខែកញ្ញា បានដកស្រង់សម្ដីលោក ថាក់ស៊ីន ស៊ីណាវ៉ាត្រថា ការលាលែងពីតំណែងរបស់លោក ដោយសារមានការចោទប្រកាន់ប្រឆាំងលោកជាច្រើន ដោយសារតែតួនាទីរបស់លោកក្នុងរដ្ឋាភិបាលកម្ពុជា ហើយដើម្បីជៀសវាងពីការរំខាននេះបន្តទៅទៀត។ លោកបានស្នើទៅលោក ហ៊ុន សែន ដើម្បីឈប់ទីតួនាទីនេះ។

លោក ថាក់ស៊ីន ស៊ីណាវ៉ាត្រ បន្ថែមថា លោកមានតំណែង ប៉ុន្តែលោកមិនអាចបំពេញតួនាទីលោកឲ្យកម្ពុជាបាននោះទេ ពីព្រោះលោកកម្រមានពេលវេលាដើម្បីធ្វើដំណើរទៅកម្ពុជា។ លោកបន្តទៀតថា ប្រសិនបើរដ្ឋាភិបាលកម្ពុជា ផ្ដល់តំណែងឲ្យលោកសាជាថ្មីវិញនោះ លោកនឹងបដិសេធ មិនទទួលយកតំណែងនេះបន្តទៅទៀតទេ ពីព្រោះលោកចង់ធ្វើការងារផ្ទាល់ខ្លួនរបស់លោកវិញ។

លោក កុយ គួង អ្នកនាំពាក្យក្រសួងការបរទេសកម្ពុជា នៅថ្ងៃសុក្រ ទី៣ ខែកញ្ញា មានប្រសាសន៍ថា កម្ពុជាទទួលការលាលែងរបស់លោក ថាក់ស៊ីន ស៊ីណាវ៉ាត្រ ដោយមូលហេតុថា លោកជាប់រវល់ការងារផ្ទាល់ខ្លួនរបស់លោក។ ប៉ុន្តែលោក កុយ គួង បដិសេធមិនធ្វើអត្ថាធិប្បាយចំពោះការលើកឡើងរបស់លោក ថាក់ស៊ីន ស៊ីណាវ៉ាត្រ ដែលថា លោកត្រូវគេរំខាន។

នាយកប្រតិបត្តិវិទ្យាស្ថានខ្មែរសម្រាប់សហប្រតិបត្តិការ និងសន្តិភាព លោក ឈាង វណ្ណារិទ្ធ មានប្រសាសន៍ប្រាប់វិទ្យុអាស៊ីសេរី នៅថ្ងៃសុក្រថា ការលាលែងរបស់លោក ថាក់ស៊ីន ស៊ីណាវ៉ាត្រ ទំនងជាលោកចង់ស្តារប្រជាប្រិយភាពរបស់លោកឡើងវិញ ក្រោយពេលមានការចោទប្រកាន់ថា លោកបានក្បត់ជាតិ ដោយមកបម្រើការងារឲ្យរដ្ឋាភិបាលកម្ពុជា ហើយការស្តារឲ្យមានប្រជាប្រិយភាពរបស់លោក ថាក់ស៊ីន ស៊ីណាវ៉ាត្រ ដើម្បីត្រៀមចូលរួមការបោះឆ្នោតរបស់ថៃ ក្នុងពេលឆាប់ខាងមុននេះ។

លោក កុយ គួង ក៏បានឲ្យដឹងផងដែរថា លោក ហ៊ុន សែន និងនាយករដ្ឋមន្ត្រីថៃ លោក អាភីស៊ិត វ៉េតឆាឈីវ៉ាក់ (Abhisit Vejjajiva) នឹងអាចជួបគ្នានៅទីក្រុងញូវយ៉ក (New York) សហរដ្ឋអាមេរិក នៅថ្ងៃទី២៤ ខែកញ្ញា ក្នុងកិច្ចប្រជុំកំពូលអាស៊ាន សហរដ្ឋអាមេរិក។ ប៉ុន្តែលោកនៅមិនទាន់ដឹងថា ប្រមុខដឹកនាំទាំងពីរ នឹងពិភាក្សាគ្នាអំពីបញ្ហាអ្វីនៅឡើយទេ។

លោក ឈាង វណ្ណារិទ្ធ មានប្រសាសន៍បន្ថែមថា លោកមិនសង្ឃឹមថា ការជួបប្រជុំរបស់ប្រមុខថ្នាក់ដឹកនាំកំពូលរបស់កម្ពុជា និងថៃ នឹងអាចបញ្ចប់វិបត្តិព្រំដែនបាននោះទេ។ ជំនួបនេះ គ្រាន់តែជាជំនួបនិមិត្តរូបតែប៉ុណ្ណោះ ពីព្រោះថៃ នឹងមិនទទួលស្គាល់ដី ៤,៦គីឡូម៉ែត្រការ៉េ នៅក្បែរប្រាសាទព្រះវិហារ ជាដីរបស់ខ្មែរនោះទេ។

ប្រាសាទព្រះវិហារត្រូវបានតុលាការអន្តរជាតិនៅទីក្រុងឡាអេ ប្រទេសហុល្លង់ កាត់សេចក្ដីឲ្យកម្ពុជាឈ្នះ កាលពីថ្ងៃទី១៥ ខែមិថុនា ឆ្នាំ១៩៦២ ប៉ុន្តែថៃបានតវ៉ាថា ដីតំបន់ក្បែរប្រាសាទព្រះវិហារមានទំហំ ៤,៦គីឡូម៉ែត្រការ៉េ ជាដីរបស់ខ្លួន។ កម្ពុជាបានបដិសេធថា គ្មានតំបន់ ៤,៦គីឡូម៉ែត្រក្បែរតំបន់ប្រាសាទព្រះវិហារដូចការលើកឡើងរបស់ថៃទេ៕

កម្មករសំណង់ឈប់តវ៉ាក្រោយមានការសន្យាពីក្រុមហ៊ុន

somphy — Fri, 03 Sep 2010 06:37:53 +0000

ដោយ ឡេង ម៉ាលី
2010-09-03
វិទ្យុអាស៊ីសេរី

ក្រុមកម្មកររាប់រយនាក់របស់ក្រុមហ៊ុនម៉ៅការសំណង់កូរ៉េមួយឈ្មោះ ឌូសុង (Doosong) បានបញ្ចប់ការតវ៉ា និងការទាមទាររបស់ខ្លួនរយៈពេលពីរថ្ងៃ ក្រោយទទួលការសន្យាមួយចំនួនពីក្រុមហ៊ុន។

០២-កញ្ញា-២០១០: កម្មករ សំណង់ តវ៉ា នៅ មុខ ការដ្ឋាន សំណង់ វឌ្ឍនៈ ខេបភីថល (Vattanac Capital) នៅ សង្កាត់ វត្តភ្នំ ខណ្ឌ ដូនពេញ រាជធានី ភ្នំពេញ។ (RFA/Leng Maly)

ការបញ្ចប់ការតវ៉ា និងការទាមទាររបស់កម្មករក្រុមហ៊ុន ឌូសុង បានកើតមានបន្ទាប់ពីមានកិច្ចប្រជុំដោះស្រាយបញ្ហាជាប់ៗគ្នារយៈពេលពីរថ្ងៃ រវាងតំណាងក្រុមហ៊ុន តំណាងកម្មករ និងតំណាងសហជីពកម្មករសំណង់ និងព្រៃឈើកម្ពុជា រហូតមកដល់រសៀលថ្ងៃទី២ ខែកញ្ញា ឆ្នាំ២០១០។

ប្រធានសហជីពកម្មករសំណង់ និងព្រៃឈើកម្ពុជា លោក សុខ សុវណ្ណដេត បានថ្លែងបន្ទាប់ពីកិច្ចប្រជុំថា ភាគីខាងក្រុមហ៊ុនបានយល់ព្រមលើចំណុចភាគច្រើន តាមការទាមទាររបស់កម្មករហើយ ហើយទន្ទឹមគ្នានេះដែរ លោកបញ្ជាក់បន្ថែមថា ៖ «អ្វីដែលបងប្អូនទាមទារ គាត់បានឯកភាព។ ប៉ុន្តែអ្វីដែលយើងទាមទារហើយ ចំណុចចុងក្រោយបំផុតគឺក្រុមហ៊ុនផ្អាកការងារសិន។ ចំណុចនេះគាត់លើកឡើងថា គាត់នឹងពិភាក្សាជាមួយក្រុមហ៊ុនខាងលើ ដោយសារតែយើងធ្វើកូដកម្មនេះប៉ះពាល់ទៅលើក្រុមហ៊ុនធំ។ អ៊ីចឹងក្រុមហ៊ុនធំ គេអត់ចង់ឱ្យបងប្អូនមានបញ្ហាអ៊ីចឹងទេ»។

លោក សុខ សុវណ្ណដេត បន្តថា ចាប់តាំងពីថ្ងៃទី១ ខែកញ្ញា កម្មករសំណង់របស់ក្រុមហ៊ុនម៉ៅការសំណង់ ឌូសុង បានទាមទារកែសម្រួលលក្ខខណ្ឌការងារចំនួន ២៤ចំណុច ដែលក្នុងចំណុចទាំងនោះ មានជាអាទិ ការដំឡើងប្រាក់ឈ្នួលពីបីដុល្លារកន្លះ ទៅបួនដុល្លារសម្រាប់កម្មករធម្មតា ហើយគុណប្រាក់ឈ្នួលនឹងពីរពេលធ្វើការនៅថ្ងៃបុណ្យ និងថ្ងៃឈប់សម្រាក។ កែប្រែពេលម៉ោងធ្វើការ និងមិនត្រូវធ្វើការបន្ថែមម៉ោងដោយបង្ខំ។ ក្រោយកិច្ចប្រជុំភាគីទាំងពីរបានព្រមព្រៀងគ្នា ១២ចំណុច លើ ២៤ចំណុច។

ក្នុងចំណោមអ្នកតវ៉ា និងក្រុមហ៊ុនម៉ៅការសំណង់ ឌូសុង ប្រមាណ ២០០នាក់ កម្មករម្នាក់ឈ្មោះ ហឿង សុខចាន់ បញ្ជាក់ការទាមទារពីពេលវេលាថា ៖ «គាត់បង្ខំឱ្យខ្ញុំថែមម៉ោង ហើយពេលព្រឹកគាត់ឱ្យខ្ញុំទាំងអស់គ្នាហ្នឹងមកឱ្យទាន់ម៉ោង ៦កន្លះ បើមកមិនទាន់ទេគេអត់ឱ្យចូលទេ។ ដល់ពេលហូបបាយគេឲ្យចេញម៉ោង ១២។ យើងឃ្លានបាយណាស់ យើងក្តៅណាស់។ ខ្ញុំសុំឲ្យបានចូលធ្វើការម៉ោង ៧ ហើយឡើងមកហូបបាយម៉ោង ១១។ សុំតែប៉ុណ្ណឹងទេ»។

ក្រុមហ៊ុន ឌូសុង ជាក្រុមហ៊ុនម៉ៅការសំណង់បន្តពីក្រុមហ៊ុនមួយទៀតឈ្មោះ ប៉ូស្កូ អ៊ីអ៊ែនស៊ី (Posco E&C) ដែលកំពុងសាងសង់អាគារកម្ពស់ ៣៨ជាន់ ឈ្មោះ វឌ្ឍនៈ ខេភីថល (Vattanac Capital) នៅរាជធានីភ្នំពេញ។

មន្រ្តីផ្នែករដ្ឋបាលរបស់ក្រុមហ៊ុន ប៉ូស្កូ អ៊ីអ៊ែនស៊ី ដែលបានចូលប្រជុំដោះស្រាយដែរ គឺកញ្ញា ឃុត ម៉ូលីន ថ្លែងថា បញ្ហាដែលបានកើតឡើងនេះ គឺបណ្តាលមកពីភាគីខាងកម្មករទទួលព័ត៌មានមិនបានគ្រប់គ្រាន់ ព្រោះកម្មករខ្លះទើបចូលធ្វើការថ្មី។

កញ្ញា ឃុត ម៉ូលីន បន្តថា ៖ «ក្រោយពីការពិភាក្សាគ្នាទៅឃើញថា កម្មករហ្នឹងគាត់មានការយល់ដឹងច្រើន ថាខាងក្រុមហ៊ុន ឌូសុង បានផ្តល់លក្ខខណ្ឌការងារល្អដល់កម្មករទាំងអស់ហ្នឹង ហើយគាត់ក៏ព្រមទទួលយក ហើយក្រុមហ៊ុនក៏ព្រមតាមសំណើររបស់គាត់ ដែលគាត់សំណូមពរឱ្យមានពេទ្យ គឺក្រុមហ៊ុនធ្វើតាមគាត់»។

លោក សុខ សុវណ្ណដេត ប្រធានសហជីពកម្មករសំណង់ និងព្រៃឈើកម្ពុជា បានឱ្យដឹងថា ក្រុមហ៊ុនសន្យានឹងបើកប្រាក់ឈ្នួលឱ្យកម្មករនៅថ្ងៃទី៣ ខែកញ្ញា ហើយនឹងផ្អាកសកម្មភាពសាងសង់មួយរយៈ។ កម្មករមួយចំនួនសម្តែងការសង្ស័យថា ក្រុមហ៊ុនអាចនឹងមិនយកពួកគាត់ធ្វើការវិញទេ ព្រោះតែការទាមទាររយៈពេលពីរថ្ងៃ។ ប៉ុន្តែមន្រ្តីសហជីពនិយាយថា ក្រុមហ៊ុនបានសន្យាថា គេនឹងមិនបញ្ឈប់ព្រោះតែការតវ៉ាទេ។ កម្មករនិយាយថា ប្រសិនបើមានការបញ្ឈប់ព្រោះតែការតវ៉ានេះមែន ពួកគាត់នឹងតវ៉ាសាជាថ្មី៕

បញ្ហាអ្វីខ្លះ ដែលនាំអោយ អន្តរាយដល់ រឿងផ្លូវភេទ?

somphy — Fri, 03 Sep 2010 06:30:03 +0000

សរសេរដោយ ភ្នំពេញដេលីញូវ
សុក្រ, 03 កញ្ញា 2010

១ – ពេលចូលបន្ទប់ទឹក មានមនុស្សជាច្រើន ក្រោយពីរៀបការរួច តែងមាន អារម្មណ៍ធម្មតា ពេលធ្វើសកម្មភាព ផ្សេងៗនៅចំពោះមុខ ដៃគូរបស់ខ្លួន ដូចជាផ្លាស់ សម្លៀកបំពាក់ ឬងូតទឹកឱ្យគ្នា… ។ ប៉ុន្តែចូរចាំថា ទោះជាធ្វើអ្វីក៏ដោយ ត្រូវកុំឱ្យ ដៃគូ របស់អ្នក ឃើញអ្នកកំពុង តែ…នោម ឬ ធ្វើ “រឿងផ្ទាល់ខ្លួន” នៅក្នុងបន្ទប់ទឹក ។ ទោះជាប្តីប្រពន្ធ មានកម្រិតស្និទ្ធស្នាល និងយល់ចិត្តគ្នា យ៉ាងណាក៏ដោយ ក៏នៅតែមានព្រំដែន ត្រឹមត្រូវដែលអ្នក ត្រូវតែយកចិត្ត ទុកដាក់ ។

– តាមអ្នកជំនាញការ ផ្នែកផ្លូវចិត្តវិទ្យា គឺលោកស្រី បារបារ៉ា ឃីសលីង បានឱ្យដឹងថា អ្នកក៏ត្រូវស្លៀកពាក់ បែបណាដើម្បីឱ្យ ខ្លួនអ្នកផ្ទាល់ មានអារម្មណ៍ជឿជាក់ លើខ្លួនឯង “បើខ្លួនអ្នកផ្ទាល់ មិនឃើញថាខ្លួនអ្នក សិចស៊ីនោះ ពុំមាននរណាគេ នឹង សរសើរអ្នកឡើយ” ។

២ – ក្នុងបន្ទប់មាន វត្ថុច្រើនពេក
ប្រហែលជា នៅពេលស្រឡាញ់គ្នា ស្វាមីរបស់អ្នក បានជូនរបស់របរ ដល់អ្នកជាច្រើន ដូចជា តុក្កតា… ប៉ុន្តែបើអ្នកដាក់ ខ្លាឃ្មុំ ធីតឌី ឬ កណ្តុរ មិកគី នៅលើគ្រែ នៃអ្នកទាំងពីរនោះ គឺអ្នកកំពុងតែរំងាប់ អារម្មណ៍តណ្ហា របស់ស្វាមី ចំពោះរឿងលើគ្រែ បន្តិចម្តងៗហើយ ។
លោកស្រី ឃីសលីង ពន្យល់ថា “ប្រការនេះ ធ្វើឱ្យស្វាមីគិតថា អ្នកនៅក្មេងខ្ចី នៅឡើយ ដូច្នេះនឹងពុំអាច នាំមកនូវ អារម្មណ៍កំពូល ពេលឡើងឋានសួគ៌ ។
អ្នកអាចបង្ហាញនូវភាព គួរក្នាញ់គួរស្រឡាញ់ ជាមួយស្វាមីនៅទីណាក៏បាន ប៉ុន្តែចំពោះបរិយាកាស ឯកជនរបស់ អ្នកទាំងពីរវិញ អ្នកគួរតែកាត់បន្ថយ នូវអ្វីៗដែល ធ្វើឱ្យរំខានដល់ “រឿងលើគ្រែ” ។ ទូដាក់សៀវភៅតុក្កតា និង ទូរទស្សន៍ផងដែរ សុទ្ធ តែជាវត្ថុដែល ពុំគួរដាក់ក្នុងបន្ទប់ដេក ។ តែចំណេកទឹកអប់ គ្រឿងតែងកាយ វិញនោះ អ្នកមិនបាច់លាក់បាំង វានោះទេ ព្រោះវាជាវត្ថុដែល សម្តែងនូវភាពជានារី របស់អ្នកម៉្យាងទៀត វាក៏ជាមេដែកដែល អាចស្រូបយកការ ចាប់អារម្មណ៍ពីស្វាមី ដោយ ងាយ ។

៣ – បើកទូរទស្សន៍ ក្នុងពេលកំពុង ប្រលោមស្នេហ៍
អ្នកប្រហែលជាយក មូលហេតុថា ប្តីប្រពន្ធអ្នករួមគ្នា មើលទូរទស្សន៍សម្រាប់ មនោសញ្ចោតនា ឬ ជួនកាលថាដើម្បី ទទួលបាននូវអារម្មណ៍ ស្រើបស្រាលពីទិដ្ឋភាព ផ្អែមល្ហែមក្នុង ទូរទស្សន៍ ដើម្បីឡើងលើគ្រែ ។ ប៉ុន្តែការស្រាវជ្រាវ មួយរបស់ក្រុម អ្នកវិទ្យាសាស្ត្រ នៃប្រទេសអ៊ីតាលី បានបង្ហាញថា គូស្រករដែល បើកទូរទស្សន៍ ក្នុងបន្ទប់ដេកគឺមាន សកម្មភាពផ្លូវភេទ បានត្រឹមពាក់កណ្តាល នៃគូដែលពុំបានដាក់ ទូរទស្សន៍ក្នុងបន្ទប់ដេក ។
មូលហេតុសំខាន់ គឺដោយសារតែជួនកាល អ្នកត្រូវទទួលឥទ្ធិពល ពីទិដ្ឋភាព “ក្តៅ” នៅលើកញ្ចក់ ទូរទស្សន៍ ហើយវាធ្វើឱ្យអ្នកមាន អារម្មណ៍ចង់ធ្វើ “រឿងនោះ” ឱ្យប្រកបដោយភាព អស្ចារ្យ តែបានភ្លេចថា ស្វាមីភរិយានីមួយៗ តែងមាន របៀបរបប ផ្សេងៗគ្នា ។ បើអ្នកនៅតែចង់ទុក ទូរទស្សន៍ក្នុង បន្ទប់ដេកនោះ ចូរចងចាំថា ត្រូវបិទវានៅពេល អ្នកទាំងពីរ ចាប់ផ្តើមថើបគ្នា ហើយចូរបំភ្លេចអ្វី ដែលអ្នកបានមើល លើកញ្ចក់ទូរទស្សន៍ទៅ ។

៤ – ប្រើ “រឿងលើគ្រែ” ដើម្បីដោះដូរ
ពួកនារីជាប្រពន្ធ តែងតែប្រើ “ក្បាច់” លួងស្វាមីបន្ទាប់មក ទើបប្រាប់ “ដំណឹងល្អ” ថា “អូនបានទិញ កាបូបធុនល្អមួយ” ឬ ផ្ទុយទៅវិញ ពួកនាងច្រើនប្រើសិច ដើម្បីជជែករឿង ទិញវត្ថុផ្សេងៗ ជាមួយស្វាមី ។ តាមលោកស្រី ឃីសលីង ថ្លែងថា “ ពេលខ្ញុំប្រើរឿងផ្លូវភេទ ដើម្បីដឹកមុខ នូវអ្វីៗឱ្យទៅតាមចិត្តនោះ វានឹងធ្វើឱ្យបាត់បង់ តុល្យភាពក្នុង ទំនាក់ទំនងប្តី ប្រពន្ធ ដែលនាំទៅរកភាព តានតឹង និង ប្រេះស្រាំដោយអចេតនា ។ ជាងនេះទៅទៀត ពេលអ្នកប្រើសិច ជាការអរគុណ ឬដាក់ទណ្ឌកម្ម ស្វាមីនោះ បង្ហាញថា អ្នកជាភរិយាដែល អត្មានិយម ។ ផ្លូវភេទមានន័យពិត គឺនៅពេលអ្នកទាំងពីរ មានអារម្មណ៍ថា សុខស្រួល និង គាប់ចិត្ត” ។
ជួនកាលអ្នកពុំ “ជជែក” ពីរឿងរសើបនេះ ប៉ុន្តែបែរជាប្រតិកម្ម តាមបែប “អូនកំពុងក្តៅចិត្ត បងកុំរំខានអូន” ។ អ្នកគួរតែបែងចែក បញ្ហាក្នុងសកម្មភាព ប្រចាំថ្ងៃឱ្យឃ្លាតពីរឿង “លើគ្រែ” ។ បើសិនអ្នកខឹង នឹងស្វាមីនោះ គួរតែនិយាយត្រង់ៗ ទៅជា មួយគាត់ ឬ យ៉ាងហោចណាស់ ក៏ត្រូវដឹងរឿងក្តៅចិត្ត ឱ្យគាត់ស្តាប់ឱ្យបាន យ៉ាងតិចពីរម៉ោង នៅមុនពេលចូលដេក ដើម្បីកុំឱ្យមានអារម្មណ៍ នៅតែក្តៅពេល នៅលើគ្រែរួមគ្នា ។
មានវិធីមួយទៀត ដែលជួយួអ្នកបំបាត់ចោល នូវរឿងរញ៉េរញ៉ៃមុនពេល ចូលបន្ទប់ដេកដោយដាក់ កន្ត្រកតូចមួយ មានក្រដាសក្នុងនោះ ដាក់នៅក្បែរមាត់ទ្វារ ដែលសរសេរនូវរឿង ដែលអ្នកនៅតែត្រូវការ “ជជែក” ជាមួយស្វាមី ហើយទុករឿងរំខាន នេះ មួយឡែករហូតដល់ អ្នកទាំងពីរ “រួចរាល់” សិន ។

៥ – ធ្វើពុត
ជួនកាលពុំមែន ដោយសារតែអ្នក និង ស្វាមីមិនស្រុះស្រួលគ្នា ប៉ុន្តែវាដោយសារ ការឈឺក្បាល ស្ត្រេស ឬ ឈឺខ្នងដែលកើតឡើង ខណៈពេលមុន ឬ ក្នុងពេល “ប្រតិបត្តិការសឹក” ហើយអ្នកនៅតែ ព្យាយាមជួយចម្លង ស្វាមីឱ្យដល់ត្រើយ ក្នុងនោះ អ្នកក៏ធ្វើពុតជាឡើងដល់ ចំណុចកំពូល ដើម្បីឱ្យស្វាមីបាន សប្បាយចិត្ត ។ នេះពុំមែនជាវិធីល្អ ក្នុងជីវភាពផ្លូវភេទ រវាងប្តីប្រពន្ធនោះទេ ។ ទីមួយការបោកប្រាស់ស្វាមី ទោះជារឿងអ្វីមួយក៏ដោយ ក៏វាពុំមែនជាការល្អដែរ ហើយវាគឺជាប្រការមួយ ដែល បង្កើតឱ្យមានគម្លាត រវាងស្វាមី និង ភរិយា ។ ទីពីរនោះ នៅពេលគាត់បានដឹងថា អ្នកធ្វើពុតក្នុងរឿងនោះ វាអាចប៉ះពាល់យ៉ាងខ្លាំង ដល់អារម្មណ៍របស់គាត់ ។
ដំណោះស្រាយល្អបំផុត សម្រាប់បញ្ហានេះ គឺអ្នកត្រូវធ្វើនូវប្រការ ដែលអ្នកទទួលអារម្មណ៍ថា ស្រួលចិត្តកាយនោះ គឺការនិយាយប្រាប់ត្រង់ ដល់ស្វាមីនូវបញ្ហានេះ ហើយសុំឱ្យផ្អាកការ “លេងល្បែង” នេះសិន ។ ឬមួយបើខ្លាចលោកប្តី មិនសប្បាយ ចិត្តនោះ អ្នកអាចគ្រាន់តែប្រតិកម្ម ទៅនឹងសំណួររបស់ស្វាមី ហើយចូរកុំធ្វើពុតជា មាននូវអ្វីដែលអ្នក គ្មាននោះឱ្យសោះ ។

៦ – និយាយពីសង្សារចាស់
ពុំមែនគ្រប់ពេលនោះទេ ដែលការស្មោះត្រង់ត្រូវវាយតម្លៃខ្ពស់ ។ អ្នកអាចគិតថាការលើកយករឿង សង្សារចាស់របស់អ្នកមកនិយាយគឺដើម្បីបញ្ជាក់ថា ពុំមាននរណាម្នាក់ប្រៀបស្មើនឹងប្តីរបស់អ្នកនោះឡើយ ប៉ុន្តែការគិតរបស់ស្វាមីអ្នកគឺផ្សេង ។ បើ សិនជាមិនប្រយ័ត្នប្រយែងនោះ គាត់នឹងពិចារណាដោយស្រមៃតាមបែប “តើវាបាននាំប្រពន្ធខ្ញុំឡើងគ្រែហើយ ឬនៅ ?” ឬ “ជួនកាលអាគាត់នោះអាចបំពេញចិត្តនាងបានល្អជាងខ្ញុំក៏មិនដឹង” ។
តែប្រសិនបើអ្នកជាមនុស្សដែលមានបទពិសោធក្នុងរឿង “លើគ្រែ”ហើយចង់ឱ្យស្វាមីធ្វើទៅតាម“ក្បាច់”ដែល សង្សារចាស់របស់អ្នកបានអនុវត្តជាមួយអ្នកនោះគ្រាន់តែប្រាប់គាត់ថា“អូនចូលចិត្តឱ្យបងថើបត្រង់-កច្រើនជាង”ជាដើម ។ ចូរកុំរំឭកពី ឈ្មោះបុរសណាផ្សេងនៅមុខស្វាមីអ្នកឱ្យសោះ ។

៧ – “ភ្លេច” ស្វាមីដោយសារកូន
មានសមាជិកគ្រួសារច្រើនគឺពុំមែនមានន័យថាអ្នកត្រូវបន្ថយការស្រឡាញ់ប្តីនោះទេ ប៉ុន្តែការងារមើលថែ ទាំកូនពេញមួយថ្ងៃធ្វើឱ្យអ្នកមានអារម្មណ៍នឿយហត់មិនចង់តបតាមសំណូមពររបស់ស្វាមីទៀត ។ លោកប្តីអាចនឹង យោគយល់ដល់គ្រា ដំបូងនៃការមានកូន តែអ្នកក៏គួរកុំប្រើមូលហេតុនេះ ដើម្បីបង្ខំស្វាមីឱ្យ“តមសាច់”រហូត ព្រោះប្រការនេះមិនត្រឹមតែមិនល្អសម្រាប់តែស្វាមីអ្នកនោះទេ តែអ្នកក៏ត្រូវប៉ះពាល់ដែរ ។
ដើម្បីធ្វើឱ្យមានតុល្យភាពរវាងស្វាមី និង កូន អ្នកត្រូវតែចែកពេលវេលាឱ្យត្រឹមត្រូវសម្រាប់“បុគ្គល”ទាំងពីរនេះ ។ ចូរស្នើឱ្យប្តីជួយួធ្វើការផ្ទះខ្លះពេលអ្នកកំពុងជាប់រវល់មើលកូន ឬ ធ្វើការផ្សេងៗ ។ ជួនកាលអ្នកគួរតែហាត់ទម្លាប់ញ្ញែក កូនឱ្យឆ្ងាយ បន្តិចពីខ្លួនដើម្បីអ្នកអាចមានពេលខ្លះសម្រាប់ខ្លួន ហើយវាក៏ជាទម្លាប់ឱ្យកូនចេះនៅឆ្ងាយពីម្តាយផងដែរ ។
ក្រៅពីនេះនៅពេលយប់ អ្នកត្រូវកំណត់នូវការគិតសម្រាប់ខ្លួនឯងថា “រឿងលើគ្រែ” ពុំមែនគ្រាន់តែដើម្បីបំពេញចិត្ត ស្វាមីប៉ុណ្ណោះទេ តែវាជាវិធីមួយដែលនាំឱ្យបន្ធូរអារម្មណ៍តានតឹង និង ថែរក្សាខ្លួនអ្នកទៀតដែរ ។ ចូរឱ្យស្វាមីជួយ ច្របាច់ដៃជើង និងខ្លួនប្រាណ ឬ ព្រមធ្វើតាមបំណងរបស់អ្នកដើម្បីកាត់បន្ថយការនឿយហត់ ។

៨ – ធ្វើចំពោះស្វាមី ដូចជាមិត្តស្រី
មានពេលខ្លះអ្នកនាំស្វាមីទៅកាន់ហាងនេះរហូតដល់ហាងនោះ ហើយឱ្យគាត់កាន់យួររាប់កញ្ចប់សម្ភារៈដែលអ្នកបានទិញ ។ បែបនេះពេលទៅដល់ផ្ទះប្រាកដជាអ្នកទាំងពីរពុំមាននៅកម្លាំងអ្វីដើម្បីគិតដល់រឿងនៅក្បែរគ្នានោះទៀតឡើយ ។
ចូរកុំស្មានថា ព្រោះតែគាត់ជាមនុស្សរបស់ខ្លួនទើបរឿងអ្វីដែលអ្នកចូលចិត្ត អ្នកក៏ចង់ឱ្យមានមុខគាត់ដែរ ។ ប្រការនេះ មិនត្រឹមត្រូវទេ ព្រោះបើចេះតែអូសទាញគាត់ឱ្យចូលក្នុងសមត្ថភាពដែលពេញដោយចរិតជា“ស្ត្រី”បែបនោះអ្នកនឹងធ្វើឱ្យ គាត់ បាត់បង់នូវសមត្ថភាពដែលមានរបស់គាត់បន្តិចម្តងៗ ៕

ទូរស័ព្ទ Samsung ចេញ Galaxy Tab ប្រកួតជាមួយ iPad

somphy — Fri, 03 Sep 2010 06:08:05 +0000

សរសេរដោយ ភ្នំពេញដេលីញូវ
សុក្រ, 03 កញ្ញា 2010

ក្រុមហ៊ុន Samsung បានប្រកាសនៅ ថ្ងៃនេះថា ក្រុមហ៊ុនយក្ស របស់កូរ៉េមួយនេះ នឹងចេញលក់ប្រភេទ ម៉ាស៊ីន iPad ដើម្បីប្រជែងជាមួយ ម៉ាស៊ីន Galaxy Tab របស់ក្រុមហ៊ុន Apple ។

Galaxy Tab មានអេក្រង់ ៧ អ៊ីញ (១៧,៨ សង់ទីម៉ែត្រ) ជាប្រភេទប្រើ ម្រាមដៃចុច ទៅលើអេក្រង់ (Touchscreen) ប្រើប្រព័ន្ធ Android 2.2 សម្រាប់ដំណើរការ ម៉ាស៊ីន វាដូចជា iPad របស់ Apple ដែលមានអេក្រង់ ៩,៧ អ៊ីញ ។

ម៉ាស៊ីន iPad របស់ Apple លក់ដាច់ ៣ លានគ្រឿង នៅក្នុងរយៈពេល តែ ៨០ ថ្ងៃ នៅសហរដ្ឋអាមេរិក កាលពីខែមេសា ។

iPad មានទម្ងន់ ៣៨០ ក្រាម នឹងចេញលក់នៅ ប្រទេសអឺរ៉ុប ពាក់កណ្តាលខែ ៩ នេះក្នុងតម្លៃ ៧៩៩ អឺរ៉ូ នៅអាល្លឺម៉ង់ ហើយនៅបារាំង ៦៩៩ អឺរ៉ូ ៕

សុខ សោម៉ាវត្តី អាយុ ២២ឆ្នាំ

somphy — Fri, 03 Sep 2010 04:24:50 +0000

សរសេរដោយ ភ្នំពេញដេលីញូវ
ព្រហស្បតិ, 02 កញ្ញា 2010

ថ្ងៃទី២៧ ខែសីហា គឺជាថ្ងៃខួបកំណើត ២២ឆ្នាំ របស់ពិធីការីនី សុខ សោម៉ាវត្តី ក្នុងឆ្នាំនេះ សុខ សោម៉ាវត្តី មិនបានរៀបចំ ពិធីខួបកំណើត របស់ខ្លួន ឲ្យធំដុំដូចជា បណ្តាឆ្នាំមុនទេ ដោយសារនាង ជាប់រវល់ការងារ តែទោះជាយ៉ាងនេះក្តី នាង និងក្រុម គ្រួសារបាន រៀបចំពិធីជួបជុំ នៅផ្ទះ.។ នៅឯពីធី ផ្សាយបន្តផ្ទាល់ ក្នុងកម្មវិធីមួយ នៅស្ថានីយ៍ ទូរទស្សន៍បាយ័ន មិត្តភក្តិរួមអាជីព បានច្រៀងអបអរ និង ជូនពរនាង ។

កាលពីឆ្នាំទៅម៉ិញ នាងបានរៀបចំ ពិធីខួបរបស់ខ្លួន មានលក្ខណៈធំដុំ ដោយមានមិត្តភក្តិ ក្នុងនិងក្រៅសិល្បៈជាច្រើន ចូលរួម សម្រាប់ឆ្នាំនេះ ខុសប្លែកពីឆ្នាំមុន នាងមិនបានធ្វើ ពិធីធំដុំអ្វីទេ ។ មូលហេតុអ្វីបានជា មិនធ្វើអាធឹកអាធម ដូចឆ្នាំមុន?
ពីព្រោះគូដណ្តឹង របស់នាងដែលត្រូវ បានគេស្គាល់ថា ជាកូនប្រុសមេបូលីស ក្រុងភ្នំពេញ មិនបាននៅ ក្នុងប្រទេសខ្មែរ។

មានគេខ្សឹបប្រាប់ អោយដឹងថា គូដណ្តឹងរបស់នាង នឹងមានដំណែងជា មេបញ្ជាការ មានបុណ្យសក្កិខ្ពស់ នៅពេលខាងមុខនេះ ។

ជំនួប សម្តេចហ៊ុនសែន នឹងអាប់ភីស៊ីត នៅថ្ងៃទី២៤ កញ្ញា

somphy — Fri, 03 Sep 2010 04:16:45 +0000

សរសេរដោយ ភ្នំពេញដេលីញូវ
ព្រហស្បតិ, 02 កញ្ញា 2010

លោក ខៀវ កាញារីទ្ធ រដ្ឋមន្ត្រី ក្រសួងព័ត៌មាន ឱ្យដឹងថា ជំនួបរវាងសម្តេច អគ្គមហាសេនាបតី តេជោ ហ៊ុន សែន ជាមួយ នាយករដ្ឋមន្ត្រីថៃ លោកអាប់ភីស៊ីត វាចាជីវ៉ា អាចនឹងធ្វើនៅក្នុង កិច្ចប្រជុំអាស៊ាន នៅអាមេរិកនៅថ្ងៃ ទី២៤ កញ្ញា ខាងមុខនេះ ដោយ ផ្តោតលើបញ្ហាជាច្រើន ប៉ុន្តែមិនជជែកគ្នា អំពីបញ្ហាព្រំដែននោះទេ ។ នេះគឺជាខ្លឹមសារ នៃការជួបសន្ទនា ពេលលោក ONGART KLAM PAIBOON រដ្ឋមន្ត្រីអមខុទ្ទការល័យ នាយករដ្ឋមន្ត្រីថៃ ទទួលបន្ទុកព័ត៌មាន ចូលជួបសម្តេច ហ៊ុន សែន នៅ ទីស្តីការ គណៈរដ្ឋមន្ត្រី កាលពីថ្ងៃទី២ កញ្ញា ។ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងព័ត៌មាន ឱ្យដឹងថាលទ្ធភាព នៃជំនួបនោះ បានធ្វើឡើងនៅក្នុង ការពិភាក្សារបស់ មន្ត្រីជាន់ខ្ពស់ អាស៊ាន នៅទីក្រុងហ្សាការតា ប្រទេសឥណ្ឌូនេស៊ី កាលពីថ្ងៃទី១ កញ្ញា ដែលកំណត់យកថ្ងៃទី២៤ កញ្ញា សម្រាប់កិច្ចប្រជុំអាស៊ាន នៅសហរដ្ឋអាមេរិក ដែលនឹងអាចយកថ្ងៃនោះ ជាថ្ងៃជួបគ្នា រវាងសមភាគី ទាំងពីរតែម្តង ។ ក្នុងជំនួបនោះ នាយករដ្ឋមន្ត្រីទាំងពីរ នឹងពិភាក្សាគ្នា ពីបញ្ហាវិនិយោគ ការធ្វើពាណិជ្ជកម្ម និង បញ្ហាផ្សេងៗ ជាច្រើនទៀត ប៉ុន្តែមិនជជែកគ្នា អំពីបញ្ហាព្រំដែន នោះទេ ។

អ្នកជំនួញស្វាគមន៍គម្រោងសង់អគារខ្ពស់ជាងគេនៅអាស៊ីក្នុងក្រុងភ្នំពេញ

somphy — Fri, 03 Sep 2010 04:08:31 +0000

ដោយ យន់ សាមៀន
2010-09-02
វិទ្យុអាស៊ីសេរីstrong>

មន្ត្រីរដ្ឋាភិបាល និងក្រុមអ្នកជំនួញវិស័យអចលវត្ថុសង្ឃឹមថា បំណងរបស់លោក ហ៊ុន សែន នាយករដ្ឋមន្ត្រីកម្ពុជា ក្នុងការសិក្សាសាងសង់អគារខ្ពស់ជាងគេនៅអាស៊ី នឹងជំរុញឲ្យសេដ្ឋកិច្ចនៅកម្ពុជា មានការរីកចម្រើនទៅថ្ងៃអនាគត។

កម្មករ ធ្វើ ការ នៅ លើ សំណង់ អគារ មួយ កន្លែង ក្នុង ទីក្រុង ភ្នំពេញ។ រដ្ឋាភិបាល ខ្មែរ កំពុង ពិចារណា អនុញ្ញាត ឲ្យ បរទេស អាច ទិញ ផ្ទះ ល្វែង នៅ ស្រុក ខ្មែរ បាន ប៉ុន្តែ មិន អាច ទិញ ដី បាន ទេ។ (Photo courtesy of Bun Tharum, http://tharum.info)

នាយករងរបស់ធនាគារកាណាឌីយ៉ា លោក ឆាល វ៉ាន (Charles Vann) នៅថ្ងៃព្រហស្បតិ៍ ទី២ ខែកញ្ញា បានប្រាប់វិទ្យុអាស៊ីសេរីឲ្យដឹងថា គម្រោងសាងសង់អគារខ្ពស់ជាងគេនៅអាស៊ី ដែលមានកម្ពស់ ៥៥៥ម៉ែត្រ នៅមិនទាន់មានរូបរាងនៅឡើយទេ។ ប៉ុន្តែលោកមានសង្ឃឹមថា ដោយសារស្ថិរភាពនយោបាយ និងសន្ទុះនៃការអភិវឌ្ឍនៅកម្ពុជា គម្រោងសាងសង់អគារនេះនឹងអាចធ្វើទៅបាន។

ប្រសិនបើគម្រោងសាងសង់អគារកម្ពស់ ៥៥៥ម៉ែត្រនេះ ក្លាយជាការពិតវិញនោះ កម្ពុជានឹងមានអគារខ្ពស់ជាងគេនៅក្នុងតំបន់អាស៊ី គឺខ្ពស់ជាងអគាររបស់តៃវ៉ាន់ តៃពៃ ១០១ ថាវវរ៍ (Taipei 101 Tower) សៀងហៃ វើល ហ្វាយនិនហ្សល់ សេនធើ (Shanghai World Financial Center) និងកូឡាឡាំពួរ ភេត្រូណាស់ ថាវវរ៍ (Kuala Lumpur’s Petronas Towers)។ អគារទាំងបីនេះ មានកម្ពស់ទាបជាងអគារ ប៊ួ ខាលីហ្វា (Burj Khalifa) នៅទីក្រុងឌូបៃ ប្រទេសអារ៉ាប់រួម ដែលមានកម្ពស់ ៨២៨ម៉ែត្រ។

លោក ឆាល វ៉ាន បន្ថែមទៀតថា អគារកម្ពស់ ៥៥៥ម៉ែត្រនេះ នឹងត្រូវសិក្សាសាងសង់ដោយក្រុមហ៊ុន អូវើស៊ី ខេមបូឌាន អ៊ិនខបផូរ៉េតធីត អ៊ិនវេសមេន (Overseas-Cambodian Incorporated Investment) ដែលធនាគារកាណាឌីយ៉ា ជាសមាជិកនៃក្រុមហ៊ុននេះ។ ក្រុមហ៊ុន អូវើស៊ី ខេមបូឌាន អ៊ិនខបផូរ៉េតធីត អ៊ិនវេសមេន បានសាងសង់រួចហើយនូវអគារកម្ពស់ ៣២ជាន់ ដែលមានឈ្មោះថា អគារធនាគារកាណាឌីយ៉ា (Canadia Bank Tower)។

លោក ឆាល វ៉ាន ថា គម្រោងអគារកម្ពស់ ៥៥៥ម៉ែត្រនេះ នឹងធ្វើទៅបាន លុះត្រាតែមានសក្ដានុពលវិនិយោគទុនគ្រប់គ្រាន់ជាមុនសិន។ ប៉ុន្តែលោកសង្ឃឹមថា កម្ពុជាពិតជាមានតម្រូវការអគារខ្ពស់ៗទៅថ្ងៃអនាគត។

លោក ហ៊ុន សែន កាលពីថ្ងៃពុធ ទី១ ខែកញ្ញា បានប្រកាសថា កម្ពុជាមានមហិច្ឆតាកសាងអគារខ្ពស់ជាងគេនៅក្នុងតំបន់អាស៊ី ដែលមានកម្ពស់ ៥៥៥ម៉ែត្រ ហើយត្រូវចំណាយប្រាក់ប្រមាណ ២០០លានដុល្លារ។ លោក ហ៊ុន សែន បន្ថែមថា ការកសាងអគារខ្ពស់ៗនៅក្នុងរាជធានីភ្នំពេញ វានឹងមិនប៉ះពាល់ទៅដល់សោភ័ណភាពទីក្រុងភ្នំពេញ ដែលជាទីក្រុងមានវ័យចំណាស់ ដែលបានបន្សល់ទុកនូវអគារជំនាន់អាណានិគមបារាំងជាច្រើននោះទេ។

ការប្រកាសរបស់លោក ហ៊ុន សែន ធ្វើឡើងបន្ទាប់ពីគណៈរដ្ឋមន្ត្រីកម្ពុជា បានអនុម័តអនុក្រឹត្យផ្ដល់សិទ្ធិឲ្យជនបរទេសអាចទិញ និងកាន់កាប់អគារសហកម្មសិទ្ធិ ឬអគាររួមទៅដល់ ៧០% ដើម្បីធ្វើឲ្យវិស័យអចលនវត្ថុនៅកម្ពុជា ដូចជាដីធ្លី និងផ្ទះ និងអគារមានតម្លៃឡើងវិញ បន្ទាប់ពីវិបត្តិសេដ្ឋកិច្ចពិភពនៅឆ្នាំ២០០៩។

អគ្គនាយកក្រុមហ៊ុនអចលនវត្ថុឈ្មោះ ប៊ុណ្ណា រៀលធីគ្រុប (Bunna Realty Group) លោក ស៊ឹង ប៊ុណ្ណា នៅថ្ងៃព្រហស្បតិ៍ បានស្វាគមន៍ចំពោះគម្រោងអគារកម្ពស់ ៥៥៥ម៉ែត្ររបស់លោក ហ៊ុន សែន ប៉ុន្តែលោកមានការព្រួយបារម្ភអំពីវិនិយោគទុន និងតម្រូវការរបស់អតិថិជនទៅលើអគារខ្ពស់នេះ។

លោក ស៊ឹង ប៊ុណ្ណា បន្ថែមទៀតថា ក្រុមហ៊ុន អូវើស៊ី ខេមបូឌាន អ៊ិនខបផូរ៉េតធីត អ៊ិនវេសមេន ដែលធនាគារកាណាឌីយ៉ាមានភាគហ៊ុនជាមួយនោះ អាចធ្វើឲ្យមានទំនុកចិត្តពីសំណាក់អតិថិជន និងដៃគូអភិវឌ្ឍន៍ក្នុងការសាងសង់អគារនេះ។ លោកថា ទម្រាំការសិក្សាសាងសង់ត្រូវបានបញ្ចប់ក្នុងរយៈពេល ១០ឆ្នាំទៀតនោះ កម្ពុជាពិតជាមានទីផ្សារសម្រាប់អគារខ្ពស់ៗ។

អ្នកនាំពាក្យគណបក្សប្រឆាំង លោក យឹម សុវណ្ណ មានប្រសាសន៍នៅថ្ងៃព្រហស្បតិ៍ដែរថា បច្ចុប្បន្នកម្ពុជាមិនត្រូវការអគារដែលមានកម្ពស់រហូតទៅដល់ ៥៥៥ម៉ែត្រនោះទេ ពីព្រោះសេដ្ឋកិច្ចកម្ពុជាបច្ចុប្បន្ន មិនអនុញ្ញាតឲ្យកម្ពុជាសង់អគារខ្ពស់នោះទេ ហើយកម្ពុជាត្រូវការពេលវេលាយ៉ាងហោចណាស់ក៏ ៥០ឆ្នាំទៅមុខទៀតដែរ ទើបប្រទេសនេះត្រូវការអគារខ្ពស់។

លោក យឹម សុវណ្ណ បានមានប្រសាសន៍ថា វិស័យចាំបាច់សម្រាប់កម្ពុជានៅពេលនេះ មានដូចជាការផ្ដល់សេវាកម្មសុខភាព អប់រំដោយឥតគិតថ្លៃ និងស្វែងរកដីឲ្យគ្រប់គ្រាន់សម្រាប់ប្រជាពលរដ្ឋធ្វើទីលំនៅជាមុនសិន ទើបឈានទៅដល់ការសាងសង់អគារខ្ពស់។

អ្នកនាំពាក្យក្រសួងដែនដីនគរូបនីយកម្ម និងសំណង់ លោកស្រី នន់ ធានី នៅថ្ងៃព្រហស្បតិ៍ មានប្រសាសន៍ថា ក្រសួងនៅមិនទាន់ទទួលបានព័ត៌មានលម្អិត អំពើការសាងសង់ខ្ពស់នេះនៅឡើយទេ។ ប៉ុន្តែការសាងសង់នេះ គឺប្រើប្រាស់ថវិការបស់វិស័យឯកជន ហើយវិស័យឯកជនដែលបានដាក់ទុនសាងសង់អគារនេះ ពីព្រោះគេអាចរំពឹងថា នឹងមានផលចំណេញ។

លោកស្រីបន្តទៀតថា ការសាងសង់អគារខ្ពស់នេះ នឹងមិនប៉ះពាល់ដល់សោភ័ណភាពទីក្រុងភ្នំពេញទេ ដោយសារកន្លែងសាងសង់នេះ ធ្វើនៅក្នុងតំបន់កោះពេជ្រ ក្នុងរាជធានីភ្នំពេញ។

លោកស្រី នន់ ធានី បន្ថែមថា បច្ចុប្បន្ននេះវិស័យឯកជនកំពុងចាប់អារម្មណ៍ទៅនឹងអនុក្រឹត្យផ្ដល់សិទ្ធិឲ្យជនបរទេសទិញ និងកាន់កាប់អគារសហកម្មសិទ្ធិ ឬអគាររួមទៅដល់ ៧០% ក្នុងកម្ពុជា ហើយអនុក្រឹត្យនេះនឹងជំរុញឲ្យវិស័យអចលនវត្ថុនៅកម្ពុជា មានតម្លៃឡើងវិញ៕

កម្ពុជាមិនទទួលយកប្រាក់កម្ចីរបស់ថៃ

somphy — Fri, 03 Sep 2010 04:02:09 +0000

ដោយ យន់ សាមៀន
2010-09-03
វិទ្យុអាស៊ីសេរី

លោក កុយ គួង អ្នកនាំពាក្យក្រសួងការបរទេសកម្ពុជា នៅថ្ងៃទី២ ខែកញ្ញា បានប្រកាសថា កម្ពុជាមិនត្រូវការប្រាក់កម្ចីការប្រាក់ទាបរបស់ប្រទេសថៃ ចំនួនជាង ៤០លានដុល្លារ ដើម្បីស្ដារផ្លូវលេខ ៦៨ ក្នុងខេត្តឧត្តរមានជ័យទៀតឡើយ ពីព្រោះកម្ពុជាបានប្រើប្រាស់ថវិកាជាតិជួសជុលផ្លូវនេះរួចហើយ។

ការប្រកាសឈប់ទទួលយកប្រាក់កម្ចីនេះ ធ្វើឡើងក្រោយពេលដែលឧបនាយករដ្ឋមន្ត្រីថៃ លោក ស៊ូថេប ថងស៊ុបាន (Suthep Thaugsuban) កាលពីថ្ងៃទី២៧ សីហាបានសន្យាថា ថៃនឹងបន្តប្រាក់កម្ចីរបស់ខ្លួន ក្រោយពេលដែលប្រទេសកម្ពុជា និងថៃ បានបញ្ជូនឯកអគ្គរាជទូតចូលមកកាន់តំណែងទៅវិញទៅមក កាលពីចុងខែសីហាកន្លងមក។

កម្ពុជា និងថៃបានបញ្ជូនឯកអគ្គរាជទូតទៅធ្វើការក្នុងប្រទេសរៀងៗខ្លួនទៅវិញទៅមក ក្រោយពេលដែលអតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ (Thaksin Shinawatra) បានលាឈប់ពីតួនាទីរបស់លោកជាទីប្រឹក្សានាយករដ្ឋមន្ត្រីកម្ពុជា លោក ហ៊ុន សែន និងជាទីប្រឹក្សាសេដ្ឋកិច្ចរដ្ឋាភិបាលកម្ពុជា។

លោក កុយ គួង បន្ថែមទៀតថា កម្ពុជាធ្លាប់បានប្រកាសប្រាប់ថៃ បន្ទាប់ពីថៃបានផ្អាកប្រាក់កម្ចីនេះ ក្រោយពេលដែលកម្ពុជា តែងតាំងលោក ថាក់ស៊ីន ស៊ីណាវ៉ាត្រ ជាទីប្រឹក្សារដ្ឋាភិបាលកម្ពុជាថា កម្ពុជាឈប់ត្រូវការប្រាក់នេះទៀតហើយ ដូច្នេះលោកមិនដឹងថា មូលហេតុអ្វីបានជាថៃ ចង់ផ្ដល់ប្រាក់កម្ចីនេះបន្តទៀត។

ការប្រកាសរបស់លោក កុយ គួង ធ្វើឡើងក្នុងគ្រាដែលមូលនិធិស៊ីធីអ៊ិន (CTN) បានសន្យាថា នឹងកសាងលេណដ្ឋានធ្វើពីស៊ីម៉ង់ត៍ដើម្បីការពារសុវត្ថិភាពរបស់កងទ័ព ក្នុងគ្រាប៉ះទង្គិចដោយអាវុធជាមួយថៃ។

នាយករងមូលនិធិស៊ីធីអ៊ិន (CTN) លោក សុក គឹមសាយ បានប្រាប់វិទ្យុអាស៊ីសេរីនៅថ្ងៃព្រហស្បតិ៍ថា លោកមានគម្រោងយកដែកចំនួន ៥០០តោន និងស៊ីម៉ង់ត៍ចំនួន១ពាន់តោន ដើម្បីកសាងលេណដ្ឋានឲ្យកងទ័ពកម្ពុជា។ លោកបន្តថា លេណដ្ឋានធ្វើពីស៊ីម៉ង់ត៍ងាយស្រួលឲ្យកងទ័ពកម្ពុជា ប្រើប្រាស់ក្នុងការពារខ្លួន។

លោកឧត្ដមសេនីយ៍ផ្កាយ៤ ជា តារា អគ្គបញ្ជាការរងនៃកងយោធពលខេមរភូមិន្ទ មានប្រសាសន៍នៅថ្ងៃព្រហស្បតិ៍ថា លោកមិនទាន់ទទួលបានព័ត៌មានធ្វើការកសាងលេណដ្ឋានកងទ័ពជាស៊ីម៉ង់ត៍នៅឡើយទេ។ ប៉ុន្តែបច្ចុប្បន្ននេះ កងទ័ពនៅតាមព្រំដែនបានត្រៀមលក្ខណៈគ្រប់គ្រាន់ ក្នុងការពារទឹកដីកម្ពុជា។

លោកថា បន្ទាប់ពីមានប្រទេសកម្ពុជា និងថៃ បានភ្ជាប់ទំនាក់ទំនងការទូតកាលពីចុងខែសីហាមក ស្ថានភាពនៅតាមព្រំដែនមានសភាពស្ងប់ស្ងាត់ ហើយកងទ័ពកម្ពុជា និងថៃ បានបន្តទំនាក់ទំនងល្អជាមួយគ្នា។

លោក ហ៊ុន សែន កាលពីថ្ងៃទី១ ខែកញ្ញា បានស្នើឲ្យរដ្ឋសភាថៃ ផ្ដល់សច្ចាប័នលើលទ្ធផលការចរចារបស់រដ្ឋមន្រ្តីបរទេសរបស់ប្រទេសទាំងពីរ ដើម្បីឈានទៅដល់ការដោះស្រាយជម្លោះព្រំដែនជាលក្ខណៈទ្វេភាគី។

លោក ហ៊ុន សែន ក៏បានមានប្រសាសន៍ផងដែរថា លោកបានត្រៀមខ្លួនពិភាក្សាជាមួយលោក អាភីស៊ិត វ៉េតឆាឈីវ៉ាក់ (Abhisit Vejjajeva) នាយករដ្ឋមន្ត្រីថៃ អំពីវិបត្តិព្រំដែនកម្ពុជា-ថៃ ក្នុងកិច្ចប្រជុំអាស៊ាន-អឺរ៉ុប នៅទីក្រុងប្រ៊ូសសែល ប្រទេសប៊ែលហ្ស៊ិក (Belgium) ដែលនឹងរៀបចំឡើងនៅដើមខែតុលា៕

អាណិកជនខ្មែរដែលអាមេរិកចាប់បញ្ជូន៥នាក់មកដល់កម្ពុជា

somphy — Fri, 03 Sep 2010 03:58:24 +0000

ដោយ សេក បណ្ឌិត
2010-09-03
វិទ្យុអាស៊ីសេរី

ពលរដ្ឋខ្មែររស់នៅសហរដ្ឋអាមេរិក ដែលពុំមានសញ្ជាតិចំនួន ៥នាក់ ត្រូវរដ្ឋាភិបាលសហរដ្ឋអាមេរិកបានបញ្ជូនមកដល់កម្ពុជាហើយ។

មន្ត្រីអ្នកនាំពាក្យអគ្គស្នងការនគរបាលជាតិ លោកឧត្ដមសេនីយ៍ឯក គៀត ចន្ថារិទ្ធ បានឲ្យវិទ្យុអាស៊ីសេរីដឹងថា ពលរដ្ឋកម្ពុជាដែលទៅរស់នៅសហរដ្ឋអាមេរិកជាយូរមកហើយ ប៉ុន្តែពុំមានសញ្ជាតិនោះ ត្រូវបានរដ្ឋាភិបាលសហរដ្ឋអាមេរិកបញ្ជូនត្រឡប់មកមាតុភូមិវិញហើយ នៅថ្ងៃព្រហស្បតិ៍ ទី២ ខែកញ្ញា។

ពលរដ្ឋខ្មែរដែលបញ្ជូនមកនោះ មានចំនួន ៥នាក់ បច្ចុប្បន្នកំពុងស្នាក់នៅក្នុងនាយកដ្ឋានអន្តោប្រវេសន៍ក្រសួងមហាផ្ទៃបណ្ដោះអាសន្នមួយរយៈសិន រង់ចាំបងប្អូនមកទទួល ហើយអ្នកដែលមិនមានបងប្អូន ត្រូវរង់ចាំអង្គការក្រៅរដ្ឋាភិបាលដែលទទួលយកទៅរក្សាដើម្បីអប់រំ និងសិក្សាជំនាញផ្សេងៗ។

ប្រធានអង្គការក្រៅរដ្ឋាភិបាលដែលធ្លាប់បានទទួលបន្ទុកជួយជនមាតុភូមិនិវត្តន៍ លោក ក្លឹង អូន មានប្រសាសន៍ថា លោកមិនទាន់ទទួលការអនុញ្ញាតពីក្រសួងមហាផ្ទៃ ឲ្យចូលទៅជួបបងប្អូនខ្មែរ ដែលត្រូវបញ្ជូនមកពីសហរដ្ឋអាមេរិកនោះទេ។ ប៉ុន្តែលោកកំពុងមានការបារម្ភពីបញ្ហាអង្គការលោកមិនទាន់បានទទួលជំនួយថវិកា សម្រាប់បំពេញការងារមនុស្សធម៌នេះបន្តទៀតនៅឡើយ។

មន្ត្រីស្ថានទូតសហរដ្ឋអាមេរិកប្រចាំនៅកម្ពុជា បានឲ្យវិទ្យុអាស៊ីសេរីដឹងថា ជនកម្ពុជាទាំង ៥នាក់នោះ មិនមានសញ្ជាតិអាមេរិក ដែលត្រូវកាត់ទោសពីបទឧក្រិដ្ឋធ្ងន់ធ្ងរ គឺជាមុខសញ្ញាក្នុងការនិរទេសខ្លួនក្រោមច្បាប់អន្តោប្រវេសន៍។ សហរដ្ឋអាមេរិកនឹងប្ដេជ្ញាជួយអ្នកដែលត្រូវបានបញ្ជូនត្រឡប់មកប្រទេសវិញនោះ ដើម្បីអាចរស់នៅក្នុងសង្គមកម្ពុជា ដោយសហការល្អជាមួយរដ្ឋាភិបាលកម្ពុជា។

អង្គការជួយជនមាតុភូមិនិវត្តន៍ តាំងពីឆ្នាំ២០០២ រហូតដល់២០១០ បានទទួលពលរដ្ឋខ្មែរដែលត្រូវបានគេបញ្ជូនពីសហរដ្ឋអាមេរិក ត្រឡប់មកកម្ពុជាវិញ មានចំនួន ២២៩នាក់ ហើយពួកគេមួយចំនួនបានទទួលការងារធ្វើ មានមុខរបររកស៊ី និងមានគ្រួសារប្រពន្ធកូនភាគច្រើនហើយ៕

Cambodia News | Khmer News - ពត៌មានខ្មែរ

ថាក់ស៊ីន ប្រាប់​ពី​មូលហេតុ​នៃ​ការ​លា​ឈប់​ពី​តំណែង​ជា​ទីប្រឹក្សា ហ៊ុន សែន

កម្មករ​សំណង់​ឈប់​តវ៉ា​ក្រោយ​មាន​ការ​សន្យា​ពី​ក្រុមហ៊ុន

បញ្ហាអ្វីខ្លះ ដែលនាំអោយ អន្តរាយដល់ រឿងផ្លូវភេទ?

ទូរស័ព្ទ Samsung ចេញ Galaxy Tab ប្រកួតជាមួយ iPad

សុខ សោម៉ាវត្តី អាយុ ២២ឆ្នាំ

ជំនួប សម្តេចហ៊ុនសែន នឹងអាប់ភីស៊ីត នៅថ្ងៃទី២៤ កញ្ញា

អ្នក​ជំនួញ​ស្វាគមន៍​គម្រោង​សង់​អគារ​ខ្ពស់​ជាង​គេ​នៅ​អាស៊ី​ក្នុង​ក្រុង​ភ្នំពេញ

កម្ពុជា​មិន​ទទួល​យក​ប្រាក់​កម្ចី​របស់​ថៃ

អាណិកជន​ខ្មែរ​ដែល​អាមេរិក​ចាប់​បញ្ជូន​៥​នាក់​មក​ដល់​កម្ពុជា

ថាក់ស៊ីន ប្រាប់ពីមូលហេតុនៃការលាឈប់ពីតំណែងជាទីប្រឹក្សា ហ៊ុន សែន

កម្មករសំណង់ឈប់តវ៉ាក្រោយមានការសន្យាពីក្រុមហ៊ុន

អ្នកជំនួញស្វាគមន៍គម្រោងសង់អគារខ្ពស់ជាងគេនៅអាស៊ីក្នុងក្រុងភ្នំពេញ

កម្ពុជាមិនទទួលយកប្រាក់កម្ចីរបស់ថៃ

អាណិកជនខ្មែរដែលអាមេរិកចាប់បញ្ជូន៥នាក់មកដល់កម្ពុជា