កីឡាករ​ ហ៊ុន ឈុនហេង ​មិន​ទទួល​​យក​សំណង​​​៦០ម៉ឺន​រៀលពីម្ចាស់រថយន្ត​

ដោយ៖​ វង្ស សុម៉ាលីន​ | ថ្ងៃពុធ ទី18 វិច្ឆិកា 2015, 08:49 AM
http://vodhotnews.com


មក​ទល់​ពេល​នេះ ​​កីឡាករ​​ប្រដាល់​​​​ដែល​មាន​ឈ្មោះ​​ល្បី​ ​ហ៊ុន ឈុន​ហេង នៅ​​មិន​ទាន់​ទទួល​បាន​សំណង​​​​ជំងឺ​​ចិត្ត​នៅ​ឡើយ​ទេ បើ​ទោះ​ជា​គ្រោះ​ថ្នាក់​ចរាចរណ៍​​ត្រូវ​បាន​កើត​ឡើង​តាំង​ពីថ្ងៃ​អាទិត្យ​ទី​​​១៥ វិច្ឆិកា។ ​​​​ក្រុម​គ្រួសារ​​​​របស់​កីឡាករ​រង​គ្រោះបាន​​​ប្រកាស​ទារសំណង​​យ៉ាង​ហោច​​​​២៥០០​ដុល្លារ​​​​​​​និង​បដិសេធ​មិន​ទទួល​​​យក​ការ​សម្រប​សម្រួល​ពី​សំណាក់​អ្នក​បង្ក​ហេតុ​​​ដែល​សុំ​​បង់​​​​៦០ម៉ឺន​រៀលនោះទេ​។

អ្នក​ស្រី សាន សាវៀង ​វ័យ​​​​៥៣​ឆ្នាំ ​​ជា​ម្ដាយ​ក្មេក​របស់​​ហ៊ុន ឈុន​ហេង បាន​ថ្លែង​ប្រាប់​ថា​​ក្រោយ​ត្រូវ​​រថយន្ត​​​​​​​​បុក​​ណ្ដាល​ឲ្យ​កូន​ប្រុស​​របស់​ខ្លួន​​​​បាក់​ជើង ​ម្ចាស់​រថយន្ត​​​សុំ​​ផ្ដល់សំណង​ត្រឹម​តែ​​​​៦០ម៉ឺន​​​រៀល​ប៉ុណ្ណោះ​ទើប​អ្នក​ស្រី​និង​ក្រុម​​គ្រួសារ​មិន​អាច​ទទួល​យក​បាន​។ ​អ្នក​ស្រី​​ថាបញ្ជាក់​​ថា​​​​កីឡាករ​ហ៊ុន ឈុន​ហេង ​​បាន​​បាក់ឆ្អឹង​​​ស្មង​ជើង​​ខាង​ស្ដាំ​​​ដោយទើប​តែ​​​​បាន​វះ​កាត់​ដាក់​ដែក​កាល​ពី​​​​​ថ្ងៃ​ល្ងាច​ថ្ងៃ​អាទិត្យ​​ប៉ុណ្ណោះ​។ បន្ថែម​ពី​នោះ​​​​​​​​​​​​​​​ជន​រងគ្រោះ​ក៏​​មាន​សភាព​​​​​ហើម​មុខនិង​​ប៉ះ​​ទង្គិច​ផ្នែក​ក្បាល​ផងដែរ ប៉ុន្តែ​​មិន​​​​ទាន់​បាន​​​ស្កេន​​ដើម្បី​​​ឲ្យ​បាន​ច្បាស់​ថា​​​តើ​​មាន​បញ្ហា​​​​​​​​​​​​​​​​​​កន្លែង​​ក្បាល​ឬ​ក៏អត់​នោះទេ ដោយ​សារតែ​ខ្វះខាត​​​​​ថ្លៃ​ព្យាបាល​។ អ្នក​ស្រី​​បញ្ជាក់​​ក្នុង​ពេល​​អ្នក​​យក​ព័ត៌មាន​​​VOD ចុះ​​ទៅ​សម្ភាសន៍​ដោយ​ផ្ទាល់​នៅ​ក្នុង​មន្ទីរ​ពេទ្យ​​​​​ថា៖ “​​​​​ឥឡូវ​ហ្នឹង​​​ជើង​កូន​ខ្ញុំ​​​ពេទ្យ​គាត់​​​វះ​​ដាក់​ដែក​​ឲ្យហើយ ​ប៉ុន្តែ​ខ្ញុំ​អត់​ដឹង​ថា​វា​​យ៉ាង​ម៉េច​ទៀត ព្រោះ​​ក្បាល​ក៏​បែក​ដេរ​​​ជិត​​១០​ថ្នេរ ហើយ​មុខ​​​ក៏​ហើម​ពរ​ទៀត ប៉ុន្តែ​​ផ្ទុយ​ពី​សភាព​បែប​ហ្នឹង​​ខាង​​ឡាន​​(អ្នកជិះ​បុក) ​​​​​​​​​​​​​​​​​​​​និយាយ​​ថា​គេ​​​​នឹង​តែ​​​៦០ម៉ឺន​រៀល​​ប៉ុណ្ណោះ ​​​ដោយ​ថា​បើ​មិន​យក​​​​​គឺ​​​​គេ​​ឲ្យ​ខ្ញុំ​ប្ដឹង​!”។


អ្នក​ស្រី​​​​​​​​បញ្ជាក់​ថា​​កូន​ប្រសារ​របស់​ខ្លួន​​នឹង​​​រង​ភាព​ពិការ​មិន​អាច​បន្ត​ការ​ប្រដាល់​បាន​​​​​យ៉ាង​ហោច​ពី​​​​៦ខែ​ទៅ​​​១ឆ្នាំ ដោយ​​មិន​ដឹង​ថា​​​​​នៅ​ក្នុង​រយៈ​ពេល​នោះ តើ​នឹង​ធ្វើ​​ឲ្យ​ជីវភាព​របស់​​​គេ​​​ប្រឈម​នឹង​បញ្ហា​​អ្វី​ខ្លះ​នោះ​ឡើយ​។ អ្នក​ស្រី​និយាយ​ថា​៖ “​​​​​ខ្ញុំ​​​ទទួល​យក​អត់​បាន​ទេ នៅ​ពេល​ខាង​​​​​​​ម្ចាស់​ឡាន​​​​​​​​​​​​​​​​​ព្រមាន​ថា​​​បើ​ខ្ញុំ​​មិន​យក​​​​​​៦០ម៉ឺន​(រៀល) គឺ​​​​​គេ​អត់​សង​​​ ​​​​​ដោយ​គេ​ថា​កូន​ខ្ញុំ​​ជិះខុស ​ហើយ​​​​​ឡាន​គេ​​​​ក៏ខូច​ខាត​ដែរ​​​អីណា!”។ ​អ្នក​ស្រី​​​និង​ក្រុម​គ្រួសារ​​​ប្រកាស​ទា​​​រ​សំណង​​​ចំនួ​​ន​​​២៥០០​ដុល្លារនិង​សុំ​ថ្លៃ​ជួល​ជុល​​ម៉ូតូដែល​រង​ការ​ខូច​ខាត​​​​​​​​​​​​​បន្ថែម​ទៀត ​ដោយ​សារ​តែ​ម៉ូតូ​ដែល​​​​​​​​​​​​​​​ខ្ទេច​ក្នុង​​​ហេតុ​​ការណ៍​ប៉ះ​ទង្គិច​នោះ គឺ​​ជា​ម៉ូតូ​ដែល​​​ហ៊ុន ឈុន​​ហេង ​​បាន​ខ្ចី​​ពី​​អ្នក​​​​រាប់អាន​។ អ្នកស្រី​​​និយាយ​ថា​៖ “​​​​​​​​​​​​​មកទល់ថ្ងៃ​នេះ ខ្ញុំ​​មើល​​​​​​ឈុន​ហេង​អស់​លុយ​ច្រើន​ណាស់ អញ្ចឹង​ហើយ​ទើប​ខ្ញុំ​ចង់​​ឲ្យ​​​​​​​​​​​​ម្ចាស់​ឡាន​បង់​​​​២៥០០(ដុល្លារ) និង​​ជួយ​​​​​ជួស​ជុល​ម៉ូតូ​តិច​​​មក បើ​មិន​អញ្ចឹង​លុយ​ហ្នឹង​ក៏​អត់​បាន​មើល​ខ្លួន​ដែរ ព្រោះ​​ត្រូវ​សង​ថ្លៃ​ម៉ូតូ​​គេ​ទៀត​​​!”។

ឆ្លើយ​តប​នឹង​​ការ​ទាម​ទារ​នេះ ​​​​ម្ចាស់​រថយន្តដែល​ជា​អ្នក​បង្ក​ហេតុ​​​​​បាន​ប្រាប់​​​ភ្នាក់​ងារ​VOD ​តាម​ទូរស័ព្ទ​ថា​លោក​មិន​មាន​លទ្ធភាព​​បង់ថ្លៃ​រាប់​ពាន់​ដុល្លារ​ទៅ​​​ឲ្យ​កីឡាករ​ហ៊ុន ឈុន​ហេង​នោះ​ទេ ​ដោយ​លោក​ថា​​​ ​ហ៊ុន​ ឈុន​ហេង គឺ​ជា​អ្នក​ជិះ​ខុស ​​​ហើយ​​អត់​បើក​ភ្លើង​ក្នុង​ពេល​​​​​មេឃមិន​ទាន់​​ភ្លឺច្បាស់និង​អត់​ពាក់​ពាក់​មួក​សុវត្ថិភាព​ដែល​ធ្វើ​​ឲ្យ​លោក​វ៉ាក់​អើ​ចាប់​ហ្វ្រាំង​មិន​ទាន់​។ ​​​​​​លោក​​និយាយ​ថា​៖ “​​​បើ​គាត់​ទារ​ដល់​រាប់​ពាន់​ដុល្លារ​ខ្ញុំទៅ​អត់​រួចទេ ​​​​​​​​ខ្ញុំ​​​​​​ចង់​សម្រួល​ជា​មួយ​គាត់​(​​គ្រួសារ​ជន​រង​គ្រោះ​) ប៉ុន្តែ​បើ​ល្មម​ៗ​​ខ្ញុំ​​​​​បង់​ឲ្យ​បាន បើ​លើស​ហ្នឹង​​​​មាន​តែ​តាម​ដំណើរ​ទៅ ព្រោះ​​ខាង​ប៉ូលិ​ស​​បាន​គូស​គំនួស​​ហើយ​​​​ថា​​ឡាន​ខ្ញុំ​​​បើក​អត់​​ខុស គឺ​គាត់​មក​វ៉ាក់​អើ​ជាមួយ​ខ្ញុំ​​​ទេ​!”។ ​​យ៉ាង​ណា​ក៏​ដោយ លោក​ថា​​នឹង​​​ធ្វើ​ការ​ពិចារណា​​រឿង​​ដំឡើង​​​ថ្លៃ​សំណង​​​លើស​ពី​​​៦០ម៉ឺន​រៀល ​​​​ដោយ​សារ​តែ​រថយន្ត​របស់​​​​ខ្លួន​ក៏​ត្រូវ​​​​​អូស​​ចូល​​ខណ្ឌ​ចំការ​ម៉ន ដែល​​​​ធ្វើ​​ឲ្យ​លោក​​ក៏​ចង់​បញ្ចប់​ក្ដី​​ឲ្យ​បាន​ឆាប់ដែរ។

ចំពោះ​ករណី​នេះ ​​VODមិន​ទាន់​​​សុំ​ការ​បំភ្លឺ​​ពី​​​មន្ត្រី​ប៉ូលិ​ស​នៅ​សាលា​ខណ្ឌ​ចំការ​មន​នៅ​ឡើយ។​

គួ​រ​បញ្ជាក់​ថា​ហ៊ុន ឈុនហេង ជា​កីឡាករ​​ជើង​ខ្លាំង និង​ល្បី​ឈ្មោះ​​​​ក្នុង​ប្រភេទ​ទម្ងន់​​៥១គីឡូក្រាម​​។ លោក​​​មាន​កេរ្តិ៍ឈ្មោះ​​​បន្ទាប់​ពី​បាន​ក្លាយ​ជា​ម្ចាស់​ខ្សែ​ក្រវាត់​​​​របស់​ក្រុម​ហ៊ុន​ខារ៉ាបាវនិង​​​​បាន​ឡើង​ប្រកួត​​​​នៅ​លើ​សង្វៀន​​​ប្រដាល់​អន្តរជាតិ​​​​ហើយ​ឈ្នះ​កីឡាករ​ថៃ​​​​​​​​​​​ស្ទើរ​គ្រប់​លើក​។ ជាក់​ស្ដែង​នៅ​​ថ្ងៃ​សៅរ៍​មុន​​​​​កើត​ហេតុ​មួយ​ថ្ងៃ​លោក​ទើប​តែ​​​​​​​​បាន​ផ្ដួល​កីឡាករ​ថៃ​​​​​ឲ្យ​​សន្លប់​ក្នុងទឹក​ទី​​៣ នៅ​​​​​លើសង្វៀន​របស់​ទូរទស្សន៍​PNN ប៉ុណ្ណោះ៕ ​

សរសេរមកកាន់លោក វង្ស សុម៉ាលីន តាមរយៈvongsomalin@yahoo.com

What Next?

Recent Articles

One Response to "កីឡាករ​ ហ៊ុន ឈុនហេង ​មិន​ទទួល​​យក​សំណង​​​៦០ម៉ឺន​រៀលពីម្ចាស់រថយន្ត​"

  1. ករណីគ្រោះថ្នាក់ចរាចរណ៍ គឺជារឿងធម្មតាទេ ដែលគេអាចរកឃើញថា កើតពីភាគីណាមួយជាពុំខាន។
    តែទោះក្នុងករណីបែបណាក៏ដោយ អ្នកប្រើរថយន្ត ក៏តែគួរតែគិតថា បើអ្នកជិះម៉ូតូ កង់ ឬថ្មើរជិង គ្នាប៉ះពាល់ដល់ជីវិត ឬក៏មានរបួសធ្ងន់ធ្ងរ ក៏យើងមិនគួរសុំតែរួចខ្លួន ថាខ្លួននេះត្រូវនោះទេ។ ចាំបាច់យើងត្រូវតែចូលរួមចំណែកបំពេញការព្យាបាល ការប៉ះប៉ូវទម្ងន់ជីវភាពគ្រួសារ ដែលគ្នាត្រូវរងបន្ទុកដែរ។
    ៦០០០០០រៀល តើឲ្យគ្នាធ្វើអ្វីបាន? សូម្បីតែឆ្លុះ X-Ray ក៏មិនគ្រាន់ផង។
    សូមសមត្ថកិច្ច ជួយពិនិត្យដោះស្រាយបញ្ហានេះផង។
    បើអ្នករត់តាក់ស៊ី គឺយើងមិនថាទេ ព្រោះគ្នាក្រមែន។ តែបើមានឡាន ៤៧០ ជិះ សុំកុំនិយាយថា ឥតលុយ។ យើងក៏មិនជម្រឹតទេ។ តែសុំអាណិតគ្នាអ្នរបួសផង គ្នាក្រណាស់។