សិទ្ធិមនុស្ស
លោក សូរ្យ ជ័យឧត្ដម | ១១ ធ្នូ ២០១៨ | ម៉ោង ១០:១១ ព្រឹក
https://www.vodhotnews.com
រូបពីក្រោយសមត្ថកិច្ចនាំខ្លួន លោក រ៉ាត់ រដ្ឋមុនី នៅថ្ងៃទី៧ខែធ្នូ ឆ្នាំ២០១៨ (រូបពី ឡុង គីមហ៊ាង)
ក្រុមសិទ្ធិមនុស្សអន្តរជាតិមួយ បានទាមទារទៅប្រទេសថៃ កុំឲ្យបញ្ចូនបុរសខ្មែរម្នាក់មកកម្ពុជាវិញ បន្ទាប់ពីបុរសម្នាក់នោះ ត្រូវបានចាប់ខ្លួននៅទីក្រុងបាងកក ទៅតាមសំណើរបស់អាជ្ញាធរកម្ពុជា។
ប្រធានសហជីពកម្មករសំណង់ លោក រ៉ាត់ រដ្ឋមុនី ត្រូវបានសមត្ថកិច្ចថៃចាប់ខ្លួនកាលពីថ្ងៃទី៧ ខែធ្នូ នៅឯទីក្រុងបាងកក ហើយគ្រោងនឹងត្រូវបញ្ជូនមកកម្ពុជាវិញទៅតាមសំណើរបស់អាជ្ញាធរកម្ពុជា។
ប៉ុន្តែ នៅក្នុងសេចក្ដីថ្លែងការណ៍មួយកាលពីថ្ងៃម្សិលមិញនេះ អង្គការឃ្លាំមើលសិទ្ធិមនុស្ស Human Rights Watch បានស្នើទៅរដ្ឋាភិបាលថៃ កុំឲ្យបញ្ជូនសកម្មជនរូបនេះត្រឡប់មកប្រទេសកំណើតរបស់លោកវិញ ដោយថា សកម្មជនរូបនេះនឹងប្រឈមមុខនឹងការកាត់ទោសក្រោមហេតុផលនយោបាយ ការឃុំខ្លួនមិនត្រឹមត្រូវ និងការប្រព្រឹត្តមិនល្អនៅក្នុងប្រទេសកម្ពុជា។
នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស លោក ប៊្រេដ អាដាម បានលើកឡើងក្នុងសេចក្ដីថ្លែងការណ៍នោះថា ថៃមិនគួរធ្វើទៅតាមសំណើរបស់កម្ពុជា ដោយចាប់បញ្ជូនទាំងបង្ខំនូវសកម្មជនដែលតែងតែទម្លាយនូវបរាជ័យរបស់នគរបាល ក្នុងការបញ្ឈប់អំពើរំលោភបំពានផ្លូវភេទ និងការជួញដូរផ្លូវភេទកុមារនោះទេ។
លោក ប៊្រេដ អាដាម បន្តថា៖ «អាជ្ញាធរថៃគួរតែដោះលែងលោក រ៉ាត់ រដ្ឋមុនី ជាបន្ទាន់ និងអនុញ្ញាតឲ្យលោកស្វែងរកកិច្ចការពារពីទីភ្នាក់ងារជនភៀសខ្លួនអង្គការសហប្រជាជាតិ»។
លោក រ៉ាត់ រដ្ឋមុនី វ័យ ៤៧ឆ្នាំ ត្រូវបានសមត្ថកិច្ចថៃចាប់ខ្លួនទៅតាមសំណើរបស់អាជ្ញាធរកម្ពុជា ក្រោយពីវីដេអូឯកសារមានចំណងជើងថា «ម្ដាយខ្ញុំលក់ខ្ញុំ»ផលិតដោយសារព័ត៌មាន Russia Today ត្រូវបានផ្សព្វផ្សាយ។
វីដេអូឯកសារនេះ បានបង្ហាញនូវការលក់ក្មេងស្រីក្រីក្រឲ្យធ្វើការងារក្នុងឧស្សាហកម្មជួញដូរផ្លូវភេទ ប៉ុន្តែ អាជ្ញាធរកម្ពុជាអះអាងថា វីដេអូមួយនេះ ជាព័ត៌មានមិនពិត ហើយធ្វើឲ្យប៉ះពាល់ដល់កិត្តិនាមប្រទេសកម្ពុជា៕
អត្ថបទទាក់ទង
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។