លោក ហ៊ុន សែន ព្រមានកម្ទេច​បក្សប្រឆាំង បើ​អន្តរជាតិ​ដក​ហូត​ប្រព័ន្ធ​អនុគ្រោះ​ពន្ធ


|
https://www.vodhotnews.com

លោក ហ៊ុន សែន អញ្ជើញបើកការដ្ឋានសាងសង់ផ្លូវក្រវាត់ក្រុងទី៣ កាត់តាមភ្នំពេញ និងខេត្តកណ្តាល(ផ្លូវជាតិ៤-ផ្លូវជាតិ១) ព្រឹកថ្ងៃទី១៤ ខែមករា ឆ្នាំ២០១៩។ រូបភាព៖ ហ្វេសប៊ុក លោក ហ៊ុន សែន/ Screenshot)

លោកនាយករដ្ឋមន្ត្រី ហ៊ុន សែន បាន​ព្រមាន​កម្ទេច​បក្ស​ប្រឆាំង​នៅ​កម្ពុជា​ចោលជា​ការ​ឆ្លើយ​តប​ទៅ​នឹងការ​ដក​ហូត​ប្រព័ន្ធ​អនុគ្រោះ​ពន្ធ​ពី​ប្រទេស​កម្ពុជា​ពី​សំណាក់​សហគមន៍​អន្តរជាតិ។

ថ្លែងក្នុងពិធីបើកការដ្ឋានសាងសង់ផ្លូវក្រវ៉ាត់ក្រុងទី៣
នៅខេត្តកណ្តាល នៅ​ថ្ងៃ​នេះ លោក ហ៊ុន សែន បញ្ជាក់ថា ការដាក់ទណ្ឌកម្មសេដ្ឋកិច្ចមកលើប្រទេសកម្ពុជាគឺមិនខុសពីសម្លាប់បក្សប្រឆាំងនោះទេ ​ហើយក៏លែងមានដែរចំពោះការនិយាយពីបញ្ហាសិទ្ធិមនុស្ស និងប្រជាធិបតេយ្យនៅកម្ពុជា។

លោក ហ៊ុន សែន ថ្លែងថា៖ «ដោយសារអ្នកជ្រុលតែដាក់ទណ្ឌកម្មខ្ញុំហើយ អ្នកក៏គ្មានសិទ្ធិដើម្បីនិយាយប្រដៅខ្ញុំ​រឿងសិទ្ធិមនុស្ស ឬ​ប្រជាធិបតេយ្យអីនោះដែរ គឺអត់ទេ ហើយខ្ញុំ​ចង្អុលបង្ហាញថា បើសិនអ្នកឯងដាក់ទណ្ឌកម្មខ្ញុំ គឺស្មើនឹងវៃសម្លាប់គណបក្សប្រឆាំងនៅកម្ពុជា។ ខ្ញុំនិយាយប្រាប់អ្នកឯងឱ្យច្បាស់ ព្រោះគ្មានរឿងអីដែលខ្ញុំត្រូវថ្នាក់ថ្នម ព្រោះវាបានតែជ្រុលអីចឹងទៅហើយ ឱ្យវាទៅបណ្តោយទៅ។ ជាន់កហ្អែងថែម»

អតីតអ្នកតំណាងរាស្ត្រគណបក្សសង្រ្គោះជាតិលោក អ៊ូ ច័ន្ទរ័ត្ន យល់ថា ប្រសិនបើមានការដាក់ទណ្ឌកម្មសេដ្ឋកិច្ចកម្ពុជាមែន នឹង​​ផលប៉ះពាល់ដល់ប្រជាពលរដ្ឋកម្ពុជាទូទាំងនគរ។ ចំណែកការប្រកាសបំផ្លាញបក្សប្រឆាំង គឺជាសេរីភាព​របស់​លោក ហ៊ុន សែន ដោយ​ថា អំណាចគ្រប់យ៉ាងស្ថិតក្នុងដៃរបស់លោក។

លោក ច័ន្ទរ័ត្ន ប្រាប់​ថា៖ «ទីមួយ បញ្ហាជីវភាពរបស់ពួកគាត់ ហើយទីពីរ រឿងសិទ្ធិសេរីភាពរបស់គាត់ហ្នឹង ត្រូវបានរឹតត្បិតបន្ថែមទៀត​ហើយ។ ដូចប្រសាសន៍របស់សម្តេចនាយករដ្ឋមន្ត្រីអីចឹង ប្រសិនបើមានការហ៊ុំព័ទ្ធខ្លាំង មានការដាក់សម្ពាធខ្លាំង វាប៉ះពាល់ដល់គណបក្សប្រឆាំងហើយ កាន់តែខ្លាំង។ អាហ្នឹង ព្រោះ អំណាចនៅលើគាត់ទាំងស្រុង ហើយគាត់អាចដាក់សម្ពាធទៅលើប្រជាពលរដ្ឋ​ខ្លួនឯង និងជាពិសេស គឺ​​អ្នកប្រឆាំងហ្នឹងតែម្តង»

អ្នកឃ្លាំមើល និងជាអ្នកវិភាគនយោបាយ លោក គឹម សុខ មានប្រសាសន៍កាលពីពេលថ្មីៗនេះថា ប្រសិនបញ្ហាប្រឈមទាំងឡាយនេះ លោក ហ៊ុន សែន មិនព្រមដោះស្រាយ ហើយជ្រើសរើសយកវិធីបំបែកបក្សប្រឆាំងដើម្បីត្រួតត្រានិងកម្ចេចក្រុមប្រឆាំង​ កម្ពុជានឹងជួបវិបត្តិកាន់តែធំ ពិសេសមនុស្សរាប់ម៉ឺននាក់នឹងបាត់បង់ការងារធ្វើ។

លោកបន្ថែមថា៖ «វាបង្កើតជាការបែកបាក់ជាតិយ៉ាងធំ​រវាងខ្មែរមួយក្រុមធំ ដែលមានពលរដ្ឋគាំទ្រជាងកន្លះនគរ និងខ្មែរមួយក្រុមទៀតដែលកំពុងកាន់អំណាច ​ចាត់ចែងវាសនារបស់ប្រទេសជាតិ ហើយក្នុងលក្ខខណ្ឌរបៀបនេះ នឹងធ្វើឱ្យបរទេសលូកដៃកកូរកកាយបំផ្លាញខ្មែរយ៉ាងងាយ។ ទាំងនេះ ជាកំហុសដែលបង្កើតឡើងដោយក្រុមលោក ហ៊ុន សែន ផ្ទាល់មិនអាចប្រកែកបានទេ»

​កាល​ពី​ថ្ងៃ​ទី​៩ ខែមករា ឆ្នាំ២០១៩ ​សមាជិក​ព្រឹទ្ធសភាអាមេរិកចំនួន​ ២​​រូប ​បាន​ស្នើ​ទៅ​រដ្ឋ​បាល​លោក​ប្រធានាធិបតី ដូណាល់ ត្រាំ ឲ្យ​សើរើ​ច្បាប់​ពាណិជ្ជកម្ម ឬ​ដក​ហូត​ប្រព័ន្ធ​អនុគ្រោះ​ពាណិជ្ជកម្មទូទៅ GSP ​ជាមួយ​កម្ពុជា ខណៈ​​សហភាព​អឺរ៉ុប​ ​ដែល​ជា​ទីផ្សារ​ធំ​បំផុត​នៃ​ទំនិញ​នាំ​ចេញ​ពី​កម្ពុជា​នោះ ក៏​បាន​ដំណើរការ​ដក​ហូត​ប្រព័ន្ធ​អនុគ្រោះ​ពន្ធ «អ្វីគ្រប់យ៉ាងលើកលែងតែអាវុធ» (EBA) ពី​កម្ពុជា​ផង​ដែរ ដែល​ប្រព័ន្ធ​នៃ​ការ​អនុគ្រោះ​ពន្ធ​ទាំង​ពីរ​នេះ ​បាន​ធ្វើ​ឲ្យ​កម្ពុជា​ចំណេញ​ថវិកាជាង ១ពាន់​លាន​ដុល្លារ​ក្នុង​មួយ​ឆ្នាំ៕


រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

What Next?

Recent Articles

One Response to "លោក ហ៊ុន សែន ព្រមានកម្ទេច​បក្សប្រឆាំង បើ​អន្តរជាតិ​ដក​ហូត​ប្រព័ន្ធ​អនុគ្រោះ​ពន្ធ"

  1. Anonymous says:

    what wrong whit you Mr CNRP already dead you are over kill Mr .OH yes maybe the dead hunting him so much just about to take his life right now.

Leave a Reply

Submit Comment