ដោយ មួង ណារ៉េត
2019-03-13
RFA
រដ្ឋមន្រ្តីការបរទេសអាមេរិកលោក ម៉ៃឃ៍ ប៉ុមប៉េអូ (Mike Pompeo) ថ្លែងទៅអ្នកសារព័ត៌មាន ប្រកាសរបាយការណ៍សិទ្ធិមនុស្សលើកទី ៤៣ នៃប្រទេសជិត ២០០ នៅក្រសួងការបរទេស នៅថ្ងៃទី ១៣ ខែ មីនា ឆ្នាំ ២០១៩ (Screenshot from the US State Department Website)
របាយការណ៍សិទ្ធិមនុស្សរបស់អាមេរិកបង្ហាញថា វប្បធម៌និទ្ទណ្ឌភាពបន្តរីករាលដាលនៅកម្ពុជា
របាយការណ៍សិទ្ធិមនុស្សប្រចាំឆ្នាំ២០១៨ របស់សហរដ្ឋអាមេរិកស្ដីពីកម្ពុជា រកឃើញថា វប្បធម៌និទ្ទណ្ឌភាពនៅតែបន្តរីករាលដាលខ្លាំង។
ក្នុងរបាយការណ៍របស់ក្រសួងការបរទេសអាមេរិក ដែលចេញផ្សាយជាផ្លូវការ កាលពីថ្ងៃទី១៣ ខែ មីនា នេះ ថា វប្បធម៌និទ្ទណ្ឌភាព ឬការប្រព្រឹត្តិខុសច្បាប់ តែរួចទោសនេះ គឺដោយសាររបបលោក ហ៊ុន សែន មិនបានបង្ហាញភស្តុតាង អំពីការផ្ដន្ទាទោស ទៅលើមន្ត្រីដែលប្រព្រឹត្តខុស ក្នុងការរំលោភសិទ្ធិមនុស្ស បំផ្លាញប្រជាធិបតេយ្យ និងអំពើពុករលួយ។
បញ្ហារំលោភសិទ្ធិមនុស្ស ដែលកើតមាននៅកម្ពុជា រួមមាន៖ ការចាប់ខ្លួន និងសម្លាប់មនុស្ស តាមតែអំពើចិត្ត ដែលប្រព្រឹត្តដោយមន្ត្រីរដ្ឋាភិបាល ការជ្រៀតជ្រែកតាមតែអំពើចិត្ត លើជីវិតឯកជនរបស់ពលរដ្ឋខ្លួន រួមមានការតាមដានការបញ្ចេញមតិតាមប្រព័ន្ធផ្សព្វផ្សាយ និងការប្រើច្បាប់ព្រហ្មទណ្ឌមិនស្មើភាពគ្នា ការរឹតត្បិតសិទ្ធិសេរីភាព ក្នុងការតវ៉ាដោយសន្តិវិធី និងការរឹតត្បិតសិទ្ធិសេរីភាពក្នុងការជួបប្រជុំគ្នា ការរឹតត្បិតសិទ្ធិសេរីភាពនយោបាយ និងអំពើពុករលួយរាលដាល រួមទាំងវិស័យតុលាការជាដើម។
របាយការណ៍ ដដែលរកឃើញបន្ថែមថា ការបោះឆ្នោត ដោយផាត់ចោលគណបក្សប្រឆាំង និង ការបន្តឃុំខ្លួន និងចោទប្រកាន់គណបក្សសង្គ្រោះជាតិលោក កឹម សុខា គឺជាផ្នែកមួយ នៃការបំផ្លាញប្រជាធិបតេយ្យ និងរំលោភសិទ្ធិមនុស្សធ្ងន់ធ្ងរនៅកម្ពុជា។
អាស៊ីសេរីមិនទាន់អាចសុំប្រតិកម្មពីមន្ត្រីរបបក្រុងភ្នំពេញ ជុំវិញរបាយការណ៍នេះបាននៅឡើយទេ កាលពីថ្ងៃទី១៣ ខែមីនា។
រដ្ឋាភិបាលសហរដ្ឋអាមេរិក កន្លងមក បានបញ្ជាក់ជំហររបស់ខ្លួន ជាច្រើនលើកច្រើនសារួចទៅហើយ ថាទំនាក់ទំនងរវាងប្រទេសទាំងពីរ អាចប្រសើរឡើងវិញបាន ទាល់តែរបបលោក ហ៊ុន សែន ស្ដារសិទ្ធិមនុស្ស និងប្រជាធិបតេយ្យឡើងវិញ៕