2019-03-25
RFA
លោក ឌី ថេហូយ៉ា មន្ត្រីកម្មវិធីផ្នែកសិទ្ធិពលករចំណាកស្រុកនៃមជ្ឈមណ្ឌលសម្ពន្ធភាពការងារ និងសិទ្ធិមនុស្ស ក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១១ ខែកក្កដា ឆ្នាំ២០១៧។ RFA
អង្គការសង្គមស៊ីវិលផ្នែកសិទ្ធិកម្មករនិងពលករចំណាកស្រុកជំរុញឱ្យរបបក្រុងភ្នំពេញបំពាក់បំប៉នជំនាញឱ្យបានគ្រប់គ្រាន់ដល់ពលរដ្ឋ ដែលធ្វើការនៅក្នុងស្រុក និងនៅក្រៅប្រទេស។ ការអំពាវនាវនេះធ្វើឡើងក្រោយពេលលោកនាយករដ្ឋមន្ត្រី ហ៊ុន សែន បានទទួលស្គាល់ថា សមត្ថភាពការងាររបស់ពលករខ្មែរនៅមានកម្រិតទាបនៅឡើយ។
មន្ត្រីកម្មវិធីនៃមជ្ឈមណ្ឌលសម្ពន្ធភាពការងារ និងសិទ្ធិមនុស្ស (CENTRAL) ថ្លែងថា ការលើកឡើងរបស់លោកនាយករដ្ឋមន្ត្រី ហ៊ុន សែន ដែលថា កម្ពុជានៅខ្វះខាតកម្មករជំនាញក្នុងវិស័យសំណង់ និងវិស័យដទៃទៀត បង្ហាញពីភាពអន់ខ្សោយនៃការដឹកនាំប្រទេស និងការអភិវឌ្ឍធនធានមនុស្ស។ លោកថា ការងារមួយចំនួន ដែលជនបរទេសកំពុងធ្វើនៅកម្ពុជា ដូចជា ការងារសំណង់ជាដើម នោះកម្មករខ្មែរក៏អាចធ្វើបានដូចគ្នា ក៏ប៉ុន្តែដោយសារកង្វះខាតយន្តការគ្រប់គ្រងទើបធ្វើឱ្យកម្មករបរទេសដណ្ដើមការងារកម្មករខ្មែរជាហេតុធ្វើ ឱ្យពួកគាត់សម្រេចចិត្តធ្វើចំណាកស្រុកដោយប្រថុយប្រថានទៅធ្វើការងារនៅក្រៅប្រទេស៖ «ខ្ញុំឯកភាពចំពោះកម្មករជំនាញកន្លែងណាដែលខ្មែរអត់មានធនធានអត់មាន។ ទីពីរបើយើងដឹងអ៊ីចឹងហើយក្នុងនាមតួនាទីដឹកនាំរដ្ឋ ៤០ឆ្នាំហ្នឹង យើងគួរតែទៅផលិតធនធានជំនាញទាំងអស់ហ្នឹងឱ្យមានវិជ្ជាជីវៈតាមស្រុកតាមខេត្តអីហ្នឹងឱ្យពលរដ្ឋបានសិក្សាវិជ្ជាជីវៈណា ដែលអាចឆ្លើយតបនឹងតម្រូវការទីផ្សារក្នុងសង្គមបច្ចុប្បន្ន»។
ប្រតិកម្មរបស់អ្នកការពារសិទ្ធិកម្មកររូបនេះធ្វើឡើងក្រោយពេលមេដឹកនាំរបបក្រុងភ្នំពេញលោក ហ៊ុន សែន បានអះអាងនៅថ្ងៃទី២៥ មីនាថា កម្ពុជាមិនទាន់ផលិតធនធានមនុស្សបានគ្រប់គ្រាន់ស្របទៅតាមតម្រូវការរបស់អ្នកវិនិយោគបរទេសនៅឡើយ។ លោកថាដោយសារបញ្ហានេះហើយ ទើបរបបរបស់លោកអនុញ្ញាតឱ្យកម្មករបរទេសចូលមកធ្វើការនៅកម្ពុជា។ លោកថ្លែងទៀតថា ដើម្បីដោះស្រាយបញ្ហាការងារជូនពលរដ្ឋរបបរបស់លោកក៏បានស្វះស្វែងរកការងារធ្វើនៅប្រទេសដទៃសម្រាប់ពលរដ្ឋខ្មែរផងដែរ៖ «បរទេសមិនមែនចង់យកជនជាតិបរទេសចូលមកនោះទេ ព្រោះតម្លៃពលកម្មដែលយកពីក្រៅមក គឺខ្ពស់។ ប៉ុន្តែដោយសារយើងផ្គត់ផ្គង់ឱ្យគេមិនទាន់គ្រប់។ វិស័យវិស្វកម្ម សំណង់យើងអត់ទាន់មានលទ្ធភាព ដើម្បីផ្គត់ផ្គង់អ្នកបច្ចេកទេសជាន់ខ្ពស់ ឬកម្រិតមធ្យមឱ្យគេគ្រប់គ្រាន់នោះទេ។ ដូច្នេះបានជាយើងផ្ដល់ឱកាសឱ្យគេនាំអ្នកបច្ចេកទេសយកមក»។
ផ្ទុយពីការលើកឡើងនេះលោក ឌី ថេហូយ៉ា មើលឃើញថា សព្វថ្ងៃក្រុមហ៊ុនបរទេសមួយចំនួនមិនមែនយកត្រឹមតែវិស្វករ ឬអ្នកជំនាញការកម្រិតខ្ពស់ ដើម្បីមកស្ថាបនាគម្រោងនោះទេ ពោលគឺពួកគេយកទាំងកម្មករប្រើកម្លាំងពលកម្មមកធ្វើការថែមទៀត ដែលករណីនេះកើតមានច្រើនសម្រាប់ក្រុមហ៊ុនចិន និងវៀតណាម។ លោកបន្តថា រដ្ឋាភិបាលត្រូវគិតគូរឡើងវិញអំពីបញ្ហាការងាររបស់ពលរដ្ឋនេះហើយកម្ពុជាគួរមើលគំរូពីប្រទេសជិតខាងដូចជា ប្រទេសថៃ ជាដើមទាក់ទងនឹងការគ្រប់គ្រងកម្មករបរទេស។ លោកបន្ថែមថា អ្វីដែលរដ្ឋាភិបាលកម្ពុជាត្រូវគិតគូរឱ្យបានខ្លាំងជាងគេទៀតនោះគឺផ្ដល់ជំនាញនិងចំណេះដឹងឱ្យបានគ្រប់គ្រាប់សម្រាប់កម្មកររបស់ខ្លួនទោះបីជាពួកគេធ្វើការនៅក្នុងស្រុកក្តី ឬចេញទៅធ្វើការងារនៅក្រៅប្រទេសក្តី ដើម្បីបញ្ចៀសករណីរំលោភសិទ្ធិការងារនិងការកេងប្រវ័ញ្ចកម្លាំងពលកម្ម៖ «រដ្ឋាភិបាលត្រូវប្រកាសប្រភេទការងារណាដែលអ្នកវិនិយោគមកស្រុកខ្មែរនាំយកមក។ អ្នកបច្ចេកទេស និងជំនាញនីមួយៗ សម្រាប់ធ្វើហ្នឹងគឺកំណត់កូតាឱ្យច្បាស់លាស់មិនមែនចេះតែនាំមក សូម្បីតែអ្នកលើកឥដ្ឋអ្នកអីធម្មតាហ្នឹង ក៏យកមកដែរ។ យើងត្រូវត្រៀម ដើម្បីឱ្យពលរដ្ឋខ្មែរយើង ដែលលោកកំពុងបម្រើការងារនៅស្រុកគេ ហើយគាត់ដាច់កុងត្រា ឬគាត់មិនចង់បន្តការងារនៅស្រុកគេគាត់មានឱកាសត្រឡប់មកធ្វើកិច្ចការងារទាំងអស់ហ្នឹង»។
កម្ពុជាមានកម្លាំងពលកម្មជិត ១០លាននាក់ នៃចំនួនប្រជាជនសរុប។ តួលេខរបស់ក្រសួងការងារបង្ហាញថា ពលរដ្ឋខ្មែរដែលកំពុងធ្វើការនៅក្នុងប្រទេសមានចំនួនជាង ៣លាន ៦សែននាក់ ក្នុងនោះជាង ១លាន ១សែននាក់ ធ្វើការឱ្យសេដ្ឋកិច្ចក្នុងប្រព័ន្ធនិងជាង ២លាន ២សែននាក់ធ្វើការក្នុងវិស័យសេដ្ឋកិច្ចក្រៅប្រព័ន្ធ។ដោយឡែក ពលករខ្មែរដែលកំពុងធ្វើការនៅក្រៅប្រទេសវិញមានចំនួនជាង ១លាន ២សែននាក់ ក៏ប៉ុន្តែបើតាមការប៉ាន់ស្មានក្រៅផ្លូវការរបស់អង្គការសង្គមស៊ីវិលវិញ ពលករចំណាកស្រុកខ្មែរនៅបរទេសយ៉ាងហោចណាស់ក៏មានជាង ២លាននាក់ដែរ។ អ្នកជំនាញអះអាងថា រដ្ឋាភិបាលកម្ពុជាត្រូវខិតខំផ្ដល់ការបណ្ដុះបណ្ដាលជំនាញបច្ចេកទេសដល់ពលរដ្ឋ និងបង្កើតការងារនៅក្នុងស្រុកឱ្យបានកាន់តែច្រើន ដើម្បីស្រូបយកកម្លាំងពលកម្ម ដែលចេះតែបន្តកើនឡើងជាលំដាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។