ដោយ អាស៊ីសេរី
2019-04-21
ជនសង្ស័យ ៣នាក់ ក្នុងចំណោម ១០នាក់ ដែលសមត្ថកិច្ចឃាត់ខ្លួន បន្ទាប់ពីដឹកឈើចេញពីព្រៃអភិរក្ស ក្នុងស្រុកកោះញែក កាលពីថ្ងៃទី១៩ ខែមេសា ឆ្នាំ២០១៩។ Photo Provided
ប្រធានមន្ទីរបរិស្ថានខេត្តមណ្ឌលគិរី លោក កែវ សុភ័ក្រ ឱ្យដឹងនៅថ្ងៃទី ២១ មេសាថា សមត្ថកិច្ចជំនាញ បញ្ជូនពលរដ្ឋខ្មែរ ៨នាក់ និងជនជាតិវៀតណាម ២នាក់ ទៅតុលាការ នៅរសៀលថ្ងៃទី ២១ មេសា។
ទន្ទឹមនឹងនេះ មន្ត្រីជំនាញ និងសមត្ថកិច្ចបានឃាត់គោយន្ត ៥គ្រឿង រថយន្តស្លាកលេខវៀតណាម ១គ្រឿង ម៉ូតូមួយគ្រឿង និងឈើជាង ៦០០កំណាត់។ លោកថា ឈើទាំងនោះ ជនសង្ស័យ បានប្រមូលចេញ ពីតំបន់ព្រៃរបៀង ជាព្រៃអភិរក្សជីវចម្រុះ នៅជាប់ក្រុមហ៊ុន លឹមរ៉ូយ៉ាល់ ឋិតនៅស្រុកកោះញែក។
លោកបញ្ជាក់ថា ជនជាតិវៀតណាមទាំងនោះមានលិខិតឆ្លងដែនត្រឹមត្រូវ ប៉ុន្តែប្រសិនបើរកឃើញថា ពួកគេប្រព្រឹត្តបទល្មើសព្រៃឈើនោះ នឹងត្រូវទទួលទោសតាមច្បាប់របស់កម្ពុជា៖ «រឹបអូសវត្ថុតាងបាន គោយន្តកន្ត្រៃ ៥គ្រឿង រថយន្តស្លាកលេខ វៀតណាម ១គ្រឿង ម៉ូតូមួយគ្រឿង និងឈើជាង ៦រយកំណាត់មានតូចធំ ចេញតែរាប់ទាំងអស់។ ក្នុងនាមមន្ទីរបរិស្ថានជាអ្នកចងក្រងសំណុំរឿង បញ្ជូនទៅតុលាការ ដឹងតែចោទប្រកាន់ គឺចោទប្រកាន់ ដើម្បីដាក់ទៅតុលាការតែម្ដង»។
សេចក្ដីរាយការណ៍ពីសហគមន៍ការពារព្រៃឈើស្រុកកោះញែក ឱ្យដឹងថា ជនសង្ស័យទាំង ១០នាក់ដែលសមត្ថកិច្ចឃាត់ខ្លួនមាន ៣នាក់ ជាអ្នកទិញឈើយ៉ាងសកម្ម ក្នុងតំបន់ព្រៃការពារធម្មជាតិ ក្នុងស្រុកកោះញែក។ ឈើដែលរឹបអូសភាគច្រើន ជាប្រភេទឈើសុក្រំ និងកកោះ ដែលប្រមូលចេញ ពីដែនជម្រកសត្វព្រៃភ្នំព្រេច ឋិតក្រោមការគ្រប់គ្រងរបស់មន្ត្រីឧទ្យានុរក្ស នៃមន្ទីរបរិស្ថានខេត្ត។
សហគមន៍ការពារព្រៃឈើ ខេត្តមណ្ឌលគិរី លោក ក្រើង តុលា សាទរចំពោះចំណាត់ការរបស់អាជ្ញាធរជំនាញ ក្នុងការអនុវត្តច្បាប់រឿងនេះ ក៏ប៉ុន្តែពួកគេបារម្ភខ្លាចក្រែង តុលាការអាចនឹងដោះលែងជនជាតិវៀតណាមទាំងនោះ ដោយសារឥទ្ធិពលនៃអំពើពុករលួយ។ លោកទទូចឱ្យអាជ្ញាធរត្រូវដាក់ទោសជនជាតិវៀតណាមទាំងនោះ តាមច្បាប់របស់កម្ពុជាជាមុនសិន មុននឹងដោះលែងពួកគេឱ្យត្រឡប់ទៅវិញ ព្រោះកន្លងទៅអាជ្ញាធរខេត្តនេះ ធ្លាប់បញ្ជូនជនជាតិវៀតណាមទៅប្រទេសគេវិញ នៅគ្រាដែលឆ្លងដែនមកកាប់ឈើខុសច្បាប់ក្នុងទឹកដីខ្មែរ៖ «សំណូមពរទៅតុលាការ សុំឱ្យគាត់ដាក់ទោសទណ្ឌជនជាតិវៀតណាម ល្មើសបំផ្លាញព្រៃឈើនៅកម្ពុជាហ្នឹង តាមច្បាប់ផង កុំឱ្យតែឃើញ បានតែមួយខែឬកន្លះខែ ដោះលែង ជាធម្មតាខ្ញុំឃើញភាគច្រើនយ៉ាងយូរ ៣ខែ ដោះលែង គេធ្វើលេសបញ្ជូនជនជាតិវៀតណាមទៅប្រទេសរបស់គេ ដល់ប្រទេសគេ គេដោះលែង»។
មន្ត្រីពង្រឹងសិទ្ធិអំណាចសហគមន៍ នៃសមាគមអាដហុក (Adhoc) លោក ប៉ែន ប៊ុណ្ណារ៍ សង្កេតឃើញថា បើទោះបីជាសមត្ថកិច្ចជំនាញ ឃាត់ខ្លួនជនសង្ស័យបែបនេះក្តី តែអ្នកដែលកាងបទល្មើសព្រៃឈើ និងអ្នកដែលនៅពីក្រោយខ្នង នៅតែរួចខ្លួនដដែល។ លោកគិតថា ជំនួញឈើខ្នាតធំនេះ អាចនឹងពាក់ព័ន្ធអ្នកមានអំណាចគ្រាក់ៗជាច្រើនទៀត ដែលទាមទារឱ្យសមត្ថកិច្ច និងតុលាការត្រូវស៊ើបអង្កេតមកផ្ដន្ទាទោសតាមច្បាប់ឱ្យគ្រប់ជ្រុងជ្រោយ៖ «ព្រោះតែចាប់តែកូនចៅតូចតាច តែបទល្មើសបន្តទៀត នៅតែមានបន្តរហូត។ សូមឱ្យស្រាវជ្រាវចាប់មេខ្លោង នៃជំនួញឈើខុសច្បាប់ មកផ្ដន្ទាទោស ទើបទប់ស្កាត់បទល្មើសព្រៃឈើមានប្រសិទ្ធភាព»។
ទោះយ៉ាងណាសហគមន៍ការពារព្រៃឈើ និងសកម្មជនបរិស្ថាន បន្ថែមថា ការអនុវត្តច្បាប់ព្រៃឈើរបស់អាជ្ញាធរពាក់ព័ន្ធ និងគណៈកម្មការទប់ស្កាត់និងបង្ក្រាបបទល្មើសព្រៃឈើនៅមិនទាន់ធ្វើឱ្យពួកគេស្ងប់អារម្មណ៍នៅឡើយទេ ខណៈដែលក្រុមហ៊ុនសម្បទានសេដ្ឋកិច្ចជាច្រើននៅស្រុកកោះញែក នៅបន្តបើកការដ្ឋានអារច្រៀកឈើ ទិញឈើនិងដឹកជញ្ជូនទៅលក់នៅប្រទេសវៀតណាមហើយឈើទាំងនោះ ភាគច្រើនក្រុមឈ្មួញបានដឹកជញ្ជូនចេញពីដែនជម្រកសត្វព្រៃភ្នំព្រេច និងព្រៃការពារធម្មជាតិមួយចំនួនទៀត។ ពួកគេអំពាវនាវឱ្យ លោក សៅ សុខា និង លោក ហ៊ុន សែន អនុវត្តច្បាប់ និងបញ្ឈប់អាជ្ញាប័ណ្ណក្រុមហ៊ុនទាំងនោះដែលពួកគេរកឃើញថា ជាប្រភពនៃវិនាសកម្មព្រៃឈើនៅខេត្តភាគឦសាន៕