ក្រុមហ៊ុន​សម្បទាន​សេដ្ឋកិច្ច​ចំនួន​៥ នៅ​ខេត្ត​មណ្ឌលគិរី​ប្រឈម​ការ​ដក​ហូត​អាជ្ញាប័ណ្ណ

ដោយ ថន ថារ៉ូ
2019-07-20
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

ទិដ្ឋភាព​កាប់​ទន្ទ្រាន​ដែន​ជម្រក​សត្វ​ព្រៃ​ភ្នំ​ព្រេច ស្រុក​កោះ​ញ៉ែក ខេត្ត​មណ្ឌលគិរី កាល​ពី​ខែ ឧសភា ឆ្នាំ ២០១៨។ រូប​៖ ​ដោយ​សហគមន៍
ទិដ្ឋភាព​កាប់​ទន្ទ្រាន​ដែន​ជម្រក​សត្វ​ព្រៃ​ភ្នំ​ព្រេច ស្រុក​កោះ​ញ៉ែក ខេត្ត​មណ្ឌលគិរី កាល​ពី​ខែ ឧសភា ឆ្នាំ ២០១៨។ រូប​៖ ​ដោយ​សហគមន៍


ក្រុមហ៊ុន​សម្បទាន​សេដ្ឋកិច្ច​ចំនួន ៥ ឋិត​ក្នុងស្រុក​កោះ​ញែក ខេត្ត​មណ្ឌលគិរី​។ ក្រុមហ៊ុន​ទាំងនេះ​ភាគច្រើន​ជា​ក្រុមហ៊ុន​របស់​ចិន ហើយ​លួច​កាប់​ឈើ នៅ​ក្រៅ​បរិវេណ​ដី​សម្បទាន​សេដ្ឋកិច្ច។ សកម្មជន​បរិស្ថាន និង​ក្រុម​ជនជាតិ​ដើម​ភាគតិច ធ្លាប់​បាន​រាយការណ៍​ជា​ញឹកញយ​មក​ហើយ​ថា​ក្រុមហ៊ុន​ទាំងនេះ ធ្វើ​អាជីវកម្ម​ឈើ​ខុសច្បាប់​ទ្រង់ទ្រាយ​ធំ ក្នុង​តំបន់​ព្រៃ​ការពារ​ធម្មជាតិ ជា​យូរ​មក​ហើយ​។ អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី ថ្លែង​ថា ក្រុមហ៊ុន​ណា​ដែល​ល្មើសច្បាប់ នឹង​ដក​អាជ្ញាប័ណ្ណ។

អ្នកនាំពាក្យ​គណៈកម្មការ​ជាតិ ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី ថ្លែង​ក្នុង​វេទិកា​សន្និសីទកាសែត នៅ​ចំពោះ​មុខ​ក្រុម​អ្នកកាសែត កាលពី​ព្រឹក​ថ្ងៃ​ទី១៨ កក្កដា​ថា ក្រុម​មន្ត្រី​ជំនាញ កំពុង​ស្រាវជ្រាវ និង​ស៊ើបអង្កេត​ទៅលើ​ក្រុមហ៊ុន​ចំនួន ៥ ដែល​ទទួល​សិទ្ធិ​វិនិយោគ​ដី​សម្បទាន​សេដ្ឋកិច្ច ក្នុងស្រុក​កោះ​ញែក ខេត្ត​មណ្ឌលគិរី។ លោក​ថា ប្រសិនបើ​រក​ឃើញ​ថា ក្រុមហ៊ុន​ទាំងនោះ មាន​ពាក់ព័ន្ធ​បទល្មើស​ព្រៃឈើ​នឹង​ត្រូវ​ដក​អាជ្ញាប័ណ្ណ។

ក្រុមហ៊ុន​ទាំងនោះ​រួមមាន ក្រុមហ៊ុន​ម៉ាស្ទ័រខេសិន ក្រុមហ៊ុន​ចិន យ៉ាន់ចាវ ក្រុមហ៊ុន ថាច់វូដ ក្រុមហ៊ុន​វិជ្ជរី និង ក្រុមហ៊ុន​ណេងណា។ លោក​បន្ថែម​ថា សមត្ថកិច្ច​កំពុង​រក​ជនសង្ស័យ​ពាក់ព័ន្ធ ៩​នាក់​ទៀត​។ សមត្ថកិច្ច​ក៏បាន​រក​ឃើញ​ឈើ​ខុសច្បាប់​ចំនួន ១​ពាន់ ៧​រយ​ម៉ែត្រ​គូប (១៧០០) និង​រឹបអូស​រថយន្ត​ដឹក​ឈើ អារ៉េវ ជាង ៤០​គ្រឿង ក្នុងនោះ​មាន​រថយន្ត​ចំនួន​២៩​គ្រឿង ត្រូវ​ដុត​កម្ទេច​ចោល​នៅ​ហ្នឹង​កន្លែង។

អាស៊ីសេរី​បាន​ទាក់ទង​អ្នកនាំពាក្យ​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី ដើម្បី​សុំ​ការ​អធិប្បាយ​បន្ថែម​ជុំវិញ បញ្ហា​នេះ​តែ​ទូរស័ព្ទ​ហៅ​ចូល​ច្រើនដង​គ្មាន​អ្នកទទួល​នៅ​ថ្ងៃទី១៨ កក្កដា។

អ្នកនាំពាក្យ​សាលាខេត្ត​មណ្ឌលគិរី លោក សុក សេរ៉ា ថ្លែង​ថា អភិបាលខេត្ត​តែង​កោះ​ប្រជុំ​គណៈបញ្ជាការ​ឯកភាព​ខេត្ត ជា​ញឹកញាប់ ដោយ​ស្នើ​ឱ្យ​ស្ថាប័ន​ពាក់ព័ន្ធ​យកចិត្តទុកដាក់​អនុវត្ត​ច្បាប់​ព្រៃឈើ​។ រីឯ​អភិបាលខេត្ត​តែងតែ​ចុះទៅ​មូលដ្ឋាន​ផ្ទាល់ ណែនាំ​ក្រុមហ៊ុន​ឯកជន និង​សហគមន៍​មូលដ្ឋាន ដើម្បី​អប់រំ​ពួកគេ ឱ្យ​ចូលរួម​ការពារ​ព្រៃឈើ និង​បញ្ឈប់​សកម្មភាព​កាប់​ឈើ​ខុសច្បាប់​ទាំងឡាយ​៖ «ថ្នាក់​ខេត្ត​ចៅហ្វាយខេត្ត គាត់​ចុះទៅ​ផ្ទាល់​ទៅ​ណែនាំ នៅ​កន្លែង​ហ្នឹង​ទៀត ពេលនោះ​ពុំ​មាន​អី​ទេ​។ ទើបតែ​មួយ​រយៈ​ក្រោយ​ដែល​យើង រវល់​ប៉ុន្មាន​ខែ ប្រហែល ២​ខែ​យើង​ដកឃ្លា គឺ​មួយរយៈ​ហ្នឹង តែ​មុន​ហ្នឹង​អត់​មាន ឬក៏​ពេល​ដែល​យើង​ទៅ​អត់​មាន យើង​ដកឃ្លា​មក​គេ​មាន​។ គេ​លួច​គេ​ឆក់​ក្រោយខ្នង នៅ​ចាំតែ​មើលផ្លូវ​យើង ហើយ​យើង​ពុំ​មាន​ពេល​នៅ​ប្រចាំការ ២៤​ម៉ោង​អ៊ីចឹង»

មន្ត្រី​ពង្រឹង​សិទ្ធិ​អំណាច​សហគមន៍​នៃ​សមាគម​អាដហុក លោក ប៉ែន ប៊ុណ្ណារ៍ មើល​ឃើញ​ថា ចំណាត់​ការ​ក្តៅ​របស់​គណៈកម្មការ​ជំនាញ​មួយ​នេះ អនុវត្ត​តែ​ខេត្ត​មួយ​ប៉ុណ្ណោះ រីឯ​ខេត្ត​ផ្សេងៗ​ទៀត​ដែល​សំបូរ​ដោយ​បទល្មើស​ឧក្រិដ្ឋ​ព្រៃឈើ ដូចជា ខេត្ត​រតនគិរី ស្ទឹងត្រែង និង​ខេត្ត​ព្រះវិហារ​ជាដើម មិន​ឃើញ​មានការ​បង្ក្រាប​ទ្រង់ទ្រាយ​ធំ​នោះ​ទេ​។ បញ្ហា​នេះ​ហាក់​ទុក​ឱកាស​ឱ្យ​ក្រុម​ឧក្រិដ្ឋជន និង​ក្រុមហ៊ុន​ផ្សេងទៀត ប្រុងប្រយ័ត្ន និង​លាក់​វត្ថុ​តាង​ទុក​។ លោក​ថា អភិបាលខេត្ត​នីមួយៗ​ដែល​ជា​សមាជិក​គណៈកម្មការ​ជាតិ​ត្រូវតែ​បើក​ប្រតិបត្តិ​ការ​បង្ក្រាប​បទល្មើស​ឱ្យ​ខ្លាំងក្លា ពុំ​មែន​រង់ចាំ​តែ​ថ្នាក់​ជាតិ​ចុះ​បង្ក្រាប​ម្ដងម្កាល​នោះ​ទេ​៖ «អ្វី​ដែល​ធ្វើ​តែមួយ​កន្លែង ធ្វើ​ឱ្យ​ពលរដ្ឋ​យើង​មានការ​សង្ស័យ​ទៅវិញ​ទេ។ សមាជិក​ជា​អភិបាលខេត្ត ប្រាកដ​ជា មាន​ទំនាក់ទំនង ឬមួយ​ក៏​ពាក់ព័ន្ធ​ជាមួយ​អំពើ​ឧក្រិដ្ឋ​ព្រៃឈើ និង​អំពើពុករលួយ​ហ្នឹងហើយ​។ ប្រសិនជា​ពុំ​មាន​ទេ ប្រាកដជា​ប្រតិបត្តិ​ការ​ធ្វើ​គ្រប់​តែ​កន្លែង នេះ​ជា​ការ​ដាក់​ការសង្ស័យ​។ ដូច​យើង​និយាយ​អ៊ីចឹង ខេត្ត​បាន​ផ្សាយ​ព័ត៌មាន​ទេ តែ​ផ្ទុយ​ទៅវិញ​ខេត្ត​ប្រាកដជា​មាន​ការ​ពាក់ព័ន្ធ»

មន្ត្រី​សង្គម​ស៊ីវិល​រូប​នេះ​បន្ថែម​ថា ការបាត់បង់​ព្រៃឈើ​ធំធេង ហើយ​ការ​ដឹក​ជញ្ជូន​ឈើ​ខុសច្បាប់​កើតមាន​ច្រើន​ជា​យូរ​មក​ហើយ ពុំ​មែន​មាន​ជាប់​ពាក់ព័ន្ធ​មន្ត្រី​រដ្ឋបាល​ព្រៃឈើ ៣​នាក់ ដែល​សមត្ថកិច្ច​កំពុង​តាម​ចាប់ខ្លួន​នោះ​ទេ​។ លោក​គិត​ថា សមត្ថកិច្ច និង​អាជ្ញាធរ ដែល​ឃុបឃិត​អនុញ្ញាត​ឱ្យ​មាន​បទល្មើស​ព្រៃឈើ និង​ប្រព្រឹត្ត​អំពើពុករលួយ បាន​កើត​មាន​ជា​ប្រព័ន្ធ និង​អាច​មាន​ពាក់ព័ន្ធ​មន្ត្រី​ធំៗ​ថ្នាក់​ខេត្ត និង​ថ្នាក់​ជាតិ គឺជា​ឧបសគ្គ​ធ្វើ​ឱ្យ​គណៈកម្មការ​ជំនាញ​មួយ​នេះ​ពិបាក​សម្រេចចិត្ត​អនុវត្ត​ច្បាប់​ដែរ៖ «បង្ក្រាប​តែ​រឿង​អី​ថ្មីៗ អ៊ីចឹង​វា​អយុត្តិធម៌​។ ចំពោះ​ច្បាប់ គឺ​មាន​ចែង​ច្បាស់​អាជ្ញាយុកាល​នៃ​បទល្មើស​ឧក្រិដ្ឋ​ដែល​មាន​រហូតដល់ ១៥​ឆ្នាំ។ អ៊ីចឹង​រាល់​បទល្មើស​ឧក្រិដ្ឋ​ព្រៃឈើ បទល្មើស​ពុករលួយ ដែល​ឋិត​ក្នុង​ដែន​នៃ​អាជ្ញាយុកាល​នេះ​។ មន្ត្រី​នគរបាល​យុត្តិធម៌​ត្រូវ​កសាង​សំណុំរឿង​គ្រប់កន្លែង​បញ្ជូន​មក​អយ្យការ ដើម្បី​ឱ្យ​អាជ្ញាយុកាល​ធ្វើការ​ស៊ើប​អង្កេត​នាំ​ខ្លួន​អតីត​ឧក្រិដ្ឋជន​មក​ផ្ដន្ទាទោស វា​អាច​បំបាត់​បទល្មើស​បាន»

សកម្មជន​បរិស្ថាន លោក ហេង ស្រស់ ដែល​ចុះ​អង្កេត​រឿង​នេះ​ថ្លែង​ថា ក្រុមហ៊ុន​ទាំង ៥​នោះ សុទ្ធ​សឹង​មាន​ពាក់ព័ន្ធ​បទល្មើស​ព្រៃឈើ​ខ្នាត​ធំ​ជា​យូរ​មក​ហើយ ខណៈ​ដែល​ពួកគេ​បាន​ចុះ​ស៊ើបអង្កេត​ដល់​មូលដ្ឋាន រក​ឃើញ​ក្បួន​រថយន្ត​យីឌុប រាប់​សិប​គ្រឿង​ដឹកជញ្ជូន​ឈើ​ចេញពី​ដែន​ជម្រក​សត្វព្រៃ​ភ្នំ​ព្រេច ឆ្លងកាត់​ភូមិ​សំពោច ស្រុក​ស្នួល ខេត្ត​ក្រចេះ ទៅ​លក់​នៅ​វៀតណាម​។ លោក​ថា មាន​ក្រុមហ៊ុន​ខ្លះ មាន​រោងចក្រ​អារ​ច្រៀក​ឈើ​ខ្នាត​ធំ នៅ​តំបន់​នោះ​។ រីឯ​ក្រុម​ឈ្មួញ​បាន​កៀរគរ​ពលរដ្ឋ​ឱ្យ​ចូល​ព្រៃ​អារ​ឈើ​លក់​ឱ្យ​ខ្លួន៖ «មិន​ត្រឹមតែ​រដ្ឋបាល​ព្រៃឈើ ៣​នាក់​នេះ​ទេ គឺ​ត្រូវ​មាន​ចៅហ្វាយស្រុក មាន​ប៉េអិម ចៅហ្វាយខេត្ត មាន​ស្នងការ​រង គឺ​សុទ្ធតែ​ជាប់​ពាក់ព័ន្ធ​រកស៊ី​ឈើ​បទល្មើស​ព្រៃឈើ ក្នុង​ខេត្ត​មណ្ឌលគិរី​ហ្នឹង។ ពួកគាត់​សុទ្ធតែ​អ្នកដឹង​ហើយ នរណា​ដែល​ទទួល​សំណូក​ចេញពី​ក្រុម​ឧក្រិដ្ឋជន​ទាំងនោះ ដើម្បី​បើកភ្លើង​ខៀវ​ឱ្យ​ក្រុម​ឧក្រិដ្ឋជន​ទាំងនោះ រកស៊ី​កាប់​បំផ្លាញ​ព្រៃឈើ ហើយ​ឡាន​រាប់​សិប​គ្រឿង រកស៊ី​ដឹកជញ្ជូន​ឈើ​។ ដឹក​ពុំ​មែន​តិច​ខែ​ទេ គឺ​ដឹក​សុទ្ធ ២ ទៅ ៣​ខែ ក្នុង​ខេត្ត​មណ្ឌលគិរី»

សកម្មជន​បរិស្ថាន និង​មន្ត្រី​សង្គម​ស៊ីវិល បន្ថែម​ថា វត្តមាន​ក្រុមហ៊ុន​សម្បទាន​សេដ្ឋកិច្ច​ទាំងនោះ បាន​ធ្វើ​អាជីវកម្ម​ឈើ​ខ្នាត​ធំ ជាច្រើន​ឆ្នាំ​មក​ហើយ បណ្ដាល​ឱ្យ ដែន​ជម្រក​សត្វព្រៃ​ស្នួល ដែល​មាន​ផ្ទៃដី​ជាច្រើន​ម៉ឺន​ហិកតារ​រលាយ​ហិនហោច​អស់ទាំង​ស្រុង នៅ​រយៈពេល​ប៉ុន្មាន​ឆ្នាំ​ចុង​ក្រោយនេះ​។ កាលពី​ឆ្នាំ ២០១៨ របប​លោក ហ៊ុន សែន បាន​រំសាយ​ដែន​ជម្រក​សត្វព្រៃ​ស្នួល និង​ដែន​ជម្រក​សត្វព្រៃ​រនាម​ដូនសំ ដែល​មាន​ផ្ទៃដី​ជាង ១១​ម៉ឺន​ហិកតារ ក្រោម​ហេតុផល​ថា តំបន់​ទាំងពីរ​បាត់បង់​សក្ដានុពល​ជា​តំបន់​អភិរក្ស តែ​ធាតុ​ពិត​ព្រៃ​ការពារ​ធម្មជាត​ទាំងពីរ​នេះ​រងគ្រោះ ដោយសារតែ​ក្រុមហ៊ុន​សម្បទាន​សេដ្ឋកិច្ច និង​ក្រុមហ៊ុន​ឯកជន ទទួល​បាន​ដី​សម្បទាន​សេដ្ឋកិច្ច ឃុបឃិត​ជាមួយ​មន្ត្រី​រដ្ឋបាល​ព្រៃឈើ បន្លំ​កាប់​ឈើ​ធំៗ លក់​នៅ​ប្រទេស​វៀតណាម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


What Next?

Recent Articles

One Response to "ក្រុមហ៊ុន​សម្បទាន​សេដ្ឋកិច្ច​ចំនួន​៥ នៅ​ខេត្ត​មណ្ឌលគិរី​ប្រឈម​ការ​ដក​ហូត​អាជ្ញាប័ណ្ណ"

  1. Anonymous says:

    land concession in Cambodia to Chinese company was HUN SEN policy in order to mad corruption money. and the land concession to Vietnamese for 99 years was HO CHIMIN policy to take over Cambodia. there was a lot of question about land concession to CHINA. CHINA and CAMBODIA agree about economy trade of selling rice, sugar, banana, ext. please think over to see what their plane was?? CHINA got free land to produce right here in Cambodia then they send it to CHINA. they will tell the world that CHINA take a lot of production from Cambodia. there is nothing that HUN SEN said making job for Cambodian .instated CHINA bring their farming machinery come to farming in Cambodia. the question is how can HUN SEN said greed job for Cambodian . this is the big question that Cambodian should ask HUN SEN . did Cambodian ever hard world report said Cambodia the country for sell. this is what it mean all Cambodian can see in their own eyes . I did not believe that Cambodia is a small country why HUN SEN had a lot of land for those foreigner. how about Cambodian are they have land to at lease grooving rice to feet their families . no I did not see that Cambodian have to go looking for work in Thai land or other . it is strange no Cambodian going looking for work in Vietnam why?? HUN SEN leadership saying Cambodia right now is booming economic , road, building. ex . but some Cambodian right now is staving to dead they are crying for food. that right I can not believe that HUN SEN is only a Cambodian GOD. instated HUN SEN is………………………………. please fill up this blank