លោក សូរ្យ ជ័យឧត្ដម
២២ មករា ២០២០ | ម៉ោង ១២:០៣ ល្ងាច
https://vodkhmer.news
លោក កឹម សុខា ប្រធានគណបក្សសង្គ្រោះជាតិដែលត្រូវបានរំលាយចោល នៅគេហដ្ឋានរបស់លោក នៅរាជធានីភ្នំពេញ នៅថ្ងៃទី១៣ ខែវិច្ឆិកា ឆ្នាំ២០១៩។ (សាញ់ ប៊ុនហឿន)
ស្ថាប័នឃ្លាំមើលការរំលោភសិទ្ធិមនុស្សតំបន់អាស៊ី បាននិយាយថា អតីតមេដឹកនាំបក្សប្រឆាំង លោក កឹម សុខា មិនទទួលបានសិទ្ធិជនុំជម្រះក្ដីជាសាធារណៈទៅតាមច្បាប់អន្តរជាតិនោះឡើយ។
សំណុំរឿងប្រធានគណបក្សសង្គ្រោះជាតិ លោក កឹម សុខា ដែលត្រូវបានចោទប្រកាន់ពីបទ«ក្បត់ជាតិ» ត្រូវបានសាលាដំបូងរាជធានីភ្នំពេញ បើកសវនាការជំនុំជម្រះជាលើកទី២នៅថ្ងៃពុធនេះ បន្ទាប់ពីសវនាការរយៈពេល២ថ្ងៃលើកដំបូងកាលពីសប្ដាហ៍មុន។
ខុសពីសវនាការលើកដំបូងកាលពីមុន សាលាដំបូងរាជធានីភ្នំពេញ បានអនុញ្ញាតឱ្យអ្នកសារព័ត៌មាន និងមន្ត្រីសង្គមស៊ីវិល បានចូលរួមតាមដានក្នុងបន្ទប់សវនាការនៅថ្ងៃនេះ ប៉ុន្តែ បើកឱ្យតំណាងតែម្នាក់មកពីស្ថាប័ននីមួយៗចូលរួម។
ក្នុងសេចក្ដីថ្លែងការណ៍របស់ខ្លួននៅថ្ងៃនេះ អង្គការឃ្លាំមើលសិទ្ធិមនុស្ស (Human Rights Watch) បានលើកឡើងថា មេដឹកនាំបក្សប្រឆាំងរូបនេះ កំពុងតែមិនទទួលបានសិទ្ធិទទួលបានការជំនុំជម្រះក្ដីជាសាធារណៈនោះឡើយ។
លោក កឹម សុខា ត្រូវបានសមត្ថកិច្ចចូលចាប់ខ្លួនទាំងកណ្ដាលអាធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ ក្រោមការចោទប្រកាន់ពីរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ថា «ក្បត់ជាតិ»។
អតីតមេបក្សប្រឆាំងរូបនេះ ត្រូវបានបញ្ជូនទៅដាក់ឃុំខ្លួននៅឯពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ ជាប់ព្រំដែនវៀតណាម មុននឹងបញ្ជូនមកដាក់ឃុំក្នុងផ្ទះ ក្រោយត្រូវបានដាក់ឃុំនៅត្រពាំងផ្លុងអស់រយៈពេលជាង ១ឆ្នាំ។
លោក កឹម សុខា ត្រូវបានដោះលែងឱ្យរួចផុតពីការឃុំខ្លួនក្នុងផ្ទះកាលពីទី១០ ខែវិច្ឆិកាឆ្នាំមុន មួយថ្ងៃក្រោយពីគម្រោងវិលត្រឡប់ចូលស្រុកវិញរបស់អតីតមេបក្សប្រឆាំង លោក សម រង្ស៊ី ពុំបានកើតឡើង។
លោក Phil Robertson នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស បានលើកឡើងក្នុងសេចក្ដីថ្លែងការណ៍នេះថា ដំណើរការកាត់ក្ដីលោក កឹម សុខា រឹតតែអាក្រក់ថែមទៀត ដោយសារតែការផាត់ក្រុមអ្នកឃ្លាំមើលសិទ្ធិមនុស្ស និងក្រុមអ្នកសារព័ត៌មាន មិនឱ្យចូលតាមដានក្នុងបន្ទប់សវនាការ។
លោក Phil Robertson និយាយថា៖ «អាជ្ញាធរកម្ពុជា គួរតែទម្លាក់ចោលការចោទប្រកាន់លើលោក កឹម សុខា ផ្ទុយទៅវិញ បែរជាព្យាយាមបន្តប្រព្រឹត្តទាំងខុសច្បាប់ និងបែបចាស់គំរិល មិនឱ្យសាធារណជនបានឃើញគាត់»។
អង្គការឃ្លាំមើលការរំលោភបំពានសិទ្ធិមនុស្សមួយនេះ កម្ពុជាគឺជាប្រទេសហត្ថលេខីលើអនុសញ្ញាអន្តរជាតិស្ដីពីសិទ្ធិស៊ីវិល និងសិទ្ធិនយោបាយ ដែលបានធានានូវសិទ្ធិទទួលបានសវនាការដោយត្រឹមត្រូវ និងជាសាធារណៈ ដែលមានការចូលរួមតាមដានពីគ្រប់គូភាគី ក្រុមឯករាជ្យ និងមិនលម្អៀង៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។