នយោបាយ | ព័ត៌មានជាតិ | អភិបាលកិច្ច
លោក ញឹម សុខន | ២៥ ឧសភា ២០២០ | ម៉ោង ៨:២២ ល្ងាច
VOD
លោក កឹម សុខា ថ្លែងប្រាប់អ្នកសារព័ត៌មានមុនពេលចូលសវនាការសាលាដំបូងរាជធានីភ្នំពេញ ថ្ងៃទី២២ ខែមករា ឆ្នាំ២០២០។ (សាញ់ ប៊ុនហឿន)
អតីតមេដឹកនាំគណបក្សសង្គ្រោះជាតិ លោក កឹម សុខា អំពាវនាវទៅបណ្តាប្រទេសជឿនលឿនឱ្យបន្តជួយកម្ពុជាដែលកំពុងរងផលប៉ះពាល់ពីជំងឺកូវីដ១៩។
លោក កឹម សុខា បានបង្ហោះសារនៅលើហ្វេសប៊ុករបស់លោកនៅថ្ងៃនេះ ថ្លែងអំណរគុណប្រជាពលរដ្ឋខ្មែរ និងឥស្សរជន ក៏ដូចជាអង្គទូត តំណាងប្រទេសប្រជាធិបតេយ្យជឿនលឿននានា ដែលបានទទួលស្គាល់នូវ«គុណតម្លៃ»របស់លោក ដោយផ្តល់ឱកាសឱ្យលោកទទួលស្វាគមន៍ ជួបសួរសុខទុក្ខ សន្ទនាគ្នា ប្រកបដោយកិត្តិយស ទោះបីខ្ញុំកំពុងស្ថិតនៅក្នុងស្ថានភាពណាក៏ដោយ។
អតីតមេដឹកនាំបក្សប្រឆាំងរូបនេះ ក៏អរគុណផងដែរដល់ប្រទេសជាមិត្ត ដែលថា បានជួយដល់ប្រទេសកម្ពុជាដោយសុទ្ធចិត្ត កន្លងមក និងបច្ចុប្បន្ន ស្របតាមគុណតម្លៃនៃមនុស្សជាតិ។
លោកថា៖ «ខ្ញុំសូមអំពាវនាវដល់ប្រទេសជាមិត្តរបស់កម្ពុជា សូមបន្តជួយដល់កម្ពុជាលើវិស័យនានា ជាពិសេសបញ្ហាដែលប៉ះពាល់ដល់ជីវភាពរស់នៅរបស់ប្រជាពលរដ្ឋខ្មែរ ក្នុងពេលដែលជំងឺកូវីដ-១៩ កំពុងរាលដាលក្នុងពិភពលោក និងពីផលវិបាកលើវិស័យសេដ្ឋកិច្ច និងសង្គមនៅពេលអនាគត ដែលចាំបាច់តម្រូវឱ្យមានការរួបរួមគ្នាដោះស្រាយបញ្ហាប្រឈមទាំងនោះ»។
លោក កឹម សុខា បន្តលើកឡើងថា ជាទូទៅប្រទេស ឬអ្នកទាំងឡាយណា ដែលស្គាល់នូវតម្លៃពិតរបស់មនុស្ស គេធ្វើការវាយតម្លៃដោយផ្អែកលើ «គុណតម្លៃ» ដែលមិនអាស្រ័យទៅលើតែមុខតំណែង គោរមងារ ឬទ្រព្យសម្បត្តិ ដែលជាសម្បកក្រៅនោះទេ ដែលលោកហៅថា «តម្លៃដែលគ្មានគុណតម្លៃ មិនមែនជាតម្លៃពិតឡើយ»។
ជំងឺកូវីដ១៩ កំពុងរាលដាលក្នុងពិភពលោក និងផលវិបាកលើវិស័យសេដ្ឋកិច្ច និងសង្គមនៅពេលអនាគត ដែលចាំបាច់តម្រូវឱ្យមានការរួបរួមគ្នាដោះស្រាយបញ្ហាប្រឈមទាំងនោះ។
គិតត្រឹមថ្ងៃចន្ទនេះ តុលាការមិនទាន់បើកផ្លូវឱ្យលោក កឹម សុខា ធ្វើនយោបាយវិញនៅឡើយទេ ក្រោយពីសមត្ថកិច្ចឆ្មក់ចូលចាប់ខ្លួនលោក នៅយប់ថ្ងៃទី៣ ខែកញ្ញា ឆ្នាំ២០១៧ ខណៈគណបក្សប្រឆាំងនេះដណ្តើមបានអាសនៈឃុំសង្កាត់ជិតស្មើគណបក្សកាន់អំណាច។
អតីតមេបក្សប្រឆាំងរូបនេះ ត្រូវបានចោទប្រកាន់ពីបទ «ក្បត់ជាតិ» ប៉ុន្តែ ប្រទេសប្រជាធិបតេយ្យជឿនលឿនចាត់ទុកចំណាត់ការនេះថា ជារឿងនយោបាយ និងជំរុញឱ្យមានការផ្សះផ្សាជាតិឡើងវិញ ដើម្បីធានាដំណើរការប្រជាធិបតេយ្យនៅកម្ពុជា។
ទោះជាយ៉ាងណា ក្រោយពីលោក កឹម សុខា បានជួបពិភាក្សាដ៏កម្រមួយជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី៥ ខែឧសភានេះរួចមក មានមន្ត្រីទូតនៃបណ្តាប្រទេសប្រជាធិបតេយ្យជឿនលឿនជាច្រើន ក្នុងនោះមានសហរដ្ឋអាមេរិក បារាំង អូស្ត្រាលី ជប៉ុន តំណាងសហភាពអឺរ៉ុប ស៊ុយអ៊ែត ជាដើម បានចូលជួបសួរសុខទុក្ខលោក កឹម សុខា នៅគេហដ្ឋានរបស់លោក ស្ថិតក្នុងខណ្ឌទួលគោក រាជធានីភ្នំពេញ និងបានលើកទឹកចិត្តឱ្យបន្តរកពេលសន្ទនានយោបាយ ដើម្បីផ្សះផ្សាជាតិ។
ប្រទេសមួយចំនួនដូចជាសហរដ្ឋអាមេរិកជាដើមនៅសប្តាហ៍មុននេះ បានបន្តផ្តល់ជំនួយជាទឹកប្រាក់ ៧លាន ៥សែនដុល្លារ បន្ថែមទៀតដល់កម្ពុជា សម្រាប់ស្តារសេដ្ឋកិច្ច និងដោះស្រាយផលប៉ះពាល់ពីជំងឺកូវីដ១៩៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។
Don’t ever dream about helping khmer people’ O K mr so kha’ you still in court case and accused by Veitcong court so how can you appeal to international?? Why help this beast regime for?? this regime never respected international or constitution so other democracy can help their people not help this beast regime ‘ Let people of cambodia beat this beast regime’