ដោយ ខែ សុណង
2020-05-30
RFA
បុគ្គលិកសណ្ឋាគារ ដឺ ហ្គ្រេត ឌ្យូក (The Great Duke) លើកបដាតវ៉ាមុខសណ្ឋាគារ នៅព្រឹកថ្ងៃទី៣ កញ្ញា ទាមទារឲ្យថៅកែបើកប្រាក់ឈ្នួល។
រូប៖ លោក ឃុន ថារ៉ូ សង់ត្រាល់ (CENTRAL) ផ្ដល់ឲ្យ
អតីតបុគ្គលិកសណ្ឋាគារហ្គ្រេតឌ្យូកភ្នំពេញ (Great Duke Phnom Penh) ទទួលបានប្រាក់សំណងការងារ ពីក្រសួងការងារនៅថ្ងៃទី៣០ ខែឧសភា ក្រោយពួកគាត់ចេញតវ៉ាទាមទាររកដំណោះស្រាយពីម្ចាស់សណ្ឋាគារ និងអាជ្ញាធរពាក់ព័ន្ធ អស់រយៈពេលជិត ៥ខែមកនេះ។
អតីតអ្នកធ្វើការផ្នែកសម្អាតបន្ទប់ នៅសណ្ឋាគារហ្គ្រេតឌ្យូក ភ្នំពេញ លោកស្រី ហេង មួយអេង បង្ហាញអារម្មណ៍សប្បាយរីករាយ នៅពេលទទួលបានប្រាក់សំណងការងារ ជាង ៨រយដុល្លារ ពីក្រសួងការងារ។លោកស្រីឱ្យដឹងថា ប្រាក់ដែលបានមកនេះ អាចទប់ទល់ការចំណាយប្រចាំថ្ងៃ និងយកទៅសងបំណុលគេ ក្នុងអំឡុងពេលគ្មានការងារធ្វើជិត ៥ខែមកនេះ ចំណែកប្រាក់នៅសល់ លោកស្រីទុកទំនុកបម្រុងកូនស្រីអាយុ៩ឆ្នាំឲ្យបន្តការសិក្សា ហើយលោកស្រីនឹងបន្តស្វែងរកការងារធ្វើនៅតាមសណ្ឋាគារផ្សេងទៀត៖ «បានប៉ុណ្ណឹងសម្រាប់វាតិចទេ បងអើយបានតាមអតីតភាពការងារយើងតិច វាបានតិចអ៊ីចឹង ទម្រាំយើងដើររកការងារបានទៀត»។
ប្រធានសហព័ន្ធសហជីពកម្មករ និយោជិកវិស័យទេសចរណ៍កម្ពុជា លោក ទូច កុសល ថ្លែងថា ក្នុងចំណោមបុគ្គលិក១៥២នាក់ គឺមានបុគ្គលិក១២០នាក់ បានបើកប្រាក់អត្ថប្រយោជន៍ការងារពីក្រសួងការងាររួចរាល់ហើយ ចំណែកបុគ្គលិក៣២នាក់ទៀត ជាប់រវល់ធុរៈផ្ទាល់ខ្លួន មិនទាន់មានពេលទៅទទួលប្រាក់សំណងឡើយទ។
លោកឱ្យដឹងថា ក្នុងចំណោមមនុស្ស៣២នាក់នេះ គឺមាន ៦នាក់បាត់ប័ណ្ណសំគាល់ការងារ ដែលអាចបង្កការលំបាកដល់ពួកគាត់ ។ លោកថា ក្រសួងការងារទុកពេលឱ្យបុគ្គលិកទាំងនេះ ស្វែងរកប័ណ្ណការងារ ដោយភ្ជាប់ជាមួយអត្តសញ្ញាណប័ណ្ណ និងប័ណ្ណរបបសន្តិសុខសង្គម (បសស) ដើម្បីទៅទទួលបានសំណងនៅក្រសួងការងារ ត្រឹមថ្ងៃទី៤ ខែមិថុនា ខាងមុខ។
វិវាទការងាររវាងក្រុមបុគ្គលិក និងម្ចាស់សណ្ឋាគារហ្គ្រេតឌ្យូកភ្នំពេញ អតីតសណ្ឋាគារអ៊ីនធ័រខន់ធីណិនថល (Intercontinental) បានអូសបន្លាយអស់រយៈពេលជិត ៥ខែ ចាប់តាំងពីពេលសណ្ឋាគារនេះបានប្រកាសបិទទ្វារ កាលពីចុងខែធ្នូ ឆ្នាំ២០១៩ ក្រោមហេតុផលក្ស័យធន បន្ទាប់ពីបើកដំណើរអាជីវកម្មអស់រយៈពេល ២៣ឆ្នាំមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលករខ្មែរមួយគ្រួសារមានកូនតូច២នាក់ទ្រាំនៅប្រទេសថៃអត់ការងារធ្វើអំឡុងវិបត្តិជំងឺកូវីដ-១៩
- ក្រសួងនៅតែតម្រូវឱ្យភាគីម្ចាស់សណ្ឋាគារហ្គ្រេតឌ្យូកទូទាត់សំណងដល់បុគ្គលិក
- អតីតបុគ្គលិកសណ្ឋាគារហ្គ្រេតឌូក តវ៉ាទាមទារប្រាក់សំណងពីថៅកែ
- សហជីព និងរដ្ឋាភិបាលប្រារព្ធទិវាពលកម្មអន្តរជាតិ ១ ឧសភា ក្នុងសភាពស្ងប់ស្ងាត់
- មន្ត្រីថា មានរោងចក្រថ្មី៧៧ បើកដំណើរការ ខណៈរោងចក្រ ៦ ត្រូវបិទទ្វារអំឡុងពេលជំងឺកូវីដ១៩
- កម្មកររោងចក្រចាកាស៊ូរាប់រយនាក់រងការបញ្ឈប់ដោយទទួលបានប្រាក់សំណងតិចតួច
- កម្មករនិងសង្គមស៊ីវិលស្នើឱ្យរដ្ឋពិចារណាឡើងវិញពីការដាក់កម្មករឱ្យនៅដាច់ដោយឡែក១៤ថ្ងៃ
- កម្មករខ្លះថា ថៅកែបង្ខំពួកគាត់ឱ្យដាក់ពាក្យលាលែងពីការងារក្រោយត្រលប់មកពីចូលឆ្នាំ
- រដ្ឋាភិបាលមិនទាន់បើកប្រាក់ឧបត្ថម្ភដល់កម្មករដែលព្យួរការងារតាមការសន្យា
- ពលករខ្មែរមួយក្រុមបន្តធ្វើការងារនៅថៃក្នុងថ្ងៃបុណ្យចូលឆ្នាំ ដើម្បីរកប្រាក់ដោះស្រាយជីវភាព