អតីត​​សមាជិក​​ក្រុម​ប្រឹក្សា​​ខេត្ត​កំពង់ធំ​​បក្ស​​សង្រ្គោះ​​ជាតិ​​ត្រូវ​​សមត្ថ​កិច្ច​​ចាប់​ខ្លួន​​

តុលាការ និងច្បាប់ | ព័ត៌មានជាតិ
លោក ម៉ម មុនីរតន៍ |០១ មិថុនា ២០២០ | ម៉ោង ១០:៣២ ល្ងាច
VOD

គ្រូ​បង្រៀន​ និង​ជា​អតីត​សមាជិក​ក្រុម​ប្រឹក្សា​ខេត្ត​របស់​គណបក្ស​សង្គ្រោះ​ជាតិ លោក ស៊ុន ធន់ ឡើងថ្លែងក្នុងកម្មវិធីមួយកាលពីពេលកន្លងទៅ។ (ស៊ុន ធន់ - Sun Thun. Page)

គ្រូ​បង្រៀន​ និង​ជា​អតីត​សមាជិក​ក្រុម​ប្រឹក្សា​ខេត្ត​របស់​គណបក្ស​សង្គ្រោះ​ជាតិ លោក ស៊ុន ធន់ ឡើងថ្លែងក្នុងកម្មវិធីមួយកាលពីពេលកន្លងទៅ។ (ស៊ុន ធន់ – Sun Thun. Page)


គ្រូ​បង្រៀន​ និង​ជា​អតីត​សមាជិក​ក្រុម​ប្រឹក្សា​ខេត្ត​របស់​គណបក្ស​សង្គ្រោះ​ជាតិ លោក ស៊ុន ធន់ ត្រូវ​បាន​សមត្ថកិច្ច​ខេត្ត​កំពង់​ធំ​ចាប់​ខ្លួននៅព្រឹកថ្ងៃចន្ទនេះ។

លោក កៅ សីហា ដែល​អះអាង​​ថា ​ត្រូវ​ជា​បង​ថ្លៃ​របស់​លោក ស៊ុន ធន់ បាន​ប្រាប់​វីអូឌី​តាម​ទូរសព្ទ​នៅ​ថ្ងៃ​ទី១ ខែមិថុនា ថា​ លោក និង​សាច់ញាតិ​ពិត​ជា​ខ្វល់ខ្វាយ​ជា​ខ្លាំង ក្រោយ​សមត្ថកិច្ច​ចាប់ និង​នាំ​ខ្លួន​លោក ស៊ុន ធន់ ចេញ​បាត់​ដោយ​គ្មាន​ដំណឹង​បែប​នេះ។ លោក​បន្ត​ថា ការ​ចាប់​ខ្លួន​នេះ​ធ្វើ​ឡើង​ដោយ​ពុំ​មាន​ដីកា​ត្រឹមត្រូវ​ណា​មួយ​ឡើយ ជាង​នេះ​ទៀត ​គេ​ក៏​ពុំ​បាន​ដឹង​ថា ​តើ​អតីត​ប្រធាន​សមាគម​គ្រូ​បង្រៀន​កម្ពុជា​ឯករាជ្យ​ប្រចាំ​ខេត្ត​កំពង់​ធំ​រូប​នេះ ត្រូវ​រងការ​ចោទ​ប្រកាន់​ពី​បទ​អ្វី​ឱ្យ​ពិត​ប្រាកដ​នោះដែរ។

លោក​បន្ត​ថា៖ «ព្រួយ​នោះ​​ព្រួយ​ពេក​ហើយ ព្រោះ​បាត់​តាម​រក​អត់​ឃើញ​ផង។ តាម​រក​គាត់ ​អត់​ឃើញ​ទេ គេ​ថា​ យក​ទៅ​ក្រសួង​បាត់​ហើយ។ ហើយ​ខ្ញុំ​ឱ្យ​គេ​សួរ​នៅ​ខាង​ក្រសួង​ហើយ ​គេ​ថា​មិន​ដឹង​ក្រសួង​ណា​ផង»។

បើ​តាម​លោក កៅ សីហា ការ​ចាប់​ខ្លួន​នេះ​ធ្វើ​ឡើង​នៅ​នឹង​មុខ​ផ្ទះ​លោក ស៊ុន ធន់ ដោយ​ផ្ទាល់ កាល​ពី​ព្រឹក​ថ្ងៃ​ទី១ ខែមិថុនា។ ការ​អនុវត្ត​បទបញ្ជា​នេះ ត្រូវ​បាន​លោក សីហា អះអាង​ថា គឺ​អនុវត្តដោយ​ផ្ទាល់​ពី​ប្រធាន​ប៉ុស្តិ៍​នគរបាល​រដ្ឋបាល​ឃុំ​ទ្រាល ​គឺ​លោក គ្រី សារិទ្ធ។

ប្រធាន​ប៉ុស្តិ៍​នគរបាល​រដ្ឋបាល​ឃុំ​ទ្រាល ​លោក គ្រី សារិទ្ធ បដិសេធ​តាម​ទូរសព្ទ​ក្នុង​ការ​ផ្ដល់​ចម្លើយ​ជុំវិញ​ការ​ចាប់​ខ្លួន​នេះ មុន​នឹង​លោក​ផ្ដាច់​​ទូរសព្ទ​ទៅ​វិញ។

បើ​ទោះ​ជា​បែប​ណា ស្នងការ​ខេត្ត​កំពង់ធំ​ លោក អ៊ុក កុសល ឱ្យ​ដឹង​ថា លោក ស៊ុន ធន់ ពិត​ជា​ត្រូវ​សមត្ថកិច្ច​ចាប់​ខ្លួន​មែន។ លោក​បន្ត​ថា​ មូលហេតុ​នៃ​ការ​ចាប់​ខ្លួន​នេះ នគរបាល​យុត្តិធម៌​ខេត្ត អនុវត្ត​តាម​ដីកា​បង្គាប់បញ្ជា​ពី​តុលាការ​ក្រុង​ភ្នំពេញ។

លោក​បន្ថែម​ថា៖ «អង្គភាព​ខាង​ខ្ញុំ​គឺ​អនុវត្ត​នៃ​ការ​ចាប់​ខ្លួន​តាម​ដីកា។ យើង​បញ្ជូន​ទៅ​សាលាដំបូង​រាជធានី​ភ្នំពេញ​ហើយ។ និយាយ​ទៅ​រឿង​នេះ​ ខាង​ណោះ​ម្ចាស់​ករណី យើង​ត្រូវ​បញ្ជូន​ឱ្យ​គេ»។

លោក ស៊ុន ធន់ បច្ចុប្បន្ន​ជា​គ្រូ​បង្រៀន​​នៅ​ស្រុក​បារាយណ៍ ​ខេត្ត​កំពង់ធំ។ មុន​នឹង​លោក​ក្លាយ​ជា​អតីត​សមាជិក​ក្រុម​ប្រឹក្សា​ខេត្ត​នៃ​គណបក្ស​សង្គ្រោះ​ជាតិ​មួយ​រយៈពេល លោក ស៊ុន ធន់ ក៏​ធ្លាប់​ជា​អតីត​ប្រធាន​សមាគម​គ្រូ​បង្រៀន​កម្ពុជា​ឯករាជ្យ​ប្រចាំ​នៅ​ខេត្ត​កំពង់​ធំ​នេះ​ដែរ។

ទី​ប្រឹក្សា​សមាគម​គ្រូបង្រៀន​កម្ពុជា​ឯករាជ្យ​ លោក រ៉ុន ឈុន ឱ្យ​ដឹង​ថា ការ​ចាប់​ខ្លួន​នេះ វា​ជា​ចេតនា​នយោបាយ​ច្រើន​ជាង ការ​អនុវត្ត​ដោយ​យោង​លើ​បទល្មើស។ បើ​តាម​លោក ឈុន ក្នុង​នាម​ស្ថាប័ន​មិនមែន​រដ្ឋាភិបាល​នេះ ​នឹង​បន្ត​តស៊ូ​មតិ​ដោយ​អហិង្សា ដើម្បី​ទាមទារ​សិទ្ធិ​សេរីភាព និង​ផ្ដល់​យុត្តិធម៌​ដល់​លោក ស៊ុន ធន់ វិញ។

លោក​បន្ថែម​ថា៖ «សមាគម​គ្រូបង្រៀន​កម្ពុជា​ឯករាជ្យ​យើង​នឹង​ធ្វើ​បទ​អន្តរាគមន៍​ទៅ​តាម​ស្ថាប័ន​ពាក់ព័ន្ធ និង​ទៅ​ដល់​អន្តរជាតិ​ផង។ យើង​ដឹង​ហើយ ​សមាគម​គ្រូបង្រៀន​កម្ពុជា​ឯករាជ្យ ជា​សមាជិក​របស់​អង្គការ​អប់រំ​អន្តរជាតិ​ដែល​មាន​សមាជិក ​៣០​លាន​នាក់​នៅ​លើ​ពិភព​លោក​នេះ។ហើយ​លោក ស៊ុន ធន់ ក៏​សមាជិក​របស់​អង្គការ​អប់រំ​ពិភព​លោក​មួយ​រូប​ដែរ»។

បើ​តាម​លោក កៅ សីហា មុន​នឹង​ចាប់​ខ្លួន​លោក ស៊ុន ធន់ ដំបូង​ឡើយ ក្រុម​នគរបាល១ក្រុម​ដើរ​មក​សួរ​លោក ស៊ុន ធន់ ហើយ​និយាយ​ថា ​តើ​នឹង​រៀបចំ​អាពាហ៍ពិពាហ៍​ឱ្យ​កូន​ពេល​ណា។ លុះ​ដល់​ម៉ោង​ជិត​ ១១​ថ្ងៃ​ត្រង់ មាន​នគរបាល​មួយ​ក្រុម​ផ្សេង​ទៀត​អម​ដោយ​រថយន្ត​មួយ​គ្រឿង​ផង ក្រៀក​ចាប់​លោក ស៊ុន ធន់ បញ្ជូន​ចូល​ឡាន​តែម្ដង។

បើ​ទោះ​ជា​ស្នងការ​ខេត្ត​កំពង់ធំ​បាន​អះអាង​ថា ​លោក ស៊ុន ធន់ ក្រោយ​ចាប់​ខ្លួន ​ត្រូវ​បាន​បញ្ជូន​មក​ទីក្រុង​ភ្នំពេញ​ក្ដី ចំណែក​អ្នកនាំ​ពាក្យ​អយ្យការ​អម​តុលាការ​ក្រុង​ភ្នំពេញ​ លោក គុជ គឹមឡុង បដិសេធ​យ៉ាង​ខ្លី​ថា ​លោក​នៅ​ពុំ​ទាន់​បាន​ដឹង​រឿង​នេះ​ច្បាស់​នៅ​ឡើយ​ទេ។

លោក​និយាយ​ថា៖ «ខ្ញុំ​អត់​បាន​ដឹង​អី​ផង។ ចាំ​តិច​មើល៎! ឈ្មោះ​អី​គេ ចាំ​ជួយ​សរសេរ​តិច​មក»។

រហូត​មក​ដល់​ពេល​នេះ ខាង​តុលាការ​ក្រុង​ភ្នំពេញ នៅមិន​ទាន់​អាច​បញ្ជាក់​ពី​សំណុំរឿង​ដែល​ឈាន​ទៅ​ដល់​ការ​ចាប់​ខ្លួនអតីត​មន្ត្រី​សមាគម​គ្រូ​បង្រៀន​នេះ​នៅ​ឡើយ​ទេ បើ​ទោះ​ជា​វីអូឌីបាន​ផ្ញើ​សំណួរ​រួច​ហើយតាម​រយៈ​បណ្ដាញ​សង្គម​ក្ដី។

លោក រ៉ុង ឈុន ឱ្យ​ដឹង​ថា​ ការ​ចាប់​ខ្លួន​អតីត​អ្នក​គាំទ្រ និង​សមាជិក​ក្រុម​ប្រឹក្សា​ឃុំ​នៃ​គណបក្ស​ប្រឆាំងមួយ​រយៈ​ចុងក្រោយ​នេះ វា​ជា​ការ​គំរាម​កំហែង​ផ្នែក​នយោបាយ ជាជាង​អនុវត្ត​ទៅ​លើ​បទល្មើស។ ទាំង​សហគមន៍​អឺរ៉ុប និង​អង្គការ​អន្តរជាតិ អំពាវនាវ​ឱ្យ​រដ្ឋាភិបាល​ផ្ដល់​សម្បទា​ឱ្យ​បាន​ពេញលេញ​ឡើងវិញ ដល់​អតីត​មន្ត្រី​បក្ស​ប្រឆាំងដែល​ត្រូវ​បាន​តុលាការ​រំលាយ​កាល​ពី​ឆ្នាំ២០១៧៕


រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

What Next?

Recent Articles

One Response to "អតីត​​សមាជិក​​ក្រុម​ប្រឹក្សា​​ខេត្ត​កំពង់ធំ​​បក្ស​​សង្រ្គោះ​​ជាតិ​​ត្រូវ​​សមត្ថ​កិច្ច​​ចាប់​ខ្លួន​​"

  1. Anonymous says:

    You living in the cage of veitcong mafia dictator and his groups so what ever they wanted to do you will never get justice or what going on because they rule like mafia and followed Angka Lour ‘All khmer must rise up altogether and polices can’t do anything ‘