បរិស្ថាន | ព័ត៌មានជាតិ | អភិបាលកិច្ច
លោក សូត សុខប្រាថ្នា | ០៦ កក្កដា ២០២០ | ម៉ោង ១៨:១១
VOD
ទិដ្ឋភាពនៃការកាប់រានដីក្នុងព្រៃសហគមន៍បឹងប្រិយ ស្ថិតនៅភូមិស្រែធ្នង់ ឃុំរមណីយ ស្រុករវៀង ខេត្តព្រះវិហារ ថ្ងៃទី២២ ខែមិថុនា ឆ្នាំ២០២០។ (Ministry of Environment)
ក្រៅពីព្រមានដល់មន្ត្រីទាំងឡាយណាដែលឆ្លៀតយកឱកាសពីការបែងចែក និងទទួលដីធ្លី ដោយថា នឹងត្រូវមានទោសហើយនោះ លោកនាយករដ្ឋមន្ត្រី ហ៊ុន សែន ក៏បានទទួលស្គាល់ថា មានតែអ្នកមានអំណាច និងអ្នកមានទ្រព្យច្រើន ប្រើអ្នកតូចតាចឱ្យទៅកាប់រុករានទន្រ្ទានយកដីឱ្យខ្លួន។
សារព្រមាននេះធ្វើឡើងបន្ទាប់ពីនាយករដ្ឋមន្រ្តី ហ៊ុន សែន បានបញ្ជាទៅក្រសួងទាំង៣ គឺក្រសួងបរិស្ថាន ក្រសួងកសិកម្ម និងក្រសួងរៀបចំដែនដី ឱ្យកាត់ឆ្វៀលដីជូនប្រជាពលរដ្ឋដែលកំពុងរស់នៅអាស្រ័យផលក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋកាលពីថ្ងៃទី៣ ខែកក្កដា ឆ្នាំ២០២0 នៅក្នុងកិច្ចប្រជុំពេញអង្គគណៈរដ្ឋមន្រ្តី។
លើកឡើងនៅលើទំព័រហ្វេសប៊ុករបស់ខ្លួនកាលពីថ្ងៃទី៥ ខែកក្កដា លោក ហ៊ុន សែន មានប្រសាសន៍ថា វិធានការកាត់ឆ្វៀលដីជូនប្រជាពលរដ្ឋនៅតំបន់អភិរក្ស ឬតំបន់ការពារនេះ គឺធ្វើឡើងចំពោះពលរដ្ឋដែលកំពុងរស់នៅអាស្រ័យផលជាក់ស្តែងក្នុងតំបន់ដីរដ្ឋខាងលើប៉ុណ្ណោះ ដោយហាមកាប់ឆ្ការទន្រ្ទានវាទីយកដីបន្ថែមទៀត។
លោកនាយករដ្ឋមន្ត្រីឱ្យដឹងថា កន្លងមក លោកបានសង្កេតឃើញមានតែអ្នកមានអំណាច និងអ្នកមានទ្រព្យច្រើន ប្រើអ្នកតូចតាចឱ្យទៅកាប់រុករានទន្រ្ទានយកដីឱ្យខ្លួន ហើយលោកក៏បានកំណត់មុខសញ្ញាពួកគេអស់ហើយដែរ។
ហ្វេសប៊ុកលោក ហ៊ុន សែន សរសេរថា៖ «រីឯចំពោះក្រុមជនខិលខូចដែលទៅទន្រ្ទានយកដីរដ្ឋក្នុងមួយយប់ធ្វើបានខ្ទមពី ១០ ទៅ ២០ ក៏សម្តេចតេជោបានដឹង និងកំណត់អត្តសញ្ញាណ និងមុខសញ្ញារួចអស់ហើយដែរ។ បើរកឃើញថា អ្នកទាំងនោះបានប្រព្រឹត្តមែននោះ គឺនឹងត្រូវចាប់ខ្លួន។ ចំពោះការបែងចែកដីជូនប្រជាពលរដ្ឋ គឺក្រសួងពាក់ព័ន្ធ និងអាជ្ញាធរ ត្រូវធ្វើឱ្យបានហ្មត់ចត់ត្រឹមត្រូវ ហាមដាច់ខាតឆ្លៀតកេងចំណេញយកចំណែកខ្លួនពីការបែងចែកដីជូនពលរដ្ឋ គឺនឹងត្រូវទទួលទោសជាកំហិត»។
សកម្មជនការពារព្រៃឈើ លោក ហេង ស្រស់ លើកឡើងថា អ្នកមានប្រាក់ ឬមានអំណាចមិនមែនត្រឹមតែប្រើដៃពលរដ្ឋតូចតាចកាប់រុករានដីព្រៃយកដីឱ្យពួកគេនោះទេ ប៉ុន្តែ ពួកគេក៏បានប្រើដៃពលរដ្ឋក្រីក្រចូលទៅកាប់ឈើដើម្បីយកមកលក់ឱ្យខ្លួន ឬក្រុមហ៊ុនខ្លួនផងដែរ។
សកម្មជនការពារព្រៃឈើរូបនេះ អះអាងថា តំបន់ព្រៃស្រោងនៅកម្ពុជាស្ទើរទូទាំងប្រទេសដែលរងការកាប់ទន្រ្ទាន ឬកាប់ឈើលក់ឱ្យឈ្មួញដោយប្រើដៃពលរដ្ឋ ដូចជា នៅខេត្តមណ្ឌលគិរី តំបន់ដែនជម្រកសត្វព្រៃ ព្រៃឡង់ តំបន់ភ្នំឱរ៉ាល់ តំបន់ព្រៃជួរភ្នំក្រវាញជាដើម។
លោក ហេង ស្រស់ ប្រាប់ថា ដើម្បីឱ្យបញ្ជារបស់លោកនាយករដ្ឋមន្ត្រីមានប្រសិទ្ធភាព ទាល់តែមានការដាក់ទោសទណ្ឌទៅដល់ក្រុមឧកញ៉ា ឬអ្នកមានអំណាចដែលធ្លាប់រកស៊ីឈើកន្លងមកជាមុនសិន។
លោក ហេង ស្រស់ បន្តថា៖ «បើសិនជាលោកនាយករដ្ឋមន្ត្រី ហ៊ុន សែន គាត់ចង់ឱ្យគ្រាន់តែនិយាយ ហើយមានប្រសិទ្ធភាពល្អ គាត់គួរតែអនុវត្តច្បាប់ទៅលើក្រុមឧកញ៉ាទាំងអស់ហ្នុងទៅ ព្រោះក្រុមឧកញ៉ាទាំងនោះហើយដែលបានខ្ចីដៃខ្ចីជើងប្រជាពលរដ្ឋដើម្បីចូលកាប់ឈើនៅតំបន់ព្រៃការពារ។ បើសិនជារដ្ឋាភិបាល ឬលោកនាយករដ្ឋមន្ត្រី ហ៊ុន សែន មិនបានអនុវត្តច្បាប់ទៅលើក្រុមឧកញ៉ាទាំងអស់នោះទេ វាហាក់បីដូចជាការលើកឡើងរបស់លោកនាយករដ្ឋមន្ត្រី ហ៊ុន សែន គ្រាន់តែជាការសម្តែងប្រាប់ទៅប្រជាពលរដ្ឋថា គាត់បានចូលរួមការពារព្រៃឈើ និងចូលរួមទប់ស្កាត់»។
មន្ត្រីកម្មវិធីពង្រឹងសិទ្ធិអំណាចសហគមន៍នៃសមាគមអាដហុក លោក ប៉ែន ប៊ុណ្ណារ៍ យល់ឃើញថា ឧក្រិដ្ឋកម្មព្រៃឈើ និងការរុករានដីព្រៃដោយប្រើដៃពលរដ្ឋតូចតាចពីសំណាក់អ្នកមានប្រាក់មានអំណាច មិនមែនទើបតែកើតឡើងនោះទេ។
លោក ប៊ុណ្ណារ៍ ប្រាប់ថា ការព្រមានរបស់លោកនាយករដ្ឋមន្ត្រីជាថ្មីម្តងទៀតនេះ នឹងធ្វើឱ្យបញ្ជារបស់លោកគ្មានប្រសិទ្ធភាព ដោយធ្វើឱ្យអំណាចនីតិប្រតិបត្តិកាន់តែចុះខ្សោយ ហើយឧក្រិដ្ឋកម្មព្រៃឈើនៅតែកើតមានបន្តទៀត ប្រសិនបើគ្មានវិធានការផ្លូវច្បាប់ចំពោះមន្ត្រីមានអំណាច ឬអ្នកមានប្រាក់ទាំងនោះ។
លោក ប៉ែន ប៊ុណ្ណារ៍ ប្រាប់ថា៖ «អ៊ីចឹង ប្រសិនបើជាលោកនាយករដ្ឋមន្ត្រីនៅតែប្រើវិធីដដែលៗគ្រាន់តែព្រមាន នោះយើងឃើញថា ការចុះខ្សោយនៃស្ថាប័នរដ្ឋកាន់តែខ្សោយទៅៗ។ អ៊ីចឹងធ្វើឱ្យទៅជាអំពើអនាធិបតេយ្យ លែងមានពីណាស្តាប់ពីណា។ នរណាហ៊ាន អ្នកនោះនឹងទទួលបានផលប្រយោជន៍»។
អ្នកនាំពាក្យក្រសួងបរិស្ថាន លោក នេត្រ ភក្ត្រា ប្រាប់វីអូឌីកាលពីខែមុនថា កម្ពុជាមានព្រៃឈើ ៥០ភាគរយគ្របដណ្តប់ទូទាំងប្រទេស ដែលជាអត្រាមានព្រៃឈើខ្ពស់ជាងគេនៅតំបន់អាស៊ីអាគ្នេយ៍។
អ្នកនាំពាក្យរូបនេះ ប្រាប់ថា មកទល់បច្ចុប្បន្ននេះ រដ្ឋាភិបាលបានបង្កើនផ្ទៃដីតំបន់ការពារធម្មជាតិ ដែលស្ថិតនៅក្រោមយុត្តាធិការរបស់ក្រសួងបរិស្ថានរហូតដល់ប្រមាណ ៤១ភាគរយ នៃផ្ទៃដីប្រទេសកម្ពុជា គឺស្មើនឹងប្រមាណ ៧លាន ២សែនហិកតា។
លោក ហ៊ុន សែន បានបញ្ជាក់សារជាថ្មីដល់មន្រ្តី អ្នកមានអំណាច និងអ្នកមានទ្រព្យធនស្តុកស្តម្ភទាំងឡាយ ឱ្យល្មមចេះឆ្អែត និងចេះគ្រប់គ្រាន់ហើយ ដោយឈប់ធ្វើបាបប្រជាពលរដ្ឋតទៅទៀត៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។