ប្រពន្ធ​សកម្មជន​បក្ស​ប្រឆាំង​បារម្ភ​ពី​ប្ដី បន្ទាប់ពី​​ពន្ធនាគារ​បិទ​ទ្វារ​ដោយសារ​ជំងឺ​កូវីដ-១៩

ដោយ ជាតិ ចំណាន
2020-12-04
RFA

ប្រពន្ធ​សកម្មជន​បក្ស​ប្រឆាំង​បារម្ភ​ពី​ប្ដី បន្ទាប់ពី​​ពន្ធនាគារ​បិទ​ទ្វារ​ដោយសារ​ជំងឺ​កូវីដ-១៩

ប្រពន្ធ និង​កូន​សកម្មជន​គណបក្ស​សង្គ្រោះ​ជាតិ ដែល​កំពុង​ជាប់​ឃុំ​នៅ​ពន្ធនាគារ​ព្រៃ​ស​ប្រមាណ ២០នាក់ នាំ​គ្នា​តវ៉ា​នៅ​មុខ​សាលា​ដំបូង​រាជធានី​ភ្នំពេញ នៅ​ព្រឹក​ថ្ងៃ​ទី១៩ ខែ​មិថុនា ឆ្នាំ២០២០ ទាមទារ​តុលាការ​ដោះលែង​អ្នក​ទោស​នយោបាយ​ជាង ១០នាក់​ឱ្យ​មាន​សេរីភាព​ឡើង​វិញ និង​ដោយ​ឥត​លក្ខខ័ណ្ឌ។ រូប​ពលរដ្ឋ


ក្រុម​ប្រពន្ធ​របស់​សកម្មជន​គណបក្ស​សង្គ្រោះជាតិ ព្រួយ​បារម្ភ​ខ្លាច​ប្ដី​របស់​ពួកគេ​ដែល​កំពុង​ជាប់ឃុំ​នៅ​ក្នុង​ពន្ធនាគារ​ព្រៃ​ស មាន​សុខភាព​ទ្រុឌទ្រោម ប៉ះពាល់​ដល់​អាយុជីវិត​។ ក្ដី​បារម្ភ​នេះ បន្ទាប់​ពី​មន្ត្រី​ពន្ធនាគារ​ហាម​មិន​ឱ្យ​ក្រុម​ស្ត្រី​ទាំងនោះ​ចូល​សួរសុខទុក្ខ​ប្ដី​របស់​ពួកគេ​ជាច្រើន​ថ្ងៃ ដើម្បី​បង្ការ​កុំ​ឱ្យ​ឆ្លង​ជំងឺ​កូវីដ១៩ ក្រោយ​កម្ពុជា​ផ្ទុះ​ករណី​រាលដាល​ក្នុង​សហគមន៍។

ប្រពន្ធ​របស់​សមាជិក​ក្រុមប្រឹក្សា​រាជធានី​ភ្នំពេញ​ជាប់ឆ្នោត​គណបក្ស​សង្គ្រោះ​ជាតិ​លោក កាក់ កុម្ភារ គឺ​លោកស្រី ព្រុំ ចាន់ថា ឱ្យ​ដឹង​នៅ​ថ្ងៃ​ទី៤ ធ្នូ ថា លោកស្រី​មិនបាន​ចូល​សួរសុខទុក្ខ​ប្ដី និង​មិនបាន​ផ្ញើ​ថវិកា ម្ហូបអាហារ​និង​ថ្នាំពេទ្យ​ឱ្យ​ប្ដី​ដែល​កំពុង​ជាប់ឃុំ​ក្នុង​ពន្ធនាគារ​នោះ​ឡើយ ចាប់តាំង​ពី​ថ្ងៃ​ទី​៣០ វិច្ឆិកា មក។ លោកស្រី​ព្រួយបារម្ភ​ថា ប្តី​លោកស្រី​មិន​មាន​អាហារ​ហូបចុក​គ្រប់គ្រាន់ និង​គ្មាន​ថ្នាំ​ព្យាបាល​ជំងឺ ហើយ​ធ្វើ​ឱ្យ​សុខភាព​ទ្រុឌទ្រោម​កាន់តែ​ខ្លាំង​ហើយ​ប្រឈម​នឹង​គ្រោះថ្នាក់​ដល់​អាយុជីវិត ពីព្រោះ​ប្ដី​លោកស្រី និង​សកម្មជន​បក្ស​ប្រឆាំង​ភាគច្រើន​ជា​មនុស្ស​ចាស់ និង​មាន​ជំងឺ​ប្រចាំ​កាយ៖ «ពួក​ខ្ញុំ​នៅ​ខាង​ក្រៅ​មិន​ដឹង​ថា សុខទុក្ខ​គាត់​យ៉ាងម៉េច ហើយ​គាត់​ក៏​មិន​ដឹង​សុខទុក្ខ​ខ្ញុំ​យ៉ាងម៉េច​ដែរ អីចឹង​បារម្ភ​មែនទែន ដោយសារ​ពួកគាត់​ចាស់ៗ​អស់ហើយ​មិន​ដឹង​ថា ក្នុង​ហ្នឹង​កូវីដ​យ៉ាងម៉េច​យ៉ាងណា។ ខ្ញុំ​ទៅ​ថ្ងៃ​មុនគេ​ថា អាទិត្យ​ក្រោយ​មិន​ដឹង​យ៉ាងម៉េច​ផង មិន​ថា​គេ​បើក​វិញ​អត់ ព្រោះ​ខាង​មន្ត្រី​ពន្ធនាគារ​ហ្នឹង​គាត់​ទៅ​ធ្វើ​តេស្ត​ហើយ នៅ​ធ្វើតេស្ត​ម្ដង ហើយ​មិន​ថា​ការ​ធ្វើ​ចត្តាឡឺស័ក​ហ្នឹង​ប៉ុន្មាន​ថ្ងៃ និង​ប៉ុន្មាន​សប្ដាហ៍​ទៀត​យើង​អត់​ដឹង​ទេ»។

ដូចគ្នា​នេះ​ដែរ ប្រពន្ធ​ចៅសង្កាត់​ផ្សារ​ដេប៉ូ​៣​ខណ្ឌ​ទួលគោក ក្រុងភ្នំពេញ ជាប់​ឆ្នោត​គណបក្ស​ប្រឆាំង លោក ឃឹម ភាណា គឺ​លោកស្រី សុខ បូលីម៉ា ប្រាប់​ថា តាំងពី​មន្ត្រី​ពន្ធនាគារ​ហាម​​សួរសុខទុក្ខ​ប្ដី​មក លោកស្រី​សម្រាន្ត​មិនសូវ​លក់​ឡើយ ព្រោះ​ខ្វល់ខ្វាយ​ខ្លាច​ប្ដី​មិន​មាន​អាហារ​ហូបចុក​គ្រប់គ្រាន់ បណ្ដាល​ឱ្យ​ធ្លាក់ខ្លួន​ឈឺ៖ «ព្រួយបារម្ភ​ខ្លាំង​ជាងគេ​ខ្លាច​គាត់​ឈឺ​លើសឈាម ខ្លាច​គាត់​អត់​អី​ញាំ​នៅ​ក្នុង​ហ្នឹង ហើយ​ធ្វើ​ឱ្យ​រញ៉េរញ៉ៃ​នៅ​ក្នុង​ពន្ធនាគារ​ហ្នឹង​។ បើ​គាត់​ដឹង​ថា ក្នុង​គុក​ព្រៃ​ស​ហ្នឹង​កើត​កូវីដ ហើយ សុំ​ឱ្យ​គាត់​ដោះលែង​អ្នក​ទោស​នយោបាយ​ចេញ​ឱ្យ​អស់​មក​វា​ចប់​រឿង​ហើយ។ ដូច​ថា​គាត់​រារាំង​មិន​ឱ្យ​គេ​ទៅ​ជួប​ប្ដី ឱ្យ​យក​លេស​កូវីដ​១៩​អីចឹង​វា​អយុត្តិធម៌​ណាស់»។

ក្រុម​ស្ត្រី​ទាំងនេះ​សំណូមពរ​ឱ្យ​មន្ត្រី​ពន្ធនាគារ​អនុញ្ញាត​ឱ្យ​ពួកគេ​អាច​ទូរស័ព្ទ​ជួប​ប្ដី​របស់​ពួកគេ​ក្នុង​មួយ​សប្ដាហ៍​ម្ដង ឬ​ពីរ​ដង ដើម្បី​បាន​ដឹង​ពី​សុខភាព​របស់​ប្ដី។

ទាក់ទង​នឹង​បញ្ហា​នេះ អ្នកនាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួង​មហាផ្ទៃ លោក នុត សាវនា ប្រាប់​អាស៊ីសេរី​ថា ការ​ហាម​ឃាត់​មិន​ឱ្យ​សួរសុខទុក្ខ​ជន​ជាប់ឃុំ​នេះ គឺ​ដើម្បី​បង្ការ​កុំ​ឱ្យ​ឆ្លង​ជំងឺ​កូវីដ​១៩​។ ទោះជា​យ៉ាងណា លោក​បដិសេធ​ការចោទប្រកាន់​ដែល​ថា មន្ត្រី​ពន្ធនាគារ​មិន​បាន​អនុញ្ញាត​ឱ្យ​សាច់ញាតិ​ផ្ញើ​ថវិកា និង​ចំណីអាហារ​ដល់​អ្នក​ជាប់​ឃុំ។ ចំណែក​ឯ​សុខភាព​របស់​ជន​ជាប់ឃុំ​វិញ លោក​ថា រឿង​នេះ​មិន​មាន​អ្វី​គួរ​ឱ្យ​ព្រួយបារម្ភ​ឡើយ៖ «អីចឹង​ជាទូទៅ​តើ​គេ​បិទ​ទាំងអស់​គឺ​គេ​បិទ​ហើយ។ អីចឹង​កុំ​បារម្ភ បើ​ថា​មានការ​អី​គេ​ទាក់ទង​ទៅ​គ្រួសារ​ហើយ។ ឥឡូវនេះ​ម្នាក់ៗ​កំពុងតែ​ប្រយ័ត្នប្រយែង​ធ្វើ​ចត្តាឡឺស័ក​ធ្វើ​អី​ហ្នឹង គ្រប់គ្រង​សភាពការណ៍​នៅ​បរិវេណ​គោលដៅ​ការងារ​ហ្នឹង​។​កុំ​បារម្ភ​ច្រើន​ពេក គេ​ចេះ​ធ្វើការ​ហើយ»។

អាជ្ញាធរ​បាន​ផ្អាក​មិន​ឱ្យ​សាច់ញាតិ​ចូល​សួរសុខទុក្ខ​អ្នក​ជាប់ឃុំ​នៅ​ពន្ធនាគារ​ព្រៃ​ស ហើយក៏​ស្នើ​ទៅ​តុលាការ​ក្រុងភ្នំពេញ​ឱ្យ​ផ្អាក​សវនាការ​អ្នក​ជាប់ឃុំ​នៅ​ទីនោះ​ដែរ ព្រោះ​តែ​មន្ត្រី​ពន្ធនាគារ​ជាច្រើន​នាក់​ត្រូវ​ធ្វើ​ចត្តាឡឺស័ក បន្ទាប់ពី​បាន​ប្រាស្រ័យ​ទាក់ទង​ដោយ​ផ្ទាល់​ជាមួយ​អគ្គនាយក​ពន្ធនាគារ លោក ឆែម សាវុធ ដែល​មាន​ផ្ទុក​ជំងឺ​កូវីដ-១៩​។​

ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក​(Adhoc) លោក នី សុខា យល់​ថា មន្ត្រី​ពន្ធនាគារ​គួរតែ​អនុញ្ញាត​ឱ្យ​សាច់ញាតិ​ជន​ជាប់ឃុំ​បាន​ផ្ញើ​ថវិកា និង​ស្បៀងអាហារ​ឱ្យ​ប្ដី​របស់​ពួកគេ​។ លោក​ថា នៅ​ក្នុង​ពន្ធនាគារ​មិន​មាន​អាហារ​ហូប​គ្រប់គ្រាន់​នោះ​ទេ ហើយក៏​មិន​សូវ​មាន​ជីវជាតិ​ដូច​អាហារ​នៅ​ខាងក្រៅ​ពន្ធនាគារ​ដែរ ដូច្នេះ​ជន​ជាប់ឃុំ​អាច​នឹង​មាន​សុខភាព​ទ្រុឌទ្រោម ប្រសិនបើ​មិន​មាន​ការឧបត្ថម្ភ​ស្បៀងអាហារ​ពី​សាច់ញាតិ​នៅ​ខាងក្រៅ៖ «ដូច្នេះ​បញ្ហា​ហ្នឹង​ដោយសារតែ​កាលៈទេស​ហ្នឹង​ជា​បញ្ហា​ស្ថានភាព​កូវីដ ខាង​ពន្ធនាគារ​គួរតែ​បង្ក​ឱ្យ​មាន​ទំនាក់ទំនង​ឱ្យ​បាន​ពី​អ្នក​ខាងក្នុង​ចេញ​មក​ខាងក្រៅ​ហ្នឹង​តាមរយៈ​ប្រព័ន្ធ​ទូរស័ព្ទ​តាម​អី​ផង​ទៅ ដើម្បី​ជៀសវាង​កុំ​មាន​ការ​ដាច់​ទំនាក់ទំនង​ស្ងាត់ឈឹង​អ៊ីចឹង។ ជា​ការ​ព្រួយបារម្ភ​របស់​អ្នក​នៅ​ខាងក្រៅ»។

គិត​ត្រឹម​ថ្ងៃ​ទី​៤ ធ្នូ មាន​សកម្មជន​គណបក្ស​នយោបាយ សកម្មជន ព្រះសង្ឃ​ខ្មែរ​ថាវរៈ និង​ក្រុម​យុវជន​ជាង​៤០​នាក់ កំពុង​ជាប់ឃុំ​នៅ​ក្នុង​ពន្ធនាគារ​ព្រៃ​ស នៅ​រាជធានី​ភ្នំពេញ។ តុលាការ​បាន​ចោទប្រកាន់​ពួកគេ​ពី​បទ​រួមគំនិត​ក្បត់ ញុះញង់​កុំ​ឱ្យ​យោធិន​ស្តាប់​បង្គាប់ ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍ ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​ប្រមាថ​ថ្នាក់​ដឹក​រដ្ឋាភិបាល។

ក្រុម​ស្ត្រី​ជា​ប្រពន្ធ​សកម្មជន​បក្ស​ប្រឆាំង​ចាត់​ទុក​ការ​ចាប់ខ្លួន​ទាំងនេះ​ថា ជា​រឿង​អយុត្តិធម៌​ធ្វើបាប​ប្រជាពលរដ្ឋ​ស្លូតត្រង់ ហើយ ពួកគេ​បាន​តវ៉ា​ទាមទារ​ឱ្យ​តុលាការ​ដោះលែង​ប្ដី​របស់​ពួកគេ​ជាង​២០​លើក​រួច​មក​ហើយ ប៉ុន្តែ​នៅតែ​គ្មាន​ដំណោះស្រាយ​។ ចាប់តាំងពី​ជំងឺ​កូ​វីដ​១៩​ឆ្លង​ក្នុង​សហគមន៍​មក​ក្រុម​ស្ត្រី​ទាំងនេះ​បាន​ផ្អាក​ការ​តវ៉ា​មួយ​រយៈ ដើម្បី​អនុវត្ត​តាម​ការ​ណែនាំ​របស់​ក្រសួងសុខាភិបាល ប៉ុន្តែ​ពួកគេ​នឹង​តវ៉ា​ជាថ្មី​នៅ​ពេល​ដែល​ជំងឺ​កូវីដ​១៩ បាន​ប្រសើរ​ឡើងវិញ។

មន្ត្រី​អង្គការ​សង្គម​ស៊ីវិល​ជាតិ និង​អន្តរជាតិ​ជាច្រើន​ស្ថាប័ន រួម​ទាំង​អង្គការសហប្រជាជាតិ​ទទួលបន្ទុក​ផ្នែក​សិទ្ធិមនុស្ស​ផង បាន​ថ្កោលទោស​ចំពោះ​ការ​ចាប់ខ្លួន​នេះ​ថា ជា​ការ​ធ្វើទុក្ខបុកម្នេញ​ផ្នែក​នយោបាយ និង​ស្នើ​សុំ​ឱ្យ​តុលាការ​ដោះលែង​ពួកគេ​ឱ្យ​មាន​សេរីភាព​វិញ​ជា​បន្ទាន់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles

One Response to "ប្រពន្ធ​សកម្មជន​បក្ស​ប្រឆាំង​បារម្ភ​ពី​ប្ដី បន្ទាប់ពី​​ពន្ធនាគារ​បិទ​ទ្វារ​ដោយសារ​ជំងឺ​កូវីដ-១៩"

  1. so socheath says:

    ​សម្រាប់ដាស់តឿនពួកមីក្តឹតងាយ !
    *******

    នឹកឡើងត្រូវខ្មាស់ស្រីចំតិញ ជំទយគូថស្ញេញលេចប្រដាប់
    គួរចេះខ្មាស់ញាតិមីត្រូវគ្រាប់ យ៉ាប់ពូជមីឡប់វង្វេងក្រោល ។
    ត្រូវចេះនឹកខ្មាស់មុនហងជឿ កុំចេះតែល្ងើទយក្តឹតឲ្យ
    អាស៊ី-អាខាវាលាត់សើយ ធើពីមុខ-ក្រោយឲ្យសន្យា ។
    សន្យាខ្យល់ខ្ចប់ វាសាប់ដូចសប់ សាប់ញាប់ដូចឆ្កែ
    សាប់ឲ្យសក្តិ៍ខ្យល់ ពួកអាតាប៉ែ ជាប់ងារក្តឆ្កែ ​​
    អាតិរច្ឆាន !