សមត្ថកិច្ច​ចាប់​ខ្លួន​ជនជាតិ​ចិន​ចំនួន​ ៤​ នាក់​ សង្ស័យ​ថា​ ជាប់​ពាក់​ព័ន្ធ​នឹង​ការ​ជួញ​ដូរ​មនុស្ស

ហេង រស្មី
2020-12-05
RFA

សមត្ថកិច្ច​ចាប់​ខ្លួន​ជនជាតិ​ចិន​ចំនួន​ ៤​ នាក់​ សង្ស័យ​ថា​ ជាប់​ពាក់​ព័ន្ធ​នឹង​ការ​ជួញ​ដូរ​មនុស្ស

សមត្ថកិច្ច​ក្រុង​ភ្នំពេញ​ កាល​ពី​ថ្ងៃ​ទី​ ៥​ ធ្នូ​ បាន​​ឃាត់​ខ្លួន​មនុស្ស​ចំនួន​៦​ នាក់​ ក្នុង​នោះ​មាន​​ជនជាតិ​ចិន​ ចំនួន​ ៤​ នាក់ និង​ពីរ​នាក់​ផ្សេង​ទៀត​ ​ជា​ជនជាតិ​វៀតណាម​​ និង​ជនជាតិ​ថៃ​ ពី​បទ​ជួញ​ដូរ​មនុស្ស​។ រូបភាព៖ពីអគ្គស្នងការនគរបាលជាតិ


សមត្ថកិច្ច​បាន​​ឃាត់​ខ្លួន​មនុស្ស​ចំនួន​៦​ នាក់​ ក្នុង​នោះ​មាន​​ជនជាតិ​ចិន​ ចំនួន​ ៤​ នាក់ និង​ពីរ​នាក់​ផ្សេង​ទៀត​ ​ជា​ជនជាតិ​វៀតណាម​​ និង​ជនជាតិ​ថៃ​ កាល​ពី​ថ្ងៃ​ទី​ ៥​ ធ្នូ​ កន្លង​ទៅ​នេះ​ ក្រោយ​ពី​បាន​សម្រុក​ចូល​បង្ក្រាប​ទី​តាំង​ហាង​ម៉ាស្សា​​មួយ​កន្លែង​ មាន​ទី​តាំង​នៅ​ក្នុង​ខណ្ឌ​សែន​ សុខ​ ក្រុងភ្នំពេញ​ ។

គេហទំព័រ​អគ្គស្នងការ​ដ្ឋាន​នគរ​បាល​ជាតិ បាន​ផ្សាយ​ថា​ សមត្ថកិច្ច​សង្ស័យ​ថា​ ទី​តាំង​ម៉ាស្សា​​ នេះ​ជាប់​ពាក់​ព័ន្ធ​និង​ការ​ជួញ​ដូរ​មនុស្ស​ ប៉ុន្តែ​មិន​បាន​បញ្ជាក់​លម្អិត​ ថា​ករណី​នេះ​ជាប់​ពាក់​ព័ន្ធ​យ៉ាង​ណា​នោះ​ទេ។​

ស្នងការ​រង​ប៉ូលិស​ក្រុង​ភ្នំពេញ​ ទទួល​ផែន​ការ​ជួញ​ដូរ​មនុស្ស លោក​ ចាន់ កិត្តិខុម​ មាន​ប្រសាសន៍​នៅ​ក្នុង​គេហទំព័រ​របស់​អគ្គស្នងការ​ដ្ឋាន​នគរ​បាល​ជាតិ​ថា​ សមត្ថកិច្ច​កំពុង​រក​អ្នក​ជួយ​បកប្រែ​ ភាសា​ចិន​ ដោយ​សារ​តែ​មាន​អតិថិជន​ម្នាក់​បាន​ចូល​មក​រក​សេវា​ផ្លូវ​ភេទ ហើយ​សមត្ថកិច្ច​ក៏​បាន​រក​ឃើញ​ស្រោមអនាម័យ​ដែល​ប្រើ​រួច​ចំនួន​ពីរ​ផង​ដែរ។

សមត្ថកិច្ច​បាន​ឱ្យ​ដឹង​ថា​ ក្នុង​ចំណោម​ជនសង្ស័យ​ដែល​ត្រូវ​ឃាត់​ខ្លួន​នោះ​ មាន​ស្ត្រី​ចំនួន​ ៥​ នាក់​ និង​មនុស្ស​ម្នាក់ មាន​អាយុ​ចាប់​ពី​២៨​ ឆ្នាំ​ រហូត​ដល់​ ៤៧​ ឆ្នាំ​ ហើយ​ជនសង្ស័យ​ត្រូវ​សមត្ថកិច្ច​នាំ​ខ្លួន​មក​ឃុំ​ឃាំង​បណ្ដោះអាសន្ន​នៅ​ស្នង​ការ​ប៉ូលិស​ក្រុង​ភ្នំពេញ​ដើម្បី​រង់​ចាំ​ជំនុំ​ជម្រះ​ទោស។

ទាក់​ទិន​នឹង​រឿងបទល្មើសប្រព្រឹត្តដោយជនជាតិបរទេស​នេះ​ផង​ដែរ​ ស្នង​ការ​ប៉ូលិស​ខេត្ត​ព្រះ​សីហនុ​លោក​ ជួន ណារិន​ ប្រាប់​អាស៊ីសេរី​ថា​ តុលាការ​បាន​សម្រេច​ឃុំ​ខ្លួន​ជនជាតិ​ចិន​ចំនួន​ ៣​ នាក់​ ពី​បទ​មនុស្សឃាត​ដោយ​ចេតនា​មាន​ស្ថាន​ទម្ងន់​ទោស​ ដែល​បាន​ប្រព្រឹត្ត​កាល​ពី​ថ្ងៃ​ទី​ ២៨​ ខែ​វិច្ឆិកា​ នៅ​ក្នុង​ខេត្ត​ព្រះ​សីហនុ។​

​​​​​​​​​សមត្ថកិច្ច​ខេត្ត​ព្រះ​សីហនុ កាល​ពី​ថ្ងៃ​ទី​ ១ ធ្នូ​ បាន​ចាប់​ខ្លួន​ជនជាតិ​ចិន​ចំនួន​​៣​ នាក់​ ក្នុង​នោះ​មាន​ស្ត្រី​ម្នាក់​ ជាប់​ពាក់​ព័ន្ធ​នឹង​ករណី​ឃាតកម្ម​ ទៅ​លើ​ជនជាតិ​ចិន​ដូច​គ្នា​ រួច​ហើយ​យក​សាកសព​មក​ប្លុង​ចោល​នៅ​ក្នុង​រថយន្ត។

លោក​ ថា​ជនសង្ស័យ​ទាំង​៣​ នាក់​ ជាសន្តិសុខ​ កាស៊ីណូ​មួយ​កន្លែង​ នៅ​ក្នុង​សង្កាត់​លេខ​ ៤​ ក្រុង​ព្រះ​សីហនុ​ ហើយ​ស្ត្រី​ម្នាក់​ក្នុង​ចំណោម​ជនសង្ស័យ​ អ្នក​គ្រប់​គ្រង​បុគ្គលិក​ជនជាតិ​ចិន​ នៅ​ក្នុង​កាស៊ីណូ​ជាមួយ​គ្នា៕​​

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles