ស្ថានទូត​ខ្មែរ​សហការ​ជាមួយ​អាជ្ញាធរ​ចិន សង្គ្រោះ​ស្ត្រី​ខ្មែរ​ម្នាក់​រង​ការ​ជួញដូរ​នៅ​ប្រទេស​ចិន

ដោយ ម៉ៅ សុធានី
2020-12-05
RFA

ន្ត្រី​ស្ថានទូត​ខ្មែរ សហការ​ជាមួយ​អាជ្ញាធរ​ចិន បាន​ទៅ​សង្គ្រោះ​ស្ត្រី​ខ្មែរ​ម្នាក់ ចេញ​ពី​ផ្ទះ​ប្តី​របស់​នាង​ដែល​ជា​ជនជាតិ​ចិន កាលពី​ថ្ងៃ​ទី​២ ខែ​ធ្នូ ក្រោយពី​ស្ត្រី​រងគ្រោះ​នេះ អំពាវនាវ​សុំ​ឱ្យ​លោកនាយក​រដ្ឋមន្ត្រី ហ៊ុន សែន ជួយ​អន្តរាគមន៍ បញ្ជូន​មក​កម្ពុជា​វិញ​។ បច្ចុប្បន្ន​ស្ត្រី​រងគ្រោះ កំពុង​ស្ថិត​ក្នុង​ស្ថានទូត​កម្ពុជា​ប្រចាំ​ប្រទេស​ចិន ដើម្បី​រៀបចំ​ឯកសារ​ផ្លូវច្បាប់ បញ្ជូន​មក​កម្ពុជា​វិញ។

ស្នងការ​រង​ទទួល​ផែន​ប្រឆាំង​ការ​ជួញដូរ​មនុស្ស និង​ការពារ​អនីតិជន​ខេត្ត​ក្រចេះ អ្នកស្រី នៅ រតនា ប្រាប់​កាសែត​ភ្នំពេញ​ប៉ុស្តិ៍​ថា ស្ត្រី​រងគ្រោះ​រូប​នេះ​ឈ្មោះ ធូក សុភី អាយុ ២០​ឆ្នាំ បាន​ចេញ​ពី​កម្ពុជា​នៅ​ឆ្នាំ​២០១៨ ដើម្បី​ទៅ​រៀបការ​ជាមួយ​ប្តី​ជនជាតិ​ចិន​។ អ្នកស្រី​បន្ត​ថា ស្ត្រី​រងគ្រោះ កាល​ពី​ពេល​ថ្មីៗ​នេះ បាន​បង្ហោះ​សារ​ពី​ប្រទេស​ចិន​នៅ​លើ​បណ្ដាញ​សង្គម​ហ្វេសប៊ុក ដោយ​អះអាង​ថា ប្តី​នាង​បាន​ប្រើ​អំពើ​ហិង្សា​លើ​រាងកាយ និង​ផ្លូវ​ភេទ ហើយ​ស្ត្រី​រងគ្រោះ​មិន​អាច​ទ្រាំទ្រ​បាន​តទៅ​ទៀត​ឡើយ​។ ស្ត្រី​រងគ្រោះ​រូប​នេះ មាន​ស្រុកកំណើត នៅ​ភូមិ​ឃ្សឹមក្រៅ ស្រុក​ស្នួល ខេត្ត​ក្រចេះ។

សមាគម​ការពារ​សិទ្ធិមនុស្ស​អាដហុក (Adhoc) ឱ្យ​ដឹង​ថា មូលហេតុ​នាំ​ឱ្យ​ស្ត្រី​ខ្មែរ​ចាញ់បោក​មេខ្យល់​ទៅ​ក្រៅ​ប្រទេស​នោះ​គឺ​ដោយសារ​ស្ថានភាព​ក្រីក្រ គ្មាន​ប្រាក់​សម្រាប់​ការ​ព្យាបាល​របស់​សមាជិក​ក្រុម​គ្រួសារ​ឈឺ និង​ពិបាក​រក​ការងារ​ធ្វើ​នៅ​ក្នុង​ស្រុក​។ សមាគម​បន្ត​ថា ករណី​ស្ត្រី​ខ្មែរ​ទៅ​រៀបការ​នៅ​ប្រទេស​ចិន​នេះ ទទួល​ល​បាន​ជោគជ័យ​និង​សុភមង្គល​តិចតួច​ណាស់ ហើយ​ថា​ស្ត្រី​ចំណាកស្រុក បង្ខំ​រៀបការ​ទៅ​ប្រទេស​ចិន​មាន ៣៩ ករណី​ដែល​សមាគម​បាន​ជួយសង្គ្រោះ រយៈពេល​១១ ខែ ក្នុង​អំឡុង​ឆ្នាំ​២០២០៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles