សកម្មជន​បក្ស​ប្រឆាំង​តែង​ចម្រៀង​ពី​បញ្ហា​នយោបាយ និង​សង្គម បង្ហោះ​តាម​បណ្ដាញ​សង្គម

ដោយ ឡេង ម៉ាលី
2021-02-27
RFA

សកម្មជន​បក្ស​ប្រឆាំង​តែង​ចម្រៀង​ពី​បញ្ហា​នយោបាយ និង​សង្គម បង្ហោះ​តាម​បណ្ដាញ​សង្គម

ផលិតកម្ម​ព្រះអាទិត្យ​រះ ដែល​ផ្សព្វផ្សាយ​ពី​ការ​តែង​និពន្ធ​សិល្បះ​ចម្រៀង របស់​​សកម្មជន​សង្គ្រោះ​ជាតិ​លោក ទុំ ប៊ុនផង។ Screenshot


សកម្មជន​គណបក្ស​សង្គ្រោះជាតិ ដែល​មាន​ជំនាញ​ផ្នែក​សិល្បៈ បាន​រួម​គ្នា​តែង​និពន្ធ​ចម្រៀង និង​ច្រៀង​រៀបរាប់​ពី​បញ្ហា​នយោបាយ សង្គម និង​បរិស្ថាន បង្ហោះ​តាម​បណ្ដាញ​សង្គម​។ ក្រុម​អ្នក​ភៀសខ្លួន​នយោបាយ​ទាំង​នោះ​បាន​យក​សិល្បៈ​ចម្រៀង​ធ្វើជា​ផ្នែក​មួយ​នៃ​ការ​តស៊ូ​មតិ និង​រិះគន់​រដ្ឋាភិបាល​លោក ហ៊ុន សែន។

ការផលិត​ចម្រៀង​ក្នុង​យុគសម័យ​បច្ចេកវិទ្យា​នេះ មិន​ចាំបាច់​ទាល់តែ​មាន​ធនធាន​ច្រើន បន្ទប់​ស្ទូឌីយ៉ូ​ស្តង់ដារ ឬ​ឧបករណ៍​សម្ភារៈ​ច្រើន​ពេក​នោះ​ទេ ពោល​គឺ​មាន​ត្រឹមតែ​កុំព្យូរទ័រ​មួយ​គ្រឿង និង​ទូរស័ព្ទ​មួយ​គ្រឿង ក៏​អាច​ធ្វើ​បាន​ដែរ​។ នេះ​ជា​ការ​អះអាង​របស់​ក្រុម​សកម្មជន​គណបក្ស​សង្គ្រោះ​ជាតិ​ដែល​ភៀសខ្លួន​នៅ​ប្រទេស​ថៃ​។ ពួកគេ​បាន​ផលិត​ចម្រៀង​រៀបរាប់​ពី​បញ្ហា​សង្គម និង​នយោបាយ ជាច្រើន​បទ​ជូន​ប្រជាពលរដ្ឋ​បាន​ស្ដាប់ ដោយ​ប្រើ​ត្រឹមតែ​កុំព្យូទ័រ និង​ទូរស័ព្ទ​ដៃ​មួយ​គ្រឿង​ប៉ុណ្ណោះ។

បទ​នេះ​មាន​ចំណងជើង​ថា “ ទទា​យំ​ឆ្លង “ ច្រៀង​ដោយ​ជនភៀសខ្លួន​នយោបាយ​នៅ​ប្រទេស​ថៃ លោក ទុំ ប៊ុនថន​។ បទ​នេះ​ត្រូវ​បាន​បង្ហោះ​ក្នុង​ទំព័រ​ហ្វេសប៊ុក។ បទ​នេះ​ជា​ការ​ឆ្លងឆ្លើយ​ប្រាប់​ទៅ​លោក ហ៊ុន សែន បើកទ្វារ​ឱ្យ​ពួកគេ​អាច​ចូល​ប្រទេស​កម្ពុជា ដើម្បី​តតាំង​ក្ដី​នៅ​តុលាការ។

ក្នុង​បន្ទប់​តូច​មួយ​នៅ​ជាយក្រុង​បាងកក សកម្មជន​សង្គ្រោះ​ជាតិ​លោក ទុំ ប៊ុនផង កំពុង​ហាត់​សម​បទ​ចម្រៀង​ជាមួយ​ទូរស័ព្ទ​របស់​លោក​ដែល​បាន​បញ្ជូន​កម្មវិធី​សម្រាប់​បញ្ចូល​សំឡេង​ច្រៀង​ជាមួយ​ភ្លេង​។ អតីត​អ្នក​ទោស​នយោបាយ​រូប​នេះ ធ្លាប់​ជាប់ពន្ធនាគារ​ក្នុង​ព្រឹត្តិការណ៍​វិល​ចូល​ស្រុក​របស់​លោក សម រង្ស៊ី កាលពី​ឆ្នាំ​២០១៩។

លោក ទុំ ប៊ុនថន ប្រាប់​ថា មុនដំបូង​លោក​មិន​ចេះ​តែង​និពន្ធ​ចម្រៀង​នោះ​ទេ ប៉ុន្តែ​នៅ​ពេល​ត្រូវ​ជាប់​ពន្ធនាគារ​ដោយ​អយុត្តិធម៌ និង​មើល​ឃើញ​ពី​បញ្ហា​សង្គម ទើប​ធ្វើ​ឱ្យ​លោក​ចេះ​សរសេរ​ពី​រឿងរ៉ាវ​ទាំងឡាយ​រៀបរាប់​ទៅ​ក្នុង​បទ​ចម្រៀង។

បើ​ស្ដាប់​ចម្រៀង​លោក ទុំ ប៊ុនថន ដែល​បង្ហោះ​តាម​បណ្ដាញ​សង្គម​ហាក់​ដូចជា​បទ​នេះ​ថត​ក្នុង​បន្ទប់​ស្ទូឌីយ៉ូ ដែលមាន​ឧបករណ៍​សម្ភារៈ​ច្រើន ប៉ុន្តែ​តាម​ពិត គឺ​ត្រូវការ​តែ​ទូរស័ព្ទ និង​ជើង​ទម្រ​មួយ​គ្រឿង ព្រមទាំង​ថវិកា​ខ្លះ​ដើម្បី​ទិញ​កម្មវិធី ថត​ចម្រៀង​ប៉ុណ្ណោះ​។ លោក​យល់ថា ចម្រៀង​គឺជា​ផ្នែក​សំខាន់​មួយ នៃ​ការ​តស៊ូ​មតិ​ដោយ​អហិង្សា។

ស្រដៀង​គ្នា​នេះ សកម្មជន​គណបក្ស​សង្គ្រោះ​ជាតិ​ម្នាក់ទៀត គឺ​លោកស្រី ឡេង សុទ្ធារី ក៏​កំពុង​បង្ហើរ​សំឡេង ចេញពី​បន្ទប់ រស់នៅ​របស់​ខ្លួន នៅ​ប្រទេស​ថៃ​ដែរ។ លោកស្រី ឡេង សុទ្ធារី សរសេរ​បទ​ចម្រៀង​មួយ​បទ សរសើរ​ពី​ទឹកចិត្ត​អង់អាច​របស់​អ្នកស្រី មូរ សុខ​ហួរ អនុប្រធាន​គណបក្ស​ស​ង្គ្រោះ​ជាតិ។​ «»

អ្នកស្រី ឡេង សុទ្ធារី នៅតែ​ចាត់​ទុក​ថ្នាក់ដឹកនាំ​គណបក្សប្រឆាំង​រូប​នេះ​ថា ជា​ស្ត្រី​ក្លាហាន បើទោះបីជា​គាត់​មិន​អាច​វិល​ចូល​ស្រុក​តាម​ផែនការ​ក្តី​។ សកម្មជន​គណបក្ស​ស​ង្គ្រោះ​ជាតិ​រូប​នេះ​យល់​ថា អ្នកស្រី មូរ សុខហួរ នៅតែ​រក្សា​ជំហរ​វិល​ចូល​ស្រុក​វិញ និង​កំពុង​រិះរក​មធ្យោបាយ ដើម្បី​អាច​វិល​ចូល​ស្រុក​វិញ។

ការ​ផលិត​ចម្រៀង​របស់​ជនភៀសខ្លួន​នយោបាយ​នៃ​គណបក្ស​សង្គ្រោះ​ជាតិ​នេះ មាន​តួអង្គ​សំខាន់ៗ គឺ​អ្នក​និពន្ធ អ្នកចម្រៀង និង​អ្នក​កាត់ត​វីដេអូ ។ មុននឹង​បាន​ចម្រៀង​មួយ​បទៗ ពួកគេ​បាន​ជួប​ជជែក​គ្នា ដើម្បី​ផ្លាស់ប្ដូរ​គំនិត​យោបល់​ជា​ញឹកញាប់។ «»

នៅ​ហាង​កាហ្វេ​មួយ​កន្លែង​ក្នុង​ទីក្រុង​បាងកក សកម្មជន​គណបក្ស​សង្គ្រោះ​ជាតិ​កំពុង​ជជែក​គ្នា​ពី​ការ​សរសេរ​បទ​ចម្រៀង​ថ្មី​ទាក់ទង​នឹង​ការ​វិវឌ្ឍ​នៃ​ស្ថានការណ៍​នយោបាយ​នៅ​កម្ពុជា​។ សកម្មជន​គណបក្ស​សង្គ្រោះជាតិ លោក ខិន សាម៉ន ដែល​មាន​ជំនាញ​ផ្នែក​ច្រៀង តែង​និពន្ធ កាត់ត និង​បញ្ចូល​រូបភាព​ក្នុង​កុំព្យូទ័រ​ផង​នោះ កំពុង​ច្រៀង​តិចៗ​ពី​ចម្រៀង​ដែល​លោក​ទើប​និពន្ធ​រួច។ «»

កវី​រូប​នេះ​ប្រាប់​អាស៊ីសេរី​ថា លោក​ធ្លាប់​ប្រឡង​ជាប់​លេខ​ល្អ​ក្នុង​ការ​ប្រឡង​តែង​និពន្ធ​នៅ​ថ្នាក់​ខេត្ត និង​ថ្នាក់​ជាតិ​។ លោក​ឱ្យ​ដឹង​ថា ចាប់​តាំង​ពី​ភៀសខ្លួន​មក​ដល់​ប្រទេស​ថៃ លោក​និពន្ធ​ចម្រៀង​បាន​ជាង ១០​បទ ដោយ​បទ​ខ្លះ​លោក​ច្រៀង​ខ្លួនឯង និង​បទ​ខ្លះ​ទៀត​ឱ្យ​អ្នក​ផ្សេង​ជួយ​ច្រៀង​។ លោក​ថា ដើម្បី​សរសេរ​បទ​ចម្រៀង​បាន​មួយ​បទៗ លោក​ត្រូវការ​ពេលវេលា​ដើម្បី​គិត ប្រមូល​ព័ត៌មាន និង​បញ្ចូល​អារម្មណ៍។ «»

លោក ខិន សាម៉ន ឱ្យ​ដឹង​ទៀត​ថា ការ​សរសេរ​បទ​ចម្រៀង​របស់​លោក​គ្មាន​បំណង​ញុះញង់​ឱ្យ​ខ្មែរ​បែកបាក់​គ្នា​នោះ​ទេ ផ្ទុយទៅវិញ​លោក​ចង់​ឃើញ​មាន​ដំណោះស្រាយ​នយោបាយ និង​ការ​ផ្សះផ្សា​ជាតិ ដើម្បី​ខ្មែរ​បាន​សុខ​សន្តិភាព​និង​ការ​អភិវឌ្ឍ​ទាំងអស់​គ្នា។ «»

ក្រុម​សកម្មជន​គណបក្សប្រឆាំង​បាន​រត់​ភៀសខ្លួន​ទៅ​ក្រៅ​ប្រទេស​ជា​បន្តបន្ទាប់ ជាពិសេស ទៅ​ប្រទេស​ថៃ ចាប់​តាំង​ពី​របប​ក្រុងភ្នំពេញ​រំលាយ​គណបក្ស​សង្គ្រោះ​ជាតិ កាលពី​ចុង​ឆ្នាំ​២០១៧

សព្វថ្ងៃ​មាន​សកម្មជន និង​មន្ត្រី​គណបក្ស​សង្គ្រោះ​ជាតិ​ជិត​១០០​នាក់​ដែល​កំពុង​ស្នាក់​នៅ ប្រទេស​ថៃ គេច​ចេញ​ពី​ការ​ធ្វើទុក្ខបុកម្នេញ និង​មិន​ព្រម​ចុះចូល​ជាមួយ​គណបក្ស​ប្រជាជន​កម្ពុជា​។ ពួកគេ​ក្រៅពី​តស៊ូ​មតិ​តាមរយៈ​សិល្បៈ​ចម្រៀង ក៏​មាន​ក្រុម​ខ្លះ​ផ្សព្វផ្សាយ​ព័ត៌មាន​តាម​បណ្ដាញ​សង្គម​ហ្វេសប៊ុក​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles