អ្នក​សង្កេតការណ៍​ថា ការតែងតាំង​លោក ហ៊ុន ម៉ាណែត ជាប្រធាន​គ្រប់គ្រង​សន្តិសុខ​ប្រឆាំង​កូវីដ-១៩​ ជាការពង្រីក​ឥទ្ធិពល​របស់​លោក

ដោយ មាន ឫទ្ធិ
2021-02-27
RFA

ស្ដាប់ ឬទាញ​យក​សំឡេង
ស្តាប់សំឡេងថតសំឡេង

អ្នក​សង្កេតការណ៍​ថា ការតែងតាំង​លោក ហ៊ុន ម៉ាណែត ជាប្រធាន​គ្រប់គ្រង​សន្តិសុខ​ប្រឆាំង​កូវីដ-១៩​ ជាការពង្រីក​ឥទ្ធិពល​របស់​លោក

លោក​នាយករដ្ឋមន្ត្រី ហ៊ុន សែន (ឆ្វេង) និង​កូន​ប្រុស​របស់​លោក គឺ​លោក ហ៊ុន ម៉ាណែត ក្នុង​ពិធី​មួយ​នា​ការដ្ឋាន​កងទ័ព​ជើង​គោក​នៃ​កង​យោធពល​ខេមរភូមិន្ទ។ ប្រភព៖ AFP


មន្ត្រីជាន់ខ្ពស់គណបក្ស​សង្គ្រោះជាតិ និង​អ្នក​វិភាគ​មើល​ឃើញថា ឥទ្ធិពល​របស់​លោក​ ហ៊ុន ម៉ាណែត ដែល​ជាកូន​ប្រុស​ច្បងរបស់​លោក​នាយករដ្ឋ​មន្ត្រី ហ៊ុន សែន កំពុង​​ត្រូវ​បាន​ពង្រី​ក​យ៉ាង​លឿន​រហ័ស​ទាំង​នៅក្នុង​ជួរ​កង​ទ័ព រដ្ឋាភិបាល និង​គណបក្ស​។

ការយល់ឃើញបែបនេះ គឺ​បន្ទាប់​ពីក្រសួង​សុខាភិបាល​បង្កើត​អនុគណៈកម្មការ​ថ្មីមួយហៅថា អនុគណៈកម្មការ​គ្រប់​គ្រង​សន្តិសុខនិង​សណ្តាប់​ធ្នាប់​នៅ​តាម​គោល​ដៅ​និង​​តំបន់​ចត្តាឡីស័ក​ដើម្បី​ប្រយុទ្ធនឹង​ជំងឺកូវីដ-១៩។ អនុគណៈកម្មាការ​នេះមាន​លោក ហ៊ុន​ ម៉ាណែត ជា​ប្រធាន ហើយ​មានមន្ត្រីយោធា នគរបាល និង​មន្រ្តីស៊ីវិល​ជាន់ខ្ពស់​ចំនួន ១៣នាក់​ ជាអនុប្រធាន និង​សមាជិក។ ចំណុច​សំខាន់​នោះ គឺមន្ត្រី​ខ្លះមាន​ឋានន្តរស័ក្តិ​ផ្កាយ​៤ខ្ពស់​ជាង​លោក ហ៊ុន ម៉ាណែត​ ដែល​ពាក់ផ្កាយ៣ទៅទៀត ប៉ុន្តែ​មន្ត្រីទាំងនោះ​បែរ​ជា​ត្រូវ​ធ្វើ​ការ​ក្រោម​បង្គាប់​របស់​លោក ហ៊ុន ម៉ាណែត ទៅវិញ។ 

តំណាងរាស្រ្តគណបក្សសង្គ្រោះជាតិ លោក អ៊ុំ សំអាន លើកឡើងថា ការ​តែង​តាំង​របៀបនេះជាការបំពាន​ឋានានុក្រមរបស់​មន្ត្រី។ លោក​ថា ករណីនេះ​ស្តែង​កាន់​តែច្បាស់​អំពីការពង្រឹងអំណាចលោក ហ៊ុន ម៉ាណែត និងក្រុមគ្រួសារត្រកូលហ៊ុន ក្នុង​ទិសដៅ​ឱ្យ​លោក ហ៊ុន ម៉ាណែត ស្នង​តំណែង​ពីលោក​ ហ៊ុន សែន នៅថ្ងៃមុខ​៖​ ​«​ក្នុង​​ឋាននុក្រមផ្កាយ​៣ មិន​អាចគ្រប់គ្រង​ទៅលើ​ផ្កាយ​៤បាន​ទេ។ នេះ​បានន័យ​ថា លោក ហ៊ុន សែន គាត់​តក់​ក្រហល់ដើម្បី​ឡង់សេ​កូន​គាត់​ឱ្យ​មាន​ឥទ្ធិពល​នៅក្នុងបក្ស នៅក្នុងរដ្ឋាភិបាល នៅក្នុង​គណៈកម្មការ​ប្រយុទ្ធ​ប្រឆាំង​នឹង​កូវីដ១៩ ដើម្បី​ឱ្យមាន​ឥទ្ធិពល​ទៅលើ​មន្ត្រីទាំង​អស់​ហ្នឹង ប៉ុន្តែ​ភ្លេច​គិត​ពីឋានានុក្រម»

ចំណែកអ្នកស្រាវជ្រាវការអភិវឌ្ឍសង្គមបណ្ឌិត មាស នី វិញ លោក​មើល​ឃើញថា ការ​គ្រប់​គ្រងសន្តិសុខសណ្តាប់​ធ្នាប់​រឿងកូវីដ-១៩ នេះ គឺជា​កាតព្វកិច្ច​របស់​អាជ្ញាធរ​ស៊ីវិល និង​នគរបាល​ ​មិន​គួរមាន​ការ​តែង​តាំង​មេទ័ព​ឱ្យ​ដឹកនាំ​ការងារនេះទេ។ លោក​យល់ថា ករណី​នេះ​បង្ហាញ​ថា ​អ្នក​នយោបាយ​កំពុង​​មាន​ឥទ្ធិពល​ទៅលើ​ស្ថាប័ន​ជំនាញ​៖​ ​«​​វា​ហាក់​ដូច​ជា ឋានៈ​ហ្នឹង​ខ្ពស់​ពេក​ដែល​ត្រូវ​យក​មក​កាន់​កាប់រឿង​កូវីដនេះ។ បើ​ឱ្យ​​អាជ្ញាធរ​ពាក់ព័ន្ធ​នៅក្នុង​មូលដ្ឋាន​ពង្រឹង​តែ​ការ​អនុវត្ត​ច្បាប់ទៅ ខ្ញុំ​គិតថា គាត់​អាច​ធ្វើ​បាន​ហើយ។ មិន​បាច់ចាំ​ទៅអំពល់ទុក្ខ​ទៅ​យក​មន្ត្រីជាន់ខ្ពស់​កង​ទ័ពយកមក​ប្រើ​ក្នុង​ស្ថានភាព​បែបនេះទេ»

ឆ្លើយតប​នឹង​ការ​លើក​ឡើងនេះ អ្នកនាំពាក្យគណបក្សប្រជាជានកម្ពុជាលោក សុខ ឥសាន បកស្រាយថា ការតែងតាំងមន្រ្តីរាជការ គឺជាសិទ្ធិសម្រេចរបស់រដ្ឋាភិបាល។ លោកចាត់ទុកមតិ​រិះគន់​ទាំងឡាយ​អំពីការ​តែងតាំងលោក ហ៊ុន ម៉ាណែត នេះ គឺ​ជារឿង​មិន​ត្រឹម​ត្រូវនិង​មាន​ចេតនាវាយ​ប្រហារលើ​ថ្នាក់ដឹកនាំរដ្ឋាភិបាល​៖ «​អាហ្នឹង ​គេ​ចោទ​តាំង​ពី​ដើម​មក​តើ ដើម្បី​វ៉ៃ​ប្រហារមក​លើ​សម្តេច​នាយក​រដ្ឋ​មន្ត្រី ហ៊ុន សែន គឺ​គេ​ធ្វើ​ឯកជន​ភាវូបនីយកម្ម​​គ្រួសារ ហ៊ុន សែន។ អាហ្នឹង​វា​រឿង​អ៊ីចឹង។ អាហ្នឹង​ហើយ​ដែល​ជា​ក្បួនឬ​ល្បិច​ក​លក្នុ​ង​ការ​លាប​ពណ៌មក​លើ​ថ្នាក់​ដឹកនាំ​គណបក្ស​ប្រជាជន​កម្ពុជា ក៏​ដូច​ជា​ថ្នាក់ដឹកនាំរាជរដ្ឋាភិបាល​កម្ពុជា»

ទោះជា​មន្ត្រីជាន់ខ្ពស់បក្សកាន់​អំណាច​បកស្រាយ​បែបនេះក្តី ក៏​លោកនាយករដ្ឋ​មន្រ្តី ហ៊ុន សែន ធ្លាប់​បាន​ប្រកាស​រួចហើយ​ថា លោក​កំពុង​ជួយ​ជ្រោមជ្រែងលោក ហ៊ុន ម៉ាណែត ​ឱ្យ​ក្លាយ​ជា​នាយករដ្ឋមន្ត្រីក្នុង​រយៈពេល​យ៉ាងហោចណាស់​ ១០ឆ្នាំ​ ទៀត​។

ដោយ​សារ​តែ​ការ​ជួយ​ជ្រោម​ជ្រែងនេះពី​ឪពុក​ លោក ហ៊ុន​ ម៉ាណែត បាន​ឡើង​រាសីខ្ពស់​ត្រដែតក្នុងរយៈពេល​ប៉ុន្មាន​ឆ្នាំចុងក្រោយ​នេះ។ ក្នុងវ័យ ៤៣ឆ្នាំ លោក ហ៊ុន ម៉ា​ណែ​ត គឺជា​ឧ​ត្ត​ម​សេនីយ៍​ផ្កាយ​៣ មាន​តួនាទី​ជា​អគ្គមេបញ្ជាការ​រង​កង​យោពល​ខេមរភូមិន្ទ ជា​មេបញ្ជាការ​កងទ័ពជើងគោក ជា​មេបញ្ជាការ​កងកម្លាំង​ពិសេស​ប្រឆាំង​ភេរវកម្ម និង​ជា​មេបញ្ជាការរង​កង​អង្គរក្ស​លោក ហ៊ុន សែន​។ ចំណែកនៅក្នុង​គណបក្ស​ប្រជាជន​កម្ពុជា​វិញ លោក​គឺជា​សមាជិក​គណៈ អចិន្ត្រៃយ៍ ស្ថិតក្នុង​ចំណោម​មនុស្ស​ ៣៤នាក់ ដែលជា​ក្បាលម៉ាស៊ីន​ដឹកនាំ​របស់​គណបក្ស​។ ក្រៅពីនេះ លោក​ជា​ប្រធាន​ចលនា​យុវជន​ដឹកនាំ​សមាជិក​ជំនាន់​ក្រោយរបស់​គណបក្ស​ប្រជាជន​កម្ពុជា ​ដែល​ភាគច្រើន​ជា​កូនចៅ​របស់​មន្ត្រី​ជំនាន់​មុន​។

ទោះជាយ៉ាងណា ក្រុម​អ្នក​សង្កេតការណ៍យល់ឃើញស្របគ្នាថា​ ប្រសិនបើ​លោក ហ៊ុន សែន ចង់​ផ្ទេរ​អំណាច​ឱ្យ​កូន​ដោយ​កិត្តិយស និង​មានការ​ទទួលស្គាល់​នោះ លោក​ត្រូវតែ​រៀបចំ​ការបោះឆ្នោត​តាម​បែប​ប្រជាធិបតេយ្យ ដោយ​អនុញ្ញាត​ឱ្យ​គ្រប់​គណបក្សអាច​​ចូលរួម​ប្រកួតប្រជែង​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។


អត្ថបទ​ដែល​ទាក់ទង

What Next?

Recent Articles

One Response to "អ្នក​សង្កេតការណ៍​ថា ការតែងតាំង​លោក ហ៊ុន ម៉ាណែត ជាប្រធាន​គ្រប់គ្រង​សន្តិសុខ​ប្រឆាំង​កូវីដ-១៩​ ជាការពង្រីក​ឥទ្ធិពល​របស់​លោក"

  1. Anonymous says:

    all CAMBODIAN wonder if the father KBOTH CHEATH can his son take powers from him . I’m laughing my ass off the powers is not a subject no one can holding it it is not every one can take from any one like what AH.. SDACH PEAL said