ដោយ ឡេង ម៉ាលី
2021-04-09
RFA
រូបភាពគំនរឈើច្រៀកដែលសកម្មជនការពារព្រៃឈើថតបាន នៅទីតាំងរបស់ PNT ចំណុចភូមិឫស្សីស្រុក ឃុំរួសរាន់ ស្រុករវៀង ខេត្តព្រះវិហារ កាលពីថ្ងៃទី២១ ខែមីនា ឆ្នាំ២០២១។ រូប៖ លោក ខេម សុឃី សកម្មជនព្រៃឡង់
ក្រុមហ៊ុនវៀតណាម ភីអ៊ិនធី (PNT Co., Ltd.) នៅតែបន្តកាប់បំផ្លាញព្រៃឡង់ទ្រង់ទ្រាយធំរយៈពេលជិត ១ខែមកហើយ។ ប្រជាសហគមន៍ព្រៃឡង់អះអាងថា គ្មានអាជ្ញាធរណា ចុះបង្ក្រាបបទល្មើសនេះទេ បើទោះបីជាពួកគាត់បានផ្តល់ព័ត៌មាន និងបង្ហាញភស្តុតាងជាច្រើនក្តី។ ប្រជាសហគមន៍ព្រៃឡង់រកឃើញថា ក្រុមហ៊ុននេះ បានបញ្ជូនកម្លាំងកម្មករកាប់ឈើក្នុងព្រៃឡង់កាន់តែខ្លាំងឡើង ក្រោយពីផ្ទុះជំងឺកូវីដ១៩ ចូលក្នុងសហគមន៍ចេញពីព្រឹត្តិការណ៍ ២០កុម្ភៈ។
ប្រជាសហគមន៍ព្រៃឡង់ និងសកម្មជនការពារព្រៃឈើទទូចជាថ្មីទៀត ឱ្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ ចុះស៊ើបអង្កេតជាបន្ទាន់ ពីសកម្មភាពកាប់បំផ្លាញព្រៃឡង់ខ្នាតធំ ដែលប្រព្រឹត្តឡើងដោយក្រុមហ៊ុនវៀតណាម ភីអ៊ិនធី (PNT Co., Ltd.)។ ការលើកឡើងនេះ ក្រោយពីពួកគេរកឃើញថា ក្រុមហ៊ុននេះ បានបញ្ជូនកម្លាំងកម្មកររាប់សិបនាក់ ចូលព្រៃឡង់កាប់ឈើ ហើយបានរាលដាលដល់តំបន់ជាំក្បាលដំរី ដែលជាកន្លែងសំបូរដើមឈើធំៗ និងដើមឈើផលិតជ័រទឹកដែលអ្នកស្រុកអាស្រ័យផល។
អ្នកសម្របសម្រួលសហគមន៍ព្រៃឡង់ ខេត្តព្រះវិហារ លោក ស្រី ថី ឱ្យដឹងនៅថ្ងៃទី៩ មេសាថា ក្រុមកម្មករសម្រុកកាប់ឈើគ្រប់ប្រភេទក្នុងតំបន់ព្រៃឡង់ ដែលមានមុខកាត់ ១តឹកកន្លះឡើងទៅ រួចដឹកចូលការដ្ឋានស្តុកឈើរបស់ក្រុមហ៊ុន ភីអ៊ិនធី ឋិតក្នុងឃុំរៀបរយ ស្រុករវៀង ជាប់ព្រៃឡង់ខេត្តព្រះវិហារ។ លោកថា ក្រុមកម្មករទាំងនោះបានដឹកជញ្ជូនឈើជ្រុងតាមគោយន្តជាច្រើនគ្រឿងស្ទើរជារៀងរាល់ថ្ងៃ ចេញពីព្រៃឡង់ឆ្ពោះទៅក្នុងដីសម្បទានសេដ្ឋកិច្ចរបស់ក្រុមហ៊ុន ភីអ៊ិនធី រួចដឹកជញ្ជូនបន្តតាមរថយន្តច្នៃ ចូលការដ្ឋានរបស់ក្រុមហ៊ុន៖ «ជោគវាសនាព្រៃឡង់ប្រហែលជាមិនឋិតថេរទេ បើគេបណ្ដែតបណ្ដោយឱ្យបទល្មើសចូលយ៉ាងនេះ។ ដូចដែលខ្ញុំច្រើននិយាយថា ខ្ញុំសោកស្តាយណាស់ដែលគេហាមក្រុមបណ្តាញព្រៃឡង់មិនឱ្យការពារព្រៃ ដល់បទល្មើសដឹកឈើជញ្ជូនចេញរាល់ថ្ងៃគេអត់ហាមឃាត់បានផង។ សហគមន៍មកថ្មីគេយាមតង់ យាមតង់យ៉ាងម៉េច បើគេដឹកឈើមកយកលុយគេមករួចគ្នាហើយ។ បទល្មើស ឬក្រុមហ៊ុនចូលកាប់ អត់មានតាមដានមើលផង»។
លោក ស្រី ថី បន្ថែមថា បើទោះបីសហគមន៍ព្រៃឡង់បានបង្ហោះព័ត៌មានតាមបណ្ដាញសង្គមហ្វេសបុក បង្ហាញពីសកម្មភាពកាប់ឈើហ៊ុបធំៗ ក្នុងព្រៃឡង់ ឱ្យអាជ្ញាធរអនុវត្តច្បាប់ក៏ដោយ ក៏អាជ្ញាធរមិនបានយកចិត្តទុកដាក់ដោះស្រាយបញ្ហានេះដែរ។ តែផ្ទុយទៅវិញ លោកថា អាជ្ញាធរតែងរកលេសឆ្លើយដោះសាគេចពីការទទួលខុសត្រូវដដែលៗ។ លោកសោកស្ដាយដើមឈើធំៗ ប្រភេទ ផ្អុង ដួងចែម ផ្ដៀក និងឈើទាលជាដើម ដែលមានអាយុកាលរាប់រយឆ្នាំ ត្រូវគេកាប់ផ្ដួល ដើម្បីធ្វើអាជីវកម្មជិត ៤សប្តាហ៍មកហើយ។
ក្រុមហ៊ុន ភីអ៊ិនធី (PNT Co., Ltd.) ទទួលបានដីសម្បទានសេដ្ឋកិច្ចពីរដ្ឋាភិបាលទំហំ ៧.៩០០ហិកតារ នៅស្រុករវៀង ខេត្តព្រះវិហារ កាលពីឆ្នាំ២០១០ ក្រោមកិច្ចសន្យារយៈពេល ៧០ឆ្នាំ។ ក្រុមហ៊ុននេះមានម្ចាស់ជាជនជាតិវៀតណាមឈ្មោះ ផាន់ ហួណាម (Phan Huu Nam)។ ក្នុងកិច្ចសន្យាក្រុមហ៊ុននេះវិនិយោគដំណាំខ្លឹមច័ន្ទ ចន្ទី និងដំណាំរួមផ្សំផ្សេងៗ ទៀត ប៉ុន្តែប្រជាសហគមន៍អះអាងថា ក្រុមហ៊ុនមិនបានដាំដុះតាមកិច្ចសន្យានោះទេ ដោយផ្ដោតលើការកាប់ឈើទៅវិញ។
អាស៊ីសេរីបានព្យាយាមទាក់ទងក្រុមហ៊ុន ភីអ៊ិនធី តាមរយៈលេខទូរស័ព្ទក្នុងគេហទំព័រសាជីវកម្ម តែគ្មានអ្នកលើក។
ចំណែកអ្នកនាំពាក្យក្រសួងបរិស្ថាន លោក នេត្រ ភក្ត្រា និងអ្នកនាំពាក្យគណៈកម្មការជាតិទប់ស្កាត់ និងបង្ក្រាបបទល្មើសព្រៃឈើ លោក អេង ហ៊ី វិញ ក៏អាស៊ីសេរីមិនអាចទាក់ទងបានដែរ នៅថ្ងៃទី៩ មេសា។
ក៏ប៉ុន្តែព្រះរាជអាជ្ញាអមសាលាដំបូងខេត្តព្រះវិហារ លោក ទី សុវិនថាល់ បដិសេធសេចក្ដីរាយការណ៍របស់ពលរដ្ឋថា ពុំមែនសុទ្ធតែការពិតទាំងអស់នោះទេ។ លោកថ្លែងថា មានពេលខ្លះពលរដ្ឋរាយការណ៍ស្នើឱ្យតំណាងអយ្យការចុះបង្ក្រាបបទល្មើសព្រៃឈើ តែពេលចុះដល់ទីតាំងជាក់ស្ដែង បែរជាគ្មានបទល្មើសទៅវិញ។ លោកថា ស្ថាប័នអយ្យការតែងបញ្ជូនព្រះរាជអាជ្ញារង ចុះបង្ក្រាបបទល្មើសព្រៃឈើដល់មូលដ្ឋានជាហូរហែ ប្រសិនបើមានបទល្មើសឧក្រិដ្ឋព្រៃឈើ ហើយនឹងអនុវត្តច្បាប់ដោយគ្មានការលើកលែងឡើយ៖ «រាយការណ៍ភរទេ ជូនកាលបុគ្គលហ្នឹងទារលុយគេអត់បានខ្ញុំតែញយហ្នឹង ព្រោះអីចាប់ជាបន្តបន្ទាប់ តើចូលព្រៃឡង់កាប់បំផ្លាញចាប់ហើយ ចាប់យកមកដាក់ពន្ធនាគារជាបន្តបន្ទាប់។ អ្នកកាប់ព្រៃឈើយើងអត់មានយោគយល់ទេ»។
ទោះយ៉ាងណាក្ដី សកម្មជនការពារព្រៃឈើ លោក ហេង ស្រស់ សង្ស័យថា ឧក្រិដ្ឋកម្មព្រៃឈើនេះកើតឡើងច្រើន ដោយសារមានការឃុបឃិតគ្នាជាប្រព័ន្ធរវៀងក្រុមហ៊ុនវៀតណាម និងអាជ្ញាធរពាក់ព័ន្ធខេត្តព្រះវិហារ។ លោកបារម្ភថា អំពើពុករលួយ និងការបណ្ដែតបណ្ដោយរបស់អាជ្ញាធរនឹងក្លាយជាដើមចម ធ្វើឱ្យព្រៃឡង់វិនាសហិនហោច៖ «ហាក់បីដូចជានៅខេត្តព្រះវិហារមានពាក់ព័ន្ធអំពើពុករលួយជាប្រព័ន្ធ សូម្បីតែកាប់បំផ្លាញព្រៃឈើក្នុងតំបន់ព្រៃឡង់ ហើយតំបន់ព្រៃឡង់ គឺគ្រប់គ្រងដោយមន្ត្រីជំនាញរបស់គាត់ គឺមន្ត្រីបរិស្ថាន តែរហូតមកដល់ពេលនេះ មិនទាន់ឃើញមន្ត្រីបរិស្ថានទប់ស្កាត់ ឬក៏រាយការណ៍ថា ក្នុងតំបន់ខ្លួនមានការកាប់បំផ្លាញព្រៃឈើ»។
ជុំវិញរឿងនេះ មន្ត្រីសម្របសម្រួលសមាគមអាហុកខេត្តព្រះវិហារ លោក ឡោ ចាន់ យល់ថា តំណាងអយ្យការគួរតែចុះទៅពិនិត្យជាក់ស្ដែងក្នុងករណីនេះ ខណៈដែលអាជ្ញាធរពាក់ព័ន្ធមិនអើពើដោះស្រាយក្តីកង្វល់រួមរបស់ពលរដ្ឋ។ លោកបារម្ភថា វិបត្តិព្រៃឈើនៅតែគ្មានច្រកចេញ បើតំបន់ជាប់ព្រៃឡង់នៅតែមានក្រុមហ៊ុនធ្វើអាជីវកម្មឈើ៖ «តាមសេចក្ដីរាយការណ៍របស់ខាងសហគមន៍ក្នុងតំបន់អស់ហ្នឹង គឺក្រុមហ៊ុនគាត់បានកាប់ឈើ ដែលពុំមែនឋិតក្នុងកិច្ចសន្យារវៀងក្រុមហ៊ុន និងរដ្ឋាភិបាលបែរជាកាប់ក្នុងតំបន់ព្រៃឡង់ អាហ្នឹងជាបទល្មើស។ ព្រះរាជអាជ្ញាគាត់មានសិទ្ធិឱ្យតែគាត់ធ្វើការតាមផ្លូវច្បាប់ តែខ្លាចតែគាត់មិនធ្វើតាមផ្លូវច្បាប់ អាហ្នឹងរឿងផ្សេង»។
កាលពីចុងឆ្នាំ២០២០ ប្រជាសហគមន៍ព្រៃឡង់ ប្រទះឃើញឈើមូលធំៗ ជាង ៥០០ដើម ត្រូវគេកាប់ចេញពីដីស្រែចម្ការរបស់ពលរដ្ឋដឹកជញ្ជូនចូលក្នុងការដ្ឋានរបស់ក្រុមហ៊ុន ភីអ៊ិនធី ជាបន្តបន្ទាប់ ដើម្បីអារច្រៀកធ្វើអាជីវកម្ម។ ប្រជាសហគមន៍ និងពលរដ្ឋអះអាងថា ក្រុមហ៊ុនមានម៉ាស៊ីនអារច្រៀកឈើខ្នាតធំ ៤គ្រឿង និងមានរថយន្តកែច្នៃជិត ១០គ្រឿង សម្រាប់ដឹកឈើធ្វើអាជីវកម្ម។
អង្គការជាតិ និងអន្តរជាតិបានរកឃើញថា ក្នុងរយៈពេល ២០ឆ្នាំចុងក្រោយនេះ ទំហំព្រៃឡង់ជាង ១សែន (១០២.៤៣៦) ហិកតារ ឬស្មើនឹង ២៤% ត្រូវបានបាត់បង់ ក្លាយជាវាលរហោឋាន។ បន្ថែមពីនេះទៀត គិតត្រឹមឆ្នាំ២០១៩ ព្រៃឡង់ទំហំជិត ៦ម៉ឺន (៥៨.១៣៨) ហិកតារ ត្រូវបានបំប្លែងទៅជាដីចម្ការដំណាំ ហើយមានផ្ទៃដីតែជាង ១ពាន់ (១.១១១) ហិកតារប៉ុណ្ណោះ ត្រូវបានដាំដុះកូនឈើឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋចោទក្រុមហ៊ុនវៀតណាម PNT ថា កាប់បំផ្លាញព្រៃឡង់ទ្រង់ទ្រាយធំថ្មីទៀត
- អាជ្ញាធរព្រះវិហារថា ក្រុមហ៊ុនវៀតណាមPNT កាប់ឈើក្នុងដីសម្បទានរបស់ខ្លួនដោយស្របច្បាប់
- ក្រុមហ៊ុនដីសម្បទានសេដ្ឋកិច្ចរងការចោទថាឈូសឆាយរំលោភដីអ្នកស្រុករវៀង
- ពលរដ្ឋប្រមាណ៣០០នាក់នៅព្រះវិហាររារាំងគ្រឿងចក្រក្រុមហ៊ុនមិនឱ្យឈូសដីលើកទី២