ដោយ យន់ សាមៀន
2021-04-10
RFA
ពលរដ្ឋខ្លះនៅតំបន់ចត្តាឡីស័កក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ទទួលជំនួយឧបត្ថម្ភខ្លះរបស់លោក ហ៊ុន សែន និងអ្នកស្រី ប៊ុន រ៉ានី។ រូប៖ រដ្ឋបាលរាជធានីភ្នំពេញ
ពលរដ្ឋមួយចំនួនកំពុងធ្វើចត្តាឡីស័ក ដង្ហោយសុំឱ្យរដ្ឋាភិបាលជួយដោះស្រាយបញ្ហាជីវភាព បន្ទាប់ពីអាជ្ញាធរក្រុងភ្នំពេញបិទខ្ទប់តំបន់ពួកគាត់មិនឲ្យចេញឬចូល។ មន្ត្រីសង្គមស៊ីវិលថា រដ្ឋាភិបាលគួររកដំណោះស្រាយបញ្ហាបន្ថែមទៀតជូនប្រជាពលរដ្ឋ ជាពិសេសជនងាយរងគ្រោះ សហគ្រាស អ្នកលក់ដូរ អាជីវកម្មតូចតាច ដោយកាត់បន្ថយពន្ធ សម្រួលថ្លៃសេវារបស់រដ្ឋ ដើម្បីស្ដារជីវភាពប្រជាពលរដ្ឋឡើងវិញ។
ពលរដ្ឋមួយចំនួនកំពុងបាត់បង់ចំណូលស្ទើរតែទាំងស្រុង ដោយសារតែវិធានការបិទខ្ទប់របស់រដ្ឋាភិបាលលោកនាយករដ្ឋមន្ត្រី ហ៊ុន សែន។ ពួកគាត់ជួបការលំបាក ខ្វះលុយបង់ថ្លៃទឹកភ្លើង និងប្រឈមបញ្ហាបំណុលធនាគារ ហើយសំណូមពររដ្ឋាភិបាលជួយរកដំណោះស្រាយជាបន្ទាន់។
ប្រជាពលរដ្ឋកំពុងធ្វើចត្តាឡីស័ក នៅរាជធានីភ្នំពេញ លោក យឿង ធាយុទ្ធ ប្រាប់អាស៊ីសេរីថា ដោយសារតែការរីករាលដាលជំងឺកូវីដ១៩ នេះ ហើយលោកមិនអាចចេញទៅប្រកបមុខរបរនៅខាងក្រៅផ្ទះបាន ធ្វើឱ្យគ្រួសាររបស់លោកបាត់បង់ចំណូលស្ទើរទាំងស្រុង ដែលមិនអាចផ្គត់ផ្គង់ជីវភាពគ្រួសារបានគ្រប់គ្រាន់នោះទេ។ ពេលនេះលោកនិងសមាជិកគ្រួសារពីរទៀតកំពុងធ្វើចត្តាឡឺស័កនៅផ្ទះ ដោយសារម្ដាយកើតកូវីដ១៩ ដែលកំពុងសម្រាកព្យាបាលនៅមន្ទីរពេទ្យ។ លោកត្អូញត្អែរថាអំឡុងពេលនេះលោក និងគ្រួសារធ្វើចត្តាឡីស័កនៅផ្ទះមិនមានអាហារហូបចុកគ្រប់គ្រាន់ ព្រោះលោកមិនអាចចេញទៅទិញម្ហូបខាងក្រៅបានទេ។ យុវជនវ័យ ២១រូបនេះអះអាងថា អាជ្ញាធរមិនអើពើជួយស្បៀងអាហារ និងជួយរំលែកទុក្ខលំបាកគ្រួសាររបស់លោក ដោយអាជ្ញាធរមើលនឹងភ្នែក និងត្រឹមតែអង្គុយចាំយាមប៉ុណ្ណោះ៖ «និយាយទៅអត់សោះម៉ង់ គាត់អត់មានបានជួយអីក្រៅពីឃ្លាំងមើលយើងអ៊ីចឹង មិនថាចំណីអាហារហូបចុក លុយកាកអីទេ សូម្បីទឹកអីតិចតួចក៏អត់ដែរ គាត់បានត្រឹមតែយាមហ្នឹង ប្រសិនបើយើងចេញទៅទិញអីក្រៅអត់បាន បើយើងអត់មានអ្នកជិតខាងជួយឱ្យ យើងមានតែដាច់ពោះ បើគាត់មើលនឹងភ្នែក»។
ស្រដៀងគ្នានេះដែរ កម្មការិនីរោងចក្រម្នាក់កំពុងធ្វើចត្តាឡីស័កនៅផ្ទះ លោកស្រី ស៊ុន ស្រីពៅ ប្រាប់ថារយៈពេល ៤ថ្ងៃមកហើយ ដែលលោកស្រីមិនទាន់ទទួលលទ្ធផលធ្វើតេស្តសំណាកកូវីដ១៩ ហើយលោកស្រីកំពុងធ្វើចត្តាឡីស័កនៅបន្ទប់ផងដែរ។ ស្រ្តីវ័យ ២៨ឆ្នាំរូប រស់នៅទាំងត្រដាបត្រដួសដោយសារតែរោងចក្រផ្អាកការងារ។ លោកស្រីទទូចឱ្យថៅកែរោងចក្រប្រញាប់បើកប្រាក់ខែឱ្យកម្មករ ដើម្បីពួកគាត់យកប្រាក់ទៅផ្គត់ផ្គង់ជីវភាពស្របពេលរាតត្បាតជំងឺកូវីដ១៩៖ «បញ្ហាអត់លុយទៅណាអត់រួច កាលខ្ញុំទៅធ្វើតេស្តមកភ្លាមហ្នឹងខ្ញុំទិញត្រីខកំប៉ុងមួយយួរ ហើយនឹងពងទាដប់គ្រាប់ហូបប៉ុណ្ណឹង តិចៗ ទៅតែឥឡូវនៅត្រីខមួយយួរ ហើយពងទាហ្នឹងនៅប្រហែលប្រាំ ប្រាំមួយគ្រាប់ បារម្ភអត់មានទឹកដោះគោឱ្យកូនពិបាកដល់ហើយ»។
ការត្អូញត្អែររបស់ប្រជាពលរដ្ឋនេះ គឺដោយសារតែអាជ្ញាធរប្រកាសបិទតំបន់មួយចំនួនក្នុងរាជធានីភ្នំពេញ ដើម្បីទប់ស្កាត់ការផ្ទុះរាលដាលជំងឺកូវីដ១៩។
ជុំវិញបញ្ហាប្រឈមរបស់ប្រជាពលរដ្ឋនេះដែរ លោក ហ៊ុន សែន បានថ្លែងនៅលើទំព័រហ្វេសប៊ុកថា ប្រជាពលរដ្ឋស្លាប់ដោយសារជំងឺកូវីដ១៩ រដ្ឋនឹងជួយគ្រួសារសព ដោយបង់ជំនួសថ្លៃទឹកភ្លើង រយៈពេលប្រាំខែ និងទទួលបានប្រាក់ ១០លានរៀល អង្ករមួយរយគីឡូក្រាម។ ចំណែកប្រជាពលរដ្ឋឆ្លងជំងឺកូវីដ១៩ រដ្ឋនឹងជួយបង់ថ្លៃទឹកភ្លើងជំនួស រយៈពេល ៣ខែ។ រីឯគ្រួសារដែលត្រូវធ្វើចត្តាឡីស័កនៅក្នុងតំបន់មិនបិទខ្ទប់ រដ្ឋនឹងជួយថវិកាបីសែនរៀលក្នុងមួយគ្រួសារ និងជួយបង់ថ្លៃទឹកភ្លើង រយៈពេលពីរខែ ហើយគ្រួសារនៅក្នុងតំបន់បិទខ្ទប់ រដ្ឋនឹងឧបត្ថម្ភក្នុងមួយគ្រួសារថវិកា ៣០ម៉ឺនរៀល ក្នុងមួយគ្រួសារ និងបង់ថ្លៃទឹកភ្លើងចំនួន ២ខែ ដោយបន្ថែមអង្ករក្នុងមួយគ្រួសារ ២៥គីឡូក្រាម មីមួយកេស និងត្រីខ ២០កំប៉ុង។ លោក ហ៊ុន សែន បន្តទៀតថា រដ្ឋនឹងជួយបង់ទឹកភ្លើងឱ្យកម្មករមានជំងឺកូវីដ-១៩ រយៈពេលបីខែ និងកម្មករធ្វើចត្តាឡីស័កជួយបង់ ២ខែ ព្រមទាំងជំនួយឧបត្ថម្ភផ្សេងទៀត។
លោក ហ៊ុន សែន ប្រកាសថាសមាគមគ្រឹះស្ថានមីក្រូហិរញ្ញវត្ថុ និងសមាគមធនាគារនៅកម្ពុជា នឹងលើកលែងការបង់ការប្រាក់ និងការផាកពិន័យទាំងអស់រយៈពេលមួយខែ ព្រមទាំងទទួលបានការរៀបចំឥណទានឡើងវិញ ប្រសិនបើអតិថិជនយល់ព្រម រួមទាំងការពន្យារពេលបង់ប្រាក់ដើមរយៈបីខែ ចំពោះអតិថិជនឆ្លងកូវីដ។ ចំណែកអតិថិជនជាប់ធ្វើចត្តាឡីស័កជួយរៀបចំឥណទានឡើងវិញ ប្រសិនបើអតិថិជនយល់ព្រម រួមទាំងពន្យារការបង់ទាំងប្រាក់ដើម និងបង់ការប្រាក់រយៈពេលមួយខែ ហើយលើកលែងរាល់ការផាកពិន័យទាំងអស់។ ជាមួយគ្នានេះសមាគមគ្រឹះស្ថានមីក្រូហិរញ្ញវត្ថុ និងសមាគមធនាគារនៅកម្ពុជានឹងផ្តល់ជូន ការរៀបចំឥណទានឡើងវិញ និងបង្កលក្ខណៈងាយស្រួលសម្រាប់អតិថិជនរងផលប៉ះពាល់ ដោយជំងឺកូវីដ១៩៖ «រាជរដ្ឋាភិបាលអំពាវនាវ ចំពោះក្រុមហ៊ុនអគ្គិសនីកម្ពុជា ក៏ដូចរដ្ឋាករទឹកស្វយ័ត ក្រុមហ៊ុនអគ្គិសនីឯកជន ក្រុមហ៊ុនទឹកឯកជន សូមចូលរួមជាមួយរាជរដ្ឋាភិបាលក្នុងការដោះស្រាយជាមួយនឹងការផ្គត់ផ្គង់របស់រដ្ឋជូនចំពោះអ្នកដែលមានក្រុមគ្រួសារស្លាប់ សមាជិកគ្រួសារស្លាប់ ឬគ្រួសារដែលមានជំងឺកូវីដ១៩ និងអ្នកជាប់ធ្វើចត្តាឡីស័ក បើមិនបានមួយរយភាគទេ ក៏បានបដិភាគមួយចំនួន»។
លោក ហ៊ុន សែន ក៏ស្នើសុំសមាគមគ្រឹះស្ថានមីក្រូហិរញ្ញវត្ថុ និងសមាគមធនាគារនៅកម្ពុជា ជួយពន្យារពេលបន្ថែមទៀតចំពោះការបង់ប្រាក់ដើម ការប្រាក់ និងចៀសវាងការផាកពិន័យ ការរឹបអូសទ្រព្យសម្បត្តិនៅពេលនេះទេ។ លោកបន្ថែមថាការកាត់បន្ថយការប្រាក់ ដើម្បីជួយស្ដារឡើងវិញនូវសេដ្ឋកិច្ចគ្រួសារ និងអាជីវកម្មមុន និងក្រោយពេលមានវិបត្តិ។
ជុំវិញរឿងនេះប្រធានអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា សង្គមស៊ីវិលគាំទ្រនូវវិធានការដោះស្រាយផលប៉ះពាល់ដល់ប្រជាពលរដ្ឋរងគ្រោះដោយសារជំងឺកូវីដ១៩។ មន្ត្រីសង្គមស៊ីវិលរូបនេះ ទទូចដល់រដ្ឋាភិបាលឱ្យជួយឧបត្ថម្ភប្រាក់មួយចំនួនដល់អ្នកប្រកបមុខរបរខ្នាតតូច និងមធ្យម ដើម្បីឱ្យពួកគាត់អាចបន្តមុខរបរ និងមានលទ្ធភាពដោះស្រាយផលប៉ះពាល់នានា។ លោកបន្តទៀតថា រដ្ឋាភិបាលគួរពិភាក្សាឱ្យលម្អិតបន្ថែមទៀតរវាងរដ្ឋាភិបាល ធនាគារ អ្នកជំនាញ និងអង្គការសង្គមស៊ីវិល ដើម្បីរកដំណោះស្រាយបញ្ហាបន្ថែមទៀតជូនប្រជាពលរដ្ឋ ជាពិសេសត្រៀមថវិកាដើម្បីជួយប្រជាពលរដ្ឋងាយរងគ្រោះ និងសហគ្រាស អ្នកលក់ដូរ អាជីវកម្មតូចតាច ដើម្បីស្ដារឡើងវិញ ដោយកាត់បន្ថយពន្ធ សម្រួលថ្លៃសេវារបស់រដ្ឋ ជាដើម៖ «អត់ទាន់ដឹងថា កូវីដហ្នឹងបន្តអូសបន្លាយប៉ុណ្ណា ការអូសបន្លាយនឹងអាចប៉ះពាល់ដល់កម្រិតណាទៅដល់ជីវភាពប្រជាពលរដ្ឋ យើងដឹងហើយ អ្នករកស៊ីប្រាក់ចំណូលមួយថ្ងៃៗ គឺគាត់ពិបាកហើយ គាត់អត់មានលុយសន្សំដូចគេទេ គឺយើងត្រូវត្រៀមទុកថវិកា ហើយការរកថវិកាពីច្រកណានោះ យើងអាចរកបានតាមរយៈលុយកម្ចី លុយជំនួយផ្សេងៗ អ្វីដែលសំខាន់ជាងគេគឺយើងប្រើលុយដែលយើងមានតិចតួចហ្នឹងឱ្យត្រូវ ត្រូវចំគោលដៅ ហើយត្រូវចំក្រុមដែលយើងគួរជួយ»។
ជុំវិញការសន្យារបស់លោក ហ៊ុន សែន នេះដែរ ប្រជាពលរដ្ឋស្នើរដ្ឋាភិបាលពន្លឿនគួរគិតគូរបន្ថែមទៀតដល់សុខទុក្ខរបស់ពួកគាត់ ដូចជាការផ្តល់ជំនួយជាស្បៀងអាហារ និងថវិកា ព្រមទាំងជួយសម្រួលរឿងបំណុលធនាគារ និងបញ្ចុះថ្លៃទឹកភ្លើង ប្រសិនបើស្ថានភាពជំងឺកូវីដ១៩ នេះបន្តអូសបន្លាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
time for HUN SEN showing his card I just want to see how smart this highly jungle educated is