តុលាការ​បដិសេធ​បណ្តឹង​សុំ​នៅ​ក្រៅ​ឃុំ​​បណ្ដោះ​​អាសន្ន​​របស់​​​លោក​ រ៉ុង ឈុន

តុលាការ និងច្បាប់ | ព័ត៌មានជាតិ | សិទ្ធិមនុស្ស
លោក ម៉ម មុនីរតន៍ |០៨ មិថុនា ២០២១ |ម៉ោង ១៧:១៧
VOD

លោក រ៉ុង ឈុន ក្រោយ​ចេញពី​សវនាការ​នៅ​តុលាការ​កំពូល ពាក់ព័ន្ធ​នឹង​បទ​ចោទ «ញុះញង់​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ថ្ងៃទី១១ ខែវិច្ឆិកា ឆ្នាំ២០២០។ (​ហ្វេសប៊ុក៖ RONG CHHUN​)

លោក រ៉ុង ឈុន ក្រោយ​ចេញពី​សវនាការ​នៅ​តុលាការ​កំពូល ពាក់ព័ន្ធ​នឹង​បទ​ចោទ «ញុះញង់​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ថ្ងៃទី១១ ខែវិច្ឆិកា ឆ្នាំ២០២០។ (​ហ្វេសប៊ុក៖ RONG CHHUN​)


តុលាការសាលាដំបូងរាជធានីភ្នំពេញ សម្រេចបដិសេធបណ្តឹង​សុំនៅក្រៅឃុំបណ្តោះអាសន្ន​​​របស់​លោក រ៉ុង ឈុន ប៉ុន្តែត្រូវបាន​មេធាវីការពារក្តី និងសាច់ញាតិ​សមាជិកក្រុមប្រឹក្សាឃ្លាំមើលកម្ពុជារូបនេះ ​ហៅការ​​សម្រេចនេះថា មិន​​ផ្អែក​​លើ​អង្គហេតុនិងអង្គច្បាប់ប្រកបដោយសុភនិច្ឆ័យឡើយ។

ថ្លែងនៅខាងមុខសាលាដំបូងរាជធានីភ្នំពេញ ក្រោយបញ្ចប់សវនាការ លោក ឡោ ជុនធី សហមេធាវីម្នាក់ក្នុងចំណោម​មេ​ធាវីទាំង​​ពីររូបដែលចូលការពារក្តីឱ្យ​លោក ​រ៉ុង ឈុន​ បានប្រាប់ក្រុមអ្នកសារព័ត៌មាន​នៅថ្ងៃទី០៨ ខែមិថុនានេះ​ថា ជាការសោកស្តាយ​​ដែល​​នៅ​​នាទីចុងក្រោយ សេចក្តីសម្រេចរបស់ចៅក្រមជំនុំជម្រះហាក់មិន​បានពិចារណា​​​ទៅ​លើ​សេចក្តី​​សន្និដ្ឋានរបស់មេធាវីការពារ​ក្តីឱ្យជនត្រូវចោទសោះ។

លោកបន្តថា តាមពិតទាំងលោក រ៉ុង ឈុន និង​​កញ្ញា សរ កណិកា គួរត្រូវបានដោះលែងឱ្យនៅក្រៅឃុំបណ្តោះអាសន្ន បើផ្អែកលើអង្គហេតុនិង​​​​នីតិវិធី​​ច្បាប់​​។

លោកមេធាវី ឡោ ជុនធី ផ្ដល់បទសម្ភាសន៍នៅមុខសាលាដំបូងរាជធានីភ្នំពេញ ពាក់ព័ន្ធនឹងសវនាការលើលោក រ៉ុង ឈុន ព្រឹកថ្ងៃទី០៨ ខែមិថុនា ឆ្នាំ២០២១។ (ម៉ម មុនីរតន៍)
លោកមេធាវី ឡោ ជុនធី ផ្ដល់បទសម្ភាសន៍នៅមុខសាលាដំបូងរាជធានីភ្នំពេញ ពាក់ព័ន្ធនឹងសវនាការលើលោក រ៉ុង ឈុន ព្រឹកថ្ងៃទី០៨ ខែមិថុនា ឆ្នាំ២០២១។ (ម៉ម មុនីរតន៍)

លោកបន្តថា៖ «[ការ]ឃុំខ្លួន​របស់​គាត់​ហ្នឹងដូចខ្ញុំបានលើកឡើងអ៊ីចឹង គិតមកដល់​​ពេល​​​​​នេះ ​​​មាន​រយៈពេល១១ខែនិង២៣ថ្ងៃហើយ ដូច្នេះ ភាពសមហេតុ​សមផលគួរតែឱ្យគាត់​បាន​​​​​​នៅ​​​ក្រៅឃុំ នេះជាចំណុចទី១។ ហើយចំណុចទី២ តើកូនក្តី​របស់ខ្ញុំគាត់គេចវេះ​ទៅណា​! ចាប់​​ពី​​នី​​តិ​វិ​ធី​ចាប់ផ្តើមរហូតមកដល់នីតិវិធីសវនា​ការរហូតដល់២ទៅ៣ដង គាត់ចូលរហូត ​គាត់មាន​គេ​ច​​​​វេះទៅ​ណា​! បើគាត់នៅក្រៅឃុំ គាត់ធ្វើអីកើត!»

យុវជន រ៉ុង​ វិជ្ជា ដែលត្រូវជាក្មួយប្រុសបង្កើតរបស់​លោក រ៉ុង ឈុន​ ចាត់ទុកសេចក្តីសម្រេចរបស់​​ចៅ​​ក្រម​​​ជំនុំជម្រះ លោក លិ សុខា ថាជាការសម្រេចដែលមាន​ភាពអយុត្តិធម៌ចំពោះលោក រ៉ុង ឈុន​​។

លោកបន្តថា ក្រុមគ្រួសាររបស់លោក​នឹងនៅ​តែបន្តស្វែងរកនីតិវិធីជាថ្មីទៀត ធ្វើយ៉ាងណាដើម្បីអាច​ជួយ​​ឱ្យលោក រ៉ុង ឈុន​ បាន​​រួច​ផុតពីការចោទ​​ប្រកាន់​។

លោក​​បន្ត​​​ថា៖ «ខ្ញុំមានការសោកស្តាយ​ជាខ្លាំង នេះជារឿងអយុត្តិធម៌ដែលក្រុមគ្រួសារ ក៏ដូច​ជាប្រ​ជា​ពល​រដ្ឋទូទៅមិនអាចទទួលយកបាន ពីព្រោះតុលាការមិនបានលើកហេតុផលសមរម្យ។ វាមើលឃើញពីការ​អនុវត្តស្តង់ដារពីររបស់តុលាការ»។

បើទោះជាបែបណា នៅក្នុងអង្គសវនាការដែលប្រព្រឹត្តទៅនៅថ្ងៃ​ទី​៨ ខែមិថុនានេះ​ គឺពុំ​​មាន​​វត្ត​មាន​ជនជាប់ចោទទាំងពីរនាក់ រួមមាន ​លោក រ៉ុង ឈុន និងកញ្ញា សរ កណិកា សកម្មជន​​អតីត​​គណបក្ស​​សង្រ្គោះ​​​ជាតិ ចូលរួមដោយផ្ទាល់នៅពេលជំនុំជម្រះទេ។

គេសង្កេតឃើញនៅ​​ក្នុង​​បន្ទប់​​​សវនាការ ទាំង​​នៅ​​ក្នុងដំណាក់កាលធ្វើសេចក្តីកត់សម្គាល់ សេចក្តីថ្លែងហេតុ និងសេចក្តី​​សន្និ​ដ្ឋាន ភាគីទាំងពីរ គឺ​​សហ​មេធាវីការពារក្តីឱ្យជនជាប់ចោទ និងតុលាការ បាន​បន្តខ្វែង​​គំនិតគ្នា​​ជា​​ច្រើន​ចំណុចនៅក្នុង​​មាត្រា​​ច្បាប់ រហូតដល់សេចក្តីសន្និដ្ឋានចុងក្រោយ។

នៅក្នុងសេចក្តីថ្លែងហេតុពីដំបូងទី លោក សំ សុគង់ សហមេធាវីម្នាក់ក្នុង​​ចំណោម​​មេធា​វីទាំ​ង​ពីររូប ឆ្លើយតបទៅចៅក្រមជំនុំជម្រះ​ថា ដោយយោងមាត្រា៣០៧ នៃក្រមព្រហ្មទណ្ឌ គឺមានភាពចាំបាច់ដែលតម្រូវឱ្យមេធាវីអាច​​ស្នើ​​សុំ​ទៅតុលាការ ដើម្បី​​បើក​​ផ្លូវឱ្យកូនក្តីរបស់ខ្លួនបាននៅ​​ក្រៅ​​ឃុំបណ្តោះអាសន្ន។ លើសពីនេះទៀត មាត្រា​​៤៩៥ នៃក្រម​​នេះ​​ដដែល គឺការកំណត់នៃបទល្មើស មានន័យថា បទល្មើសប្រឆាំងលោក រ៉ុង ឈុន និងកញ្ញា សរ កណិ​​កា នេះជាបទល្មើសមជ្ឈិមទេ។

លោក សំ សុគង់ បន្ត​ថា បើផ្អែកលើការឃុំខ្លួននេះ អ្នកទាំងពីរ​បាន​អនុវត្តទោស​បាន​​​២​​​​ភាគ​​៣​​នៃទោស​អតិបរមាដែលកំណត់ផ្តន្ទាទោសដោយក្រមនេះចន្លោះពី៦ខែ ទៅ២៤​ខែរួច​​បាត់​​ទៅហើយ ដែលករណីនេះ ​កូនក្តីរបស់លោក​​គួរ​ត្រូវដោះលែងឱ្យនៅក្រៅឃុំបណ្តោះអាសន្ន។

ភ្លាមៗ ក្រោយពីមេធាវីការពារក្តីឱ្យជនត្រូវចោទ ព្យាយាមដោះបន្ទុកនោះ តំណាង​អយ្យការ​​ លោក សេង ហៀង បានប្រតិកម្មតបភ្លាម ដោយលើកសម្អាងហេតុថា តាមពិតទៅ ទាំងលោក រ៉ុង ឈុន និងកញ្ញា សរ កណិកា មិនបានឃុំខ្លួនលើសពីនីតិវិធីឡើយ។

លោកថា ​បើ​តាម​មាត្រា​៣០៥ នៃ​​ក្រម​​ព្រហ្មទណ្ឌនេះ តាម​​រយៈការបង្ហាញខ្លួនចំនួន២ ទៅ៣ដងកន្លងទៅ នៅចំពោះមុខតុលាការ មាន​​ន័យ​​ថា ​​គឺ​​ជា​​កា​រ​អនុវត្ត​​នីតិវិធីពេញ​​លេ​ញ​​​​​ហើយ។

នៅក្នុងដំណាក់កាលនៃ​ដំណើរការក្តីឯណោះវិញ សហមេធាវីទាំងពីររបស់​​ជន​​​ត្រូវ​​ចោទ ក៏បានស្នើ​ទៅចៅក្រមជំនុំជម្រះ ឱ្យកូន​ក្តីរបស់ខ្លួនមានវត្តមាននៅក្នុងបន្ទប់សវនា​ការផងដែរ។

ករណីនេះ លោក សេង ហៀង ព្រះរាជ​​អាជ្ញា​​រង ដែល​កាន់សំណុំរឿងនេះ បានលើកឡើង​ថា ការជំនុំជម្រះនេះពុំ​​ចាំ​​បាច់​​មាន​​វត្ត​​​​មាន​​ជន​ត្រូវ​​ចោទ​ទាំងពីររូបចូលរួមកាត់ក្តី​​ដោយ​​​ផ្ទាល់ទេ ដោយសារ​ខាង​ពន្ធនាគារបាន​ជូន​​ដំណឹងមក​តុលា​ការ​​រួចទៅហើយ ពីហានិភ័យនៃការឆ្លងជំងឺកូវីដ-១៩ ដែលពិបាកដល់ការដឹកជញ្ជូនអ្នកជាប់ឃុំមកសាល​​សវ​នា​ការ។

ម៉្យាងវិញទៀត លោកថា នេះជាសវនា​ការមុនអង្គសេចក្តី ហេតុនេះពុំមានហេតុផល​អ្វីដែល​ចាំបាច់​​តម្រូ​វឱ្យ​មាន​​ជនជាប់ចោទទាំងពីរបង្ហាញវត្តមាននៅទីនេះឡើយ។

បើទោះជាបែបណា យោងតាមលិខិតកោះអញ្ជើញរបស់តំណាងអយ្យការ លោក សេង ហៀង ដែល​​ចេញកាលពីថ្ងៃទី១ ខែមិថុនា ឆ្នាំ២០២១ ការជំនុំ​​ជម្រះដែល​​ធ្វើឡើងនៅព្រឹកថ្ងៃទី​៨ ខែ​មិថុនា​នេះ ជា​​​សវនាការ​លើអង្គ​​សេចក្តីទេ។ ប៉ុន្តែគេមិនបានដឹង​​ថា​តើមានមូលហេតុអ្វីឱ្យប្រាកដបានជាតុលាការ​​សម្រេច​​បង្វែ​​​រ​​រឿងក្តី​ មកជាសវនាការមុន​អង្គសេចក្តី​ទៅវិញ។

យ៉ាងនេះក្តី សវនាការសុំនៅក្រៅ​​ឃុំ​​ណ្តោះ​អាសន្ន​ដែលប្រើពេលប្រមាណជិត១ម៉ោង ប្រព្រឹត្តទៅក្រោមការឃ្លាំមើលនិងចូលរួមសង្កេត​​ការ​​​ពីអង្គការដៃគូជាតិនិងអន្តរជាតិ ដូចជា ​តំណាង​​ស្ថាន​​​ទូតជប៉ុន សហរដ្ឋអាមេរិក អាល្លឺម៉ង់ អ៊ីយូ អូស្រ្តាលី ស៊ុយអែត និងសមាគមបណ្តាញ​​យុវជន​​កម្ពុជា (CYN) ជាដើម។

លោក អំ សំអាត នាយករងអង្គការការពារសិទ្ធិមនុស្ស​លីកាដូ យល់ឃើញថា ចៅក្រមជំនុំជម្រះមិនគួរបដិសេធ​​បណ្តឹង​សុំនៅក្រៅឃុំដូចនេះឡើយ។ លោកបន្តថា ទាំងសេចក្តីសន្និដ្ឋាននិងសម្អាងហេតុរបស់​​សហ​​​មេធាវីការពារក្តីឱ្យជនត្រូវចោទ មានធាតុផ្សំគ្រប់គ្រាន់​ ដែលល្មមអាចឱ្យ​ជន​​​ជាប់ឃុំទាំ​​ង​២​​រូបបាននៅក្រៅឃុំបណ្តោះអាសន្ន​។

លោកបន្តថា៖ ​«វាគួរតែមានការពិចារ​ណាដែរ ចំពោះ​ការ​លើ​កឡើងរបស់មេធាវី ពួកគាត់មានអំណះអំណាងមួយចំនួន គឺជាការត្រឹមត្រូវហើយ។ យើងមើលឃើញថា បើទោះបីកន្លងមក មានបើកសវនាការ​ជាបន្តបន្ទាប់ហើយក្តី តែបើយើងគិតពីរយៈពេលនៃការឃុំខ្លួនបណ្តោះអាសន្នហ្នឹង វាលើសទៅហើយ»។

លោក រ៉ុង ឈុន ដែលជា​អតីតប្រធានសមាគមគ្រូបង្រៀនកម្ពុជាឯករាជ្យផងនោះ​ ត្រូវបានសមត្ថកិច្ចចាប់​​ខ្លួន​ទាំង​យប់ កាល​​ពីចុងខែ​កក្កដា ឆ្នាំ២០២០ និង​ត្រូវបានតុលាការ​​ចោទប្រកាន់​ពី​បទ «ញុះញង់​បង្ក​ឱ្យមានភាពវឹកវរ​ធ្ងន់​​​ធ្ងរ​ដល់សន្តិសុខ​សង្គម​​»​​។ ដោយឡែក កញ្ញា សរ កណិកា ជាសកម្មជននយោបាយរបស់អតីត​គណ​​​​បក្ស​​សង្រ្គោះ​​ជាតិ ត្រូវបានសមត្ថកិច្ចចាប់ខ្លួននៅខាងមុខ​សាលាដំបូងរាជធានីភ្នំពេញ ខ​ណៈ​​​​​មាន​ការ​​តវ៉ា​ឱ្យដោះលែងលោក រ៉ុង ឈុន៕


រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

What Next?

Recent Articles

One Response to "តុលាការ​បដិសេធ​បណ្តឹង​សុំ​នៅ​ក្រៅ​ឃុំ​​បណ្ដោះ​​អាសន្ន​​របស់​​​លោក​ រ៉ុង ឈុន"

  1. Anonymous says:

    please hang on right now the situation in KAMPOUCHEA is un certain some thing will change at any time. we knew that dump evil will have his day we do not know how long this beast regime can survive . the pressure is coming from every where COVID19 , US. VEITCONG , CHINA. let see what that strong evil will do.

Leave a Reply

Submit Comment