បរិស្ថាន | ព័ត៌មានជាតិ
កញ្ញា ហ៊ន ថូវ៉ាន | ២១ កក្កដា ២០២១ |ម៉ោង ១៣:៤៤
VOD
ផ្ទះប្រជាពលរដ្ឋរងការខូចខាតដោយសារខ្យល់កន្ត្រាក់ ស្រុកពេជ្រាដា ខេត្តមណ្ឌលគិរី នាដើមខែកក្កដា ឆ្នាំ២០២១។ (អគ្គស្នងការដ្ឋាននគរបាលជាតិ)
មនុស្សយ៉ាងហោចណាស់៤នាក់បានស្លាប់និង៤នាក់ទៀតរងរបួស ព្រមទាំងទ្រព្យសម្បត្តិជាច្រើនទៀតបានរងការខូចខាត ដោយសារហេតុការណ៍គ្រោះធម្មជាតិរន្ទះបាញ់និងខ្យល់កន្ត្រាក់ ត្រឹមរយៈពេល២០ថ្ងៃនៃខែកក្កដានេះ។
យោងតាមការផ្សព្វផ្សាយរបស់គណៈកម្មាធិការជាតិគ្រប់គ្រងគ្រោះមហន្តរាយ (គ.ជ.គ.ម) នៅរសៀលថ្ងៃទី២០ ខែកក្កដា ឆ្នាំ២០២១ ឱ្យដឹងថា ក្នុងរយៈពេលត្រឹម២០ថ្ងៃកន្លងទៅនេះ បាតុភូតខ្យល់កន្ត្រាក់បានកើតឡើងចំនួន២២លើក ក្នុង១៤រាជធានី-ខេត្ត បណ្តាលឱ្យរលំនិងខូចខាតផ្ទះធ្ងន់ធ្ងរចំនួន១៤៣ខ្នង និងខូចខាតមធ្យម១ ១៩៨ខ្នង ព្រមទាំងរបួសមនុស្ស៣នាក់ ខណៈបាតុភូតរន្ទះបាញ់បានស្លាប់មនុស្ស៤នាក់និងរបួសម្នាក់។
របាយការណ៍បន្តថា នៅក្នុងខែកក្កដានេះ កម្ពុជារងនូវឥទ្ធិពលព្យុះក្នុងតំបន់ និងប្រព័ន្ធសម្ពាធទាប ដែលបានកើតឡើងជាបន្តបន្ទាប់ បង្កឱ្យមានភ្លៀងធ្លាក់ពីកម្រិតមធ្យមទៅច្រើន រាយប៉ាយក្នុងក្របខណ្ឌទូទាំងប្រទេស លាយឡំនឹងផ្គរ រន្ទះ និងខ្យល់កន្ត្រាក់បក់ខ្លាំងដោយកន្លែង។
ប្រភពដដែលបានស្រង់ប្រសាសន៍ប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ លោក គន់ គីម ដោយលោកបានអំពាវនាវដល់សាធារណជន ជាពិសេសប្រជានេសាទ ឱ្យមានការប្រុងប្រយ័ត្នខ្ពស់ចំពោះគ្រោះថ្នាក់ដែលអាចកើតឡើងជាយថាហេតុបង្កឡើងដោយបាតុភូតធម្មជាតិនេះ។
លោកបន្តអំពាវនាវដល់សាធារណជនថា៖ «សូមចូលរួមចុះឈ្មោះប្រើប្រាស់ប្រព័ន្ធ ១២៩៤ ដែលជាប្រព័ន្ធផ្តល់ដំណឹងជាមុន តាមរយៈសារជាសំឡេងតាមទូរសព្ទ ដើម្បីទទួលបាននូវដំណឹងទាន់ហេតុការណ៍អំពីគ្រោះមហន្តរាយ ព្រមទាំងតាមដានជាប្រចាំនូវសេចក្តីជូនដំណឹងរបស់ក្រសួងជំនាញ និងប្រព័ន្ធផ្សព្វផ្សាយរបស់គណៈកម្មាធិការជាតិគ្រប់គ្រងគ្រោះមហន្តរាយ ដើម្បីត្រៀមលក្ខណៈជាមុន ក្នុងករណីមានគ្រោះមហន្តរាយណាមួយកើតឡើងជាយថាហេតុ»។
ចំណែកក្រសួងធនធានទឹក និងឧតុនិយម កាលពីថ្ងៃម្សិលមិញ បានព្យាករថា ចាប់ពីថ្ងៃទី២១ដល់២២ ខែកក្កដា កម្ពុជានឹងទទួលនូវឥទ្ធិពលពីមូសុងនិរតីខ្លាំង និងប្រព័ន្ធសម្ពាធទាប ភ្ជាប់នឹងព្យុះលើកទី៧ សេមប៉ាកា (CEMPAKA) ហើយពីថ្ងៃទី២៣ដល់២៧ ខែកក្កដា ទទួលឥទ្ធិពលពីមូសុងនិរតីកម្រិតខ្លាំង ជ្រលងសម្ពាធទាបពីប្រទេសចិន និងប្រព័ន្ធសម្ពាធទាប។
ក្រសួងដដែលបន្តថា ស្ថានភាពអាកាសធាតុនេះនឹងធ្វើឱ្យបណ្តាខេត្តនៅតំបន់វាលទំនាបកណ្តាល និងបណ្តាខេត្តជាប់ជួរភ្នំដងរែកនិងខ្ពង់រាបឦសាន អាចនឹងមានភ្លៀងធ្លាក់ពីមធ្យមទៅច្រើន លាយឡំនឹងផ្គរ រន្ទះ និងខ្យល់កន្ត្រាក់ក្នុងល្បឿនខ្លាំង ពិសេសនៅតាមតំបន់ជួរភ្នំក្រវាញ ជួរភ្នំដងរែក និងបណ្តាខេត្តស្ថិតនៅតាមដងទន្លេមេគង្គ។ ដោយឡែក នៅតំបន់មាត់សមុទ្រវិញ ក្រសួងថា អាចនឹងមានជំនន់ទឹកភ្លៀងដែលបណ្តាលមកពីភ្លៀងធ្លាក់ពីកម្រិតបង្គួរទៅច្រើន ផ្គររន្ទះបង្គួរ លាយឡំនឹងខ្យល់កន្ត្រាក់ក្នុងល្បឿនខ្លាំង និងរលកសមុទ្រខ្ពស់៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។