កូវីដ-១៩ | ព័ត៌មានជាតិ | សន្តិសុខ | សុខភាព
លោក ណាត សុភាព | ២៩ កក្កដា ២០២១ |ម៉ោង ១៦:៣០
VOD
ជនជាតិចិនជាង៣០នាក់លួចឆ្លងដែនដោយខុសច្បាប់ចូលមកប្រទេសកម្ពុជា ត្រូវកម្លាំងល្បាតរបស់អង្គភាពបង្ក្រាបបទល្មើសលើផ្ទៃសមុទ្រ នៃនាយកដ្ឋាននគរបាលការពារព្រំដែនទឹក សហការជាមួយសមត្ថកិច្ចេពាក់ព័ន្ធបង្ក្រាបបាននៅវេលាម៉ោង២១និង៣០យប់ ថ្ងៃទី២៤ ខែកក្កដា ឆ្នាំ២០២១ ក្នុងភូមិសាស្រ្តកោះរ៉ុងសន្លឹម ក្រុងកោះរ៉ុង ខេត្តព្រះសីហនុ។ (អគ្គស្នងការដ្ឋាននគរបាលជាតិ)
អាជ្ញាធរកម្ពុជានៅទាន់មានវិធានការច្បាប់ទៅលើ ជនជាតិចិនជាង៣០នាក់ដែលលួចឆ្លងចូលដែនសមុទ្រកម្ពុជាក្នុងខេត្តព្រះសីហនុ នៅឡើយទេ ដោយសារមន្ត្រីជំនាញបានរកឃើញជនជាតិចិន៤នាក់ក្នុងចំណោមពួកគេទាំងនោះ មានផ្ទុកវីរុសកូវីដ-១៩ និងមួយចំនួនទៀតត្រូវដាក់ឱ្យធ្វើចត្តាឡីស័ក។
អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន ប្រាប់ វីអូឌី នៅថ្ងៃទី២៩ ខែកក្កដានេះថា កម្លាំងល្បាតរបស់អង្គភាពបង្ក្រាបបទល្មើសលើផ្ទៃសមុទ្រ បានឃាត់កប៉ាល់មួយគ្រឿងឈ្មោះ តុងហាយ (Tong Hay) ដែលមានជនជាតិចិន៣៦នាក់និងខ្មែរ២នាក់ ធ្វើដំណើរមកពីកំពង់ផែហ៊្វូអាន (Fou An) ខេត្តហ៊្វូចៀន (Fou Chean) ប្រទេសចិន ហើយចូលក្នុងភូមិសាស្ត្រកោះរ៉ុងសន្លឹម ក្រុងកោះរ៉ុង ខេត្តព្រះសីហនុ កាលពីថ្ងៃទី២៤ ខែកក្កដា។
អ្នកនាំពាក្យរូបនោះបញ្ជាក់ថា ក្រោយពីឃាត់ខ្លួន អគ្គស្នងការដ្ឋាននគរបាលជាតិ សហការជាមួយក្រុមការងារជំនាញ ចាត់ឱ្យក្រុមគ្រូពេទ្យយកសំណាកជនជាតិចិនទាំង៣៦នាក់ ដោយក្នុងនោះរកឃើញ៤នាក់វិជ្ជមានកូវីដ-១៩ ត្រូវបានដាក់ឱ្យព្យាបាល និងជាង៣០នាក់ទៀតដែលអវិជ្ជមាន ត្រូវដាក់ឱ្យធ្វើចត្តាឡីស័កនៅលើកប៉ាល់នោះតែម្តង។
បើតាមអ្នកនាំពាក្យរូបនេះ សមត្ថកិច្ចកម្ពុជានៅមិនទាន់អនុវត្តច្បាប់លើពួកគេនៅឡើយដែរ។
លោកមានប្រសាសន៍ថា៖ «គេអត់ទាន់ប្រគល់ដល់ដៃអន្តោប្រវេសន៍ទេ នៅលើកប៉ាល់នៅឡើយ! ដោយសារមើលឃើញកូវីដ-១៩ ដែលក្នុងចំណោមហ្នឹងមាន៤នាក់មានវិជ្ជមានកូវីដ-១៩ យើងធ្វើចត្តាឡីស័កនៅលើកប៉ាល់ហ្នឹងសិន។ ឥលូវរឿងមិនទាន់នៅក្នុងដៃ ខ្ញុំនិយាយអត់ទាន់កើតទេ»។
វីអូឌី មិនអាចសុំការបំភ្លឺបន្ថែមពីអ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានទេ នៅថ្ងៃព្រហស្បតិ៍នេះ។
មន្ត្រីសម្របសម្រួលសមាគមអាដហុកប្រចាំខេត្តព្រះសីហនុ អ្នកស្រី ជៀប សុធារី ជំរុញទៅរដ្ឋាភិបាលពង្រឹងការអនុវត្តច្បាប់លើជនជាតិចិនទាំងនោះ និងមន្ត្រីនៅតាមព្រំដែនដែលបណ្តែតបណ្តោយឱ្យមានអំពើល្មើសបែបនេះកើតឡើងលើដែនសមុទ្រកម្ពុជា ដើម្បីកុំឱ្យមានការរិះគន់ពីប្រទេសជិតខាង។
លោកស្រីជំរុញដូច្នេះថា៖ «ត្រូវតែអនុវត្ត [ច្បាប់] មិនត្រឹមត្រែអនុវត្តឱ្យបានម៉ត់ចត់ ឱ្យមានប្រសិទ្ធភាពទេ ហើយវាជាការលើកទឹកចិត្តដល់សមត្ថកិច្ចដែលគាត់ខិតខំប្រឹងប្រែង [ចាប់ខ្លួនជនជាតិចិន]។ ហើយគួរតែមានដាក់ទោសពិន័យ [សមត្ថកិច្ចយាមនៅសមុទ្រ] ដែរ ដើម្បីពង្រឹងការអនុវត្តច្បាប់ និងជាការព្រមានអ្នកផ្សេងទៀតដែលរំលោភទៅលើច្បាប់ដែលប្រទេសកម្ពុជាកំពុងតែអនុវត្តប្រើប្រាស់ ដើម្បីធ្វើឱ្យប្រទេសជិតខាងឬប្រទេសផ្សេងទៀតលើពិភពលោក កុំឱ្យគេប្រមាថមើលងាយកម្ពុជាដែរ»។
ក្នុងលិខិតរបស់អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ កាលពីថ្ងៃ១៥ ខែមិថុនា ឆ្នាំ២០២១ បានឱ្យដឹងថា ចាប់ពីឆ្នាំ២០១៤ រហូតដល់ត្រឹម៥ខែ ក្នុងឆ្នាំ២០២១នេះ អគ្គនាយកដ្ឋានអន្តោប្រវេសន៍បានបណ្តេញជនបរទេសខុសច្បាប់ចេញពីប្រទេសកម្ពុជា សរុបចំនួន១៨ ៤៧០នាក់ ស្មើនឹង១០៤សញ្ជាតិ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។