កម្ពុជា​រក​ឃើញ​អ្នក​ឆ្លង​ជំងឺ​កូវីដ១៩ អូមីក្រុង​​ក្នុង​សហគមន៍​ជា​លើក​ដំបូង

ដោយ សេក បណ្ឌិត
2022-01-09
RFA

កម្ពុជា​រក​ឃើញ​អ្នក​ឆ្លង​ជំងឺ​កូវីដ១៩ អូមីក្រុង​​ក្នុង​សហគមន៍​ជា​លើក​ដំបូង

រូបសញ្ញា​កូវីដ១៩។ Photo Courtesy


ក្រសួង​សុខាភិបាល​កម្ពុជា​រក​​ឃើញ​អ្នក​ឆ្លង​ជំងឺ​កូវីដ១៩ (Covid19) ប្រភេទ​ឈ្មោះ​អូមីក្រុង (Omicron) ក្នុង​សហគមន៍​​ជា​លើក​ដំបូង​ នៅ​ថ្ងៃ​ទី៨ មករា ២០២២​នេះ។ ខណៈ​​ករណី​នាំ​ចូល​ពី​ក្រៅ​ប្រទេស​​មាន ចំនួន ៣០​​នាក់​ថែម​ទៀត​នៅ​ថ្ងៃ​ទី៩ មករា។

សេចក្ដី​ប្រកាស​របស់​អ្នកនាំពាក្យ​ក្រសួង​សុខាភិបាល​កម្ពុជា​អ្នកស្រី ឱ វណ្ណឌីន នៅ​យប់​ថ្ងៃ​ទី៨ មករា ថា ករណី​​ប្រភេទ​ថ្មី​អូមី​ក្រុង​នេះ កម្ពុជា​រក​ឃើញ​លើ​បុរស​​ខ្មែរ​​អាយុ ២៣​ឆ្នាំ រស់​នៅ​សង្កាត់​ទួលសង្កែ ខណ្ឌ​ឫស្សីកែវ រាជធានី​ភ្នំពេញ។ បុរស​នោះ​បាន​ទៅ​កំដរ​អ្នក​ជំងឺ​ដែល​ជា​បងប្អូន​ជីដូន​មួយ នៅ​មន្ទីរពេទ្យ​មួយ នា​រាជធានី​ភ្នំពេញ ហើយ​មន្ទីរពេទ្យ​នោះ បាន​យក​វត្ថុ​សំណាក​របស់​គាត់​ទៅ​ពិនិត្យ​នៅ​មន្ទីរពិសោធន៍ ឃើញ​វិជ្ជមាន​អូមីក្រុង។ ក្រោយ​តេស្ដ​វិជ្ជមាន​ ក្រសួង​បាន​បញ្ជូន​​បុរស​រូប​នោះ​ដាក់​ឱ្យ​សម្រាក​ព្យាបាល​នៅ​មណ្ឌល​ព្យាបាល​អូឡាំពិក។

ក្រសួង​អះអាង​ថា បុរស​នោះ​បាន​ធ្វើ​ដំណើរ​ជា​ច្រើន​កន្លែង នៅ​រាជធានី​ភ្នំពេញ ខេត្ត​កំពង់ធំ សៀមរាប និង​ខេត្ត​កំពត។ បុរស​នេះ​បាន​ធ្វើ​ដំណើរ​ជាមួយ​បងប្អូន​ជីដូន​មួយ​មក​ពី​ប្រទេស​អូស្ត្រាលី ដែល​ចូល​មក​រាជធានី​ភ្នំពេញ កាល​ពី​ថ្ងៃ​ទី២៧ ធ្នូ ២០២១ ហើយ​ថ្ងៃ​ទី៥ មករា បុរស​រូប​នោះ​ត្រូវ​បាន​រក​ឃើញ​វិជ្ជមាន​កូវីដ១៩ ​ប្រភេទ​ថ្មី អូមីក្រុង។

ប៉ុន្តែ ក្រសួង​សុខាភិបាល​នៅ​មិន​ទាន់​បង្ហាញ​ពី​ទីតាំង​លម្អិត​ដែល​បុរស​រូប​នោះ ធ្វើ​ដំណើរ​ក្នុង​រយៈពេល ១​សប្ដាហ៍​ចុងក្រោយ​នោះ​ទេ។

គិត​ត្រឹម​​ថ្ងៃ​អាទិត្យ ទី៩ ខែ​មករា ក្រសួង​សុខាភិបាល​រក​ឃើញ​អ្នក​ឆ្លង​ជំងឺ​កូវីដ (Covid-19) ប្រភេទ​ថ្មី ឬ​អូមីក្រុង (Omicron) ចំនួន ៣០​នាក់​ថ្មី​ទៀត ដែល​ជា​ករណី​នាំ​ចូល​ពី​ក្រៅ​ប្រទេស​ទាំង​អស់ ធ្វើ​​​​​​ឱ្យ​អ្នក​ឆ្លង​សរុប​កើន​ដល់ ១២០.៦២១​នាក់។ ចំណែក​អ្នក​ជា​សះស្បើយ​វិញ មាន​ចំនួន​សរុប ១១៧.០១៤នាក់។ ដោយឡែក​នៅ​ថ្ងៃ​នេះ មិន​មាន​អ្នក​ស្លាប់​ថ្មី​ទេ ដែល​ធ្វើ​ឱ្យ​តួលេខ​អ្នក​ស្លាប់​សរុប​នៅ​ត្រឹម ៣.០១៥​នាក់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

What Next?

Recent Articles