នយោបាយ, ព័ត៌មានជាតិ
លោក សេង ថៃ | ១៨ មករា ២០២២ | ម៉ោង ១១:៤៥
VOD

លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើរមុខលោក ទៀ បាញ់ រដ្ឋមន្ត្រីក្រសួងការពារជាតិ ក្នុងអំឡុងពេលពិធីបើកសម្ពោធវិមាន ឈ្នះ-ឈ្នះ នៅភូមិព្រែកតាសោម នៅជាយក្រុងភ្នំពេញ ប្រទេសកម្ពុជា កាលពីថ្ងៃសៅរ៍ ទី29 ខែធ្នូ ឆ្នាំ2018 ។ (ក្រសួងការពារជាតិ)

រដ្ឋាភិបាលកម្ពុជាបានសម្រេចដាក់បញ្ចូលថ្ងៃទី២៩ ខែធ្នូ ជា «ទិវានយោបាយឈ្នះ ឈ្នះ» ទៅក្នុងប្រតិទិនប្រចាំឆ្នាំរបស់កម្ពុជា ចាប់ពីឆ្នាំ២០២២នេះតទៅ តែមិនអនុញ្ញាតឱ្យឈប់សម្រាកនោះទេ។

យោងតាមសារាចរណែនាំរបស់រដ្ឋាភិបាលកម្ពុជាចុះថ្ងៃទី១៤ ខែមករា ប៉ុន្តែទើបផ្សព្វផ្សាយនៅថ្ងៃទី១៨ ខែមករានេះថា រដ្ឋាភិបាល​បានណែនាំឱ្យគ្រប់ក្រសួង ស្ថាប័ន រាជធានី-ខេត្ត និងគ្រឹះស្ថានសាធារណៈឯកជនទាំងអស់ ត្រូវកំណត់យកទិវា «នយោបាយឈ្នះ ឈ្នះ» ថ្ងៃទី២៩ ខែធ្នូ ទៅក្នុងប្រតិទិនប្រចាំឆ្នាំ ដោយមិនឈប់សម្រាក ចាប់ពីឆ្នាំ២០២២នេះតទៅ។​

សារាចរណែនាំក៏បានបង្គាប់ឱ្យគ្រប់ក្រសួង ស្ថាប័ន រាជធានី-ខេត្តទាំងនោះ ត្រូវរៀបចំចងបដា ពាក្យស្លោក ដើម្បីអបអរសាទរទិវានយោបាយឈ្នះឈ្នះនេះ ដែលមានខ្លឹមសារថា «អរគុណសន្តិភាព! អរគុណនយោបាយឈ្នះ ឈ្នះ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករនយោបាយឈ្នះឈ្នះ ដែលនាំមកនូវសន្តិភាព និងការឯកភាពជាតិពេញលេញ!» ជាដើម។

បើតាមសារាចររដ្ឋាភិបាលដដែល​បញ្ជាក់ថា ការកំណត់យកទិវា «នយោបាយឈ្នះ ឈ្នះ» ទៅក្នុងប្រតិទិនប្រចាំឆ្នាំនេះ គឺជាការដឹងគុណ កតញ្ញូ និងការចងចាំចំពោះគុណបំណាច់របស់រដ្ឋាភិបាលដែលបានបញ្ចប់សង្គ្រាមនៅកម្ពុជាទាំងស្រុង នៅថ្ងៃទី២៩ ខែធ្នូ ឆ្នាំ១៩៩៨។

សារាចរណែនាំរបស់រដ្ឋាភិបាលបានសរសេរថា៖ «អស់រយៈពេល២៣ឆ្នាំកន្លងមកហើយ ដែលកម្ពុជាបានកំណត់យកថ្ងៃទី២៩ ខែធ្នូ ឆ្នាំ១៩៩៨ ជាការបញ្ចប់សង្គ្រាមស៊ីវិលទាំង​ស្រុង​ ដោយមិនមានការបង្ហូរឈាម និងទទួលបានសន្តិភាពពេញលេញ។ តាមរយៈនយោបាយឈ្នះឈ្នះ ជាគោលនយោបាយដ៏ធំមួយក្នុងការដឹកនាំប្រទេសកម្ពុជា បន្ទាប់ពីឆ្លងកាត់នូវដំណាក់កាលសង្គ្រាម ដំណាក់កាលនៃរបបប្រល័យពូជសាសន៍ ប៉ុល ពត ដំណាក់សង្គ្រាមផង និងចរចាផង រហូតដល់ការលេចឡើងនៃវត្តមានរបស់នយោបាយឈ្នះ ឈ្នះ»។

សារាចរណែនាំរបស់រដ្ឋាភិបាលនេះបានធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានស្នើកាលពីថ្ងៃទី២៩ ខែធ្នូ ឆ្នាំ២០២១ ឱ្យដាក់បញ្ចូលទិវានយោបាយឈ្នះឈ្នះនេះ នៅក្នុងប្រតិទិនចាប់ពីឆ្នាំ២០២២ ដោយមិនឈប់សម្រាក។ បើតាមលោក ហ៊ុន សែន ការដាក់បញ្ចូលទិវានយោបាយឈ្នះឈ្នះទៅក្នុងប្រតិទិន គឺសម្រាប់អបអរជ័យជម្នះដែលកម្ពុជាបានបិទបញ្ចប់សង្គ្រាមទាំងស្រុង ហើយបន្តការអភិវឌ្ឍដល់ពេលបច្ចុប្បន្ន​៕

នយោបាយឈ្នះៗ, ហ៊ុន សែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។