កម្ពុជា-សង្គម
27/11/2022 – 07:39
ដោយ៖ ហុង សេរីហ្វុង
RFI

ការចាប់ខ្លួន កញ្ញា ឈឹម ស៊ីថរ នៅអាកាសយានដ្ឋានភ្នំពេញ © Twitter Phil Robertson

មន្ត្រី​ជាន់​ខ្ពស់​នៃ​អង្គការ​ឃ្លាំមើល​សិទ្ធិ​មនុស្ស​ (Human Rights Watch) នៅ​ថ្ងៃ​ទី២៧ ​វិច្ឆិកា​នេះ ​បាន​ទាម​ទារ​ឲ្យ​ដោះ​លែង​កញ្ញា​ ឈឹម ស៊ីថរ​ជា​បន្ទាន់​ និង​ដោយ​ឥត​លក្ខខណ្ឌ ​បន្ទាប់​ពី​ប្រធាន​សហជីព​រូប​នេះ​ត្រូវ​បាន​ចាប់​ខ្លួន​នៅ​អាកាសយានដ្ឋាន​កាល​ពី​ម្សិល​មិញ។​ សង្គម​ស៊ីវិល​ថា​ ការ​ចាប់​ខ្លួន​នេះ​ជា​ការ​បំភិត​បំភ័យ​លើ​មេ​ដឹកនាំ​សហជីព​ និង​អតីត​បុគ្គលិក​ណាហ្គាវើលដ៍​ ដែល​កំពុង​ធ្វើ​កូដកម្ម។

លោក Phil Robertson នាយករងប្រចាំ​តំបន់​អាស៊ីនៃអង្គការឃ្លាំមើលសិទិ្ធមនុស្សបានទាមទារឱ្យដោះលែង កញ្ញា ឈឹម ស៊ីថរ ជាបន្ទាន់ និងដោយឥតលក្ខខណ្ឌ ព្រមទាំងអំពាវនាវឱ្យកម្ពុជា បញ្ឈប់ការបង្រ្កាបលើសហជីពឯករាជ្យ។ នេះបើតាមគណនី Twitter ផ្លូវការរបស់លោក Phil Robertson។

ការទាមទាររបស់អង្គការឃ្លាំមើលសិទ្ធិមនុស្សអន្តរជាតិនេះ ធ្វើឡើងក្រោយពីមានការចាប់ខ្លួន កញ្ញា ឈឹម ស៊ីថរ ដែលជាប្រធានសហជីព​ទ្រទ្រង់សិទ្ធិការងារបុគ្គលិក-កម្មករខ្មែរនៃក្រុម​ហ៊ុនណាហ្គាវើលដ៍ កាលពីថ្ងៃទី២៦ វិច្ឆិកា។ បើតាមអង្គការលីកាដូ ប្រធានសហជីពរូបនេះ ​ត្រូវ​បាន​ឃាត់ខ្លួន​ ​និង​សាកសួរ​ដោយ​នគរបាល​អន្តោប្រវេសន៍​ ​នៅ​ក្នុង​អាកាសយាន្តដ្ឋាន​អន្តរជាតិ​ភ្នំពេញ​ ​ក្រោយ​ពី​បាន​វិលត្រឡប់ពីប្រទេសអូស្ត្រាលី ​មកដល់​​កម្ពុជា​។ ក្នុងថ្ងៃតែមួយ កញ្ញា​ត្រូវបានប៉ូលីសបញ្ជូនទៅសាលាដំបូង និងពន្ធធានាគារព្រៃស។

បើតាមអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានឱ្យដឹងថា ​ការចាប់ខ្លួន កញ្ញា ឈឹម ស៊ីថរ គឺដោយសារកញ្ញាមិនគោរពតាមដីការរបស់តុលាការដែលដាក់ក្រោមការត្រួតពិនិត្យរបស់តុលាការ និងហាមការចេញក្រៅប្រទេស។

លោក អំ សំអាត នាយក​ទទួល​បន្ទុក​កិច្ចការ​ទូទៅ​នៃ​អង្គការ​លីកាដូ (Licadho) បានថ្លែងប្រាប់វិទ្យុបារាំងអន្តរជាតិ RFI ថា ការចាប់ខ្លួន កញ្ញា ឈឹម ស៊ីថរ នេះហាក់ដូចជាការគំរាមកំហែង និងបំភិតបំភ័យបន្ថែមទៀតទៅលើមេដឹកនាំសហជីពណាហ្គាវើលដ៍។ លោកបន្ថែមថា ការចាប់ខ្លួននេះក៏បានគំរាមកំហែងដល់បុគ្គលិក និងអតីតបុគ្គលិកណាហ្គាវើលដ៍ដែលកំពុងធ្វើកូដកម្មទាមទារដំណោះស្រាយវិវាទការងារ។

លោក អំ សំអាត យល់ថាការចាប់ខ្លួន និងការចោទប្រកាន់ផ្សេងៗ មិនឆ្លើយតបនឹងវិវាទការងារទេ ផ្ទុយទៅវិញអាជ្ញាធរពាក់ព័ន្ធគួរបញ្ចប់វិវាទការងារណាហ្គាវើលដ៍ឱ្យបានឆាប់ទើបជារឿងត្រឹមត្រូវ។

បើតាម លោក អំ សំអាត អង្គការលីកាដូ នឹងបញ្ជូនមេធាវីរបស់ខ្លួនឱ្យទៅការពារក្ដីឱ្យ កញ្ញា ឈឹម ស៊ីថរ នៅថ្ងៃចន្ទសប្ដាហ៍ក្រោយ។

គួរជម្រាបជូនថា កញ្ញា​ ឈឹម ​ស៊ី​ធ​រ​ ​​ត្រូវ​បាន​ចោទប្រកាន់​ពី​បទ​ញុះញង់​ កាលពី​ខែ​មករា​ ​ឆ្នាំ​២​០​២​២​ បន្ទាប់ពីសហជីព​កញ្ញា​ចាប់ផ្ដើម​ធ្វើ​កូដកម្ម​ទាមទារឲ្យមានដំណោះស្រាយចំពោះវិវាទការងារនៅណាហ្គា។​ ​កញ្ញា​ត្រូវ​បាន​ចាប់ខ្លួន​ ​អំឡុង​ពេល​ព្យាយាម​ចូលរួម​ធ្វើ​កូដកម្ម​ជាមួយ​កូដករ​ផ្សេងទៀត​ និង​ត្រូវ​បាន​ជាប់ឃុំ​បណ្ដោះអាសន្ន​ក្នុង​ពន្ធ​នាគា​រ​អស់​រយៈពេល​២​ខែ​ រួចត្រូវបាន​ដោះលែង​ឱ្យ​នៅ​ក្រៅ​ឃុំ​វិញ​ ​កាលពី​ខែ​មីនា​ ​ឆ្នាំនេះ​​។ នេះបើតាមអង្គការលីកាដូ៕